1. A vokari va ti zwisa kuyini hi ku chumayela van’wani? (Wona ni mufota.)

 KOTA vanhu va Jehovha, hi chumayela van’wani hakuva hi randza Papayi wa hina wa le tilweni niku hi lava ku va vhuna ku va mu tiva. A vahuweleli vo tala va tsaka hi ntiro wa kuchumayela. Kanilezvi a van’wani zva va karatela ku kuma litsako kuchumayeleni. Hikuyini? A vokari kuzvilava va na ni tingana niku a va ti woni na va hi vagondzisi va vanene. A van’wani a va tlhatlheki a kuya mutini wa munhu na va nga rambiwangi. A van’wani va chava ku kala va nga amukeliwi khwatsi. A van’wani va gondzisilwe ku va nga zangarisi a van’wani. Hambu lezvi va mu randzako nguvhu Jehovha, a vamakabye lava zva va karatela a ku tshinelela a munhu wo kala va nga mu tivi va mu chumayela. Hambulezvo, va zvi tiva lezvaku a ntiro lowu wa lisima nguvhu niku va wu maha hi kukhandzakanya. Lezvo zva mu tsakisa nguvhu Jehovha!

2. Loku zvi ku karatela ku kuma litsako kuchumayeleni, hikuyini u nga faneliko ku mbhela ntamu?

² Xana ka zvikhati zvin’wani zva tshuka zvi ku karatela ku kuma litsako kuchumayeleni hi kota ya lezvi zvi kumbukilweko laha hehla? Loku zvi hi lezvo, u nga mbheli ntamu. A ku ti wona na u nga hi mugondzisi wa munene zvi nga komba ku wa ti koramisa niku a wu lavi lezvaku a vanhu va veka kupima ka wena. Lezvo zvi nga komba kambe lezvaku a wu lavi ku holovisana ni van’wani. Niku a nga kona a zvi tsakelako ku kombiwa makatla, nguvhunguvhu loku na a zama ku maha zvazvinene ka van’wani. A Papayi wa wena wa le tilweni wa zvi wona a zvikarato lezvi u kumanako nazvo niku i lava ku ku vhuna. (Isa. 41:13) Ka ndzima leyi, hi ta wona a ntlhanu wa zvilo hi nga mahako kasi hi lwisana ni kutizwa loko niku hi ta tlhela hi wona lezvi hi nga engetelisako zvona a litsako la hina kuchumayeleni.

 VHUMELA KU TIYISIWA HI MHAKA YA NUNGUNGULU

3. Zvini zvi vhunileko muphrofeti Jeremiya lezvaku a chumayela van’wani?

³ Hambu cikhatini ci hundzileko, a mhaka ya Nungungulu yi tiyisile malandza yakwe a cikhati leci ma nga nyikiwa ntiro wo karata kasi ku wu maha. Wona cikombiso ca muphrofeti Jeremiya. I wa chava a cikhati leci Jehovha a nga mu nyika a ntiro wa kuchumayela. Jeremiya i te: ‘A ndzi zvi tivi ku wulawula, hakuva ndza hi n’wanana.’ (Jer. 1:6) Zvini zvi vhunileko Jeremiya lezvaku a tiya hlanha kasi ku chumayela? I tiyisilwe hi mhaka ya Nungungulu. I te: ‘Ku fana ni ndzilo wu vhurako, na wu vhalelwe lomu marambyini ya mina, ndzi rerekile hi ku ti khoma’. (Jer. 20:8, 9) Hambu lezvi Jeremiya a nga kumana ni zvikarato ka cipandze leci a nga chumayela ka cona, a mahungu lawa a nga nyikilwe ku chumayela ma mu tiyisile kasi a maha ntiro lowo.

4. Zvini zvi humelelako a cikhati leci hi lerako a Mhaka ya Nungungulu hi tlhela hi ehleketa hi yona? (Va Le Kolosi 1:9, 10)

⁴ A maKristu ma tiyisiwa hi mahungu lawa ma nga lomu ka Mhaka ya Nungungulu. A cikhati leci a nga tsalela a bandla ga le Kolosi, mupostoli Pawule i wulile lezvaku a ku kuma wutivi ga lisine zvi wa ta kuca a vamakabye vakwe lezvaku va “famba hi ndlela yi fanelako Jehovha” laha va nga simama “ku pswala mihandzu mitirweni yontlhe yo saseka”. (Lera Va Le Kolosi 1:9, 10.) A mitiro leyo yo saseka yi patsa a ku chumayela mahungu ya manene. Hikwalaho, a cikhati hi lerako a Mhaka ya Nungungulu hi tlhela hi ehleketa hi yona, a kukholwa ka hina ka Jehovha ka tiya niku ha li wona khwatsi a lisima la ku chumayela a mahungu ya Mufumo.

5. Hi nga vhuneka khwatsi hi lezvi hi lerako lomu ka Bhibhiliya hi ndlela muni?

⁵ Kasi hi vhuneka khwatsi hi lezvi hi gondzako lomu ka Mhaka ya Nungungulu, a hi faneli ku lera, ku gondza ni ku ehleketa hi kutsutsuma. Ti nyike cikhati ca ku u zvi maha khwatsi a zvilo lezvo. Loku u lera mutsalo wo kari zvi ku karatela ku wu zwisisa, u nga zvi tsikise zvezvo, ti karatele ku wu zwisisa. Tirisa a Índice das publicações da torre de vigia kutani Bhuku go kambisisa hi gona ga Vakustumunyu va Jehovha kasi ku kuma mitlhamuselo xungetano hi vhesi lego. Loku u ti nyika cikhati co enela kasi ku gondza, u ta tiyisa kutsumba ka wena ka lezvaku lezvi a Bhibhiliya gi zvi wulako lisine. (1 Tes. 5:21) Laha u toya u tiyiseka nguvhu hi lezvo, u ta zvi lava nguvhu a ku byela van’wani lezvi u zvi gondzako.

 TI LONGISELE KHWATSI KASI KUYA KUCHUMAYELENI

6. Hikuyini hi faneleko ku ti longisela kasi kuya kuchumayeleni?

⁶ Loku u ti longisela khwatsi kasi kuya kuchumayeleni, u nga ta chava nguvhu a cikhati leci u to chumayela van’wani. Jesu i vhunile vapizani vakwe lezvaku va ti longisela na va nga seya kuchumayeleni. (Luka 10:1-11) Hi kota lezvi va nga maha lezvi Jesu a nga va gondzisa, a vapizani va zwile litsako la hombe hi lezvi va nga zvi kota ku maha. — Luka 10:17.

7. Hi nga ti longiselisa kuyini kasi kuya kuchumayeleni? (Wona ni mufota.)

⁷ Hi nga ti longiselisa kuyini kasi kuya kuchumayeleni? Hi fanele ku ehleketa hi lezvi hi nga chumayelisako zvona hi magezu ya hina hi ndlela ya yinene. Zva vhuna a ku ranga hi ehleketa hi tindlela timbiri kutani tinharu ta lezvi a vanhu va lomu cipandzeni ca hina va nga hlamulisako zvona ni lezvi hi nga mahako ka ciyimo cin’we ni cin’wani. Makunu loku hi sangula ku bhula navo, hi nga rula, hi n’wayitela hi tlhela hi kombisa cinghana.

8. A maKristu ma fana ni zvibya zva wumba zvi kumbukiwako ka mufananiso wa mupostoli Pawule hi ndlela muni?

⁸ Xungetano hi ntiro wa kuchumayela, mupostoli Pawule i byelile vamakabye, aku: “A tshomba leyi hi nga nayo yi lomu ka zvibya zva wumba”. (2 Kor. 4:7) Cini a tshomba leyo? I ntiro wu ponisako wutomi, ku nga ntiro wa kuchumayela van’wani a mahungu ya Mufumo. (2 Kor. 4:1) Zvini a zvibya zva wumba? A zvibya zva wumba zvi yimela a malandza ya Nungungulu, lawa ma chumayelako mahungu ya manene ka van’wani. Masikwini ya Pawule, a vamahi va mabhindzu va wa tirisa a tifuko ta wumba kasi ku rwala zvilo zva lisima zvo kota zvakuga, ni vhinyo ni mali. Hi kufanana, Jehovha i hi nyikile mahungu ya manene ya lisine. Hi ku vhuniwa hi Jehovha hi nga kuma ntamu hi wu lavako kasi ku chumayela mahungu lawo hi kutsumbeka.

KHONGELA U KOMBELA KUTIYA-HLANHA

9. Hi nga ku hlulisa kuyini a kuchava vanhu kutani ku chava ku a vanhu va nga hi ingiseli? (Wona ni mufota.)

⁹ Ka zvikhati zvin’wani hi nga tshuka hi chava vanhu kutani ku chava ku a vanhu va nga hi ingiseli. Hi nga ci hlulisa kuyini cikarato leco? Ehleketa hi mukhongelo wa vapostoli a cikhati leci va nga layiwa ku va nga ha chumayeli. Wutshan’wini ga ku va woma hi kuchava, va no  kombela Jehovha lezvaku a va vhuna ku ‘simama va kanela a mhaka [yakwe] hi kutiya kontlhe’. Jehovha i no tekela ku hlamula mukhongelo wabye. (Miti. 4:18, 29, 31) Loku ka zvikhati zvin’wani hi tshuka hi chava, hinawu hi fanele ku kombela a civhuno ca Jehovha. Kombela Jehovha lezvaku a ku vhuna ku hlula ku chava vanhu hi ku maha ku u va randza nguvhu.

10. Jehovha i hi vhunisa kuyini ku maha ntiro wa hina kota Vakustumunyu vakwe? (Isaya 43:10-12)

¹⁰ Jehovha i hi hlawulile kasi hiva Vakustumunyu vakwe niku i tsumbisa ku hi vhuna ku hi tiya hlanha. (Lera Isaya 43:10-12.) Wona mune wa tindlela ta lezvi a mahisako zvona lezvo. Yo sangula, Jesu i zvin’we na hina contlhe cikhati hi chumayelako a mahungu ya manene. (Mat. 28:18-20) Ya wumbiri, Jehovha i yimisile tingilozi to kari kasi ku hi vhuna. (Kuv. 14:6) Ya wunharu, Jehovha wa hi nyika moya wakwe wo basa kasi ku hi vhuna ku alakanya lezvi hi zvi gondzileko. (Joh. 14:25, 26) Ya wumune, Jehovha i hi nyika vamakabye kasi hi tira zvin’we navo. Hi ku vhuniwa hi Jehovha ni vamakabye va hina va lirandzo, hi na ni zvontlhe hi zvi lavako kasi zvi hi fambela khwatsi ntirweni lowu.

TI ZWANANISE NI ZVIYIMO U TLHELA U HI NI MAWONELA YA MANENE

11. Hi nga va kumisa kuyini vanhu vo tala ntirweni wa kuchumayela? (Wona ni mufota.)

¹¹ Xana wa mbhela ntamu loku u nga kumi vanhu kuchumayeleni? Hikuyini u nga ti wutisiko lezvi: ‘Va kwihi a vanhu va lomu cipandzeni ca mina a cikhati leci?’ (Miti. 16:13) A ku va lomu mitirweni kutani va lomu ka ku famba va xava zvilo?’ Loku zvi hi lezvo, a ku u nga kuma vanhu vo tala hi ku chumayela lomu maruweni? A makabye wo kari wa ku hi Joshua, i te: “Ndza zvi kota ku chumayela loku ndzi hi lomu ku xavisiwako zvilo kutani lomu maparki.” Yena ni sati wakwe, Bridget, va kuma vanhu vo tala lomu mitini loku va chumayela lomu cikari ka vhiki ni gambonyana kutani loku va chumayela hi tisonto ni gambo. — Efe. 5:15, 16.

12. Hi nga zvi tivisa kuyini lezvi a vanhu va zvi kholwako kutani zvi va karatako?

¹² Loku a vanhu va nga kombisi nguvhu ku tsakela, zama ku pola lezvi va zvi kholwani kutani lezvi zvi va karatako. Joshua na Bridget va tirisa zviwutiso lezvi zvi tako laha ka zviphephana zva hina. Hi cikombiso, hi ku tirisa a ciphephana leci ca ku U gi wonisa kuyini a Biblia?, va wula lezvi: “A vanhu vo kari  va wona Bhibhiliya kota bhuku gi tako hi ka Nungungulu, kanilezvi a van’wani a va zvi wonisi lezvo. Hi wahi mawonela ya wena?” A kutala ka zvikhati, lezvo zvi maha ku vava ni mabhulo.

13. Hikuyini hi nga wulako lezvaku ha humelela khwatsi hambu loku a vanhu va nga hi amukeli khwatsi? (Mavingu 27:11)

¹³ A ku humelela ntirweni wa hina wa kuchumayela a kuyi hi mihandzu leyi hi yi kumako. Hikuyini? Hakuva hi maha lezvi Jehovha ni N’wana wakwe va zvi lavako ku hi maha, ku nga ku nyika wukustumunyu. (Miti. 10:42) Hambu loku hi nga kumi munhu wa ku mu chumayela, kutani loku va ala mahungu ya hina, ha kuma litsako hakuva ha zvi tiva lezvaku hi tsakisile a Papayi wa hina wa le tilweni. — Lera Mavingu 27:11.

14. Hikuyini hi tsakako loku a muhuweleli mun’we a kuma munhu wo tsakela lomu cipandzeni ca hina?

¹⁴ Hi nga tsaka kambe a cikhati leci a muhuweleli mun’wani a kumako munhu wo tsakela kuchumayeleni. A Murindzeli wo kari i fananisile a ntiro wa hina ni ntiro wa ku lava n’wanana a lahlekileko. Vanhu vo tala va patsekako ka ntiro wa ku mu lavetela. Va mu lavetela ka matshamu yo hambanahambana. A cikhati leci va mu kumako, a ku tsaki loyi a nga mu kuma basi, kanilezvi vontlhe va na ni cigelo ca ku tsaka. Hi kufanana, a ntiro wa ku maha vapizani i ntiro wa ntlawa. Kasi hi eneta a cipandze ca hina, hontlheni ha laveka niku hontlheni ha tsaka a cikhati leci a mun’we a sangulako kuta mitlhanganweni.

VEKA KUPIMA KA LEZVI U MU RANDZISAKO ZVONA JEHOVHA NI VAAKELANI WA WENA

15. A ku tirisa Matewu 22:37-39 zvi hi vhunisa kuyini ku hi engetela a kuhiseka ka hina ntirweni wa kuchumayela? (Wona ni mufota wa kapa.)

¹⁵ Hi nga engetela a kuhiseka ka hina ntirweni wa kuchumayela hi ku veka kupima ka lezvi hi mu randzisako zvona Jehovha ni vaakelani va hina. (Lera Matewu 22:37-39.) Hi nga ehleketa hi lezvi Jehovha a tsakisako zvona a cikhati leci a hi wonako na hi maha ntiro wa kuchumayela ni lezvi a vanhu va to tsakisa zvona loku va sangula ku gondza Bhibhiliya! Ehleketa kambe hi kuhanyiswa loku ku to kumiwa hi lava va vhumelako a mahungu ya manene. — Joh. 6:40; 1 Tim. 4:16.

16. Hi nga li kumisa kuyini litsako ntirweni wa kuchumayela loku zvi nga koteki ku hi suka laha kaya? Nyika zvikombiso.

¹⁶ A wu zvi koti ku suka laha kaya hi zvigelo zvo kari? Loku zvi tshamisile lezvo, ehleketa hi  lezvi u nga mahako kasi ku kombisa a lirandzo la wena hi Jehovha ni vaakelani va wena. Ndzeni ka ntungu wa COVID-19, Samuel na Dania zvi wa nga koteki ku va suka laha kaya. Ndzeni ka cikhati leco co karata, va wa chumayela hi ku khandzakanya hi ku tirisa telefone, ku tsala mapapilo ni ku fambisa zvigondzo zva Bhibhiliya hi ku tirisa Zoom. Samuel i wa chumayela lava a nga va kuma ka clinica leyi a nga tiriwa a kankro. I wula lezvi: “A zvikarato zva hi rera hi tlhelo ga maalakanyo, ni ga miri ni ga moya. Hi fanele ku kuma litsako ntirweni wa hina lowu hi mahelako Jehovha.” Ndzeni ka cikhati leco, Dania i nowa zvi nga koteki ku a fambafamba hi tihweti tinharu. Andzhako ka lezvo a famba hi cikarinyana ca marodha hi 6 wa tihweti. I wula lezvi: “Ndzi wa zama ku maha zvontlhe lezvi ndzi nga zvi kota ka ciyimo ca mina. Ndzi wa chumayela a enfermeiro loyi a nga ndzi khatalela, ndzi tlhela ndzi bhula ni lava va ngata va ta nyikela zvilo laha kaya. Ndzi vile ni mabhulo yo tsakisa kambe hi telefone ni wasati wo kari a tirako ka koponi yo kari ya mimuri. A zviyimo zva Samuel na Dania zvi wa va maha ku va nga zvi koti ku maha zvotala, kanilezvi va wa maha lezvi va nga zvi kota va tlhela va kuma litsako hi ku maha lezvo.

17. U nga vhuneka khwatsi hi mawonela ma nyikilweko ka ndzima leyi hi ndlela muni?

¹⁷ A mawonela lawa ma nyikilweko ka ndzima leyi, ma tira khwatsi loku ma tirisiwa wontlhe. A gin’we ni gin’wani gi fana ni nchumu wa lisima wu lavekako kasi ku bhika zvakuga zvo kari. Loku zvontlhe zvi tlhanganiselwa khwatsi, ku huma zvakuga zvo nandziha nguvhu. Hi ku tirisa mawonela wontlhe u tava u longile khwatsi a ku lwisana ni kutizwa ka hava u tlhela u kuma litsako ntirweni wa kuchumayela.