Mupostoli Pawule i tsalele maKristu ya le Tesalonika, aku: “Loku a wokari a nga ingisi a magezu ya hina ma nga ka papilo legi, markarani a munhu loye”. (2 Tes. 3:14) A kale hi wa wula lezvaku a cileletelo leci ci waya ka madhota. Loku a munhu a simama ku kanyisa matshinya ya milayo ya Bhibhiliya hambu loku a nyikiwa wusungukati hi kuphindaphinda, a madhota ma wa fanele ku veka kanelo ya ku tlharihisa bandla. Hikwalaho, a vahuweleli va wa ta nyima ku ti tlhanganisa ni munhu loyi a markarilweko.

Hambulezvo, ku cicile zvokari. Zvo khwatsi a wusungukati ga Pawule gi wula zvilo lezvi a muKristu mun’we ni mun’wani a faneleko ku maha ka zviyimo zvo kari. Hikwalaho, a ka ha hi na cigelo ca ku a madhota ma veka kanelo ya ku tlharihisa bandla. Hikuyini ku vileko ni kucica loko? Wona mongo wa wusungukati ga Pawule.

Pawule i wa wonile lezvaku a vokari ka bandla lego va wa ‘famba hi vhilinganya’. Va wa nga cheli kota hi wusungukati gi pimiselweko. Ka liendzo lakwe li nga hundzile, Pawule i wa va byelile lezvi: “Loku a munhu a nga zvi lavi ku tira, ngha a ngagi.” Hambulezvo, a vokari va wa nga zvi lavi ku tira kasi ku ti hanyisa, hambu lezvi zvi nga koteka ku va maha lezvo. A cin’wani kambe, va wa nghenela zvilo zvo kala zvi nga va lumbi. A maKristu ma wa ta va khomisa kuyini a vanhu lavo va vhilinganya? — 2 Tes. 3:6, 10-12.

Pawule i te: “Markarani a munhu loye”. A gezu ga ciGreki gi nyika maalakanyo ya ku mu tiva khwatsi munhu loye u tlhela u ti wonela ku a nga ku kuceteli. Pawule i nyikile cileletelo leci ka bandla gontlhe, na ku nga hi ka madhota basi. (2 Tes. 1:1; 3:6) Hikwalaho, a muKristu mun’we ni mun’wani a nga wona lezvaku a muKristu-kuloni a nga ingisi a wusungukati ga Mhaka ya Nungungulu, kuzvilava i wa ta boha ku nyima “ku hlengela” ni munhu loye wa vhilinganya.

Xana lezvo zvi wula ku a munhu loye i wa wonisiwa ku khwatsi i no susiwa bandleni? Ahihi, hakuva Pawule i engetile aku: “Simamani ku mu nyika wusungukati kota makabye”. Hikwalaho, a muKristu mun’we ni mun’wani i wa ta simama ku ti tlhanganisa ni munhu loye mitlhanganweni ya bandla ni kuchumayeleni, kanilezvi i wa ta boha ku nyima ku hlengela naye lomu ka mibuzo kutani lomu ko hlakana. Hikuyini? Pawule i te: “Kasi awa tingana”. Kota wuyelo ga ku markariwa, a muKristu loye wa vhilinganya kuzvilava i wa tawa tingana a tlhela a cica mahanyela yakwe yo biha. — 2 Tes. 3:14, 15.

A maKristu nyamutlha ma nga gi tirisisa kuyini a wusungukati legi? Co sangula, hi fanele ku tiyiseka lezvaku hakunene a munhu loye munhu wa “vhilinganya” a ku khwatsi hi lezvi Pawule a zvi tlhamuselisileko zvona. Pawule i wa nga wuli lava hi hambanako navo hi mawonela, hi timhaka ti yelanako ni livhalo kutani hi lezvi hi zvi randzako. Niku i wa nga wuli lava va hi swirileko. Wutshan’wini ga lezvo, Pawule i wa wula lava va nga kala ku ingisa a wusungukati ga Nungungulu ha womu.

Nyamutlha, loku a muKristu-kuloni a kombisa moya a lowo wo kala ku ingisa hi ta ti mahela ciboho ha hoce ca ku hi ta simama ku hlengela naye kutani hi ta nyima ku hlengela naye lomu ka mibuzo kutani lomu ka ku hlakana. Kota lezvi ci nga ciboho ca munhu wutsumbu, hi nga ta bhula hi zvona ni van’wani vo kala va nga hi va laha ngangweni wa hina. Niku hi ta simama ku hlengela ni munhu loye mitlhanganweni ni kuchumayeleni. A cikhati leci a cicako mahanyela yakwe, hi nga cica ciboho ca hina, hi simama ku hlengela naye.