A kuhlambanya ku tlhamuselwa kota “magezu ya lisine kutani citsumbiso ca ku maha zvokari a kutala ka zvikhati ku kumbukiwa Nungungulu . . . kota kustumunyu.” Ku ngaya hi ku wuliwa kutani kuya hi ku tsaliwa.

A vokari kuzvilava va nga alakanya lezvaku zvi bihile a ku hlambanya hakuva Jesu i te: “Mu nga tshuki mu hlambanya . . . “A ‘Ina’ wa wena i wave ina, ni ‘Ahihi’ ava ahihi, hakuva ni cihi co hundza lezvi cita hi ka loyi wa kubiha.” (Mat. 5:33-37) Kunene, Jesu i wa zvi tiva lezvaku a Nayo wa Mosi wu wa lava lezvaku a vaIzrayeli va hlambanya ka zviyimo zvo kari niku a malandza yo tsumbeka ya Nungungulu ma wa hlambanya. (Gen. 14:22, 23; Ekso. 22:10, 11) I wa zvi tiva kambe lezvaku Jehovha wutsumbu i wa hlambanyile ka zviyimo zvo kari. (Mah. 6:13-17) Hikwalaho, Jesu i wa nga wuli lezvaku a hi faneli ku tshuka hi hlambanya. Wutshan’wini ga lezvo, Jesu i wo tlharihisa vanhu lezvaku va nga hlambanyi ka zvilo zvo kala hloko kutani zvo kala zvi nga hi zva lisima. Contlhe cikhati hi fanele ku maha lezvi hi nga tsumbisa hakuva hi zvalezvi Jehovha a lavako lezvaku hi maha.

Hambulezvo, zvini u faneleko ku maha loku u kombeliwa lezvaku u hlambanya? Co sangula, tiyiseka lezvaku u ta zvi kota ku maha lezvi u lavako ku hlambanya. Loku u nga tiyiseki i chukwana u nga hlambanyi. A Mhaka ya Nungungulu ya hi tlharihisa yiku: ‘I chukwana lezvaku u nga fungi, ku hundza ku maha cifungo u nga ci tatisi.’ (Mutsh. 5:5) Hi ku landzela, ehleketa hi matshinya ya milayo lawa ma yelanako ni kuhlambanya loku u lavako ku maha, u gumesa u maha ciboho hi kuya hi livhalo la wena li gondzisilweko khwatsi. Hi wahi a matshinya yo kari ya Bhibhiliya?

A kuhlambanya ko kari ka yelana ni kurandza ka Nungungulu. Hi cikombiso, a Vakustumunyu va Jehovha va maha zvifungo a cikhati leci va chadhako. A zvifungo lezvo ku hlambanya ko kari. Mahlweni ka Nungungulu ni vakustumunyu, a noivho ni noivha va tsumbisana ku va ta randzana, va khatalelana, ni ku kombisana cichavo ka ‘contlhe cikhati leci va to hanya zvin’we laha misaveni’. (A van’wani kuzvilava va nga tshuka va nga wuli a magezu lawa a cikhati va chadhako, kanilezvi va maha zvifungo mahlweni ka Nungungulu.) Vava nuna ni sati niku va fanele ku simama zvin’we wutomini gabye gontlhe. (Gen. 2:24; 1 Kor. 7:39) A cifungo ca wukati ci nene niku ca yelana ni kurandza ka Nungungulu.

A kuhlambanya ko kari a ku yelani ni kurandza ka Nungungulu. A maKristu ya lisine a ma faneli ku hlambanya ka timhaka to kota ku yimela tiko hi ku tirisa zvibhamu kutani ku hlambanya ku tsika ku tirela Nungungulu. A ku maha lezvo zvi wa ta tshova milayo ya Nungungulu. A maKristu a ma faneli kuva ya “tiko” hikwalaho, a ma ti ngheniseli  ka timhaka ni tiyimpi ta tiko. — Joh. 15:19; Isa. 2:4; Jak. 1:27.

A kuhlambanya ko kari ku yelana ni livhalo. Ka zvikhati zvin’wani, zvi nga lava ku kambisisa khwatsi hi ku hlambanya loku hi lavako ku maha na hi zvi zwananisa ni wusungukati ga Jesu gaku “tlhelisani ka Khezari lezvi zvi nga zva Khezari, ni ka Nungungulu lezvi zvi nga zva Nungungulu.” — Luka 20:25.

Hi cikombiso, a hi nga zvi veki laha ka ku a muKristu i lava ku ti tsalelisa kota cisumbulwa ca tiko go kari, kutani ku i lava ku teka passaporte, a gumesa a tiva ku zvi lava ku a hlambanya ku seketela tiko lego. Loku ku hi ku ka tiko lego, a kuhlambanya loko ku patsa ku maha zvilo zvi lwisanako ni milayo ya Nungungulu, a livhalo lakwe li gondzisilweko hi Bhibhiliya li wa nga ta mu vhumelela a ku a hlambanya. Hambulezvo, a mufumo wu nga mu vhumelela ku a cicanyana a magezu ya kuhlambanya loko kasi ku ti zwananisa ni livhalo lakwe.

A kuhlambanya hi magezu ma cicilweko kutsongwani zvi fanele ku yelana ni tshinya ga nayo gi nga ka Va Le Roma 13:1, gi nge ngalo: “A mun’we ni mun’wani i wa ingise mufumo”. Hikwalaho, a muKristu i fanele ku hlola lezvaku a kuhlambanya loko ku nga ta mu kurumeta ku tsika ku maha zvilo lezvi Nungungulu a nge a maKristu ma fanele ku maha ke.

Zva lisima kambe a ku ingisa a livhalo la wena li gondzisilweko loku u kombeliwa lezvaku u khoma nchumu wo kari kutani ku maha jesto yo kari a cikhati u hlambanyako. A vaRoma ni vaSkite va cikhatini ca kale, va wa hlambanya hi zvipadha zvabye niku lezvo zvi wa wula ku va tirisa a cifananiso ca nungungulu wa yimpi kota citiyisekiso ca ku a munhu loye i ta tsumbeka. A vaGreki va wa tlakusa woko gi ya tilweni a cikhati va nga hlambanya. Hi ku maha lezvo, va wa komba lezvaku va zvi zwisisa ku le tilweni ku na ni Nungungulu a zwako lezvi zvi wuliwako ni ku wona lezvi zvi mahiwako, loyi a vanhu vontlhe va to ti hlamulela kakwe.

Kunene, a nandza ga Jehovha gi wa nga ta hlambanya mahlweni ka ni cihi cifananiso ca tiko ci yelanako ni wukhozeli ga mawunwa. Kanilezvi ahati loku lomu tribhunali u kombeliwa lezvaku u tlhateka woko hehla ka Bhibhiliya u hlambanya ku wula lisine? Ka ciyimo leco, u nga boha ku maha lezvo, kota lezvi a Mitsalo yi wulawulako hi vanhu vo tsumbeka lava va hlambanyileko na va tirisa majesto. (Gen. 24:2, 3, 9; 47:29-31) Zva lisima a ku alakanya lezvaku loku u maha lezvo, u hlambanya mahlweni ka Nungungulu lezvaku u ta wula lisine. U fanele ku ngha u longile ku wula lisine basi ka zvontlhe a zviwutiso va to ku maha.

Kota lezvi hi gi nyikako nguvhu lisima a wunghana ga hina na Jehovha, hi fanele ku khongela hi tlhela hi ehleketa khwatsi loku va hi kombela a ku hlambanya, hi tiyiseka lezvaku a kuhlambanya loko ku nga ta tshova a matshinya ya milayo ya Bhibhiliya kutani livhalo la hina. Loku u boha ku hlambanya u fanele ku tiyiseka lezvaku lezvi u lavako ku hlambanya u ta zvi maha. — 1 Ped. 2:12.