Wa ha zvi alakanya ke?
U nga zvi kota ku hlamula zviwutiso lezvi zvi seketelwako ka Murindzeli wa 2019?
Ci wula yini a citsumbiso leci caku: ‘A gi kona tlhari gi fulelweko ku vhukela wena gi ta nga humelela?’ (Isa. 54:17)
Hi nga tsumba lezvaku Jehovha i ta hi vhikela ka mintamu leyo yi hahlulako yo fana ni “moya wa la’vo tshisa”. (Isa. 25:4, 5) A valala va hina va nga ta tshuka va zvi kota ku hi lovisa. — w19.01, pp. 6-7.
Lezvi Nungungulu a nga tirisananisa zvona ni vaKhanani ni zvitlula-milayo zva vaIzrayeli zvi kombisa kuyini a kululama kakwe?
Jehovha i lamulile lava va nga kari va maha wubhayi kutani va nga xanisa vavasati ni vanana. I katekisile a vanhu vakwe lava va nga tsumbeka ka yena va tlhela va mahela van’wani kululama. — w19.02, pp. 22-23.
Zvini hi faneleko ku maha loku a munhu a kalako a nga hi Kustumunyu wa Jehovha a maha mukhongelo na hi hi laho?
Hi nga miyela hi tlhela hi kombisa cichavo kanilezvi a hi faneli ku wula ku “amen” kutani ku khomana mandla ni lava va nga laho a cikhati ku mahiwako mukhongelo. Hi nga ti mahela mukhongelo wa hina hi lomu mbilwini. — w19.03, p. 31.
Hikuyini a ku xakela n’wanana zvi bihileko?
A ku xakela n’wanana ku wonhela yena, bandla, mufumo wa tiko, na Nungungulu. A madhota ma ingisa a nayo wa tiko wa ku tivisa wuhosi loku mazwa lezvaku ku ni munhu a nga xakela n’wanana. — w19.05, pp. 9-10.
U nga zvi kotisa kuyini a ku cica kutani ku chukwatisa a kupima ka wena?
Maha lezvi: Bhula na Jehovha hi mukhongelo. Ku hlole khwatsi a kupima ka wena. Hlawula khwatsi a vanghana va wena. — w19.06, p. 11.
Zvini hi nga mahako zvezvi kasi hi ti longisela a kuxaniseka na ku nga se chikela?
Hi fanele ku tiyisa wunghana ga hina na Jehovha. Hi tsumba lezvaku wa hi randza ni ku a nga ta tshuka a hi fularela. Lera Bhibhiliya siku ni siku u tlhela u khongela hi kukhandzakanya. Kholwa hi mbilu yontlhe lezvaku a makatekwa ya Mufumo wa Nungungulu ma ta tatiseka. Tshama hi ku alakanyela a mavhesi u ma randzako. Tiva ku yimbelela tisimu ti dhumisako -Jehovha hi hloko. — w19.07, pp. 2-4.
Hi nga maha yini kasi ku vhuna maxaka ya hina lezvaku ma ponisiwa?
A ca lisima ku zama ku ma zwisisa, hi chumayela hi mahanyela ya hina, hi kombisa lihlazva-mbilu, hi tiya, hi tlhela hi kombisa cichavo. — w19.08, pp. 15-17.
Hi humutiswa kuyini, kota lezvi Jesu a zvi tsumbisileko ka Matewu 11:28?
Hi ku tirisa a vawoneleli va lirandzo, vanghana va va nene, ni ntiro wa wu nene. — w19.09, p. 23.
Jehovha i hi nyikisa kuyini a kuxuva ni ntamu wa ku zvi maha?
A cikhati leci hi lerako Bhibhiliya hi tlhela hi ehleketa hi lezvi hi gondzako, Nungungulu a nga hi vhuna hi ku hi nyika a kuxuva ni ntamu wa ku maha kurandza kakwe. A moya wakwe wa ku basa wu nga hi vhuna a ku chukwatisa a wutlhari ga hina ga mabeleko. — w19.10, p. 21.
Zvini hi faneleko ku maha na hi nga se maha a ciboho?
Ku na ni ntlhanu wa zvilo u nga zvi mahako: Kambisisa. Khongela u kombela wutlhari. Hlola leci ci ku kucako. Ti mahele longoloko wo kongoma. Ti zwananise ni ciyimo. — w19.11, pp. 27-29.
A maalakanyo ya lezvaku a muhefemulo a wufi ma sukele ka lezvi Sathani a nga byela Evha ke?
Ko khwatsi a zvi tshamisangi lezvo. Sathani i byelile Evha lezvaku i wa nga tafa. A nga te i wa ta ku khwatsi i nofa. Loku a gondzo leyo ya mawunwa yi wa sangulile ka cikhati leco, yona ni tin’wani na ti lovile ni Ndambi. Hikwalaho, zvi wonekisa ku a gondzo ya lezvaku a muhefemulo a wufi yi sangulile Nungungulu na a nga se hangalasa lava va nga kari va aka Peredhu ga Bhabheli. — w19.12, p. 15.