KA NAYO wa Mosi, Jehovha i wa vhumela ku a vaIzrayeli va maha minyikelo hi matuva ni zvipomba. Contlhe cikhati a zvinyanyani lezvi zva zvimbiri zvi wa kumbukiwa zvin’we lomu ka milayo yi nga yelana ni miphahlo — a ko kari va ranga hi matuva, a kun’wani va ranga hi zvipomba. (Levi 1:14; 12:8; 14:30) Hikuyini lezvo zvi nga vhuna? A cin’we ca zvigelo hi ku a matuva a hi contlhe cikhati ma nga kumeka. Hikuyini?

A matuva zvinyanyani zvi cicako lomu zvi hanyako kona hi kuya hi tinguva. Ka tihweti ta cimumu, ma wa kumeka lomu Izrayeli. Lembe ni lembe hi Outubro, ma wa rura maya ka matiko ya cimumu ma kumekako le sul wa Izrayeli; ma wuya kumbheleni ka cirami. (Xizim. 2:11, 12; Jer. 8:7) Makunu lezvo zvi komba ku le Izrayeli wa kale, zvi wa karata ku a muIzrayeli a kuma matuva kasi a maha hi wona miphahlo ka nguva ya cirami.

Kanilezvi a zvipomba a zvi toloveli ku rula loku a tinguva ti cica. Hikwalaho, zvi wa kumeka le Izrayeli lembe gontlhe. Ahandle ka lezvo, a zvipomba zvi wa fuyiwa. (Wona ni mongo wa Johani 2:14, 16.) A bhuku Tisinya ni zvihari zvi kumbukiwako lomu ka Bhibhiliya, (hi ciNgiza) gi wula lezvi: “Lomu ka zvidhoropana zvontlhe ni madhoropa ya Palestina, ku wa fuyiwa zvipomba. Muti ni muti wu wa hi ni cihahlo ca zvipomba, kutani kovotlo laha ka paredhi, kasi a zvipomba zvi tshama kona.” — Wona ni mongo wa Isaya 60:8.

Lezvi Jehovha a nga vhumela ku a vaIzrayeli va maha miphahlo hi zvinyanyani zvi nga kumeka lembe gontlhe le Izrayeli, i kombisile kuzwisisa ni lirandzo ka vaIzrayeli.