NDZIMA YA CIGONDZO N.° 7
Ha mu randza nguvhu Jehovha, a Papayi wa hina
“Ha randza hakuva hi yena a nga ranga a hi randza.” — 1 JOH. 4:19.
LISIMU 3 Ntamu wa hina ni kutsumba ka hina
LEZVI HI TO GONDZA *
1-2. Hikuyini Jehovha a nga vhulula ndlela ya lezvaku hiva zviro zva ngango wakwe, niku i zvi mahisile kuyini?
JEHOVHA wa hi ramba kasi hiva zviro zva ngango wakwe wa vakhozeli. A hi ku tsakisa ka cirambo leco! A ngango wa hina wu wumbiwa hi lava va kombisako kukholwa ka hakhelo ya kutlhatlhisa ya N’wana wakwe va tlhela va nyikela a wutomi gabye ka Nungungulu. A ngango wa hina i ngango wo tsaka. Hi na ni wutomi go tsakisa zvezvi, niku ha tsaka hi kota ya citsumbiso ca ku hanya kala kupindzuka ni kupindzuka — le tilweni kutani Paradhiseni laha misaveni.
2 Jehovha i vhululile ndlela ya ku hiva zviro zva ngango wakwe hakuva wa hi randza nguvhu. Kanilezvi kasi a maha lezvo, zvi lavile ku a ti karata nguvhu. (Joh. 3:16) Hi “xavilwe hi ntsengo”. (1 Kor. 6:20) Hi ku tirisa a hakhelo ya kutlhatlhisa, Jehovha i mahile a ku zvi koteka lezvaku hiva ni wunghana ga hombe naye. Wudzundzo ka hina a ku vitana a Munhu wa hombe wuakweni gontlhe kota Papayi. Niku kota lezvi hi nga zvi wona ka ndzima yi hundzileko, Jehovha hi yena a Papayi wa mu nene nguvhu ka vontlhe.
3. Zviwutiso muni kuzvilava hi nga ti wutisako? (Wona ni kwadru “ Xana Jehovha wa khatala hi mina?”)
3 A ku fana ni mun’we wa vatsali va Bhibhiliya, hi nga ha wutisa lezvi: ‘Ndzi ta mu tlhelisela yini Jehovha, hi kota ya makatekwa wontlhe a nga ndziha wona?’ (Lis. 116:12) A hlamulo ku hi nga ta tshuka hi zvi kota a ku hakhela a Papayi wa hina wa le tilweni. Kanilezvi, a lirandzo lakwe hi hina li hi kuca ku hinawu hi mu randza. Mupostoli Johani i tsalile lezvi: “Ha randza hakuva hi yena a nga ranga a hi randza.” (1 Joh. 4:19) Hi nga zvi kombisa kuyini lezvaku ha mu randza a Papayi wa hina wa le tilweni?
TSHAMA KUSUHANI NA JEHOVHA
Hi komba lezvaku ha mu randza nguvhu Jehovha, a Papayi wa hina wa le tilweni, hi ku tshama kusuhani naye hi ku maha mukhongelo hi kukhandzakanya, ku mu ingisa, ni ku vhuna van’wani lezvaku va mu randza (Wona ndzimana 4-14)
4. Hi kuya hi Jakobe 4:8, hikuyini hi faneleko ku ti karata kasi hiva kusuhani na Jehovha?
4 Jehovha i lava lezvaku hi tshinela kakwe hi tlhela hi bhula naye. (Lera Jakobe 4:8.) Hikwalaho i hi kuca ku ‘khongela hi nga tsiki’ niku contlhe cikhati wa hi ingisela. (Rom. 12:12) A nga tshuki a khomeka laha ka kuza a tsandzeka ku hi ingisela ne a nga tshuki a karala. Niku hi nga mu ingisela hi ku lera a Mhaka yakwe, a Bhibhiliya, a ku patsa ni mabhuku lawa ma hi vhunako a ku zwisisa a Bhibhiliya. Hi mu ingisela kambe hi ku demba khwatsi ndleve loku hi hi mitlhanganweni ya wuKristu. A ku fana ni lezvi a mabhulo yo khandzakanya ma vhunako a vanana a kuva vanghana va vapswali vabye, a ku bhula hi kukhandzakanya na Jehovha zvi hi vhuna a ku tshama kusuhani naye kutani kuva vanghana vakwe.
Wona ndzimana 5
5. Hi nga yi chukwatisisa kuyini a mikhongelo ya hina?
5 Ehleketa hi matshamela ya mikhongelo ya wena. Jehovha i lava lezvaku hi chulula a timbilu ta hina kakwe hi mukhongelo. (Lis. 62:8) Hi maha khwatsi loku hi ti wutisa lezvi: ‘Xana a mikhongelo ya mina yi tala kuva yo hundzisa ntungu, na yi phindaphinda zvalezvi zva zvin’we kutani yi huma mbilwini na yi chulula a kutizwa ka mina kontlhe?’ A zvi kanakanisi lezvaku wa mu randza nguvhu Jehovha niku u lava lezvaku a wunghana ga wena naye gi simama gi tiyile. Kasi lezvo zvi koteka, u fanele ku bhula naye hi kukhandzakanya. U mu byela a zvihundla zva wena zvontlhe, lezvi zvi ku mahako u tsaka ni lezvi zvi ku xanisako. Tiyiseka lezvaku u nga mu kombela ku a ku vhuna.
6. Zvini hi faneleko ku maha kasi hi tshama kusuhani ni Papayi wa hina wa le tilweni?
6 Kasi hi tshama kusuhani ni Papayi wa hina wa le tilweni hi fanele ku mu bonga contlhe cikhati. Ha vhumelelana ni mutsali wa Tisimu loyi a ngaku: ‘Jehovha, Nungungulu wa mina, yi tele a mitiro yi hlamalisako leyi u yi mahileko, ni makungo ya wena ha hina. A ku na mun’we loyi a fananako na wena, ndzi wa ta randza ku yi tlhatlhambutela, kanilezvi a yi na ku hlayiwa.’ (Lis. 40:5) A hizwi kubonga basi kanilezvi hi tlhela hi ku kombisa hi magezu ni mitiro. Lezvo zvi komba ku hi hambene ni vanhu vo tala va nyamutlha. Hi hanya ka tiko legi a vanhu va kona va nga kombisiko kubonga hi zvontlhe lezvi Nungungulu a va mahelako. Hi lisine, a kuva a vanhu va nga kombisi kubonga cin’we ca zvikombiso zvaku hi hanya “masikwini yo gumesa”. (2 Tim. 3:1, 2) Ngha hi nga tshuki hi pimanyisa a mahanyela lawo.
7. Zvini lezvi Jehovha a lavako lezvaku hi maha niku hikuyini?
7 A vapswali a va zvi lavi ku a vana vabye va holovisana, kanilezvi va lava ku va zwanana. Hi ku fanana, Jehovha i lava ku a vana vakwe vontlhe va hanya zvin’we. Kunene, a lirandzo leli hi nga nalo hi mun’we ni mun’wani li hi tivekisa kota maKristu ya lisine. (Joh. 13:35) Hi vhumelelana ni mutsali wa Tisimu loyi a ngaku: ‘Hi nga wonani kutsakisa ka zvona, loku maxaka ma hanya khatigin’we hi kuzwanana.’ (Lis. 133:1) Loku hi randza a vamakabye va hina hi komba lezvaku ha mu randza Jehovha. (1 Joh. 4:20) A zvo ku tsakisa a kuva zviro zva ngango wa vamakabye va cinuna ni va cisati lava va nga ‘va nene ka mun’we ni mun’wani, ni vo zwelana wusiwana’! — Efe. 4:32.
KOMBISA A LIRANDZO LA WENA HI KU INGISA
Wona ndzimana 8
8. Hi kuya hi 1 Johani 5:3, hi cihi a cigelo ca hombe ci hi mahako hi ingisa Jehovha?
8 Jehovha i lava lezvaku a vanana va ingisa a vapswali vabye niku i lava ku hinawu hi mu ingisa. (Efe. 6:1) Wa ringanelwa hi ku hi mu ingisa hakuva hi yena Muvangi wa hina, Museketeli wa wutomi ga hina, ni Papayi wo tlhariha a ku hundza vontlhe. Hambulezvo, a cigelo ca hombe ci hi mahako hi ingisa Jehovha hi ku ha mu randza. (Lera 1 Johani 5:3.) Hambu lezvi ku nga ni zvigelo zvo tala zvi hi mahako hi ingisa Jehovha, a nga hi kurumeti ku maha lezvo. Jehovha i hi nyikile a kutlhatlheka ka ku hi ti hlawulela, hikwalaho wa tsaka loku hi hlawula ku mu ingisa hi ku mu randza.
9-10. Hikuyini zvi nga zva lisima a ku tiva milayo ya Nungungulu hi tlhela hanya hi yona?
9 A vapswali va lava lezvaku a vana vabye va hlayiseka. Hi zvalezvo zvi va mahako va veka milayo ya mahanyela yi vhunako vana vabye. A cikhati a vanana va ingisako a milayo leyo, va komba lezvaku va va tsumba a vapswali vabye ni ku va komba cichavo. Hikwalaho a ha ha wuli hi lisima la ku tiva milayo ya Papayi wa hina wa le tilweni hi tlhela hi yi ingisa. Loku hi maha lezvo, hi komba Jehovha lezvaku ha mu randza ni ku mu komba cichavo ku nga zvilo zvi vhunako hina. (Isa. 48:17, 18) Kanilezvi, lava va alako Jehovha ni milayo yakwe va gumesa hi ku tshovela kubava. — Gal. 6:7, 8.
10 Loku hi hanya hi ndlela leyi yi tsakisako Jehovha, ho ti vhikela ka zvilo zvi nga wa ta hi vangela timhango hi tlhelo ga nyama, ni ga kutizwa kutani zvi nga wa ta wonha a wuxaka ga hina naye. Jehovha wa zvi tiva lezvi zvi nga zvi nene ka hina. Aurora a tshamako le Estados Unidos i wula lezvi: “Ndza zvi wona lezvaku a ku ingisa Jehovha contlhe cikhati zvi maha ku hiva ni wutomi ga gi nene.” Lezvo hakunene lisine. Wena ke, u vhunekisa kuyini hi ku ingisa a milayo ya lirandzo ya Jehovha?
11. A mukhongelo wu hi vhunisa kuyini?
11 A mukhongelo wu hi vhuna a kuva vanhu vo ingisa hambu loku a ku maha lezvo zvi karata. Ka zvikhati zvo kari zva karata a ku ingisa Jehovha hi kota ya lezvi hi nga vawonhi, kanilezvi hi fanele ku kulula hi n’watseka kasi hi mu ingisa. A mutsali wa Tisimu i khongotele Jehovha aku: ‘Ndzihe kupima, ndzi ta hlayisa a nayo wa wena. Futsi, ndzi ta wu hlayisa hi mbilu ya mina yontlhe.’ (Lis. 119:34) Denisia, a nga phayona ga cikhati contlhe, i wula lezvi: “Loku zvi ndzi karatela a ku ingisa a wun’we wa milayo ya Jehovha, ndzo khongela ndzi kombela ntamu wa ku maha zva zvi nene.” A hi tiyisekeni lezvaku contlhe cikhati Jehovha i ta hlamula a zvikombelo zva tshamela lego. — Luka 11:9-13.
VHUNA VAN’WANI LEZVAKU VA RANDZA PAPAYI WA HINA
12. Hi kuya hi Va Le Efesusi 5:1, zvini hi faneleko ku maha?
12 Lera Va Le Efesusi 5:1. Kota vana “vo randzeka” va Jehovha hi maha zvontlhe hi zvi kotako kasi ku mu pimanyisa. Hi pimanyisa a matshamela yakwe hi kuva vanhu va lirandzo, va va nene ni vo tsetselela van’wani. Loku lava va kalako va nga tivi Jehovha va wona a mahanyela ya hina ya ma nene, kuzvilava va nga kuceka a ku gondza zvotala hi yena. (1 Ped. 2:12) A vapswali va nga maKristu va na ni zvigelo zva zvi nene zvaku va pimanyisa Jehovha ka ndlela leyi va khomako hi yona a vana vabye. Loku va maha lezvo, a vana va ta lava ku wumba wunghana gabye wutsumbu ni Papayi wa hina wa lirandzo.
Wona ndzimana 13
13. Zvini hi faneleko ku maha kasi hi tiya-hlanha?
13 A n’wanana wa tizwa matshandza hi papayi wakwe ni ku wa tsaka hi ku bhula ni van’wani xungetano hi yena. Hi kufanana, ha tizwa matshandza hi Jehovha, a Papayi wa hina wa le tilweni, niku hi lava lezvaku a van’wani va mu tiva. Lomu timbilwini ta hina hi ti zwisa ku khwatsi hi Hosi Dhavhidha a nga tsala lezvi: ‘A muhefemulo wa mina wu ta ti kulisa ha Jehovha.’ (Lis. 34:2) Kanilezvi, ahati ke loku hi chava ku bhula ni van’wani hi Jehovha? Hi nga zvi kotisa kuyini kutiya-hlanha? Hi tiya-hlana loku hi alakanyela lezvi Jehovha a to tsakisa zvona ni lezvi a vanhu va to vhunekisa zvona hi ku mu tiva. Jehovha i ta hi nyika a kutiya-hlanha loku hi ku lavako. Yena i vhunile a vamakabye va hina va zana ga malembe go sangula niku i ta hi vhunawo. — 1 Tes. 2:2.
14. Hikuyini zvi nga zva lisima a ku hlengela ka ntiro wa ku maha vapizani?
14 Jehovha a nga na cihlawulela niku wa tsaka loku a hi wona na hi randza van’wani na hi nga cuwuki lomu va tako hi kona kutani zviyimo zvabye. (Miti. 10:34, 35) A yin’we ya tindlela ta ti nene nguvhu ta ku komba lezvaku ha randza van’wani ku va bhulela a mahungu ya ma nene. (Mat. 28:19, 20) Hi lihi lisima la ntiro lowu? Lava va hi zvaku va nga chukwatisa a wutomi gabye zvezvi va tlhela va kuma a citsumbiso ca wutomi ga pindzukelwa cikhatini ci tako. — 1 Tim. 4:16.
RANDZA A PAPAYI WA HINA U TLHELA U TSAKA
15-16. Zvini zvi hi mahako hi tsaka?
15 Jehovha i Papayi wa lirandzo, hikwalaho i lava lezvaku a ngango wakwe wu tsaka. (Isa. 65:14) Hambu lezvi hi kumanako ni zvikarato, ku na ni zvigelo zvo tala zvi nga hi mahako hi tsaka. Hi cikombiso, ha tiyiseka lezvaku a Papayi wa hina wa le tilweni wa hi randza nguvhu. Hi na ni wutivi ga lisine ga Mhaka ya Nungungulu, a Bhibhiliya. (Jer. 15:16) Niku hi zviro zva ngango wo hlawuleka wa vanhu lava va randzako Jehovha ni milayo yakwe va tlhela va randzana. — Lis. 106:4, 5.
16 Hi nga simama hi tsakile hakuva hi na ni citsumbiso ca lisine ca lezvaku a wutomi gi tava ga gi nene nguvhu cikhatini ci tako. Ha zvi tiva lezvaku lokuloku Jehovha i ta fuvisa a wubihi gontlhe a tlhela a tirisa a Mufumo wakwe kasi ku maha misava yontlhe yiva Paradhise. Niku hi na ni citsumbiso co tsakisa ca lezvaku lava va fileko va ta vhuxiwa va tlhangana ni maxaka yabye. (Joh. 5:28, 29) Lezvo zvi ta tsakisa nguvhu! Niku a ca lisima nguvhu ka zvontlhe, ha tiyiseka lezvaku lokuloku vontlhe, le tilweni ni lava misaveni, va ta nyika a Papayi wa hina lirandzo lezvi zvi mu ringanako ku nga ku mu dhumisa, ku mu dzundza ni ku mu khozela.
LISIMU 12 Jehovha i Nungungulu wa Hombe
^ nzi. 5 Ha zvi tiva lezvaku Jehovha, a Papayi wa hina, wa hi randza nguvhu niku i hi nehile ngangweni wakwe wa vakhozeli. Hi kota ya lezvo, hinawu hi kuceka ku mu randza. Hi nga zvi kombisa kuyini lezvaku ha mu randza a Papayi wa hina wo khatala? A ndzima leyi yi ta komba a zvilo zvo kari hi nga zvi mahako.
