Ka ndzima leyo, hi wonile lezvaku ku na ni mhaka ya lisima yi khumbako a vanhu ni tingilozi — ku nga kubasisiwa ka vito ga Jehovha. A mhaka ya kubasisiwa ka vito ga Jehovha, yi yelanako ni ku komba ku Jehovha wa fuma khwatsi kutani ahihi, ya lisima nguvhu. Hi ndlela yo fana, a mhaka ya ku tiva ku a vanhu va nga tirela Jehovha hi kutsumbeka kutani ahihi yonawu ya lisima kubasiseni ka vito ga Jehovha.

Hikuyini hi khanyisako ku a mhaka ya lisima i vito ga Jehovha ni kubasisiwa ka gona? A hi woneni zvigelo zvinharu.

Co sangula, Sathani i vhukele a vito ga Jehovha kutani wumunhu gakwe, le sin’wini ga Edheni. A ciwutiso leci Sathani a nga wutisa Evha, ci wa komba ku Jehovha wa tsona niku a milayo a nga vekela Adhamu na Evha yi wa nga lulamangi. Hi kumaha lezvo, Sathani i no kaneta Jehovha. Hi kukongoma i no wula ku Nungungulu muhembi. Hi kota ya lezvo i no chakisa vito ga Jehovha. Yena i no maha “Sathani”, lezvi zvi wulako ku “mulumbeti.” (Joh. 8:44) Hi kota ya lezvi Evha a nga ingisa mawunwa ya Sathani, i no tsika ku ingisa Nungungulu, lezvi zvi nga komba ku i wa nga lavi ku rangelwa hi yena. (Gen. 3:1-6) Kala nyamutlha, Sathani wa ha chakisa a vito ga Nungungulu a tlhela a hangalasa mawunwa xungetano hi gona. Lava va kholwako ka mawunwa yakwe a va toloveli ku ingisa Jehovha. Kanilezvi, ka vanhu va Nungungulu, a ku chakisa a vito go basa ga Jehovha zvi bihile nguvhu. Leco cigelo ci mahako ku kuva ni kuxaniseka ni zvikarato zvo tala laha misaveni.

Kasi a zvivangwa zvontlhe zvi vhuneka, Jehovha i ti yimisele ku lwela vito gakwe, a gi basisa ka zviruko zvontlhe. Lezvo hi zvona zva lisima nguvhu ka Jehovha. Yena i wula lezvi: ‘Ndzi ta basisa a vito ga mina ga hombe.’ (Ezek. 36:23) Niku Jesu i kombile kubaseni a nchumu lowu a malandza yo tsumbeka ya Jehovha ma faneleko ku wu rangisa mikhongelweni yabye, laha a ngaku: “A vito ga wena a gi basisiwe.” (Mat. 6:9) Hi kuphindaphinda, a Bhibhiliya ga khanyisa a lisima la ku dzundza a vito ga Jehovha. Wona zvikombiso zvokari: ‘Nyikani Jehovha a wudhumo gi faneleko a vito gakwe!’ (1 Kro. 16:29; Lis. 96:8) “Yimbelelani a wukulu ga vito gakwe”. (Lis. 66:2) ‘Ndzi ta kulisa a vito ga wena kala kupindzuka.’ (Lis. 86:12) A gin’we ga makhati lawa Jehovha wutsumbu a wulawulileko na a hi tilweni ku vile tempeleni le Jerusalema, laha Jesu a ngaku: “Papayi, dhumisa a vito ga wena.” Jehovha a hlamula, aku: “Ndzi gi dhumisile, ndzi ta tlhela ndzi gi dhumisa.” — Joh. 12:28. a

Ca wunharu, a kungo go sangula ga Jehovha gi yelana ni vito gakwe, kutani kubasa ka gona. Alakanyela hi lisima li tova ni vito ga Jehovha andzhako ka 1000 wa malembe ya kufuma ka Kristu. A vanhu ni tingilozi va ta ti zwisa kuyini xungetano hi vito ga Jehovha ka cikhati leco? Kasi hi kuma a hlamulo, a hi ehleketeni hi zvilo zvimbiri zva lisima zva mhaka leyi, ku nga kutsumbeka ka vanhu ni wuhosi  ga wuako gontlhe. Lava va to ngha va kombile ku va tsumbekile va ha ta simama ku ringiwa kasi va komba ku va ha tsumbekile? Ahihi. Va ta ngha va mbhelele ni ku ngha va ringilwe zvi enela. Va ta ngha va amukele wutomi ga pindzukelwa. A ku a tingilozi ni vanhu va ta simama va kanakanela a mufumo wa wuako gontlhe? Ahihi. Ka cikhati leco, vontlhe le tilweni ni laha misaveni va ta zwanana va tlhela va vhumela ku Jehovha hi yena a faneleko ku fuma. Kanilezvi ka cikhati leco, a ku a vito ga Jehovha gi ta simama gi hi nchumu wa lisima ka vanhu vakwe?

Ka cikhati leco, vontlhe va ta yi tiva lisine xungetano hi Jehovha ni vito gakwe, niku gi ta basisiwa hi kumbhelela. Hambulezvo, a vito ga Jehovha gi ta simama gi hi nchumu wa lisima ka wontlhe malandza yakwe le tilweni ni laha misaveni. Hikuyini? Hakuva ma ta wona Jehovha na a simama ku maha zvilo zvo hlamalisa. Ehleketa hi lezvi: Hi kota ya lezvi Jesu a to ti koramisa a tlhelisa a mufumo ka Jehovha, Nungungulu i tava “zvontlhe ka vontlhe.” (1 Kor. 15:28) Andzhako ka lezvo, a vanhu laha misaveni va ta ti buza hi “kutlhatlheka ka kungangamela ka vana va Nungungulu.” (Rom. 8:21) Niku Jehovha i ta tatisa hi kumbhelela a kungo gakwe ga kale ni kale ga ku tlhanganisa a zvivangwa zvakwe zvontlhe, zva le tilweni ni laha misaveni, zviva ngango wun’we wu boheneko. — Efe. 1:10.

Andzhako ka zvontlhe lezvi, a ngango wa Jehovha le tilweni ni laha misaveni wu ta ti zwisa kuyini? Handle ko kanakana hi ta ngha na hi hi ni kuxuva ka hombe ka ku lava ku dzundza a vito ga Jehovha. Dhavhidha a mutsali wa tisimu i pimiselwe ku tsala lezvi: ‘A khesiwe Jehovha, a Nungungulu . . . A gi khesiwe a vito gakwe ga hombe kala kupindzuka.’ (Lis. 72:18, 19) Hi ta simama hi kuma a zvigelo zviswa zvo tsakisa lezvi zvi to hi maha hi dzundza Jehovha.

A vito ga Jehovha gi yimela zvontlhe xungetano hi yena. Loku hi ehleketa xungetano hi vito ga Jehovha, zvi hi alakanyisa a lirandzo lakwe. (1 Joh. 4:8) Contlhe cikhati hi ta alakanya ku lirandzo lakwe li nga mu maha a hi vanga, ni ku hi nyika hakhelo ya kutlhatlhisa, a tlhela a hi komba ku a mufumo wakwe hi wona wo lulama ni wa lirandzo. Kanilezvi hi ta simama ku wona Jehovha na a kombisa lirandzo ka zvivangwa zvakwe kala kupindzuka. Hi ta kuceka a ku tshinela kusuhani kakwe kota papayi wa hina, hi tlhela hi dzundza a vito gakwe ga hombe hi tisimu kala kupindzuka. — Lis. 73:28.