U gondzile zvi buvha a tindzima ta Murindzeli wa lembe legi? A hi wone ku u nga zvi kota ku hlamula zviwutiso zvi landzelako:

Cikombiso muni leci Jehovha a hi vekelako xungetano hi lezvi hi faneleko ku va khomisa zvona a vavasati?

Jehovha a nga na cihlawulela, a nga nyiki nguvhu lisima a vavanuna a ku hundza vavasati. Nungungulu wa ingisela a vavasati, a chela kota hi kutizwa kabye ni kukarateka kabye niku wa va tsumba lezvaku va ta maha a ntiro wakwe. — Murindzeli 01.24, paj. 15-16.

Hi nga mu tirisisa kuyini Va Le Efesusi 5:7, a nge “mu nga hlengeli navo”?

Mupostoli Pawule i hi tlharihisa lezvaku hi nga hlengeli ni vanhu lava va mahako ku zvi hi karatela ku namarela ka milayo ya Nungungulu. A vanghana lavo vo biha va patsa lava hi tshamako navo nghohe ni nghohe ni lava hi bhulako navo ka ma rede sociais. — Murindzeli 03.24, paj. 22-23.

Hi fanele ku ti wonela ka mahungu muni ya mawunwa?

Hi fanele ku ti wonela ka mahungu yo kala ma nga hloliwangi khwatsi hi rumelwako hi vanghana hi va tivako, timesaji ta vanhu vo kala hi nga va tivi ni vadhuki lava va mahisako ku khwatsi va tsakela lisine. — Murindzeli 04.24, paj. 12.

Zvini hi zvi tivako niku zvini hi kalako hi nga zvi tivi xungetano hi lezvi Jehovha a to mu lamulisa zvona hosi Solomoni zvin’we ni lava va fileko le Sodhoma ni Gomora ni lava va fileko ka Ndambi?

A hi zvi tivi hi kumbhelela lezvaku Jehovha i konele a vanhu lavo vontlhe a kulovisiwa ka pindzukelwa. Kanilezvi ha zvi tiva lezvaku wa zvi tiva zvontlhe zvi patsekako niku i na ni wuxinji ga hombe nguvhu. — Murindzeli 05.24, paj. 3-4.

A ku ngha Nungungulu a hi “Ribye” zvi hi tiyisekisa yini? (Dhewu. 32:4)

Hi nga kuma wuchavelo ka Jehovha. Wa tsumbeka niku contlhe cikhati wa tatisa lezvi a tsumbisako. A nga cicacici a matshamela yakwe niku a nga ndlengandlengi ka makungo yakwe. — Murindzeli 06.24, paj. 26-28.

Zvini zvi nga ku vhunako ku ti zwananisa ni bandla giswa?

Tsumba lezvaku a ku khwatsi hi lezvi Jehovha a vhunileko a malandza yakwe ya cikhatini ci hundzileko i ta ku vhuna na wenawu. U nga fananisi a bandla ga wena ga giswa ni legi ga kale. Patseka ka mitiro ya bandla ga wena ga giswa niku ti karatele ku chata vanghana vaswa. — Murindzeli 07.24, paj. 26-28.

Zvigondzo muni hi zvi kumako ka mifananiso yinharu yi nga ka Matewu cipimo 25?

A mufananiso wa tiyivhu ni timbuti wu khanyisa a lisima la kutsumbeka. A mufananiso wa vanhwana vo tlhariha ni lava va zvipumbu wu khanyisa a lisima la ku tshama na hi longile ni ku tshama na hi rindzele. Niku a mufananiso wa titalenta wu khanyisa lisima la ku tira hi kutikarata ni ku hiseka. — Murindzeli 09.24, paj. 20-24.

A ligumbagumba la tempeli ya Solomoni li wa tlakukile ku kota kwihi?

Ka 2 Kronekele 3:4, a tikopiya to kari ta kale ta Bhibhiliya to tsaliwa hi mandla, ti wula lezvaku li wa hi ni 120 wa mikono a kutlakuka lezvi zvi wulako ku li wa hi ni 53 wa timetro a kutlakuka! Kanilezvi a mitsalo yin’wani yo tsumbeka yi komba lezvaku li wa hi ni 20 wa mikono zvi wulako ku li wa hi ni 9 wa timetro a kutlakuka. A tipimo leti to gumesa ti yelana khwatsi ni ku hlonga ka makhurisi ya tempeli. — Murindzeli 10.24, paj. 31.

A ku a nandza go vhunetela giva ‘nuna wa sati mun’we’ zvi wula yini? (1 Tim. 3:12)

Zvi wula ku i fanele ku chadha ni sati mun’we basi niku a nga faneli ku maha wubhayi. Ahandle ka lezvo, a nga faneli ku navela vavasati van’wani. — Murindzeli 11.24, paj. 19.

Hikuyini hi nga wulako lezvaku Johani 6:53 a nga nyiki cikombiso ca lezvi zvi faneleko ku mahiwa Cilalelweni ca Hosi?

Johani 6:53 i wulawula hi cilaveko ca kuga a nyama ya Jesu ni kunwa a nkhata wakwe. Jesu i wulile magezu lawa le Galileya hi 32 Nguveni ya Hina, ka vaJudha lava zvi nga ha lava ku va kombisa kukholwa kakwe. Kanilezvi a Cilalelo ca Hosi ci yimisilwe le Jerusalema, andzhako ka lembe na a wulile magezu lawo. Jesu i wa wulawula ni lava a nga wa ta fuma navo le tilweni. — Murindzeli 12.24, paj. 10-11.