Ka ciyimo leco, a ka bandla a muchadho lowu wo sangula wu mbhelile niku lowu wa wuswa wa amukeleka hi kuya hi nayo wa tiko. Kasi ku zwisisa ku hikuyini hi chikelelako a magumo lawo, a hi kambisiseni lezvi Jesu a nga wula xungetano hi ku tlhatlha wukati ni ku chadha kambe.

Kota lezvi zvi tsalilweko ka Matewu 19:9, Jesu i kombile a cigelo cin’we basi ca ku tlhatlha wukati hi kuya hi Mitsalo. I te: “Ni wihi loyi a tsikako a sati wakwe ahandle ka wubhayi, a chadha ni mun’wani, wa maha wubhayi.” A ka magezu ya Jesu hi gondza zvilo zvimbiri: Co sangula, hi kuya hi Mitsalo a cigelo cin’we basi ca ku daya kutani ku tlhatlha wukati wubhayi. Ca wumbiri, a wanuna loyi a tsikako sati wakwe na ku nga cigelo ca Mitsalo, a gumesa a chadha ni mun’wani, wa maha wubhayi. *

Xana a magezu ya Jesu ma wula lezvaku a wanuna loyi a mahako wubhayi a tlhela a tlhatlha wukati, hi kuya hi Mitsalo i tlhatlhekile a ku tlhela a chadha kambe? Ahihi. Loku a nuna a maha wubhayi, a sati wakwe loyi a kalako a nga hi na nandzu, a nga boha ku i ta mu tsetselela a nuna wakwe kutani i ta mu tsika. Loku a boha ku nga mu tsetseleli, va tlhatlha wukati, hi wumbiri gabye va tlhatlhekile a ku tlhela va chadha kambe, andzhako ka loku zvontlhe zvi patsekako laha ka ku tlhatlha wukati zvi mbhelile.

Kanilezvi zva koteka ku ngha a sati wakwe a lava ku va simama zvin’we a tlhela a byela nuna wakwe lezvaku wa mu tsetselela. Hambulezvo, ahati loku a nuna wakwe loyi a mahileko wubhayi a ala ku tsetselelwa, a tlhatlha wukati? Kota lezvi ka ku a sati wakwe i wa ti yimisele ku mu tsetselela va tlhela va simama zvin’we, hi kuya hi Mitsalo a wanuna loye a nga tlhatlhekangi ku tlhela a chadha kambe. Loku a boha ku chadha ni mun’wani kuveni i wa nga tlhatlhekangi hi kuya hi Mitsalo, o maha wubhayi kambe. Mhakeni leyo, zvi wa ta lava ku a madhota ya bandla ma wumba yin’wani a kometi ya ku lamula kasi ku khatalela mhaka leyo. — 1 Kor. 5:1, 2; 6:9, 10.

Loku a wanuna a chadha kambe kuveni i wa nga tlhatlhekangi hi kuya hi Mitsalo, a bandla gi fanele ku wu wonisa kuyini a muchadho lowu wo sangula ni lowu wa wuswa? A ku a muchadho lowu wo sangula wa ha tira hi kuya hi Mitsalo? A ku zva ha koteka lezvaku a sati wakwe a mu tsetselela kutani ku mu tsika? Xana a muchadho lowu wa wuswa wu wa ta woniwa kota wubhayi?

A kale, hi wa zwisisa lezvaku loku a sati wakwe a ha hanya, na a nga se chadha kambe, kutani loku a nga mahangi wubhayi, a bandla gi wa wona a muchadho lowu wa wuswa kota wubhayi. Hambulezvo, Jesu a nga zangi a kumbuka loyi wo kala nandzu a cikhati nga wulawula hi ku tlhatlha wukati ni ku chadha kambe. Kanilezvi i no tlhamusela lezvaku a wanuna loyi a tsikako a sati wakwe a chadha ni mun’wani na ku nga hi na cigelo ca Mitsalo, wa maha wubhayi. Mhakeni leyi, a  ku tlhatlha wukati ni ku chadha kambe zvi daya a muchadho lowu wo sangula.

Loku a wanuna a tlhatlha wukati a tlhela a chadha kambe, a zva ha koteki lezvaku a sati wakwe, loyi a nga hiko na nandzu, a boha ku i ta mu tsetselela kutani i ta mu tsika. Hikwalaho, a zvi kali zvi lava ku a sati a karateka hi mhaka leyo. Ahandle ka lezvo, lezvi a bandla gi wu wonisako zvona a muchadho lowu wa wuswa a zviyi hiku a sati wakwe loyi a nga hiko na nandzu afa, ku chadha kambe kutani ku maha wubhayi. *

Ka cikombiso leci hi ci wonileko laha hehla, a nuna i no maha wubhayi, legi gi nga maha ku va tlhatlha wukati. Ahati loku ku hi ku a wununa a nga mahangi wubhayi kanilezvi a tlhatlha wukati a tlhela a chadha kambe. Ahati ke loku ku hi ku a wununa a nga mahangi wubhayi na a nga se tlhatlha wukati kanilezvi i mahile wubhayi andzhako ka ku ngha a tlhatlhile wukati, a gumesa a chadha ni mun’wani hambu lezvi a sati wakwe a nga ti yimisele ku mu tsetselela? Ka zvikombiso zvontlhe lezvi, a ku tlhatlha wukati ni ku chadha kambe, lezvi zvi nga wubhayi, zvi daya a muchadho lowu wo sangula. Hi kuya hi nayo wa tiko a muchadho lowu wa wuswa wa amukeleka. Kota lezvi zvi wulilweko ka A Sentinela ga 1 ka Fevereiro wa 1980, pajina 32, “makunu a wanuna loye i le ka muchadho wa wuswa, hikwalaho a zvi koteki lezvaku a ku halahala a daya muchadho lowo a tlhelela ka sati wakwe wa kale; a muchadho lowu wo sangula wu gumesile hi ku tlhatlhiwa ka wukati, wubhayi ni muchadho wuswa.”

A kuzwisisa loku ka kuswa a ku hunguli a kubasa ka wukati kutani ku maha lezvaku a wubhayi gi nga woniwi kota ciwonho ca hombe. A cikhati leci a wanuna a tlhatlhako wukati na ku nga hi na cigelo ca Mitsalo, a gumesa a chadha ni mun’wani kuveni i wa nga tlhatlhekangi ku maha lezvo hi kuya hi Mitsalo, a madhota ma fanele ku wumba kometi ya ku lamula hakuva i mahile wubhayi. (Loku a sati wakwe loyi wa muswa a hi muKristu, yenawu i fanele ku wumbelwa a kometi ya ku lamula hakuva i mahile wubhayi.) Hambu lezvi a muchadho lowo wu nga faneliko ku woniwa kota wubhayi, a wanuna loye i wa nga ta ringanelwa hi ku kuma malungelo lomu bandleni hi malembe yo tala, kutani ku kala loku a vamakabye lomu bandleni va tlhela va mu kombisa cichavo. Na a nga se nyikiwa malungelo lomu bandleni, a madhota ma fanele ku chela kota hi ciyimo ca sati wakwe wa kale, loyi a nga tsumbekangiko kakwe kuzvilava ni ca vana vakwe lava a va tsikileko. — Mala. 2:14-16.

Hi kota ya wuyelo go bava gi vangiwako hi ku tlhatlhiwa ka wukati ni ku chadha kambe, a maKristu ma kombisa wutlhari ma pimanyisa Jehovha ma tlhela ma wona wukati kota nchumu wo basa. — Mutsh. 5:4, 5; Mah. 13:4.