Mupostoli Pawule i tsalele a dhota-kuloni Timote, aku: “Ndza ku laya mahlweni ka Nungungulu ni ka Kristu Jesu zvin’we ni ka tingilozi ti hlawulilweko lezvaku u landzela zvileletelo lezvi na u nga soli nchumu ne kuva ni cihlawulela.” — 1 Tim. 5:21.

A kusangula, a hi wulawuleni hi lava va kalako va nga hi tingilozi leto. Zvi laha kubaseni lezvaku a ku wuliwi lava va 144 000. A cikhati leci Pawule a nga tsalela Timote, a kuvhuxiwa ka maKristu ma totilweko kasi ma ya hanya tilweni ku wa nga se sangula. A vapostoli ni vatotilweko van’wani va wa nga seva zvivangwa zva moya, hikwalaho, a “tingilozi ti hlawulilweko” a ku wuliwi lava va 144 000. — 1 Kor. 15:50-54; 1 Tes. 4:13-17; 1 Joh. 3:2.

A cin’wani kambe, a “tingilozi ti hlawulilweko” a hi tingilozi leti to kala ku ingisa ta cikhatini ca Ndambi. A tingilozi leto ti ti patsile na Sathani, ti maha madhimoni niku ti wa hi valala va Jesu. (Gen. 6:2; Luka 8:30, 31; 2 Ped. 2:4) Cikhatini ci tako, ti ta vhalelwa nkeleni wo eta wo kala magumo hi 1000 wa malembe niku andzhako ka lezvo ti ta lovisiwa zvin’we na Dhiyabho. — Jud. 6; Kuv. 20:1-3, 10.

Zvi wonekisa ku khwatsi a “tingilozi ti hlawulilweko” leti ti nga wuliwa hi Pawule, tingilozi ta le tilweni leti ti nga seketela ‘Nungungulu na Kristu’, lava vonawu va kumbukiwako ka vhesi galegi.

Ku na ni mazanazana ya mazanazana ya tingilozi to tsumbeka. (Mah. 12:22, 23) Zvi wonekisa ku khwatsi Jehovha a nga nyiki a ntiro walowu wa wun’we ka tingilozi tontlhe hi cikhati caleci ca cin’we. (Kuv. 14:17, 18) Alakanya lezvaku ka khati go kari, a ngilozi yin’we yi nyikilwe a ntiro wa ku lovisa a 185 000 wa masochwa ya vaAsiriya. (2 Tih. 19:35) A tingilozi to kari kuzvilava ti nyikilwe ntiro wa ku “hlengeleta zvontlhe lezvi zvi khunguvanyisako ni vanhu lava va mahako lezvi zvi nga hiko laha nayweni ti va humesa Mufun’weni [wa Jesu]”. (Mat. 13:39-41) A tin’wani kuzvilava ti avelwe ku “hlengeleta a vahlawulilweko” vakwe vaya tilweni. (Mat. 24:31) Niku a tin’wani kambe ti nyikilwe a ntiro wa ku hi “hlayisa tindleleni ta [hina] tontlhe.” — Lis. 91:11; Mat. 18:10; fananisa na Matewu 4:11; Luka 22:43.

Makunu zvi wonekisa ku khwatsi a “tingilozi ti hlawulilweko” ti wuliwako ka 1 Timote 5:21, tingilozi leti ti nga nyikilwe a mitiro yo hlawuleka yi yelanako ni vanhu va Nungungulu. Ka mongo wa mhaka leyi, Pawule i nyikile a wusungukati ga ginene ka madhota, lawa ma ringanelwako hi ku kombisiwa cichavo hi bandla. A madhota ma fanele ku maha a mitiro yabye na ma nga “soli nchumu ne kuva ni cihlawulela” niku a ma faneli ku maha ciboho kutani ku lamula hi matloti. A cigelo ca hombe ci ma kucako ku ma landzela a wusungukati gi pimiselweko ga Pawule hi lezvaku a madhota ma tirela a vamakabye vabye “mahlweni ka Nungungulu ni ka Kristu Jesu zvin’we ni ka tingilozi ti hlawulilweko”. Zva dlunyateka lezvaku a tingilozi to kari ti avelwe mitiro yi yelanako ni bandla, yo kota ku gi vhikela, ku wonelela a ntiro wa ku chumayela ni ku tivisa Jehovha lezvi ti zvi wonako. — Mat. 18:10; Kuv. 14:6.