A matshamela lawa Jesu a nga gondza a cikhati a nga hi le tilweni, ma mu vhunile ku a ta tirisana khwatsi ni lava a nga tira navo laha misaveni. Hi nga gondza yini ka cikombiso ca Jesu? Loku hi hlola khwatsi a cikombiso cakwe, hi nga wona matshinya manharu ma nga hi vhunako ku tirisana khwatsi ni van’wani. A matshinya lawo, ma ta hi vhuna ku hi vhuvhumisa moya wa ku tirisana ni ku zwanana ni vamakabye va hina.

A munhu a zvi tivako ku tirisana khwatsi ni van’wani i ti koramisa a va nyika lisima lava a tirako navo a tlhela a nga ti gwirisi. Jesu i gondzile tshamela legi ka Papayi wakwe. Hambu lezvi ka ku hi Jehovha basi a ringanelwako hi ku vitaniwa ku Muvangi, i lava ku a van’wani va wu tiva a ntiro wa lisima lowu a nga maha a N’wana wakwe laha va nga tira zvin’we. Lezvo hi zvi wona ka lezvi Jehovha a nga wula, zvaku: “A hi vangeni munhu hi mufananiso wa hina.” (Gen. 1:26) Laha Jehovha a nga wula lezvo, zva koteka ku Jesu na a tsakile nguvhu hi kutikoramisa ka Jehovha. — Lis. 18:35.

A cikhati leci Jesu a nga hi laha misaveni, yenawu i wa ti koramisa. Loku va mu dzundza hi zvokari a nga maha, i wa yisa wudzundzo ka Loyi gi mu ringanako, ku nga Nungungulu. (Mar. 10:17, 18; Joh. 7:15, 16) Jesu i wa maha zvontlhe a zvi kotako kasi a tirisana hi kurula ni vapizani vakwe a tlhela a va wona kota vanghana vakwe, na ku nga hi zvitiri. (Joh. 15:15) I zile a va hlambisa mikondzo, kasi ku va gondzisa ku va ti koramisa.  (Joh. 13:5, 12-14) Hinawu i chukwana hi va nyika wudzundzo lava hi tirako navo wutshan’wini ga ku rangisa lezvi hina hi zvi lavako, hi nga cheli kota hi lezvi zvabye. Loku hi nyikana wudzundzo ni loku hi nga karatekeli ku contlhe cikhati hi kuma wudzundzo zva vhuna nguvhu. — Rom. 12:10.

A munhu wo ti koramisa kambe wa zvi zwisisa ku ‘a zvikungo . . . zva tiya hi kutala ka masungukati’. (Mav. 15:22) Kani hi ni wutlhari go kota kwihi, hi fanele ku alakanya ku a ku na munhu a tivako zvontlhe. Hambu Jesu i ti wulele lisine a ku ku ni lezvi a kalako a nga zvi tivi. (Mat. 24:36) Ahandle ka lezvo, i wa zvi lava nguvhu a kuzwa mawonela ya vapizani vakwe vo kala kumbhelela, ni ku tiva lezvi va nga zvi tiva. (Mat. 16:13-16) Lezvo hi zvona zvi nga maha ku a vapizani vakwe va tizwa khwatsi loku va hi naye. Loku hinawu hi ti koramisa hi zvi zwisisa a ku ku ni lezvi hi kalako hi nga zvi tivi ni lezvi hi nga zvi kotiko, hi ta tirisana hi kurula ni van’wani, a ntiro wa hina wonawu wu famba khwatsi.

Nguvhunguvhu a madhota zva laveka nguvhu a ku ma pimanyisa Jesu laha ma tirako zvin’we. Ma fanele ku zvi tiva ku a moya wo basa wu nga tirisa ni gihi dhota laha ka hubye. Lomu ka mitlhangano yabye, a madhota ma fanele ku bhulisana hi ndlela ya ku wontlhe ma tlhatlheka ku wula mawonela yabye. Lezvo zvi ta maha ku kota hubye va maha zviboho zvi to vhuna bandla gontlhe.

Loyi a zvi tivako ku tirisana khwatsi ni van’wani a nga sihalali. I vhumela mawonela ya van’wani, a nga womeleli ka lawa ya yena. A zvi kanakanisi a ku Jesu i gi wonile makhati yo tala a tshamela legi ka Papayi wakwe. Hi cikombiso, i mu rumile kasi a ta ponisa vanhu ka lezvi va nga konelwe kufa. — Joh. 3:16.

Loku zvi ringana ni loku zvi laveka, Jesu i wa tirisa mawonela ya van’wani. Wa zvi alakanya a ku i vhunile wasati wa muFenikiya, hambu lezvi a nga rumelwe ka yindlu ya ka Izrayeli? (Mat. 15:22-28) I wa nga rindzeli zvo hundza lezvi a vapizani vakwe va nga zvi kota kambe. I tsetselele munghana wakwe Pedro kambe a cikhati a nga kaneta lomu ka talo wa vanhu a ku wa mu tiva Jesu. Hi ndzhako ka cikhati, i no tlhela a mu nyika ntiro wa lisima nguvhu. (Luka 22:32; Joh. 21:17; Miti. 2:14; 8:14-17; 10:44, 45) Zvi la su dlunya ku a cikombiso ca Jesu ci hi komba ku a hi faneli kuva vanhu vo ‘womelela ka mawonela ya hina’. — 1 Tim. 3:3; tlhamuselo wa lahasi.

 A ku ngavi vanhu vo sihalala kambe zvi ta hi vhuna ku tirisana khwatsi ni vanhu va tixaka tontlhe. Jesu i tirisene khwatsi ni lava a nga hanya navo laha ka kuza a valala vakwe va ciluse va mu vitana ku “munghana wa vakhupisi ni vawonhi” lava va nga vhumela mahungu a nga chumayela. (Mat. 11:19) A ku hi nga zvi kota ku fana na Jesu, hi tirisana khwatsi ni lava va nga ni matshamela yo hambana ni ya hina? Louis, a tirileko cikhati co leha kota muwoneleli wa cipandze ni le Bheteli, lezvo na a tira ni vanhu va midhawuko yo hambana, i wula lezvi: “Kota vanhu vo kala kumbhelela, a ku tira zvin’we zvi fana ni ku aka muro hi maribye yo kala ku tsemiwa ma lulama ma ku pswi ma tlhela ma hambana kukula ka wona. Loku u hundzulusela a maribye lawo kasi u kuma laha ma tshamako khwatsi, ku gumesa ku huma paredhi go lulama gi ku pswi. Minawu ndzi zama ku cica zvokari lezvaku ndzi tira hi kurula ni van’wani kasi hi maha ntiro wa hina.” Hi nga wona tshamela legi ga gi nene!

Laha bandleni, hi zvihi zvikhati lezvi hi nga kombisako ku a hi vanhu vo sihalala? Hi nga zvi kombisa loku hi hi kuchumayeleni. Hi nga tshuka hi aviwa ni muhuweleli a nga ni ntiro wo hlayisa ngango wo hambana ni lowu wa hina kutani wa tanga yo hambana ni ya hina. Zvi ngo yini ku chumayelisa lezvi a zvi lavisako zvona kutani ku cica zambo ga hina kasi hontlheni hi ti buza hi ntiro wo chumayela?

Loyi a zvi tivako ku tirisana khwatsi ni van’wani i tshama a longile ku “hana”. (1 Tim. 6:18) Laha Jesu a nga kari a tira na Jehovha i zvi wonile ku Jehovha a nga randzi ku fihla zvilo. A cikhati Jehovha a nga “lulamisela matilo”, Jesu i “wa hi kona” a tlhela a gondza ka Jehovha. (Mav. 8:27) Hi ndzhako ka cikhati, Jesu i no gondzisa vapizani vakwe hi kutsaka “zvontlhe lezvi [a] zvi zwileko” ka Papayi wakwe. (Joh. 15:15) Lezvo zvi hi gondzisa ku hinawu hi fanele ku gondzisa lava hi tirako navo lezvi hi zvi tivako ni lezvi hi gondzileko. Loyi a zvi tivako ku tirisana khwatsi ni van’wani a nga fihli lezvi zvi lavekako ku a vatiri-kuloni va zvi tiva hi ku fela ku va fumela. I tsaka hi ku byela van’wani lezvi a gondzileko.

Lava hi tirako navo kambe hi nga va bhulela magezu yo tiyisa. Zva hi tiyisa nguvhu loku a wokari a wona kutikarata ka hina a guma a hi bonga hi mbilu yontlhe. Jesu i wa ti nyika cikhati ca ku dzundza lava a nga tira navo hi zva zvi nene a nga zvi wona ka vona. (Wona mongo wa Matewu 25:19-23; Luka 10:17-20.) I zile a va byela ku va ta “maha mitiro ya hombe yo hundza leyi” ya yena. (Joh. 14:12) Ka wusiku legi gi ngaca a dawa, i dzundzile vapostoli vakwe vo tsumbeka, aku: “N’wina hi n’wina mu simamileko na mina mindzhingweni ya mina.” (Luka 22:28) A magezu lawo ma va tiyisile nguvhu ma tlhela ma va nyika ntamu wa ku va nga kondli mawoko. Loku hinawu hi ti nyika cikhati ca ku dzundza lava hi tirako navo, handle ko kanakana va ta tsaka nguvhu va tlhela va kuma ntamu wa ku simama va tira nguvhu.

A makabye wokari wa ku hi Kayode i wulile lezvi: “A zvi lavi ku uva munhu wo mbhelela kasi u zvi kota ku tirisana khwatsi ni van’wani. Leci ci lavekako ku maha lezvi u zvi kotako kasi lava u tirako navo va tira na va tsakile ni ntiro wabye wu nga va bindzeli.” U tshamisile lezvo laha u tirisanako ni van’wani? Kuzvilava u nga wutisa vokari u tirako navo a ku va ti zwisa kuyini hi ku tira na wena? Loku va tsaka hi ku tira na wena, a ku fana ni lezvi a vapizani va Jesu va nga tsaka hi ku tira naye, makunu u nga wula zvo fana ni lezvi a nga wula mupostoli Pawule, zvaku: “Hi zvitiri . . . kasi n’wina mu tsaka.” — 2 Kor. 1:24.