1. Hikuyini a ku bhabhatiswa wu nga nchumu wa lisima nguvhu? (Wona mufota laha hehla.)

LEMBE ni lembe ku bhabhatiswa makume ya mazana ya zvigondzani zva Bhibhiliya. A kutala kabye vaswa, kutani vanana. Kuzvilava va wundlilwe lisineni. Loku u hi mun’we wabye, u mahile nchumu wa lisima nguvhu. A maKristu wontlhe ma fanele ku bhabhatiswa. Lowo i nchumu wu lavekako kasi a munhu a hanyiswa a tlhela a hanya kala kupindzuka. — Matewu 28:19, 20; 1 Pedro 3:21.

2. Hikuyini u nga faneliko ku chava ku ti hendleleta ka Jehovha?

² A cikhati u nga bhabhatiswa, Jehovha i sangulile ku ku katekisa hi tindlela to tala ta tiswa. Kanilezvi u engetelwe wutihlamuleli kambe. Hi ndlela muni? Ka siku lego, a makabye loyi a nga veka kanelo i ku wutisile lezvi: ‘Ciseketelweni ca muphahlo wa Jesu Kristu, u ti solile ka zviwonho zva wena u tlhela u ti hendleleta ka Jehovha kasi ku maha kurandza kakwe ke?’ Wena u hlamula uku ina. U tsumbisile Jehovha lezvaku u ta mu randza ni ku mu tirela niku hi zvalezvo u to zvi rangisa  wutomini ga wena. Xana u fanele ku ti laya hi kuva u mahile citsumbiso leco? Ne ni kutsongwani! U nga ta tshuka u ti laya hi ku tsika Jehovha a rangela wutomi ga wena. Lava va kalako va nga mu tivi Jehovha va lumba tiko ga Sathani, loyi a kalako a nga khatali ne ni kutsongwani hi vona. A nga khatali hi wena kambe. Hi lisine loku wo luza kutsumba ka ku hanya kala kupindzuka hi ku yima naye u tsika Jehovha, Sathani a nga tsaka zva ku cima a wu se zvi wona.

3. Jehovha i ku katekisisa kuyini hi kuva u ti hendleletile kakwe?

³ Ehleketa hi lezvi Jehovha a ku katekisisako zvona hi kuva u ti hendleletile ka yena u tlhela u bhabhatiswa. U nyikele wutomi ga wena ka Jehovha, hikwalaho u nga wula hi kutiya uku: “Jehovha [wa] ndzi yimela, ndzi nga ta chava nchumu; xana munhu a nga ndzi mahela yini?” (Lisimu 118:6) A ku na thomo ga hombe go hundza kuva reveni ga Nungungulu ni ku tiva lezvaku wa tizwa matshandza hi wena.

4, 5. a) Hikuyini hi nga wulako lezvaku munhu ni munhu i lwela gakwe mhakeni ya kutihendleleta? b) Zvikarato muni lezvi a maKristu ya titanga tontlhe ma kumanako nazvo?

⁴ A wunghana ga wena na Jehovha a gi fani ni tshomba kutani petso waku u nga siyelwa hi vapswali va wena. Hambu loku wa ha hanya navo, a wunghana ga wena na Jehovha u fanele ku gi lwela hi wece. Hikuyini zvi nga zva lisima ku alakanya mhaka leyi? Hiku i hava a zvi tivako ku ciringo muni a to kumana naco ka masiku ma tako. Hi cikombiso, kuzvilava u bhabhatisilwe na wa ha hi mutsongwani. Zvalezvi u ka tanga yo sangula ku ti tshotshota. A mbilu ya wena yi sangula ku navela zvin’wani niku u kumana ni zvikarato zva zviswa. A nhanyana wo kari wa tanga leyo i te: “A kutala ka zvikhati a n’wanana a ngazi a xukuvala loku a ngagi bholu ya ku alakanya masiku ya kupswaliwa le cikoleni hi kota ya lezvi a nga Mboni ya Jehovha. Kanilezvi andzhako ka malembe yo kari, a cikhati leci a kunavela ka masango ku kulako, zvi lava ku a tiyiseka khwatsi lezvaku a ku ingisa milayo ya Jehovha hi zvona zva chukwana.”

⁵ A vaswa a hi vona voce va kumanako ni zvikarato zva zviswa. Hambu lava va bhabhatiswako na va hi va hombe, a kukholwa kabye ka ringwa hi tindlela to kala va nga ti rindzelangi. Zvi ngava zviringo zva kungazwanani ka nuna ni sati, mababyi, kutani ntiro wa kutihanyisa. Kani hi vanana kani hi va hombe, hontlheni hi fanele kulwa kasi ku simama hi tsumbekile ka Jehovha ka zviyimo zvo hambanahambana. — Jakobe 1:12-14.

6. a) Zvini u faneleko ku zvi alakanya xungetano hi kutihendleleta ka wena? b) U gondza yini ka Va Le Filipi 4:11, 12 na Isaya 12:2?

⁶ Kasi u zvi kota ku simama u tsumbekile ka Jehovha, tshama na u alakanya lezvi u nga mu tsumbisa. U te u ta mu tirela hambu ko humelela yini; hambu loku a vanghana va wena kutani vapswali va tsika ku mu tirela. (Lisimu 27:10) Ka zviyimo zvontlhe, kombela Jehovha lezvaku a ku vhuna ku maha lezvi u nga mu tsumbisa. — Gondza Va Le Filipi 4:11, 12; Isaya 12:2.

7. Zvi wula yini a ku tirela kuhanyiswa ka wena “hi kuchava ni kururumela”?

⁷ Jehovha i lava lezvaku u maha munghana wakwe. Kanilezvi kasi mu simama kuva  vanghana, u fanele kulwa. Ka Va Le Filipi 2:12, a Bhibhiliya gi ngalo: “Tirelani a kuhanyiswa ka n’wina hi kuchava ni kururumela.” Lezvo zvi wula ku hi fanele ku ehleketa khwatsi hi lezvi zvi to hi vhuna ku simama hi zwanana na Jehovha hi tlhela hi tsumbeka ka yena ni ka cihi ciyimo. Hi nga ti byeli ku hi taku halahala hi tsumbeka. Alakanya lezvaku hambu vanhu va tireleko Nungungulu hi malembe yo tala va tshuka va nga ha tsumbeki. Zvini u nga mahako kasi ku tirela a kuhanyiswa ka wena?

8. A ku gondza Bhibhiliya zvi patsa yini niku hikuyini zvi nga zva lisima?

⁸ Kasi kuva munghana wa Jehovha, hi fanele ku mu ingisela hi tlhela hi bhula naye. A ndlela ya hombe ya ku ingisela Jehovha ku gondza Bhibhiliya. Lezvo zvi patsa ku lera ni ku ehleketa hi Mhaka yakwe ni mabhuku ma seketelwako ka yona. Kanilezvi a ku gondza Bhibhiliya a hi ku lera zvi tshama lomu hlokweni basi, a ku khwatsi hi loku u lava ku ya maha provha cikoleni. Zvi fana ni ku teka lipfhumba lo tsakisa, laha u polako zvilo zviswa xungetano hi Jehovha. Loku u maha lezvo, u ta tshinela ka Nungungulu, yenawu a tshinela ka wena. — Jakobe 4:8.

9. Mahungu muni u ma tirisako ka cigondzo ca wena?

⁹ A hlengeletano ya Jehovha yi humesa zvilo zvo tala zvaku u nga zvi tirisa ka cigondzo ca wena. Hi cikombiso, laha ka cipandze ca vaswa lomu ka jw.org ku na ni maphepha ya zviwutiso laha ka ku Exercícios Bíblicos yaku ma nga ku vhuna ku tirisa  lezvi u zvi gondzako ka matimu ya Bhibhiliya. Ku na ni maphepha kambe yo gondza hi wona a bhuku “Zvini lezvi a Bhibhiliya gi zvi gondzisako hakunene?” A mahungu lawo ma nga ku vhuna ku tiyisa kukholwa ka wena ni ku tlhamusela van’wani lezvi u zvi kholwako. A mawonela man’wani yaku ma nga ku vhuna ka cigondzo ca wena, u nga ma kuma ka ndzima leyi yi nge “Os Jovens Perguntam . . . Como tornar a leitura da Bíblia agradável?” ka Despertai! ga Abril wa 2009. A ku gondza ni ku ehleketa zva lisima kasi u zvi kota ku tirela a kuhanyiswa ka wena. — Gondza Lisimu 119:105.

10. Hikuyini a muKristu a bhabhatisilweko a faneleko ku khongela?

¹⁰ A cikhati hi gondzako Bhibhiliya, ho ingisela Jehovha. A cikhati hi khongelako, ho wulawula naye. Hi nga woni mukhongelo kota mukhuwo kutani mbulo wa ku hi nyika tinjombo. A mukhongelo i ndlela ya ku bhula ni Muvangi wa hina. Phela Jehovha i lava kuzwa lezvi u nga nazvo lomu mbilwini! (Gondza Va Le Filipi 4:6.) Hikwalaho loku u karateka hi zvokari, a Bhibhiliya gi ngalo: “Rula a nzhwalo wa wena ka Jehovha.” (Lisimu 55:22) A vamakabye vo tala va sina va li wonile a lisima la ku ingisa wusungukati lego. Wenawu gi nga ku vhuna!

11. Hikuyini u faneleko ku bonga Jehovha contlhe cikhati?

¹¹ Hi nga khongeli ntsena loku hi lava lezvaku Jehovha a hi vhuna. A Bhibhiliya gi hi byela lezvi: “Muva ni kubonga.” (Va Le Kolosi 3:15) A zvikhati zvin’wani hi bindziwa hloko hi zvikarato zva hina laha ka kuza hi nga ha woni a zvilo zvo tala zva zvi nene lezvi hi nga nazvo. Hikwalaho, siku ni siku zama ku ehleketa hi zvilo zvinharu zva zvi nene, u bonga Jehovha hi zvona. A muswa wo kari waku hi Abigail, a bhabhatisilweko na a hi ni 12 wa malembe, i ngalo: “Ndzi alakanya ku Jehovha hi fanele ku mu bonga nguvhu ku hundza ni wihi munhu mun’wani a nga kona. Contlhe cikhati hi fanele ku mu bonga hi zvinyikiwo zvo saseka lezvi a hi nyikako.” A zvikhati zvin’wani Abigail i ti maha ciwutiso a nga tshuka a cizwa ni wokari caku: “Loku ndzo vhuka mandziko na ndzi no sala ni lezvi ndzi nga mu bonga hi zvona Jehovha nyamutlha basi, ndzi wa ta vhuka ni yini?”

12, 13. Hi rini u nga wona wunene ga Jehovha hi wece, niku hikuyini zvi nga zva lisima ku ehleketa hi lezvi Jehovha a ku vhunisako zvona?

¹² Dhavhidha i timisele zvikarato zvo tala hi ku vhuniwa hi Jehovha. Hikwalaho i wa wula zvilo a zvi tivako a cikhati a ngaku: “Ringani mu wona lezvaku Jehovha i nene; i katekile a munhu loyi a chavelako ka yena.” (Lisimu 34:8) A vhesi legi gi komba lezvaku hi fanele ku wona wunene ga Jehovha ha hoce. A cikhati u lerako Bhibhiliya ni mabhuku ya hina ni kuya mitlhanganweni, u wona lezvi Jehovha a vhunisileko zvona van’wani lezvaku va simama va tsumbekile. Kanilezvi laha a wunghana ga wena na Jehovha gi yako gi tiya, u fanele ku wona lezvi Jehovha a ku vhunisako zvona wena. Xana u tshuka u wona wunene ga Jehovha wutomini ga wena?

¹³ A muKristu mun’we ni mun’wani i mahelwe wunene go hlawuleka hi Jehovha. Hi yena a nga hi ramba lezvaku hi tshinela ka  yena ni ka N’wana wakwe. Jesu i te: “A ku na munhu a zvi kotako kuta ka mina, loku a nga kokiwi hi Dhadhani loyi a ndzi rumileko.” (Johani 6:44) Wa ti wona na u kokilwe hi Jehovha lezvaku u tshinela ka yena? Kutani u ti byela ku ‘Jehovha i no koka vapswali va mina; mina ndzo va landzela’? Alakanya lezvaku a cikhati u nga ti hendleleta ka Jehovha, u bhabhatiswa, u sangulile kuva ni wunghana go hlawuleka ga wena na yena basi. A Bhibhiliya gi ngalo: “Loku munhu a randza Nungungulu, yaloye wa tiviwa hi yena.” (1 Va Le Korinte 8:3) Contlhe cikhati nyika lisima a wutshamu legi Jehovha a ku nyikileko hlengeletanweni yakwe.

14, 15. A ntiro wa kuchumayela wu nga ku vhunisa kuyini ku tiyisa kukholwa ka wena?

¹⁴ U wona wunene ga Jehovha kambe a cikhati a ku nyikako hlana wa ku bhulela van’wani lezvi u zvi kholwako, ku ngava kuchumayeleni kutani cikoleni. Zvi nga tshuka zvi karata ku chumayela zvigondzani-kuloni. U nga ha ti wutisa ku kani va ta zvi khomisa kuyini, nguvhunguvhu loku u alakanyela ku tlhamusela lezvi u zvi kholwako lomu ko tala vanhu. Cini ci to ku vhuna?

¹⁵ Ehleketa hi leci ci ku mahako u kholwa lezvi u zvi kholwako. Loku a maphepha yo gondza hi wona lawa ma nga ka jw.org ma hi kona hi lirimi la wena, ma londzowote. Ma ta ku vhuna ku ehleketa hi lezvi u zvi kholwako, leci ci ku mahako u zvi kholwa, ni lezvi u nga tlhamuselisako zvona van’wani. Loku u tiyiseka u tlhela u ti longisela khwatsi, u ta xuva ku nyika wukustumunyu hi Jehovha. — Jeremiya 20:8, 9.

16. Cini ci nga ku nyikako hlana wa ku wulawula hi lezvi u zvi kholwako?

¹⁶ Hambu loku u ti longisele khwatsi, u nga tshuka u gavatana cifuva loku u alakanyela ku tlhamusela lezvi u zvi kholwako. A makabye wo kari wa 18 wa malembe, a nga bhabhatiswa na a hi ni 13, i ngalo: “Ndza zvi tiva lezvi ndzi zvi kholwako, kanilezvi zva tshuka zvi ndzi karatela ku tlhanganisela magezu kasi ku zvi wula.” Hikwalaho, i zama ku wulawula hi lisine hi ndlela yo khwatsi ku hlakana. I ngalo: “A zvigondzani-kulori a zvi chavi ku wulawula hi lezvi zvi mahako. Minawu ndzi fanele ku maha zvalezvo. Hikwalaho, ndzi kumbuka mhaka yo kari hi ndlela yo khwatsi ku hlakana ndziku: ‘Ka siku go kari na ndzi gondzisa munhu Bhibhiliya, ndzi . . . ’ Hi laho ndziya mahlweni ni mhaka ya mina. Hambu lezvi ndzi kalako ndzi nga tekeli ku khoma mhaka ya lomu ka Bhibhiliya, a kutala ka zvikhati a van’wani va panga tindleve va lava kuzwa lezvi ndzi mahako loku ndzi gondzisa munhu Bhibhiliya. A zvikhati zvin’wani va tlhela va maha zviwutiso. Khati ni khati ndzi tirisako mahela legi, ndziya ndzi gi tolovela. Andzhako ka lezvo, a ndzo ku xalala lomu mbilwini!”

17. Cini cin’wani ci to hi vhuna ku bhulela lisine van’wani?

¹⁷ Loku a van’wani va wona lezvaku wa  khatala nguvhu hi vona u tlhela u va komba cichavo, zvi ta va olovela ku ku komba cichavo wena ni lezvi u zvi kholwako. Olivia wa 17 wa malembe, a nga bhabhatiswa na a ha hi muswa nguvhu, i ngalo: “A kale ndzi wa chava ku loku ndzo nghenisa Bhibhiliya lomu ka mabhulo, a vanhu va taku ‘i sangulile nyamaBhibhiliya loyi.’” Kanilezvi hi kufamba ka cikhati i sangulile kuva ni mawonela yo hambana. Wutshan’wini ga ku veka kupima ka lezvi a zvi chavako, i sangulile ku ti byela lezvi: “A vaswa vo tala a va tivi nchumu hi Timboni ta Jehovha. A Timboni ta kona va ti tivako hi ye’ hina basi. Hikwalaho lezvi hi mahako hi zvona zvi to va kuca ku amukela kutani ku nga amukeli mahungu ya hina. Maku, ahati loku hi chava kutani zvi hi karatela ku wulawula hi lezvi hi zvi kholwako, kutani loku hi ti lumaluma a cikhati hi zamako ku wulawula hi zvona? Va ta alakanya ku a hi ti dzundzi hi lezvi hi nga zvona. Va nga tlhela va nga hi khomi khwatsi hi ku wona ku a hi ti tsumbi. Kanilezvi, loku hi wulawula hi kutlhatlheka xungetano hi lezvi hi zvi kholwako, na hi nga ti lumalumi, hi tlhela hi tala ku bhula hi zvona siku ni siku, zvi nga va maha va hi komba cichavo.”

18. Zvini u faneleko ku maha kasi ku tirela a kuhanyiswa ka wena?

¹⁸ Hi wonile lezvaku a ku tirela kuhanyiswa ka hina a hi mhaka yo hlakana. Zvi lava ku hi gondza Mhaka ya Nungungulu hi tlhela hi ehleketa hi yona, hi khongela ka Jehovha, hi tlhela hi ehleketa khwatsi hi tindlela tontlhe leti Jehovha a hi vhunako hi tona hina wutsumbu. A ku maha lezvo zvi ta ku maha u tiyiseka lezvaku Jehovha Munghana wa wena. Zvi ta ku kuca ku bhulela van’wani lezvi u zvi kholwako. — Gondza Lisimu 73:28.

19. Hikuyini a ku tirela kuhanyiswa ka wena ku nga ku lwela co ci tiva?

¹⁹ Jesu i te: “Loku munhu a randza ku ndzi landzela, a ti tsike, a rwala . . . [mhandze yakwe, Tradução do Novo Mundo] a ndzi landzela.” (Matewu 16:24) Kasi ku landzela Jesu, a muKristu mun’we ni mun’wani i fanele ku ti hendleleta ka Jehovha a tlhela a bhabhatiswa. Kanilezvi lawo masangulo ntsena ya wutomi go tsakisa zvezvi niku zvi yisa ka wutomi ga pindzukelwa misaveni yiswa. Hikwalaho, maha zvontlhe u zvi kotako kasi ku simama u tirela kuhanyiswa ka wena!