1-3. a) Zvini hi nga faneliko ku zvi siya ndzhako loku hi wulawula hi lezvi hi zvi kholwako? b) Hikuyini a kuvhuka ka vafileko ku nga ka lisima nguvhu? (Wona mufota laha hehla.)

LOKU a wokari o ku wutisa ku hi tihi a tigondzo-tshinya ta wukhongeli ga wena, u wa ta kuyini? Handle ko kanakana u wa ta wula ku ndzi kholwa lezvaku Jehovha hi yena Muvangi niku hi yena a nga hi nyika wutomi. Kuzvilava u nga tlhela uku wa kholwa ka Jesu Kristu, loyi a nga hi fela kota ndzhiho. U wa ta tlhela u wulawula hi paradhise legi gi tova kona laha misaveni, laha a vanhu va Nungungulu va to hanya kala kupindzuka. Kanilezvi xana u wa ta wulawula hi kuvhuxiwa ka vafileko kota cin’we ca zvilo u zvi rindzelako hi mahlo yo pswhuka?

² Hi na ni zvigelo zvo zwala zva ku wulawula hi kuvhuxiwa ka vafileko kota cin’we ca zvilo hi zvi kholwako nguvhu, hambu loku ku hi ku hi rindzela ku pona kuxanisekeni ka hombe hi simama hi hanya kala kupindzuka laha misaveni. Mupostoli Pawule i kombile ku hikuyini a kuvhuka ka vafileko ku nga ka lisima. I te: “Loku ku hi hava a kuvhuka ka vafileko, hambu na Kristu a nga vhukangi.” Phela loku Jesu i wa nga vhukangi,  na a nga fumi kota Hosi le tilweni niku a ntiro wa hina wa kuchumayela wu wa tava wa mahala. (Gondza 1 Va Le Korinte 15:12-19.) Kanilezvi, ha zvi tiva ku Jesu i vhuxilwe hi ka vafileko. Hikwalaho, a hi fani ni vaSadhusi lava va nga kala va nga vhumeli lezvaku a vafileko va nga tlhela va hanya kambe. Hambu loku a van’wani va hi tseketsekela, a kukholwa ka hina ka ku Nungungulu i ta vhuxa vafileko ku simama ku tiyile. — Marku 12:18; Mitiro 4:2, 3; 17:32; 23:6-8.

³ Pawule i te a “kuvhuka ka vafileko” ku maha cipandze ca “timhaka to sangula ta gondzo ya Kristu”. (Mahebheru 6:1, 2) I wa ku rangisa nguvhu loku a wulawula hi lezvi a nga zvi kholwa. (Mitiro 24:10, 15, 24, 25) A kuvhuka ka vafileko yin’we ya tigondzo to sangula hi ti kumako lomu ka Mhaka ya Nungungulu. Hambulezvo hi fanele ku simama hi gondza zvin’wani hi mhaka leyi. (Mahebheru 5:12) Hikuyini?

4. Zviwutiso muni hi nga ti mahako xungetano hi kuvhuka ka vafileko?

⁴ Na va ha sangula ku gondza Bhibhiliya, a vanhu va tolovela ku lera matimu ya vanhu va nga vhuxiwa hi ka vafileko cikhatini ci hundzileko, vo kota Lazaru. Va gondza kambe va tiva lezvaku Abrahama, na Joba, na Dhaniyeli va wa kholwa ku a vafileko va ta tlhela va hanya kambe cikhatini ci tako. Hambulezvo, u ngaku yini loku a wokari o ku kombela ku tlhamusela hi ku tirisa Bhibhiliya a ku cini ci ku kholwisako lezvaku a zvitsumbiso zva kuvhuka ka vafileko zvi mahilweko kale nguvhu zvi ta tatiseka? Kona a Bhibhiliya ga wula ku a vafileko va ta vhuka rini ke? A mihlamulo ya zviwutiso lezvi yi ta tiyisa kukholwa ka hina.

5. Zvini hi to wulawula hi zvona kuranga?

⁵ Loku a munhu a ha hi kufa, a zvi karati ku zvi kholwa loku vaku i vhuxilwe hi ka vafileko. (Johani 11:11; Mitiro 20:9, 10) Kanilezvi, ahati lezvi ku hundzako mazanazana ya malembe na ku tsumbisilwe lezvaku a vafileko va ta vhuka? Ha kholwa lezvaku a maxaka ya hina ni vanghana va ta vhuka, hambu lava va ngafa kale? A Bhibhiliya gi wulawula hi munhu a nga vhuxiwa hi ka vafileko andzhako ka mazanazana ya malembe na zvi tsumbisilwe lezvaku i ta vhuka. Hambu wena wa kholwa ku zvi mahekile. Himani munhu wa kona niku lezvo zvi yelanisa kuyini ni citsumbiso ca ku a vafileko va ta vhuka cikhatini ci tako?

6. Jesu i patsekisile kuyini kutatisekeni ka Lisimu 118?

⁶ Zvalezvi a hi wulawuleni hi munhu a nga vhuka hi ka vafileko na zvi phrofetilwe kale nguvhu. A ciphrofeto ca kona hi ci kuma ka Lisimu 118, leli kuzvilava li nga tsaliwa hi Dhavhidha. Li na ni magezu lawa: “Jehovha, hanyisa makunu, . . . ha ku kombela. A khesiwe yena loyi a tako vitweni ga Jehovha.” A vanhu va tshahile magezu lawo ma wulawulako hi Mesiya a cikhati leci Jesu a nga nghena Jerusalema na a khilele cimbongolana hi 9 ka Nisani, na ku kiyela masiku matsongwani kasi a dawa. (Lisimu 118:25, 26; Matewu 21:7-9) Kanilezvi, a Lisimu 118 li wulawulile hi munhu a nga wa ta vhuka hi ka vafileko andzhako ka malembe yo tala hi ndlela muni? Wona magezu man’wani hi ma kumako ka lisimu lelo: “A ribye legi gi nga aliwa hi vaaki, gi mahile a hloko ya magumo.” — Lisimu 118:22.

7. A vaJudha va alile Jesu hi ndlela muni?

 ⁷ A “vaaki” lava va nga ala Mesiya varangeli va vaJudha. A hi ku khwatsi va no mu chepeta kutani ku ala lezvaku hi yena Kristu basi. Kanilezvi a vaJudha vo tala va mu alile hi ku kurumeta Pilatu lezvaku a mu daya. — Luka 23:18-23.

8. Jesu i wa ta mahisa kuyini “hloko ya magumo”?

⁸ Loku Jesu a alilwe a tlhela a dawa, i wa ta mahisa kuyini “hloko ya magumo”? Zvi wa ta maheka ntsena loku a vhuxiwa hi ka vafileko. Jesu i dlunyatisile mhaka leyi a cikhati a nga hlawutela mufananiso wa n’winyi wa simu a nga rumela malandza yakwe ka varimi lava va nga tira sin’wini lego. A varimi va no xanisa malandza lawo. Hi magumo, a n’winyi wa simu i no rumela n’wana wakwe, na aku kuzvilava va ta mu ingisa. Kanilezvi va no khoma n’wana loye va mu daya. Andzhako ka ku hlawutela mufananiso lowu, Jesu i tshahile a ciphrofeto ci nga ka Lisimu 118:22. (Luka 20:9-17) Mupostoli Pedro i tirisile vhesi galego a cikhati a nga wulawula ni ‘vafumeli, ni masingalakati, ni vatsali va nga tsombene le Jerusalema’. I wulawulile hi “Jesu Kristu wa le Nazareta”, aku “loyi n’wina mu nga mu belela, loyi Nungungulu a nga mu vhuxa hi ka vafileko”. Hi kulandzela i te: “Hi yena a nga ribye gi nga aliwa hi n’wina vaaki, legi gi nga mahiwa a hloko ya magumo.” — Mitiro 3:15; 4:5-11; 1 Pedro 2:5-7.

9. Cimaho muni co hlawuleka ci phrofetilweko ka Lisimu 118:22?

⁹ Zvi te dlunya ku a ciphrofeto ci nga ka Lisimu 118:22 ci wulawulile hi kuvhuka ka vafileko ku nga wa ta maheka andzhako ka mazanazana ya malembe. Mesiya i wa ta aliwa a tlhela a dawa. Hambulezvo, i wa ta vhuxiwa hi ka vafileko a maha hloko ya magumo. Andzhako ka kuva a vhuxilwe hi ka vafileko, Jesu ive yena yece loyi a vito gakwe “gi nyikilweko cikari ka vanhu, legi hi nga hanyiswako ha gona”. — Mitiro 4:12; Va Le Efesusi 1:20.

10. a) A Lisimu 16:10 li phrofetile yini? b) Cini ci kombako lezvaku a Lisimu 16:10 a li wulawuli hi Dhavhidha?

¹⁰ Zvalezvi a hi wulawuleni hi vhesi gin’wani gi phrofetileko kuvhuka ka munhu hi ka vafileko. A ciphrofeto leco ci tatisekile na ku hundzile 1000 wa malembe. Lezvo zvi fanele ku hi tiyisa lezvaku a citsumbiso ca kuvhuka ka vafileko ci nga tatiseka hambu loku ci mahilwe kale nguvhu. Ka Lisimu 16, hi kuma magezu ya Dhavhidha yaku: “U nga ta tsika a muhefemulo wa mina le Xeyole; ge hambu ku tsika a wakubasa wa wena a wona kubola.” (Lisimu 16:10) A hi  ku khwatsi Dhavhidha i wo ti byela ku a nga ta tshuka afa aya Xeyole, kutani cilahleni. A Mhaka ya Nungungulu yi zvi veka kubaseni lezvaku Dhavhidha i khosahele a gumesa afa, a “etlela zvin’we ni vararu vakwe, a lahliwa le mutini wa Dhavhidha.” (1 Tihosi 2:1, 10) Makunu, a vhesi legi gi wula mani?

11. Pedro i tlhamusele rini a Lisimu 16:10?

¹¹ Andzhako ka 1000 wa malembe na Dhavhidha a tsalile magezu lawo, Pedro i kombile loyi a Lisimu 16:10 li wulawulako hi yena. Andzhako ka mavhiki matsongwani na Jesu a file a tlhela a vhuxiwa, Pedro i wulawulile ni makume ya mazana ya vaJudha ni makholwa ya ciJudha. (Gondza Mitiro 2:29-32.) I va alakanyisile lezvaku Dhavhidha i wa file a tlhela a lahliwa. A Bhibhiliya a gi kombi ku i kona a nga kaneta a cikhati leci Pedro a ngaku Dhavhidha i no ‘wona hi mahlweni, a kanela hi kuvhuka’ ka Mesiya.

12. A Lisimu 16:10 li tatisekisile kuyini, niku lezvo zvi tiyisisa kuyini a citsumbiso ca ku a vafileko va ta vhuka?

¹² Pedro i seketele mhaka leyo hi ku tshaha magezu ya Dhavhidha ma nga ka Lisimu 110:1. (Gondza Mitiro 2:33-36.) A tlhamuselo wakwe wa ku tirisa Mitsalo wu vhunile cidlemo leco ca hombe a ku kholwa lezvaku Jesu i “Hosi ni Kristu.” A vanhu va zvi zwisisile lezvaku a Lisimu 16:10 li tatisekile a cikhati leci Jesu a nga vhuxiwa hi ka vafileko. Hi ndzhako ka cikhati, mupostoli Pawule i tirisile mhaka yaleyi ya yin’we a cikhati a nga bhulisana ni vaJudha dhoropeni ga Antiyokiya, le Pisidhiya. A mhaka leyo yi va khumbile nguvhu laha ka kuza va lava ku simama vazwa zvin’wani. (Gondza Mitiro 13:32-37, 42.) A kuva a zviphrofeto lezvo zva kuvhuka ka vafileko zvi tatisekile hambu lezvi ku nga hundzile mazanazana ya malembe, zvi fanele ku tiyisa a kukholwa ka hinawu.

13. Zviwutiso muni hi nga ti mahako xungetano hi kuvhuka ka vafileko?

¹³ A zvo ku tiyisa hlana a ku tiva lezvaku a citsumbiso ca kuvhuka ka vafileko ca tatiseka hambu loku ci mahilwe kale nguvhu. Hambulezvo a vokari va nga ha ti wutisa ku: “Xana lezvo zvi wula ku ndzi fanele ku rindzela nguvhu kasi kuza ndzi wona maxaka ya mina ma fileko? Kasi a vafileko va ta vhuka rini?’ Jesu i byelile vapostoli vakwe aku ku wa hi ni zvilo va nga kala va nga zvi tivi zvaku va wa nga ta zvi tiva kambe. Ku na ni zvilo zvi yelanako ni “zvikhati ni tinguva, lezvi Dhadhani a zvi yimisileko hi ntamu wakwe” zvaku zvo tiviwa hi yena n’winyi. (Mitiro 1:6, 7; Johani 16:12) Hambulezvo zvi kona hi zvi tivako xungetano hi cikhati leci a vafileko va to vhuka hi cona.

14. A kuvhuka ka Jesu hi ka vafileko ku hambanisa kuyini ni ka lava va nga ranga va vhuxiwa?

¹⁴ Loku Jesu i wa nga vhukangi hi ka vafileko, hontlheni na hi nga hi na kutsumba ka ku tlhela hi wona maxaka ya hina ma fileko. Hikwalaho, a kuvhuxiwa kakwe ka lisima nguvhu. Lava va nga ranga va vhuxiwa, vo kota lava va nga vhuxiwa hi Elija na Elixa, a va hanyangi kala kupindzuka. Va tlhelile vafa va maha misava le cilahleni. Kanilezvi Jesu loyi a “vhuxilweko hi ka vafileko a nga ta hafa kambe; a kufa a ka hi na ntamu hehla kakwe”. I “hanya kala kupindzuka” le tilweni. — Va Le Roma 6:9; Kuvhululelwa 1:5, 18; Va Le Kolosi 1:18; 1 Pedro 3:18.

15. Hikuyini Jesu a vitaniwako lezvaku “matewula?”

 ¹⁵ Jesu ive yena wo ranga ku vhuxiwa kota munhu wa moya lezvaku aya hanya tilweni, niku a kuvhuxiwa kakwe hi kona ku nga lisima nguvhu. (Mitiro 26:23) Hambulezvo, a hi yena yece a nga wa ta vhuxiwa aya hanya tilweni. Jesu i tsumbisile vapostoli vakwe vo tsumbeka lezvaku va wa ta ya fuma naye le tilweni. (Luka 22:28-30) Kanilezvi, a nchachazelo lowo va wa ta wu kuma ntsena andzhako ka loku va file. Va wa ta vhuxiwa na va hi ni miri wa moya a ku fana na Jesu. Pawule i tsalile lezvaku “Kristu i vhukile hi ka vafileko, hi yena matewula ya vona lava va etleleko”. Hi kulandzela, i wulile lezvaku ku wa tava ni van’wani va nga wa ta vhuxiwa vaya tilweni. I te: “Mun’we ni mun’wani i ta vhuka hi cikhati cakwe: a matewula hi Kristu; zvonake lava va nga va Kristu va ta vhuka a kuwuyeni [‘cikhatini ca kuvakona’, NM] kakwe”. — 1 Va Le Korinte 15:20, 23.

16. Cini ci hi vhunako ku tiva a cikhati leci lava va yako tilweni va nga wa ta vhuxiwa hi cona?

¹⁶ A magezu ya Pawule ma hi vhuna ku wona a cikhati leci lava va yako tilweni va nga wa ta vhuxiwa hi cona. Va wa ta vhuxiwa cikhatini ca kuvakona ka Kristu. A Timboni ta Jehovha ti na ni malembe na ti tlhamusela hi ku tirisa Bhibhiliya lezvaku a “kuvakona” ka Kristu ku sangulile hi 1914. Ni nyamutlha, hi hanya cikhatini ca “kuvakona” kakwe niku a kugumesa ka tiko legi go biha ku laha kusuhani nguvhu.

17, 18. Zvini zvi to humelela vatotilweko vo kari cikhatini ca kuvakona ka Kristu?

¹⁷ A Bhibhiliya gi tlhamusela zvin’wani kambe xungetano hi lava va vhuxiwako vaya tilweni. Gi ngalo: “A hi zvi randzi lezvaku mu kohlwa xungetano ni lava va etlelako . . . Hakuva loku hi kholwa lezvaku Jesu i [file] a tlhela a vhuka, hizvalezvo ni lava va etleleko, Nungungulu i ta va vhuxa . . . Hina lava hi hanyako, lava ha ha seleko kuwuyeni [‘cikhatini ca kuvakona’, NM] ka Hosi, hi nga ta va rangela ha nchumu lava va etleleko. Hakuva yona Hosi wutsumbu yi ta relela hi le tilweni hi huwa yi leletelako, . . . lava va fileko ka Kristu va ta vhuka kuranga. Zvonake hina lava ha ha hanyako, lava hi seleko, hi ta amukelwa zvin’we navo marefini, a ku ya khinga Hosi le ndengelengeni; lezvo hi taku tsondzoma zvin’we ni Hosi.” — 1 Va Le Tesalonika 4:13-17.

¹⁸ A vo ranga ku vhuxiwa vaya tilweni va wa ta vhuxiwa cikhatanyana ndzhako ka loku a kuvakona ka Kristu ku sangulile. A vatotilweko va to ngha va ha hanya cikhatini ca kuxaniseka ka hombe va ta “amukelwa . . . marefini”. (Matewu 24:31) Zvi wula kuyini lezvo? Lavo va to “amukelwa . . . marefini” va nga ta “etlela” kufeni, lezvi zvi wulako ku va nga ta mbheta cikhati co leha na va file. Kanilezvi, zvalezvo va tofa, va ta “hundzuluswa ciyimo hi cikhatanyana co fanana ni kutsopeta ka tihlo, loku ku biwa a mpundzu wo gumesa”. — 1 Va Le Korinte 15:51, 52.

19. Cini a ku “kuvhuka ku nene”?

¹⁹ Inyamutlha, a kutala ka maKristu a ma totiwangi niku a ma hlawuliwangi kasi ku ya fuma na Kristu le tilweni. Kanilezvi, ma rindzela a “siku ga Jehovha” legi a to lovisa hi gona a tiko legi go biha. I hava a zvi tivako khwatsi ku a siku lego gi ta chikela rini, kanilezvi loku hi cuwuka lezvi zvi mahekako nyamutlha ha zvi wona ku gi laha kusuhani. (1 Va Le Tesalonika 5:1-3) Loku a  misava yiswa ya Nungungulu yi ta chikela, ku tava ni kuvhuka ka vafileko ka tshamela gin’wani. Ka cikhati leco, a vanhu va ta vhuxiwa va hanya kwalaha misaveni va tlhela va rindzela ku kuma kumbhelela, va nga hafi kambe. Loko ku tava “kuvhuka ku nene” a ku hundza lava va vhuxilweko cikhatini ci hundzileko va nga gumesa vafa kambe.— Mahebheru 11:35.

20. Hikuyini hi nga tsumbako ku a kuvhuka ka vafileko ku ta maheka hi ndlela yo xaxametwa?

²⁰ Loku gi wulawula hi lava va yako tilweni, a Bhibhiliya gi a “mun’we ni mun’wani i ta vhuka hi cikhati cakwe”. (1 Va Le Korinte 15:23) Hikwalaho hi nga tsumba lezvaku lava va to vhuxiwa laha misaveni vonawu va ta vhuxiwa hi ku landza xaxameto. Lezvo zvi nga hi maha hi ti wutisa lezvi: Xana lava va fileko zvezvanyana va ta vhuka kusanguleni ka Kufuma ka Kristu ka 1000 wa malembe, va amukelwa hi maxaka yabye ni vanghana va va tivako ke? Xana a vavanuna vo tsumbeka va cikhatini ci hundzileko lava va nga hi varangeli vo tlhariha va ta ranga hi vona va vhuxiwa kasi va vhunetela ku xaxameta vanhu va Nungungulu misaveni yiswa ke? Ahati lava va ngafa na va nga zangi va tirele Jehovha ke, va ta vhuxiwa rini niku kwihi? A zvo wutisa zvi tele, kanilezvi a hi faneli ku karateka hi zvilo lezvo zvezvi. A ca chukwana ku rindzela, hi ta wona hi zvona. Hi nga tsumba ku zvi ta tsakisa a ku wona lezvi Jehovha a to mahisa zvona zvilo lezvo.

21. Zvini u zvi rindzelako?

²¹ Zvalezvi hi fanele ku tiyisa kukholwa ka hina ka Jehovha. I tsumbisile hi ku tirisa Jesu lezvaku a vafileko va lomu maalakanyweni yakwe niku i ta va vhuxa hi ka vafileko. (Johani 5:28, 29; 11:23) Kasi ku tiyisa lezvaku Jehovha i ta vhuxa vafileko, ka khati go kari Jesu i te Abrahama, na Isaka, na Jakobe “vontlhe vahanyi” kuwoneni ka Jehovha. (Luka 20:37, 38) Zvi te dlunya lezvaku hi na ni zvigelo zvo zwala zva ku wula magezu yo khwatsi hi lawa ya Pawule yaku: “Ndzi na ni kutsumba ka Nungungulu . . . lezvaku ku tava kona a kuvhuka” ka vafileko.— Mitiro 24:15.