1. I thomo muni hi nga nago?

I THOMO ga hombe nguvhu ka hina a kuva bandleni ga Jehovha. Hi lomu ka paradhise ga moya legi gi teleko hi vanhu va kurula, ni vo tsaka. I ntiro muni u nga nawo lomu bandleni?

2. Mufananiso muni lowu mupostoli Pawule a wu tirisileko ka mapapilo yakwe ma pimisilweko?

² Hi nga gondza zvo tala xungetano hi mhaka leyi ka mufananiso lowu Pawule a wu tirisileko ka mapapilo lawa a pimiselweko ku ma tsala. Ka mapapilo lawo, Pawule i fananisile bandla ni miri wa munhu. I tlhelile a fananisa a mun’we ni mun’wani wa hina lowu bandleni ni zviro zva miri. — Rom. 12:4-8; 1 Kor. 12:12-27; Efe. 4:16.

3. Zvilo muni zva zvinharu hi to bhula hi zvona ka ndzima leyi?

³ Ka ndzima leyi, hi ta bhula hi zvilo zvinharu zva lisima lezvi hi nga gondzako ka mufananiso wa Pawule. Co sangula, hi ta tiva lezvaku mun’we ni mun’wani wa hina wa lisima niku i na ni ntiro * lomu bandleni ga Jehovha. Ca wumbiri, hi ta bhula hi lezvi hi nga mahako loku zvi hi karatela ku tiva ntiro wa hina lomu bandleni. Ca wunharu, hi ta tiva ku hikuyini hi faneleko ku tshama na hi khomekile hi ku maha ntiro wa hina lomu bandleni ga Nungungulu.

4. Va Le Roma 12:4, 5 i hi gondzisa yini?

⁴ A nchumu wo sangula hi nga gondzako ka mufananiso wa Pawule hi lezvaku a mun’we ni mun’wani wa hina wa lisima nguvhu ngangweni wa Jehovha. Pawule i sangula mufananiso wakwe hi ku wula lezvaku: “A ku khwatsi hi lezvi hi nga ni zviro zvo tala ka miri wun’we, ni lezvi a zviro lezvo zvi nga tiriko a ntiro walowu wa wun’we, hi zvalezvo na hinawu, hambu lezvi hi nga tala, hi miri wun’we ka Kristu, kanilezvi a mun’we ni mun’wani wa hina ciro ka mun’wani.” (Rom. 12:4, 5) Kasi Pawule i wa lava ku wula yini? I komba lezvaku a mun’we ni mun’wani wa hina i na ni ntiro wakwe lomu bandleni; kanilezvi hontlheni hi va lisima.

5. “Zvinyikiwo” muni lezvi Jehovha a nga nyika mabandla?

⁵ Loku u alakanyela hi lava va nga ni mitiro lomu bandleni kuzvilava u tsutsumela ka lava va rangelako. (1 Tes. 5:12; Mah. 13:17) Lisine lezvaku hi ku tirisa Jesu, Jehovha wa nyika “vanhu kota zvinyikiwo” lomu bandleni gakwe. (Efe. 4:8) A “vanhu kota zvinyikiwo” va patsa a zviro zva Hubye yi Fumako, vavhuneteli va Hubye yi Fumako, zviro zva Kometi ya Ravi, va woneleli va zvipandze, vagondzisi va zvikola zva Bhibhiliya, madhota ya bandla, ni malandza yo vhunetela. Vontlhe vamakabye lavo va yimisilwe hi moya wa ku basa kasi va khatalela a tiyivhu ta lisima ta Jehovha, ni ku khatalela a zvilaveko zva bandla. — 1 Ped. 5:2, 3.

6. Hi kuya hi 1 Va Le Tesalonika 2:6-8, zvini lezvi a vamakabye lava va yimisilweko hi moya wo basa va ti karatelako ku maha?

⁶ A vamakabye va yimisilweko hi moya wo basa va na ni mitiro yo hambanahambana. A ku fana ni zvipandze zva miri, zvo kota mawoko ni minenge, zvi tirako kasi ku vhuna miri wontlhe, a vamakabye va yimisilweko hi moya wo basa va tira hi ku ti karata kasi va vhuna bandla gontlhe. A va tiri kasi va nyikiwa wudzundzo. Kanilezvi, va tira hi kutikarata kasi va aka ni ku tiyisa a vamakabye vabye. (Lera 1 Va Le Tesalonika 2:6-8.) Ha mu bonga nguvhu Jehovha hi kota ya lezvi a yimisileko a vamakabye lavo va khatalelako nguvhu a zvilaveko zva van’wani a ku hundza lezvi zvabye.

7. Makatekwa muni va ti buzako hi wona lava va nga ka ntiro wa cikhati contlhe?

⁷ A vo kari lomu bandleni va nga yimisiwa kasi va tira kota: Varumiwa, maphayona yo hlawuleka, kutani maphayona ya cikhati contlhe. Hi lisine, a vamakabye misaveni yontlhe va mahile ciboho ca ku nghenela ntiro wa cikhati contlhe kasi va chumayela ni ku maha vapizani. Hi ku maha lezvo va vhuna vanhu vo tala kasi va maha vapizani va Kristu Jesu. Hambu lezvi lava va nga ka ntiro wa cikhati contlhe va nga hava titshomba to tala, Jehovha wa va katekisa nguvhu wutomini gabye. (Mar. 10:29, 30) A vamakabye lavo va ni lisima nguvhu ka hina niku ha va bonga hi lezvi va mahako cipandze ca bandla!

8. Hikuyini a vahuweleli vontlhe va mahungu yo saseka va nga va lisima ka Jehovha?

⁸ A vamakabye va yimisilweko ni lava va nga ntirweni wa cikhati contlhe, hi vona voce va nga va lisima lomu bandleni? Ahihi. Vontlhe vahuweleli va mahungu ya ma nene va lisima ka Nungungulu ni ka bandla. (Rom. 10:15; 1 Kor. 3:6-9) Hakuva a kungo ga lisima ga bandla ku mu mahela vapizani Jesu Kristu, a Hosi ya hina. (Mat. 28:19, 20; 1 Tim. 2:4) Vontlhe vahuweleli, va ku bhabhatiswa ni vo kala ku bhabhatiswa, va ti karatela ku rangisa ntiro wa kuchumayela wutomini gabye. — Mat. 24:14.

9. Hikuyini hi va nyikako lisima a vamakabye va hina va cisati?

⁹ Jehovha wa va nyika wudzundzo a vamakabye va cisati, hi ku va nyika ntiro wa lisima lomu bandleni. Wa va nyika lisima a vasati lavo, vamamani, va nga felwa, ni va nga chadhangiko va  simamako ku tsumbeka va mu tirela. A Bhibhiliya gi kumbuka makhati yo hlaya a vavasati va tsakisileko Nungungulu. A vavasati lavo va dzundziwa hi kuva cikombiso ci nene hi ku kombisa wutlhari, kukholwa, ku hiseka, kutiya hlanha, ku hana, ni mitiro ya yi nene. (Luka 8:2, 3; Miti. 16:14, 15; Rom. 16:3, 6; Filp. 4:3; Mah. 11:11, 31, 35) A ho ku mu bonga Jehovha hi kuva ni vamakabye va cisati lomu mabandleni ya hina — a vavasati va maKristu va nga ni matshamela ya ma nene yo fana ni ya lava va kumbukiwako lomu ka Bhibhiliya!

10. Hikuyini hi va nyikako lisima lava va khosaheleko?

¹⁰ Ha tsaka kambe hi kuva ni vamakabye vo tala va kulileko hi tanga. Ka mabandla yo kari ku na ni vamakabye va khosaheleko va tirelako Jehovha hi ku tsumbeka wutomini gabye gontlhe. A vokari vabye kuzvilava va gondzile lisine zvezvanyana. Kuzvilava a vakhosaheleko lavo va yimisa ni zvikarato zvo tala hi kota ya tanga. Hambulezvo, a vamakabye lavo va khosaheleko va ti tsitsirita ntirweni wa ku chumayela. Va tlhela va tirisa a ntamu wabye wontlhe kasi va gondzisa van’wani. Ha vhuneka hi matshango yabye. Jehovha wa va nyika wudzundzo, niku hinawu ha va nyika. — Mav. 16:31.

11-12. A vaswa va laha bandleni ga wena va ku tiyisisa kuyini?

¹¹ A vaswa va hina vonawu a va sali ndzhako! Va kumana ni zvikarato zvo tala hakuva va kula ka tiko legi rangelwako hi Sathani na gi tele hi tifilozofiya to biha. (1 Joh. 5:19) Hambulezvo, hontlheni ha tiyisiwa a cikhati hi wonako a vaswa va hina na va hlamula mitlhanganweni, va tira kuchumayeleni, ni ku tiya hlanha va yimela a kukholwa kabye. Muswa, tiyiseka lezvaku u na ni ntiro wa lisima bandleni ga Jehovha. — Lis. 8:2.

¹² Hambulezvo, a vamakabye vo kari zva va karatela ku kholwa lezvaku va lisima lomu bandleni. Maku cini ci nga vhunako a mun’we ni mun’wani wa hina a ku tizwa na a hi wa lisima lomu bandleni? A hi zvi woneni.

13-14. Hikuyini a vokari va ti wonako na va nga hi na lisima lomu bandleni?

¹³ Wona nchumu wa wumbiri hi nga wu gondzako ka cikombiso ca Pawule, i yisa kupima  ka cikarato leci a vanhu vo tala va kumanako naco nyamutlha. A vamakabye vo tala zva va karatela a ku tiva lezvaku va lisima lomu bandleni. Pawule i tsalile lezvi: “Loku a nkondzo wuku: ‘Lezvi ndzi kalako ndzi nga hi canja a ndzi ciro ca miri’, wu nga ta tsika kuva ciro ca miri hi kota ya lezvo. Ni loku a ndleve yiku: ‘Lezvi ndzi kalako ndzi nga hi tihlo, a ndzi ciro ca miri’, yi nga ta tsika kuva ciro ca miri hi kota ya lezvo.” (1 Kor. 12:15, 16) Zvini lezvi Pawule a hi gondzisako?

¹⁴ Loku u ti fananisa ni van’wani lomu bandleni, u nga ha alakanya lezvaku a wu vhuni nchumu. A vo kari lomu bandleni va na ni wutlhari ga ku gondzisa, ku chavelela ni ku tiyisa van’wani. Kuzvilava u tizwa na u nga hi na wutlhari go fana ni ga van’wani. Lezvo zvi komba lezvaku wa ti koramisa. (Filp. 2:3) Kanilezvi ti wonele, loku u tshamela ku ti fananisa ni van’wani va nga ni wutlhari go hlawuleka, u ta mbhela ntamu. A ku fana ni lezvi Pawule a nga wula, u nga tshuka u ti zwisa ku khwatsi a wu vhuni nchumu lomu bandleni. Zvini zvi nga ku vhunako ku hlula a kutizwa loko?

15. Hi kuya hi 1 Va Le Korinte 12:4-11, zvini hi faneleko ku zvi tiva xungetano hi zvinyikiwo lezvi kuzvilava hi nga nazvo?

¹⁵ Ehleketa hi mhaka leyi: Ka zana ga malembe go sangula, Jehovha i ma nyikile zvinyikiwo zvo hlamalisa a maKristu yo kari hi ku tirisa a moya wo basa. Kanilezvi a ma nyikiwangi a zvinyikiwo zvo fana. (Lera 1 Va Le Korinte 12:4-11.) Jehovha i va nyikile zvinyikiwo zvo hambana; kanilezvi a mun’we ni mun’wani wabye i wa hi wa lisima. Nyamutlha a hi mahi zvihlamaliso hi ku tirisa moya wa ku basa, kanilezvi a tshinya legi ga nayo ga ha tira. Hambu loku hi nga hi na wutlhari go fana, hontlheni hi va lisima ka Jehovha.

16. Wusungukati muni ga mupostoli Pawule hi faneleko ku gi tirisa?

¹⁶ Wutshan’wini ga ku ti fananisa ni man’wani maKristu, hi fanele ku tirisa wusungukati gi pimisilweko ga mupostoli Pawule, gi nge: “A mun’we ni mun’wani i wa hlole mitiro yakwe, hi kona a to kuma cigelo ca ku ti dzundza hi zva yena n’winyi, na a nga ti fananisi ni mun’wani munhu.” — Gal. 6:4.

17. Hi ta vhunekisa kuyini loku hi landzela wusungukati ga Pawule?

 ¹⁷ Loku hi landzela a wusungukati gi pimisilweko ga Pawule, hi tlhela hi hlola a mitiro ya hina venyi, hi nga sangula ku wona lezvaku hi na ni wutlhari ga ku a van’wani a va nago. Hi cikombiso, zva koteka ku a dhota go kari, gi nga hi na wutlhari ga ku veka khwatsi tikanelo; hambulezvo, na gi humelela khwatsi ntirweni wa kuchumayela. Zva koteka kambe a ku na gi nga xaxameti khwatsi zvilo a ku fana ni madhota man’wani laha bandleni; hambulezvo, na gi hi gi nene gi tlhela gi kombisa lirandzo. A vamakabye kambe va nga tizwa na va tlhatlhekile ku kombela wusungukati ka gona. Zvi nga ha maha na gi tiviwa khwatsi hi ku amukela vapfhumba. (Mah. 13:2, 16) Loku hi zvi wona hi tlhela hi zvi tiva khwatsi a zvinyikiwo zva hina, hi tava ni zvigelo zva ku tizwa khwatsi hi lezvi hi nga mahako kasi ku vhuna bandla. Niku hi nga tava ni ciluse hi vamakabye lava va nga ni zvinyikiwo zvo hambana ni lezvi zva hina.

18. Zvini hi nga mahako kasi hi zvi kota ku gondzisa khwatsi?

¹⁸ Kani i ntiro muni hi nga nawo lomu bandleni, hontlheni hi fanele ku xuva ku chukwatisa a ntiro wa hina ni kuva ni wutlhari. Kasi ku hi vhuna ku chukwatisa, Jehovha i hi gondzisa hi ndlela ya yi nene nguvhu hi ku tirisa hlengeletano yakwe. Hi cikombiso, ka mutlhangano wa hina wa cikari ka vhiki, hi gondzisiwa lezvi hi nga wu mahisako zvona a ntiro wa hina wa kuchumayela. Loku u hi ntirweni wa kuchumayela, wa zama ku tirisa lezvi u gondzako mutlhanganweni lowu?

19. Zvini u nga mahako kasi u tatisa mixuvo ya kuya cikoleni ca Vavhangeli va Mufumo?

¹⁹ A yin’wani gondziselelo yo hlamalisa Cikola ca Vavhangeli va Mufumo. A cikola leci ci gondziwa hi vamakabye va nga ntirweni wa cikhati contlhe va nga ni 23 kuya ka 65 wa malembe. U nga ha zvi wonisa ku u nga ta tshuka u ringanelwa hi ku gondza a cikola leci. Kanilezvi, wutshan’wini ga ku maha lista ya lezvi zvi ku mahako u alakanya ku u nge tshuki u gondza cikola leci, maha lista ya lezvi zvi ku mahako u lava ku gondza. Loku u mahile lezvo, gumesa u hlota tindlela ta ku maha lezvi zvi lavekako kasi u ringanelwa hi ku gondza cikola leci. Hi ku vhuniwa hi Jehovha ni ku ti karata ka wena, u nga tshuka u ti wona na u maha lezvi u nga alakanya ku a zvi koteki.

20. Zvini hi nga gondzako ka Va Le Roma 12:6-8?

²⁰ A nchumu wa wunharu hi nga gondzako ka mufananiso wa Pawule wu kumeka ka Va Le Roma 12:6-8. (Lera.) Ka mavhesi lawa, Pawule i tlhela a komba lezvaku lava va nga lomu bandleni va na ni zvinyikiwo zvo hambana. Kanilezvi laha i khanyisa lezvaku hi fanele ku tirisa ni cihi cinyikiwo hi nga naco kasi ku aka ni ku tiyisa bandla.

21-22. Cini hi nga gondzako ka matimu ya Robert na Felice?

²¹ Ehleketa hi lezvi zvi nga humelela makabye hi to mu vitana ku hi Robert. Andzhako ka ku tira hi malembe yo tala tikweni gin’wani, i no nyikwa ciavelo ca kuya tira Bheteli ya lomu tikweni gabye. Hambu lezvi a vamakabye va nga mu tiyisekisa lezvaku a nga ciciwangi hi kuva a mahile zvo biha, i wulile lezvi: “Ku hundzile tihweti to tala na ndzi nga tsaki hakuva ndzi wa alakanya lezvaku ci kona ndzi nga kala ku maha khwatsi ntirweni wa mina. Ku vile ni cikhati ndzi nga alakanya ni ku huma Bheteli.” Cini ci nga mu vhuna ku li wuya a litsako lakwe? I no alakanyisiwa hi dhota-kuloni lezvaku ka zvontlhe zviavelo hi nga hundza hi ka zvona, Jehovha i hi gondzisile kasi hi tirisiwa khwatsi ka ntiro hi wu mahako zvezvi. Robert i no zvi zwisisa lezvaku i fanele ku tsika ku veka kupima ka zvilo zvi hundzileko, kanilezvi a ku veka ka lezvi a nga fanele ku maha ka cikhati leco.

 ²² Makabye Felice Episcopo i kumene ni cikarato co fana. Yena ni sati wakwe va gradhuwarile cikoleni ca le Gileyadhe hi 1956 a tlhela a tira kota muwoneleli wa cipandze le Bolívia. A sati wakwe i no xura nyimba va pswala n’wana hi 1964. Felice i ngalo: “Zvi hi bindzele nguvhu a ku tsika ciavelo ca hina hi nga ci randza. Kasi ku wula lisine, ku hundzile cipimo ca lembe na ndzi mbhelile ntamu, kanilezvi hi ku vhuniwa hi Jehovha ndzi cicile a mawonela ya mina, ndzi vekile kupima ka ciavelo ca mina ca ciswa kota mupswali.” U tizwa ku fana na Robert na Felice? U mbhelile ntamu hi kuva u luzile ciavelo ca wena? Loku zvi hi lezvo, u nga tsaka loku u cica mawonela ya wena u veka kupima ka lezvi u nga mahako zvezvi kasi u tirela Jehovha ni vamakabye. Tshama na u khomekile hi ku tirisa zvinyikiwo zva wena ni wutlhari ga wena kasi u vhuna van’wani. Loku u maha lezvo, u ta kuma litsako laha u tiyisako bandla.

23. Zvini hi faneleko ku ti nyika cikhati ca ku maha, niku zvini hi to gondza ka ndzima yi landzelako?

²³ Hontlheni hi va lisima ka Jehovha. I lava lezvaku hi tizwa na hi hi zviro zva ngango wakwe. Loku hi ti nyika cikhati ca ku ehleketa hi lezvi hi nga mahako kasi hi aka ni ku tiyisa vamakabye, hi tlhela hi ti karata kasi ku zvi maha futsi, zva kanakanisa a ku hi ta tizwa na hi nga vhuni nchumu lomu bandleni. Ahati a van’wani laha bandleni ke, hi va wonisa kuyini? Hi nga kombisa kuyini lezvaku ha va randza niku ha va nyika lisima? Ka ndzima yi landzelako hi ta bhula hi mhaka leyi ya lisima.