ZVIKHATINI zva kutsaliwa ka Bhibhiliya, a lowolo wu wa nyikiwa maxaka ya nhanyana a cikhati ku longiselwako muchadho. Kuzvilava a lowolo wu wa patsa zvibya zva lisima, zvifuyo kutani mali. Ka zvikhati zvin’wani, a lowolo wu wa hakheliwa hi ku tira, a ku khwatsi hi lezvi a nga maha Jakobe, loyi a nga vhumela ku tirela papayi wa Rakeli hi 7 wa malembe kasi a tekana na Rakeli. (Gen. 29:17, 18, 20) Hikuyini va nga kari va hakhelisa lowolo?

A tlhari yo kari ya ku hlola Bhibhiliya ya ku hi Carol Meyers, yi wulile lezvi: “Kuzvilava a lowolo wu wa mahela ku vhunetela laha kaya ka nhanyana, kota lezvi a nga wa ta kala a nga ha hi kona kasi ku va vhuna ku tira lomu masin’wini.” A lowolo kambe kuzvilava wu wa tira kasi ku tiyisa wuxaka cikari ka maxaka ya nhanyana ni ya jaha. A maxaka ya seno ni ya seniya ma wa ta vhunana ka zvikhati zva zvikarato. Ahandle ka lezvo, a lowolo wu wa kombisa lezvaku a wasati i tekilwe niku i wa ta suka ka vapswali vakwe a ya hlayisiwa hi nuna wakwe.

A ku hakhela lowolo zvi wa nga wuli ku a wasati i wa hi cibya ca ku u nga xava kutani ku ci xavisa. A bhuku Mahanyela ni milayo le Izrayeli wa kale (hi ciNgiza) gi wulile lezvi: “A kuva zvi koxa ku hakhela mali kutani zvin’wani zvilo ka maxaka ya nhanyana, zvi wa maha ku a muchadho wa vaIzrayeli wu ku khwatsi ku xava munhu. Hambulezvo, zvi wonekisa ku a lowolo ku wa hi ku va tlhelisela mulera a va ngango wa loyi wa wasati, na ku nga hi ku mu xava.”

Inyamutlha, ka matiko yo kari a vanhu va ha simama ku landza mukhuwo lowu wa ku humesa lowolo. Loku a maKristu ma kombela lowolo, ma fanele ku tsika ‘a wunene gabye gi tiviwa hi vanhu vontlhe’, hi ku nga koxi zvilo zvo tala ku hundza mpimo. (Filp. 4:5; 1 Kor. 10:32, 33) Lezvo zvi ta komba ku a va ‘randzi mali’, a va na makangwa kutani makolo. (2 Tim. 3:2) Ahandle ka lezvo, loku a vapswali va maKristu va nga londzi zvilo zvo tala ku hundza mpimo ka lowolo, a jaha gi nga ta kurumeteka ku hlwela ku chadha na ga ha zama ku kuma mali ya ku xava lezvi zvi lavekako kasi gi lowola. Ne zvi nga ta lava ku aza a tsika ku phayona na a fela ku tira kasi a ta kuma mali ya ku xavetela zvilo zva madhura-dhura zvi laviwako kasi ku lowola.

Ka matiko man’wani, a nayo wa tiko hi wona wu wulako lezvi zvi faneleko ku humesiwa kota lowolo. Ka matiko lawo, a vapswali va nga maKristu va ingisa nayo lowo. Hikuyini? Hi ku a Mhaka ya Nungungulu yi laya maKristu lezvaku ma ‘ingisa mufumo’ ni ku ingisa lezvi zvi nga lwisaniko ni milayo ya Nungungulu. — Rom. 13:1; Miti. 5:29.