A VANHU va zvi lava kuva ni litsako. Kanilezvi hi hanya masikwini yo gumesa, hikwalaho hontlheni ha kumana ni ‘zvikarato’. (2 Timote 3:1) A vokari va mbhelelwa hi litsako hi kuva va mahelwe kubiha, ku babya, ku luza ntiro, kutani ku felwa. A van’wani va mbhelelwa hi litsako hi kuva ku humelele zvilo zvi va swirako kutani zvi va mahako va karateka. Hambu vakhozeli va Jehovha va nga tshuka va mbhela ntamu va tlhela va mbhelelwa hi litsako labye hi kutsongwani-kutsongwani. Loku lezvo zvi ku humelela, u nga vhuxisa kuyini a litsako la wena?

Kasi hi hlamula ciwutiso leco, a ku ranga hi fanele ku zwisisa ku cini a litsako la lisine niku a van’wani va zvi kotisile kuyini ku simama va tsakile hambu loku va hi zvikaratweni. Andzhako ka lezvo, hi ta wona lezvi hi nga mahako kasi hi tshama hi tsakile hi tlhela hi engetela litsako lelo.

A kuva munhu wo tsaka a zvi wuli kuva munhu wa mahleko. Hi cikombiso, a munhu a nga sangula ku hlekelela loku a popilwe. Kanilezvi neti a byala gi mbhela, a mahleko wonawu mo mbhela, a zvikarato zvontlhe zvi wuya. A mahleko yakwe mave ya cikhatanyana; li wa nga hi litsako la lisine. — Mavingu 14:13.

Kanilezvi, a litsako kuxalala hi ku zwako lomu mbilwini loku hi kuma kutani ku rindzela nchumu wa wu nene. A kuva ni litsako zvi wula ku xalala ni ka cihi ciyimo, kani ca ci nene kani co biha. (1 Va Le Tesalonika 1:6) Hi lisine, hambu loku hi swirekile hi zvokari hi nga simama hiva ni litsako. Hi cikombiso, a vapostoli va bilwe hi lezvi va nga chumayela xungetano hi Jesu. Hambulezvo, ‘va sukile laha hubyeni, na va tsaka hi lezvi va hlayelweko lava va faneleko a ku xaniseka hi kota ya vito ga Jesu’. (Mitiro 5:41) Va wa nga tsaki hi kuzwa ku biwa, kanilezvi va wa tsaka hi kuva va zvi kotile ku simama va tsumbekile ka Nungungulu.

A litsako a hi nchumu wo pswaliwa nawo kutani waku halahala u wu kuma. Hikuyini hi wulako lezvo? Hi ku a litsako la lisine wun’we wa mihandzu ya moya wa ku basa wa Nungungulu. A moya wa Nungungulu wu hi vhuna ku ambala a “munhu muswa” loyi a patsako ku tsaka. (Va Le Efesusi 4:24; Va Le Galatiya 5:22) Loku hi hi ni litsako, zvi ta hi olovela ku lwisana ni zvikarato zva hina.

Jehovha i wa lava ku laha misaveni ku maheka zvilo zva zvi nene; i wa nga lavi a zvilo zvo biha lezvi hi zvi wonako nyamutlha. Kanilezvi, hambu lezvi a vanhu va mahako zvilo zvo biha, Jehovha a nga mbhelelwi hi litsako. A Bhibhiliya gi li: ‘A ntamu ni kutsaka zvi le wutshan’wini gakwe.’ (1 Kronekele 16:27) Ahandle ka lezvo, a zvilo zva zvi nene lezvi a malandza ya Jehovha ma zvi mahako zva mu nyika litsako. — Mavingu 27:11.

Hina hi pimanyisa Jehovha hi ku nga mbhelelwi hi litsako loku a zvilo zvi nga hi fambeli khwatsi. Wutshan’wini ga ku karateka, hi fanele ku veka kupima ka zvilo zva zvi nene hi nga nazvo zvezvi hi tlhela hiva ni lihlazva-mbilu hi rindzela a zvilo  zva zvi nene nguvhu lezvi zva ha tako. * — Wona tlhamuselo wa lahasi.

Lomu ka Bhibhiliya, ku na ni zvikombiso zvo tala zva vanhu va nga simama va tsakile hambu lezvi va nga hi ni zvikarato zvo tala. Abrahama i simamile a tsakile hambu a cikhati leci a wutomi gakwe gi nga hi mhangweni ni cikhati leci a van’wani va nga mu vangela zvikarato. (Genesisi 12:10-20; 14:8-16; 16:4, 5; 20:1-18; 21:8, 9) I zvi kotisile kuyini? I wa ehleketa hi kutsumba ka ku hanya misaveni yiswa mandleni ya mufumo wa Mesiya. (Genesisi 22:15-18; Mahebheru 11:10) Jesu i te: ‘A raru wa n’wina Abrahama i no tsaka lezvaku i wa ta ngha a wona a siku ga mina.’ (Johani 8:56) Hi pimanyisa Abrahama loku hi simama hi ehleketa hi litsako leli hi to li kuma cikhatini ci tako. — Va Le Roma 8:21.

Pawule na Silasi va wa hi ni kukholwa ko tiya niku va simamile va tsaka hambu lezvi va kumeneko ni zvikarato zvo tala. Hi cikombiso, andzhako ka ku biwa yi nga chayi va tlhela va vhalelwa paxweni, va sangulile ku ‘khongela, va yimbelela tisimu to dhumisa Nungungulu’. (Mitiro 16:23-25) A ku simama va ehleketa hi zvitsumbiso zva Nungungulu zvi va vhunile ku timisela tixanisa leto. Va kumile litsako kambe hi ku tiva lezvaku va xanisiwa hi kota ya lezvi va nga valandzeli va Kristu. Hi pimanyisa Pawule na Silasi loku hi ehleketa hi mihandzu ya yi nene hi yi kumako hi ku tirela Nungungulu hi kutsumbeka. — Va Le Filipi 1:12-14.

Nyamutlha kambe ku na ni zvikombiso zvo tala zva vamakabye va simamako va tsaka hambu loku va kumana ni zvikarato. Hi cikombiso, hi Novembro wa 2013, a Cingulo ca Haiyan ci hahlulile a 1000 wa mimiti ni ku hundza ya Timboni ta Jehovha le Filipinas. George, a nga hahlukelwa hi muti wakwe wontlhe le Tacloban, i te: “Hambu lezvi ku nga humelela khombo legi, a vamakabye va tsakile. Zva ndzi karatela ku tlhamusela a litsako hi li zwako.” Loku hi ehleketa hi lezvi Jehovha a hi mahelako hi tlhela hi mu bonga, hi ta simama hi tsaka hambu loku hi hi ni zvikarato zva hombe. Jehovha i hi nyika zvilo zvin’wani kambe zvi hi mahako hi tsaka. Zvilo muni?

A cigelo ca hombe ca kutsaka ka hina wunghana legi hi nga nago na Jehovha. Zvi nyika litsako la hombe a ku tiva a Hosi ya wuako gontlhe. I Papayi wa hina, ni Nungungulu wa hina ni Munghana wa hina. — Lisimu 71:17, 18.

Hi bonga Jehovha kambe hi lezvi a hi nyikako wutomi ni lezvi zvi lavekako kasi hizwa kunandziha ka gona. (Mutshawuteli 3:12, 13) Kota lezvi a nga hi koka hi tshinela kakwe, ha zvi kota ku zwisisa a kurandza kakwe ni lezvi hi nga hanyisako zvona. (Va Le Kolosi 1:9, 10) Kanilezvi, a vanhu vo tala a va gi tivi a kungo ga wutomi. Kasi ku dlunyatisa a kuhambana loko, Pawule i te: ‘A zvilo lezvi zvi nga woniwangiko hi tihlo, ni ndleve yi nga zvi zwangiko, lezvi zvi nga alakanyiwiko mbilwini ya munhu, zvalezvo Nungungulu i zvi longisele vona lava va mu randzako. Hakuva Nungungulu i zvi wonekelisile ka hina hi moya wakwe.’ (1 Va Le Korinte 2:9, 10) A ku zwisisa a kurandza ka Jehovha ni kungo gakwe zva hi nyika litsako.

Kanilezvi, a hi lezvo basi. Jehovha i hi vhululele ndlela ya ku kuma ku tsetselelwa zviwonho zva hina. (1 Johani 2:12) I hi tsumbisa ku hanya misaveni yiswa, leyi yi to chikela lokuloku. (Va Le Roma 12:12) Hambu zvalezvi, Jehovha i hi nyika vanghana vo tala lezvaku hi mu khozela navo. (Lisimu 133:1) Wa hi vhikela kambe ka Sathani ni ka madhimoni. (Lisimu 91:11) Loku hi tshama na hi alakanya a zvilo lezvo zvo saseka hi nyikiwako hi Jehovha, hi tava ni litsako la hombe. — Va Le Filipi 4:4.

Xana a muKristu a sinako a tsakile a nga engetela litsako lakwe ke? Jesu i te: “Ndzi mu byelile lezvi, kasi a kutsaka ka mina ku fela ku tshama ka n’wina, ni lezvaku a kutsaka ka n’wina ku  mbhelela.” (Johani 15:11) Lezvo zvi komba ku hontlheni hi nga engetela ku tsaka. A litsako hi nga li fananisa ni ndzilo. Loku hi lava ku a ndzilo wu vhura nguvhu, ho engetela tihunyi. Maku, alakanya lezvaku a moya wa ku basa wa hi vhuna ku kuma litsako. Hikwalaho, loku hi lava ku engetela a litsako la hina, hi fanele ku simama hi kombela a moya wa ku basa wa Nungungulu. Hi fanele ku ehleketa kambe hi lezvi hi gondzako ka Bhibhiliya, gi pimisilweko hi moya wa ku basa. — Lisimu 1:1, 2; Luka 11:13.

A cin’wani ci to engetela litsako la hina ku tshama na hi khomekile hi mitiro yi tsakisako Jehovha. (Lisimu 35:27; 112:1) Hikuyini? A Bhibhiliya gi li hi vangelwe ku ‘chava Nungungulu, hi hlayisa zvileletelo zvakwe; hakuva leyo hi yona fanelo yontlhe ya munhu’. (Mutshawuteli 12:13) Hina vanhu hi vangelwe ku maha kurandza ka Nungungulu. Hikwalaho, loku tirela Jehovha, hi tava litsako la lisine wutomini ga hina. * — Wona tlhamuselo wa lahasi.

Loku hi engetela litsako la hina, hi ta kuma mabhindzu man’wani yo tala. Hi cikombiso, Jehovha i ta hi tsakela nguvhu loku hi simama hi mu tirela na hi tsakile hambu loku hi hi ni zvikarato. (Dhewuteronome 16:15; 1 Va Le Tesalonika 5:16-18) Ca wumbiri, kota lezvi hi nga ni litsako la lisine, hi nga ta tshuka hi alakanya ku a kuva ni titshomba to tala ta nyama hi zvona zva lisima nguvhu wutomini ga hina. Wutshan’wini ga lezvo, hi ta zama ku ti tsona zvotala hi kota ya Mufumo wa Nungungulu. (Matewu 13:44) A cikhati hi wonako a mabhindzu ma tako hi ku tirela Jehovha hi citalo, hi ta engetela ku tsaka, hi xalala, hi tlhela hi maha van’wani va tsaka. — Mitiro 20:35; Va Le Filipi 1:3-5.

A cin’wani kambe hi ku laha hi yako hi engetela litsako, hi nga ti vhikela mababyi kambe. A Bhibhiliya gi li: ‘A mbilu yi tsakileko i muri wu nene.’ (Mavingu 17:22) A mukambisisi wo kari a gondzileko ta lihanyo le Univhersidhadhe ya Nebraska, Estados Unidos, i wulile magezu ma zwananako ni lezvi a Bhibhiliya gi wulako. I te: “Loku u tsakile u tlhela u xalala hi wutomi ga wena zvezvi, u ngava ni lihanyo li nene ka masiku ma tako.”

Hikwalaho, hambu lezvi hi hanyako zvikhatini zva zvikarato, hi ngava ni litsako la lisine a cikhati hi kumako moya wa ku basa hi ku khongela, hi gondza Mhaka ya Nungungulu, hi tlhela hi ehleketa hi lezvi hi gondzako. Hi ta engetela ku tsaka kambe loku hi ehleketa hi zvilo zvo tala lezvi Jehovha a hi nyikako zvezvi, hi pimanyisa kukholwa ka van’wani hi tlhela hi ti karatela ku maha kurandza ka Nungungulu. Loku hi maha lezvo, hi ta wona lezvi zvi tlhamuselwako ka Lisimu 64:10, zvaku: ‘A wakululama i ta tsakela Jehovha, a mu tsumba.’