Ahihi. Lomu ka Bhibhiliya ni ka matimu wontlhe a ci kona ci kombako lezvaku zvi wa mahiwa lezvo.

Lezvi a vhesi legi gi nga tshamisa zvona lomu ka maBhibhiliya yo tala zvi maha vokari va pimisa lezvaku masikwini ya Pawule a vanhu va wa bhabhatiswa hi mati na va bhabhatiselwa lava va fileko. Hi cikombiso, a Bhibhiliya Nova Versão Internacional gi wula lezvi: “Makunu, loku ku hi lezvaku a vafileko va nga ta vhuka, va ta kuyini lava va bhabhatiselwako lava va fileko ke?”

Hambulezvo, wona lezvi zvi nga wuliwa hi titlhari to kari ta ku tlhamusela Bhibhiliya. Dr. Gregory Lockwood, i te a ku wula lezvaku a vanhu va wa bhabhatiswa “va bhabhatiselwa lava va fileko” hi wa to wulawula hi “kubhabhatisa ka ku hi kuya hi lezvi zvi tivekako matin’wini kutani lomu ka Bhibhiliya, a hi se zvizwa”. Mugondzisi Gordon D. Fee, yenawu i tsalile lezvi: “Matin’wini ni lomu ka Bhibhiliya a ku kumbukiwi lezvaku a vanhu va wa bhabhatiswa hi kungo lego. Ka mhaka leyi, a T[estamenta] G[iswa] giya hi ku kape; ne a hi se zvizwa a ku ku ni maKristu ma nga kari ma zvi maha zvezvo, hambu ka lawa ma ngava kona andzhako ka loku Pawule a file.”

A Bhibhiliya gi wula lezvaku a vapizani va Jesu va wa fanele ku ‘maha vapizani a vanhu va matiko wontlhe, va va bhabhatisa . . . , va va gondzisa a ku ingisa zvontlhe lezvi’ a va layileko. (Mat. 28:19, 20) Kasi a munhu ava mupizani wa Jesu a bhabhatisilweko, i fanele ku ranga hi ku gondza a tiva Jehovha ni N’wana wakwe, a kholwa ka vona a tlhela a va ingisa. Loyi a fileko a zvi koteki ku a maha lezvo; ne a muKristu a hanyako a nge mahi lezvo a mahela munhu a fileko. — Mutsh. 9:5, 10; Joh. 4:1; 1 Kor. 1:14-16.

Makunu, kasi zvini a nga wula Pawule ka vhesi legi?

A vokari le Korinte va wa kaneta lezvaku a vafileko va nga vhuka. (1 Kor. 15:12) Pawule i kombile lezvaku va wo kaneta mahala. I tlhelile aku siku ni siku i wa hi “mhangweni ya kufa”. Hambu lezvi a nga hi mhangweni ya kufa, i wa tiyiseka lezvaku loku afa i ta vhuxiwa kota civangwa ca moya ca ntamu, a ku fana na Jesu. — 1 Kor. 15:30-32, 42-44.

A va le Korinte va wa fanele ku zvi zwisisa lezvaku siku ni siku va wa ta kumana ni zvikarato. Kota maKristu ma totilweko, kasi va vhuxiwa vaya tilweni va wa fanele ku tsumbeka kala vafa. Makunu, a cikhati va nga kari va ‘bhabhatiselwa ka Kristu’ va wo ‘bhabhatiswa kufeni kakwe’ kambe. (Rom. 6:3) A kubhabhatiswa loko ko fananisa ku wa va veka ndleleni ya ku va guma va dawa futsi, zvonake va vhuxiwa vaya tilweni.

Andzhako ka malembe mambiri ni ku hundza Jesu na a bhabhatisilwe, i no byela vapostoli vakwe va vambiri aku: Mu ta “bhabhatiswa hi kubhabhatiswa loku ndzi bhabhatiswako hi kona.” (Mar. 10:38, 39) Jesu i wa nga bhabhatiswi hi mati. I wo komba lezvaku a ku hanya hi ku tsumbeka ka Nungungulu zvi wa ta maha ku a guma a dawa futsi. Pawule i tsalile lezvaku a vatotilweko va wa ta ‘xaniseka zvin’we [na Jesu], kasi va fela ku kuliswa zvin’we naye.’ (Rom. 8:16, 17; 2 Kor. 4:17) Hikwalaho, kasi vonawu va vhuxiwa vaya tilweni, zvi wa lava ku va ranga hi kufa.

Makunu hi kusonga, lezvi Pawule a nga wula zvi nga hundzuluselwa zvi wula lisine hi ku zvi wulisa lezvi: “Loku zvi nga hi lezvo, va ta kuyini lava va bhabhatiselwako kufa ke? Loku ku hi lezvaku hakunene a vafileko va nga ta vhuka, hikuyini va bhabhatiselwako kufa ke?”