1. Zvini lezvi Dhavhidha a nga wula xungetano hi ku ti koramisa ka Jehovha?

XANA Jehovha wa ti koramisa futsi? Ina, wa ti koramisa. Ka khati go kari Dhavhidha i te: “Wa ndzi nyika a citlhangu ca kuhanyisa ka wena, a ku ti koramisa ka wena ka ndzi kulisa.” (2 Sam. 22:36, NM; Lis. 18:35) Kuzvilava Dhavhidha i wa ehleketa hi siku legi muphrofeti Samuweli a ngaya le kaya ka papayi wakwe kasi aya tota a hosi leyi yi nga wa ta vhaleta Sawule, yi fuma Izrayeli. Hambu lezvi Dhavhidha a nga hi yena n’wanana ka vafana vontlhe va 8, hi yena loyi Jehovha a nga mu hlawula kasi ku vhaleta Hosi Sawule. — 1 Sam. 16:1, 10-13.

2. Zvini hi to bhula hi zvona ka ndzima leyi?

² Dhavhidha i wa yima ni lezvi Lisimu 113 li wulako hi Jehovha: ‘Loyi a koramako a hlomela, a wona tilo ni misava. Wa humesa loyi wa tsongwani hi lomu ntshurini . . . a mu tshamisa ni tihosana a cikari ka tihosana ta tiko gakwe.’ (Lis. 113:6-8) Ka ndzima leyi, hi ta ranga hi ku kambisisa a zvigondzo zvo kari zva lisima xungetano hi kutikoramisa hi ku bhula hi lezvi Jehovha a nga gi kombisisa zvona a tshamela legi. Hi guma hi bhula hi lezvi hi nga gondzako ka Hosi Sawule, muphrofeti Dhaniyeli, na Jesu xungetano hi tshamela legi ga ku ti koramisa.

3. Jehovha i tirisanisa kuyini na hina niku lezvo zvi komba yini?

³ Jehovha i komba lezvaku wa ti koramisa hi ndlela leyi a tirisanako hi yona ni vanhu vo kala ku mbhelela. A handle ka ku vhumela a wukhozeli ga hina, i tlhela a hi wona kota vanghana vakwe. (Lis. 25:14) Kasi zvi koteka a ku hiva vanghana vakwe, Jehovha i  no nyikela a N’wana wakwe kota muphahlo wa zviwonho zva hina. Hi nga wona wuxinji ni zwela wusiwana legi a hi kombisako!

4. Zvini lezvi Jehovha a hi nyikileko niku hikuyini?

⁴ Ehleketa hi ndlela yin’wani leyi Jehovha a kombisako hi yona kutikoramisa. Kota Muvangi, Jehovha na a hi vangile na hi nga hi na fanelo ya ku hlawula lezvi hi lavako ku maha hi wutomi ga hina. Kanilezvi a nga mahangi lezvo. I hi mahile hi mufananiso wakwe a tlhela a hi nyika a kutlhatlheka ka ku ti hlawulela. I lava lezvaku hina vanhu va nyalidede hi mu tirela hi timbilu ta hina hakuva ha mu randza niku ha ma tiva a mabhindzu ma kumiwako hi lava va mu ingisako. (Deu. 10:12; Isa. 48:17, 18) Ha mu bonga nguvhu Jehovha hi kota ya lezvi a ti koramisako!

5. Jehovha i hi gondzisisa kuyini kuva vanhu va ku ti koramisa? (Wona mufota wa kapa.)

⁵ Jehovha i hi gondzisa kuva vanhu vo ti koramisa hi ndlela leyi a tirisanako hi yona na hina. Jehovha hi yena a nga ni wutlhari a ku hundza vontlhe. Hambulezvo, i ti yimisele ku ingisela mawonela ya van’wani. Hi cikombiso, Jehovha i vhumele lezvaku a n’wana wakwe a mu vhuna ka ku vanga zvilo zvontlhe. (Mav. 8:27-30; Kol. 1:15, 16) Hambu lezvi Jehovha a nga ni ntamu a ku hundza vontlhe, wa va nyika wuhosi go kari a van’wani. Hi cikombiso, i hlawulile Jesu lezvaku ava Hosi ya Mufumo wakwe; niku lava va 144 000 va to fuma na Jesu, i va nyikile wuhosi go kari vonawu . (Luka 12:32) Jehovha i gondzisile Jesu kambe kasi ava Hosi ni Mupristi wa Hombe. (Mah. 5:8, 9) Lava va to fuma na Jesu vonawu wa va gondzisa ku maha ntiro wabye, niku a nga gumi a zama ku va landza hi ndzhako kasi a wona lezvi va wu mahisako zvona. Wutshan’wini ga lezvo, i tsumba lezvaku va ta maha kurandza kakwe. — Kuv. 5:10.

6-7. Zvini hi nga gondzako ka Papayi wa hina wa le tilweni xungetano hi nyika mitiro van’wani?

⁶ Loku a Papayi wa hina wa le tilweni — loyi a  nga laviko ku vhuniwa hi munhu — a nyika van’wani mitiro, xana hinawu a hi fanele ku maha zvo fana? Loku u hi hloko ya ngango kutani dhota bandleni, landzela cikombiso ca Jehovha hi ku avela mitiro van’wani u tlhela u nga va landzi hi le ndzhako kasi ku wona lezvi va yi mahisako zvona. Loku u pimanyisa Jehovha, u nga ta tsakela ku a ntiro wu mahiwa basi, kanilezvi u ta va nyika mitiro a van’wani, u va gondzisa ku yi maha, u tlhela u va tsumba ku va ta yi maha khwatsi. (Isa. 41:10) Zvini zvin’wani lava va nga ni wutihlamuleli va nga gondzako ka Jehovha?

⁷ A Bhibhiliya gi komba lezvaku Jehovha wa ma nyika lisima a mawonela ya tingilozi. (1 Tih. 22:19-22) Vapswali mu nga ci pimanyisisa kuyini a cikombiso ca Jehovha? Loku zvi fanela kombelani a mawonela ya vana va n’wina xungetano hi lezvi mu faneleko ku wu mahisako zvona a ntiro wo kari. Loku a mawonela yabye ma hi ma nene, mu nga ma tirisa.

8. Jehovha i kombisisile kuyini a lihlazva-mbilu a cikhati a nga tirisana na Abrahama na Sara?

⁸ A ndlela yin’wani leyi Jehovha a kombisako hi yona lezvaku wa ti koramisa, kuva ni lihlazva-mbilu. Hi cikombiso, Jehovha wa kombisa lihlazva-mbilu loku a malandza yakwe ma kombela ku a ma tlhamusela zvokari xungetano hi zviboho zvakwe. I ingisele Abrahama hi lihlazva-mbilu a cikhati leci a nga wula lezvi zvi nga mu karata xungetano hi ciboho ca Jehovha ca ku lovisa Sodhoma ni Gomora. (Gen. 18:22-33) Alakanya kambe hi ndlela leyi Jehovha a nga mu khoma hi yona Sara, a sati wa Abrahama. A nga swirekangi kutani ku kwata a cikhati leci Sara a nga hleka hi kota ya citsumbiso ca lezvaku i wa ta xura nyimba na a khosahele. (Gen. 18:10-14) Wutshan’wini ga lezvo, i khomile Sara hi cichavo.

9. A vapswali ni madhota va nga gondza yini ka cikombiso ca Jehovha?

⁹ Xana a vapswali ni madhota va nga gondza yini ka cikombiso ca Jehovha? Ehleketa hi lezvi u mahako loku lava u va rangelako va lava ku u va tlhamusela zvokari xungetano hi zviboho u zvi mahako. Xana u tsutsumela ku va kawuka? Kutani u zama ku zwisisa a mawonela yabye hi mhaka leyo? Hi lisine, a mingango ni mabandla ma vhuneka nguvhu loku lava va rangelako va pimanyisa Jehovha. Kala laha, hi bhulile hi lezvi hi nga gondzako xungetano hi cikombiso ca Jehovha ca ku ti koramisa. Zvezvi a hi woneni lezvi hi nga gondzako ka zvikombiso zvi tsalilweko ka Mhaka ya Nungungulu xungetano hi kutikoramisa.

10. A Mhaka ya Nungungulu yi hi vhunisa kuyini?

¹⁰ Kota Mugondzisi wa Hombe, Jehovha i hi nyika zvikombiso zvi nga ka Mhaka yakwe kasi ku hi gondzisa. (Isa. 30:20, 21) Loku hi lera hi tlhela hi ehleketa hi matimu ma nga lomu ka Bhibhiliya ya vanhu va kombisileko matshamela ma tsakisako Nungungulu, a ku patsa ni kutikoramisa, ha gondza cokari. Loku hi hlola lezvi zvi humeleleko lava va nga kala ku kombisa matshamela lawa ya ma nene, ha gondza cokari kambe. — Lis. 37:37; 1 Kor. 10:11.

11. Hi nga gondza yini ka cikombiso co biha ca Sawule?

¹¹ Ehleketa hi lezvi zvi nga humelela Hosi Sawule. Kusanguleni i wa hi jaha ga ku ti koramisa. A cikhati leci a nga hi Mufana i wa ku tiva kugumelwa kakwe niku ka khati go kari i alile wutihlamuleli. (1 Sam. 9:21; 10:20-22) Hambulezvo, hi ku famba ka cikhati Sawule i nova ni matshandza a tlhela a maha a zvilo a nga kala a nga hi na fanelo ya ku zvi maha. I sangulile kuva ni matshandza na ko hundza cikhati citsongwani na a yimisilwe kota hosi. Ka khati go kari i no mbhelelwa hi lihlazva-mbilu a cikhati leci a nga rindzela muprofeti Samuweli. Wutshan’wini ga ku tsumba ku Jehovha i wa ta vhikela vanhu vakwe, Sawule i no hisa miphahlelo hambu lezvi a  nga zvi tiva lezvaku i wa nga hi na fanelo ya ku zvi maha. Kota wuyelo ga kona, Sawule a nga ha tsakelwangi hi Jehovha, niku Jehovha i wa nga ha tsakisiwi hi wuhosi gakwe. (1 Sam. 13:8-14) Hi maha khwatsi loku hi gondza cokari ka cikombiso leci co biha ca Sawule hi tlhela hi potsa ku maha zvilo hi nga hiko ni fanelo ya ku zvi maha.

12. Dhaniyeli i kombisisile kuyini kutikoramisa?

¹² A ku hambana ni cikombiso co biha ca Sawule, wona cikombiso ca ci nene ca muphrofeti Dhaniyeli. Wutomini gakwe gontlhe Dhaniyeli i simamile kuva munhu wo ti koramisa niku contlhe cikhati i wa kombela a wurangeli ga Jehovha. Hi cikombiso, a cikhati leci Jehovha a nga mu tirisa kasi ku tlhamusela a noro wa Nebukadnezzare, Dhaniyeli a nga ti lavelangi wudzundzo. Kanilezvi, i no ti koramisa a yisa wudzundzo gontlhe ka Jehovha. (Dan. 2:26-28) Hi gondza yini? Loku a vamakabye va tsaka hi tikanelo ta hina kutani loku zvi hi fambela khwatsi kuchumayeleni, hi nga rivali ku mu nyika wudzundzo gontlhe Jehovha. Hi fanele ku ti koramisa hi vhumela lezvaku a hi nge zvi koti a ku maha zvilo lezvo na hi nga vhuniwi hi Jehovha. (Filp. 4:13) Loku hi maha lezvo, hi pimanyisa cikombiso ca ci nene ca Jesu. Hi ndlela muni?

13. Zvini hi gondzako ka magezu ya Jesu ma nga ka Johani 5:19, 30 xungetano hi kutikoramisa?

¹³ Hambu lezvi Jesu a nga hi N’wana wo mbhelela wa Nungungulu i wa tsumba Jehovha. (Lera Johani 5:19, 30.) A nga tshukangi a zama ku wutla wuhosi ga Papayi wakwe wa le tilweni. Va Le Filipi 2:6 i hi byela lezvaku Jesu a nga ‘tshukangi a alakanyela ku wutla cikhundla ca Nungungulu, a ti byela ku wa ringana naye’. Kota N’wana wo ti koramisa ni ku ingisa, i wa ku tiva a kugumelwa kakwe niku i wa hi ni cichavo hi wuhosi ga Papayi wakwe.

14. Jesu i wa maha yini loku a kombeliwa ku maha zvokari zvi kalako zvi nga hi ntan’wini wakwe?

¹⁴ Ehleketa hi lezvi Jesu a nga maha a cikhati leci Jakobe na Johani ni mamani wabye va nga mu yela va ya mu kombela nchumu wu nga kala wu nga hi ntan’wini wakwe. Jesu i no tekela ku wula ku a Papayi wakwe hi yena a nga ni fanelo ya ku yimisa lava va faneleko ku tshama cineneni kutani cibhabheni Mufun’weni wakwe. (Mat. 20:20-23) Jesu i kombile lezvaku i wa ku tiva kugumelwa kakwe. I wa ti koramisa. A nga tshukangi a maha nchumu wo hundza lowu Jehovha a nga mu layile. (Joh.12:49) Hi nga ci pimanyisisa kuyini a cikombiso ci nene ca Jesu?

15-16. Hi nga gi tirisisa kuyini a wusungukati gi nga ka 1 Va Le Korinte 4:6?

 ¹⁵ Hi pimanyisa cikombiso ca Jesu ca ku ti koramisa hi ku tirisa wusungukati ga Bhibhiliya gi nga ka 1 Va Le Korinte 4:6. Gi hi byela lezvi: “Mu nga mahi zvo hundza lezvi zvi tsalilweko.” Hikwalaho loku hi kombeliwa civhuno, a wusungukati lego a gi faneli kuva mawonela ya hina. Hi fanele ku ti wonela ku wulawula na hi nga rangangi hi ku pimisa kambe. Kanilezvi, hi fanele ku va nyika wusungukati gi nga lomu ka Bhibhiliya ni lomu ka mabhuku ya hina. Hi ndlela leyo, hi ta komba lezvaku ha zvi zwisisa lezvaku a hi tivi zvilo zvontlhe. Loku hi maha lezvo, ha ti koramisa hakuva hi komba lezvaku ha zvi zwisisa ku contlhe cikhati a wusungukati ga Jehovha gi nene a ku hundza legi ga hina. — Kuv. 15:3, 4.

¹⁶ Ahandle ka ku dhumisa Jehovha, ku na ni zvin’wani zvigelo zva zvi nene zvi hi mahako hi kombisa ku ti koramisa. Zvezvi hi ta wona lezvi a kutikoramisa ku hi nyikisako zvona litsako ni lezvi ku hi vhunisako zvona a kuva ni kuzwanana ni van’wani.

17. Hikuyini a vanhu vo ti koramisa va tsakako?

¹⁷ A kutala ka zvikhati loku hi ti koramisa hi kuma litsako la hombe. Hikuyini? Hakuva loku hi vhumela lezvaku ku ni zvokari hi kalako hi nga zvi koti ku maha, hi ta bonga hi tlhela hi tsaka ni cihi civhuno hi to nyikiwa hi van’wani. Hi cikombiso, alakanya hi cikhati leci Jesu a nga hanyisa a khume ga vanhu va nga kari va babya hi hlokonho. Mun’we basi a nga tlhela a ya bonga Jesu hi lezvi a mu hanyisileko a wubabyi lego ga hombe — ku nga zvilo zva ku a wanuna loye na a nga tshukangi a zvi kota ku ti mahela. A wanuna loyi wo ti koramisa i kombisile kubonga ka hombe hi civhuno leci a nga ci kuma, niku i dhumisile Nungungulu hi kota ya civhuno leco. — Luka 17:11-19.

18. A kutikoramisa ku hi vhunisa kuyini kuva ni kuzwanana ni van’wani? (Va Le Roma 12:10)

 ¹⁸ A vanhu va ku ti koramisa va tala ku hanyisana khwatsi ni van’wani va tlhela va maha vanghana vabye va susa ndzi kandzihela. Hikuyini? Hiku va tsaka hi ku tiva lezvaku a van’wani va na ni matshamela ya ma nene. Ahandle ka lezvo, va tlhela va komba lezvaku va va tsumba. A munhu wa ku ti koramisa wa tsaka loku a van’wani va maha khwatsi mitiro leyi va nyikilweko niku wa va dzundza. — Lera Va Le Roma 12:10.

19. Hi zvihi zvigelo zvo kari zvi hi mahako hi potsa matshandza?

¹⁹ A ku hambana ni lezvo, a vanhu va matshandza zva va karatela ku dzundza van’wani, va lava lezvaku ku dzundziwa vona basi. Va tolovela ku ti fananisa ni van’wani niku va byala moya wa mapalisana. A munhu wa matshandza i ti byela lezvaku i chukwana ku a maha zvilo hi yece, hakuva hi mawonela yakwe, a van’wani va nga ta zvi maha khwatsi. I lava kuva wa lisima nguvhu ku hundza van’wani niku i na ni ciluse loku a van’wani va maha khwatsi mitiro a ku hundza yena. (Gal. 5:26) A vanhu lavo zva kala ku vava ni wunghana ni munhu hi cikhati co leha. Loku hi pola ku hi na ni matshandza hi fanele ku tekela ku kombela Jehovha hi mukhongelo lezvaku a hi nyika ‘kupima kuswa’ kasi hi nga tshuki hiva vanhu va matshandza. — Rom. 12:2.

20. Hikuyini hi faneleko ku ti koramisa?

²⁰ Ha mu bonga nguvhu Jehovha hi lezvi a ti koramisako, a hi nyika cikombiso. A kutikoramisa kakwe hi ku wona ka lezvi a ma khomisako zvona a malandza yakwe, niku hi lava ku mu pimanyisa. Ahandle ka lezvo, hi lava ku pimanyisa cikombiso ci nene ca vanhu vo ti koramisa va kumbukiwako lomu ka Bhibhiliya, lava va vileko ni thomo ga ku famba na Nungungulu. Hi xuva ku contlhe cikhati hi nyika Jehovha a wudzundzo — hakuva i fanele ku nyikiwa wudzundzo futsi! (Kuv. 4:11) Loku hi maha zvontlhe lezvo, hi ngava vanghana va Jehovha kala kupindzuka, hakuva i randza vanhu vo ti koramisa.