1. A vanhu va Jehovha va wa xaxametisilwe kuyini ka zana ga malembe go sangula?

 CONTLHE cikhati leci Jehovha a va nyikako a ntiro wo kari a vanhu vakwe, i rindzela lezvaku va wu maha hi ndlela yi xaxametilweko khwatsi. (1 Kor. 14:33) Hi cikombiso, kurandza ka Nungungulu lezvaku a mahungu ya manene ma chumayelwa misaveni yontlhe. (Mat. 24:14) Jehovha i yimisile Jesu kasi a rangela a ntiro lowo. Jesu i maha zvontlhe zvi kotekako kasi a ntiro lowo wu mahiwa hi ndlela yi xaxametilweko khwatsi. Ka zana ga malembe go sangula, laha ku nga kari ku vhululiwa mabandla ka matshamu yo hambanahambana, ku wa yimisiwa madhota kasi ku nyika zvileletelo ni ku rangela. (Miti. 14:23) Le Jerusalema, a hubye ya madhota, leyi yi nga wumbiwa hi vapostoli ni madhota, yi wa maha a zviboho zvo kari lezvi ku nga rindzelwa ku a mabandla wontlhe ma zvi ingisa. (Miti. 15:2; 16:4) Kota wuyelo ga ku ingisa a zvileletelo lezvi va nga nyikiwa, “a mabandla ma no simama ku tiya kukholweni ma tlhela ma kula siku ni siku”. — Miti. 16:5.

2. Kusukela hi 1919, Jehovha i va rangelisa kuyini ni ku va nyika zvakuga zva moya a vanhu vakwe?

² Ni nyamutlha, Jehovha wa ha simama ku xaxameta vanhu vakwe. Kusukela hi 1919, Jesu i kari a tirisa a ntlawa wutsongwani wa vavanuna vatotilweko kasi ku xaxameta a ntiro wa kuchumayela ni ku phamela zvakuga zva moya ka valandzeli vakwe. a (Luka 12:42) Zvi laha kubaseni ku Jehovha wa katekisa a ntiro wa ntlawa lowo. — Isa. 60:22; 65:13, 14.

3-4. a) Nyika cikombiso ci kombako lezvaku ha vhuneka hi lezvi hi xaxametilweko. b) Zvini hi to bhula hi zvona ka ndzima leyi?

 ³ Loku hi wa nga xaxametiwangi, na hi nga zvi koti a ku maha a ntiro lowu Jesu a hi nyikileko. (Mat. 28:19, 20) Hi cikombiso, hi nga alakanyela loku ku wa nga hi na kuavelwa a zvipandze zva kuchumayela ka zvona; a munhu ni munhu i wa ta chumayela ni kwihi a ku lavako. A zvipandze zvo kari zvi wa ta tiriwa makhati yo tala hi vahuweleli vo hambanahambana, kanilezvi a zvin’wani zvi nga tiriwi. Xana wa ehleketa hi ndlela yin’wani hi vhunekako hi yona hi lezvi hi xaxametilweko?

⁴ Lezvi Jesu a zvi mahileko a cikhati leci a nga hi laha misaveni zvi hi vekele cikombiso ca lezvi a simamako ku hi xaxametisa zvona nyamutlha. Ka ndzima leyi hi ta wona a cikombiso leci Jesu a hi vekeleko ni lezvi a hlengeletano ya hina yi ci landzelisako zvona a cikombiso leco. Hi ta tlhela hi wona lezvi hi kombisako zvona lezvi hi yi bongisako zvona a hlengeletano ya Jehovha.

A HLENGELETANO YA HINA YI LANDZELA A CIKOMBISO CA JESU

5. Hi yihi a yin’we ya tindlela hi landzelako hi yona a cikombiso ca Jesu? (Johani 8:28)

⁵ Jesu i gondzile ka Papayi wakwe wa le tilweni lezvi a nga mahako ni lezvi a nga wulako. Hi ku landzela a cikombiso ca Jesu, a hlengeletano ya Jehovha yi seketela ka Mhaka ya Nungungulu lezvi yi gondzisako ni wurangeli legi yi nyikako. (Lera Johani 8:28; 2 Tim. 3:16, 17) Ha alakanyisiwa hi kukhandzakanya lezvaku hi lera ni ku tirisa a Mhaka ya Nungungulu. Hi vhunekisa kuyini hi ku landzela wusungukati lego?

6. Hi vhunekisa kuyini hi ku gondza Bhibhiliya?

⁶ Ha vhuneka nguvhu a cikhati leci hi gondzako a Bhibhiliya hi ku vhuniwa hi mabhuku ya hina ya wuKristu. Hi cikombiso, ha zvi kota ku fananisa lezvi a Bhibhiliya gi zvi wulako ni wurangeli legi hi nyikiwako hi hlengeletano. A cikhati leci hi wonako lezvaku a wurangeli legi hi nyikiwako hi hlengeletano gi seketelwa ka Mitsalo, hi engetela lezvi hi yi tsumbisako zvona a hlengeletano ya Jehovha. — Rom. 12:2.

7. Mahungu muni lawa Jesu a chumayeleko, niku a hlengeletano ya Jehovha yi ci landzelisa kuyini a cikombiso cakwe?

⁷ Jesu i chumayele ‘mahungu ya manene ya Mufumo wa Nungungulu’. (Luka 4:43, 44) A cin’wani kambe, Jesu i layile vapizani vakwe lezvaku va chumayela Mufumo. (Luka 9:1, 2; 10:8, 9) Nyamutlha, vontlhe lava va hlengelako zvin’we ni hlengeletano ya Jehovha va chumayela zvin’we a mahungu ya Mufumo ni kwihi lomu va tshamako kona kutani wutihlamuleli legi va nga nago lomu hlengeletanweni.

8. I thomo muni hi nyikilweko?

⁸ Hi gi wona kota thomo ga hombe a ku byela van’wani a lisine xungetano hi Mufumo wa Nungungulu! A hi vanhu vontlhe va nga ni thomo lego. Hi cikombiso, a cikhati leci Jesu a nga hi laha misaveni i wa nga vhumeli ku a mimoya ya kubiha yi nyika wukustumunyu hi yena. (Luka 4:41) Nyamutlha, a munhu na a nga se ringanelwa hi ku chumayela ni vanhu va Jehovha, a kusangula i fanele ku hanya hi ndlela yi tsakisako Jehovha. Hi komba ku ha gi nyika nguvhu lisima a thomo legi hi nga nago ga ku chumayela hi ku nyika wukustumunyu contlhe cikhati ni kwihi laha zvi kotekako. A ku fana na Jesu, a kungo ga hina ku byala ni ku chetela mati a timbewu ta lisine ta Mufumo timbilwini ta vanhu. — Mat. 13:3, 23; 1 Kor. 3:6.

9. A hlengeletano yi tivekisa a vito ga Nungungulu hi ndlela muni?

⁹ Jesu i tivekisile a vito ga Nungungulu. Ka mukhongelo a mahileko ka Papayi wakwe wa le tilweni, Jesu i te: “Ndzi va tivisile a vito ga wena”. (Joh. 17:26) Hi ku landza cikombiso  ca Jesu, a hlengeletano ya Jehovha yi maha zvontlhe zvi kotekako kasi ku vhuna vanhu lezvaku va tiva a vito ga Nungungulu. A Wuhundzuluseli ga Misava Yiswa gi maha a ntiro wa hombe mhakeni leyi hi ku tlhelisela a vito ga Nungungulu wutshan’wini ga gona. A wuhundzuluseli lego ga Bhibhiliya zvezvi ga kumeka hi cipandze kutani gontlhe hi 270 wa tirimi ni ku hundza. Lomu ka Apendise A4 ni A5 ya wuhundzuluseli legi, u ta kuma mitlhamuselo yo engeteleka xungetano hi kutlheliselwa ka vito ga Nungungulu lomu ka Bhibhiliya. A Apendise C, yi kumekako lomu ka Bhibhiliya ga cigondzo, yi nyika zvin’wani zvikombiso zvo engeteleka zvi kombako lezvaku a vito ga Nungungulu gi fanele ku kumeka 237 wa makhati lomu ka Mitsalo ya ciGreki ya wuKristu.

10. Zvini hi zvi gondzako ka magezu ya wasati wo kari wa le Myanmar?

¹⁰ A ku fana na Jesu, hi lava ku vhuna vanhu vo tala hi laha zvi kotekako hi kona lezvaku va tiva a vito ga Nungungulu. Laha a nga gondza lezvaku Nungungulu i na ni vito, a wasati wo kari wa 67 wa malembe wa le Myanmar i no khumbeka nguvhu a rila, aku: “Legi i khati go sangula wutomini ga mina ndzi zwako lezvaku a vito ga Nungungulu hi Jehovha. . . . U ndzi gondzisile zvilo zva lisima nguvhu ka zvontlhe.” Kota lezvi a tshango legi gi kombako, a ku tiva vito ga Nungungulu zvi nga va khumba nguvhu a vanhu va timbilu ti nene.

SIMAMA KU BONGA A HLENGELETANO YA JEHOVHA

11. A madhota ma nga kombisa kuyini lezvaku ma yi bonga a hlengeletano ya Jehovha? (Wona ni mufota.)

¹¹ Hi yihi a yin’we ya tindlela leti a madhota ma kombisako hi tona lezvaku ma bonga a hlengeletano ya Jehovha? Loku ma nyikiwa zvileletelo, a madhota ma fanele ku zvi lera khwatsi, andzhako ka lezvo ma zvi tirisa hi laha zvi kotekako hi kona. Hi cikombiso, a madhota ma nyikiwa zvileletelo xungetano hi lezvi zvi nga mahisiwako zvona a zvipandze zva mitlhangano, lezvi ma nga khongelisako zvona lomu bandleni ma tlhela ma byeliwa lezvi ma nga khatalelisako zvona a tiyivhu ta Kristu. A madhota lawa ma landzeleko a zvileletelo zva hlengeletano, ma vhuna lava va nga hasi ka wutihlamuleli gabye lezvaku va tizwa na va hlayisekile ni ku randziwa.

12. a) Hikuyini hi ingisako lava va rangelako? (Mahebheru 13:7, 17) b) Hikuyini hi faneleko ku veka kupima ka matshamela ya manene ya lava va rangelako?

¹² Loku hi nyikiwa zvileletelo hi madhota, hi fanele ku zvi landzela hi mbilu yontlhe. Loku hi maha lezvo, lava va rangelako zvi ta va olovela a ku maha ntiro wabye. A Bhibhiliya gi hi kuca lezvaku hi ingisa hi tlhela hi ti koramisa ka lava va rangelako. (Lera Mahebheru 13:7, 17.) Lezvo zvi nga tshuka zvi hi karatela. Hikuyini? Hi ku a vavanuna lavo vanhu vo kala kumbhelela. Hambulezvo, loku hi veka kupima ka matshamela yabye ya hava wutshan’wini ga ku veka kupima ka matshamela yabye ya manene, hi lisine hi ta ngha ho vhuna valala va hina. Hi ndlela muni? A valala va hina va lava lezvaku hi kanakana ku Nungungulu i tirisa a hlengeletano yakwe kasi ku hi rangela. Hikwalaho, loku hi ehleketa zva hava xungetano hi madhota, hi nga tlhela hi sangula ku alakanyela zva hava xungetano hi hlengeletano; hi nga ha yi tsumbi. Zvini hi nga mahako kasi ku pola ni ku ala mawunwa ya valala va hina?

U NGA VHUMELI KU A VAN’WANI VA KU MAHA U NGA HA TSUMBI A HLENGELETANO YA JEHOVHA

13. A valala va hina va Nungungulu zamisa kuyini ku bihisa a hlengeletano yakwe?

¹³ A valala va Nungungulu va zama ku a zvilo zva zvinene zva hlengeletano ya Nungungulu va zvi mahisa ku khwatsi zvi bihile. Hi cikombiso, lomu ka Mitsalo hi gondza lezvaku Jehovha  i rindzela ku a vakhozeli vakwe va basa hi tlhelo ga miri, ni ga mahanyela, ni ga moya. I lava lezvaku ni wihi loyi a nga ni mahanyela yo biha na a nga ti soli a susiwa bandleni. (1 Kor. 5:11-13; 6:9, 10) Hi namarela ka nayo lowo wa Mitsalo. Kanilezvi a valala va hina va zama ku tirisa a nayo lowo kasi ku hi vhukela, va wula lezvaku ha hundzeleta zvilo, ha lamula van’wani niku a hi na lirandzo.

14. Himani a n’winyi wa mawunwa xungetano hi hlengeletano ya Nungungulu?

¹⁴ Tiva loyi hi lisine ku nga yena a hi vhukelako. Sathani Dhiyabho hi yena n’winyi wa mawunwa. I “papayi wa mawunwa”. (Joh. 8:44; Gen. 3:1-5) Hikwalaho, ha zvi tiva lezvaku Sathani i tirisa lava va mu seketelako kasi ku vhuvhumisa mawunwa xungetano hi hlengeletano ya Jehovha. Lezvo zvi mahekile ka Jesu ni ka maKristu yo sangula.

15. Zvini lezvi a varangeli va wukhongeli va nga maha ka Jesu ni ka valandzeli vakwe?

¹⁵ Hambu lezvi Jesu, a N’wana wa Nungungulu, a nga hi munhu wo mbhelela a tlhela a maha zvihlamaliso, Sathani i tirisile vanhu vo kari kasi ku xwanya mawunwa hi Jesu. Hi cikombiso, a varangeli va wukhongeli va wa byela vanhu lezvaku a ntamu wa Jesu wa ku hlongola madhimoni i wa wu kuma ka “hosi ya madhimoni”. (Mar. 3:22) A cikhati leci Jesu a nga kari a xuxiwa, a varangeli va wukhongeli va mu lumbetile lezvaku i wa rukatele va tlhela va kucetela citshungu lezvaku Jesu a dawa. (Mat. 27:20) Andzhako ka lezvo, laha a valandzeli va Kristu va nga chumayela mahungu ya manene, a valala vabye va no “kucetela vamatiko” lezvaku va xanisa a maKristu lawo. (Miti. 14:2, 19) Xungetano hi Mitiro 14:2, A Sentinela ga 1 ka Dezembro wa 1998 gi tlhamusele lezvi: “Na va nga xalali basi hi ku ala mahungu ya  mufumo, a valala va vaJudha va no maha tsima ga ku zama ku a vamatiko a va nga vhumeli a wuKristu.”

16. Zvini hi faneleko ku zvi alakanya loku hizwa mawunwa?

¹⁶ Sathani a nga gumesangi ku hemba ka zana ga malembe go sangula. Ni nyamutlha wa ha ‘kanganyisa tiko gontlhe’. (Kuv. 12:9) Loku uzwa mawunwa xungetano hi hlengeletano ni vamakabye lava va rangelako, alakanya lezvi a valala va Nungungulu va nga mu khomisa zvona Jesu ni vapizani vakwe ka zana ga malembe go sangula. Nyamutlha, a vanhu va Jehovha va xanisiwa ni ku wulawuliwa mawunwa kota lezvi a Bhibhiliya gi zvi phrofetileko. (Mat. 5:11, 12) A mawunwa ma nga ta hi khohlisa loku hi tiva a n’winyi wa wona ni loku hi tekela ku maha cokari. Zvini hi to maha?

17. Zvini hi nga mahako kasi hi nga khohlisiwi hi mawunwa? (2 Timote 1:13) (Wona ni kwadru “ Lezvi hi nga mahako loku hizwa mawunwa”.)

¹⁷ Ala mawunwa. Mupostoli Pawule i hi nyikile zvileletelo zvo dlunyateka xungetano hi lezvi hi faneleko ku maha loku hizwa mawunwa. I byelile Timote lezvaku a laya ku “va nga gondzisi a gondzo yin’wani, . . . va nga ingiseli tikaringani” ni “mitsheketo ya mawunwa”. (1 Tim. 1:3, 4; 4:7) Hambu lezvi a n’wanana a nga rolako a nchumu wa chaka aga, a munhu wa hombe a nge tshuki a maha lezvo hakuva wa zvi zwisisa lezvaku zvi wa ta mu vangela mhango. Hi ku fanana, hi ala mawunwa hakuva ha mu tiva a n’winyi wa mahungu lawo. Hi ingisela ntsena a “timhaka ti hanyisako” ta lisine. — Lera 2 Timote 1:13.

18. Hi nga kombisa kuyini lezvaku ha yi bonga a hlengeletano ya Jehovha?

¹⁸ Hi bhulile ntsena hi tindlela tinharu leti a hlengeletano ya Nungungulu yi pimanyisako Jesu ha tona. Laha u gondzako a Bhibhiliya, wona tindlela tin’wani leti a hlengeletano yi landzelako hi tona a cikombiso ca Jesu. Vhuna van’wani lomu bandleni ga wena lezvaku va engetela lezvi va yi bongisako zvona a hlengeletano. Simama ku kombisa kubonga ka wena hi ku tirela Jehovha hi kutsumbeka ni ku namarela ka hlengeletano leyi a yi tirisako kasi ku maha kurandza kakwe. (Lis. 37:28) Ngha hi simama ku gi nyika lisima a thomo legi hi nga nago ga ku hlengela ni vanhu va Jehovha va lirandzo ni kutsumbeka.