1. Zvini lezvi Jesu a byelileko a vapizani vakwe xungetano hi cikhatini co gumesa, niku citlharihiso muni a va nyikileko?

 NA KU kiyela masiku matsongwani kasi Jesu a dawa, a mune wa vapizani vakwe va no mu wutisa ku: “Ci tava cihi a cikombiso . . . ca kugumesa ka tiko?” (Mat. 24:3) Kuzvilava a vapizani lavo va wa ti wutisa ku va wa ta zvi tivisa kuyini a ku a kulovisiwa ka Jerusalema ni Tempeli ku chikele. Ka hlamulo wakwe, Jesu a nga wulawulangi hi ku lovisiwa ka Jerusalema ni Tempeli basi, kanilezvi i tlhelile a wulawula hi ku “kugumesa ka tiko” legi hi hanyako ka gona. Xungetano hi masiku yo gumesa, Jesu i te: “Xungetano hi siku lego ni cikhati ca kona a ku na munhu a zvi tivako, ne tingilozi le tilweni ne hambu N’wana, zvo tiviwa hi Papayi yece.” Hikwalaho i no tlharihisa a vapizani vakwe vontlhe lezvaku va tshama na va tlharihile ni ku ‘tshama na va rindzele.’ — Mar. 13:32-37.

2. Hikuyini zvi nga hi zva lisima ku a maKristu yo sangula ma tshama na ma tlharihile?

² A maKristu ya maJudha ya zana ga malembe go sangula ma wa fanele ku simama ku ti wonela kasi a wutomi gabye gi ponisiwa. Jesu i byelile a valandzeli vakwe lezvi va nga wa ta zvi wona loku a kulovisiwa ka Jerusalema ni Tempeli ku chikele. I wulile lezvi: “Loku mu wona Jerusalema na a randzelwe hi masochwa, zvi tiveni lezvaku a kuhahlulwa kakwe ku tshinele.” Ka cikhati leco va wa fanele ku ingisa citlharihiso ca Jesu ca ku va tsutsumela zvitsungeni. (Luka 21:20, 21) Lava va nga ingisa citlharihiso leco va ponile a cikhati leci a vaRoma va nga hahlula Jerusalema.

3. Zvini hi to bhula hi zvona ka ndzima leyi?

³ Nyamutlha hi hanya magumo ya tiko legi go biha. Hikwalaho, hinawu hi fanele ku simama hi hlayisa kupima ka hina, ni  ku simama hi ti wonela. Ka ndzima leyi, hi ta wona ndlela ya ku kombisa a kuringanisela laha hi wonako lezvi zvi humelelako lomu tikweni, lezvi hi nga ti wonelisako zvona ni lezvi hi nga ci tirisisako zvona a cikhati leci ci seleko.

4. Hikuyini hi faneleko a kutsaka hi ku wona lezvi a zvimaho zva tiko legi zvi tatisisako zvona a zviphrofeto zva Bhibhiliya?

⁴ Hi cigelo co zwala, ha zvi lava nguvhu a ku wona ku lezvi zvi humelelako lomu tikweni zvi tatisisa kuyini a zviphrofeto zva Bhibhiliya. Hi cikombiso, Jesu i hi byelile lezvi zvi nga wa ta humelela kasi ku hi vhuna a ku tiva lezvaku a kugumesa ka tiko legi ga Sathani ku laha kusuhani. (Mat. 24:3-14) Mupostoli Pedro i hi kucile ku veka kupima ka zviphrofeto zvi tatisekako, kasi a kukholwa ka hina ku tshama na ku tiyile. (2 Ped. 1:19-21) A bhuku go gumesa ga Bhibhiliya gi sangula hi magezu lawa: “Kuvhululelwa ka Jesu Kristu, loku a nga nyikiwa hi Nungungulu lezvaku a tivisa a malandza yakwe lezvi zvi to maheka zvalezvanyana.” (Kuv. 1:1) A ho kutsaka hi lezvi zvi mahekako nyamutlha lomu tikweni ni ku tiva lezvi zvi tatisisako zvona a zviphrofeto zva Bhibhiliya. Kuzvilava ha zvi xuva nguvhu kambe a ku bhula hi zvilo lezvo ni van’wani.

5. Zvini hi faneleko ku zvi potsa niku zvini hi faneleko ku maha? (Wona ni mifota.)

⁵ Hambulezvo, a cikhati hi wulawulako hi zviphrofeto zva Bhibhiliya, hi fanele ku potsa ku wula zvo hundza lezvi zvi nga wuliwa. Hikuyini? Hakuva a hi lavi a ku wula ni cihi ci nga wa ta wonha kuzwanana ka hina lomu bandleni. Hi cikombiso, kuzvilava hazwa tihosi ta tiko na ti wulawula hi lezvi ti to lulamisisa zvona a gujeguje yo kari ni ku neha kurula ni kutshamiseka. Wutshan’wini ga ku hundzeleta hiku a magezu lawo ma tatisa ciphrofeto ci nga ka 1 Va Le Tesalonika 5:3, hi fanele ku tiva tlhamuselo wo gumesa wu humesilweko. Loku a mitlhamuselo ya hina hi yi seketela ka lezvi zvi wulilweko hi hlengeletano ya Jehovha, hi ta vhuna bandla lezvaku gi simama gi zwanana “kupimiseni ni maalakanyweni.” — 1 Kor. 1:10; 4:6.

6. Zvini hi nga gondza ka 2 Pedro 3:11-13?

⁶ Lera 2 Pedro 3:11-13. Mupostoli Pedro i hi vhunile ku simama hiva ni mawonela yo ringanisela laha hi ehleketako hi zviphrofeto zva Bhibhiliya. I hi kucile ku simama hi “alakanya a kuta ka siku ga Jehovha.” Hikuyini? A hi ku khwatsi ho lava ku tiva “siku ni cikhati” leci Jehovha a to tisa a Armagedhoni, kanilezvi, hi lava ku tirisa cikhati leci ci hi saleleko kasi hiva ‘ni mahanyela yo basa, hi kombisa hi mitiro lezvaku hi khozela Nungungulu.’ (Mat. 24:36; Luka 12:40) Hi magezu man’wani, hi lava ku simama hiva ni mahanyela manene ni ku maha lezvi hi zvi kotako kasi a kutikarata ka hina ntirweni wa Jehovha ku kombisa lezvaku ha mu randza nguvhu. Kasi ku maha lezvo, hi fanele ku ti wonela.

7. Hi kombisa kuyini lezvaku ha ti wonela? (Luka 21:34)

⁷ Jesu i byelile vapizani vakwe lezvaku va nga ti woneli ka lezvi zvi humelelako lomu tikweni basi, kanilezvi va tlhela va ti wonela vona venyi. A mhaka leyo yi dlunyateka khwatsi ka citlharihiso ci nga ka Luka 21:34. (Lera.) Wona magezu ya Jesu, yaku: “Ti woneleni.” A munhu a ti wonelako i tshama na a ma vhulile ka ni yihi mhango yi nga wonhako wunghana gakwe na Jehovha niku i ti karatela  ku yi potsa. Hi ndlela leyo, i simama lirandzweni la Nungungulu. — Mav. 22:3; Jud. 20, 21.

8. Wusungukati muni legi mupostoli Pawule a nyikileko maKristu?

⁸ Mupostoli Pawule i byelile maKristu lezvaku ma ti wonela. Hi cikombiso, i byelile maKristu ya le Efesusi aku: “Ti woneleni nguvhu kufambeni ka n’wina. Mu nga mahisi ku khwatsi a mu tlharihangi kanilezvi fambani kota vatlharihileko.” (Efe. 5:15, 16) Sathani i zama ku wonha wunghana ga hina na Jehovha. Hikwalaho, a Bhibhiliya gi hi kuca ku ti karatela “ku tiva lezvi Jehovha a zvi randzako” kasi hi ti vhikela ka mitlhamu yontlhe ya Sathani. — Efe. 5:17.

9. Hi ku tivisa kuyini a kurandza ka Jehovha?

⁹ A Bhibhiliya a gi wulawuli hi zvontlhe zvi nga wonhako a wunghana ga hina na Jehovha. A kutala ka zvikhati hi fanele ku maha zviboho ka zvilo zvi kalako zvi nga tlhamuselwi hi kukongoma lomu ka Mitsalo. Kasi hi maha zviboho zva zvi nene, hi fanele ku zwisisa kutani ku tiva “lezvi Jehovha a zvi randzako.” Hi nga maha lezvo hi ku gondza Bhibhiliya hi kukhandzakanya hi tlhela hi ehleketa hi lezvi hi gondzako. Laha hi yako hi zwisisa a kurandza ka Jehovha hi tlhela hi zama kuva ni “kupima ka Kristu” hi ta zvi kota ku famba “kota vatlharihileko,” hambu loku ku nga hi na nayo wo kongoma kasi ku hi rangela. (1 Kor. 2:14-16) A mitlhamu yo kari ya olova ku yi pola, kanilezvi a yin’wani a zvi olovi — yi tumbele.

10. Hi tihi timhango to kari hi faneleko ku ti potsa?

¹⁰ A timhango to kari hi faneleko ku ti potsa ti patsa ku hlakana hi lirandzo, kunwa nguvhu, kuga nguvhu, ku wulawula zvilo zvi bayisako van’wani, ku sixtira zvilo zva tihanyi, pornografia ni zvin’wani zvo fana ni lezvo. (Lis. 101:3) A nala wa hina Sathani, contlhe cikhati i hlota tindlela ta ku wonha a wunghana ga hina na Jehovha. (1 Ped. 5:8) Loku hi nga ti woneli, Sathani a nga byala timbilwini ta hina a mbewu ya matshoho, kukanganyisa, wunavenave, livengo, matshandza ni civiti. (Gal. 5:19-21) Kusanguleni, a zvilo lezvo zvi nga wonekisa ku khwatsi a hi cikarato ca hombe. Kanilezvi, loku hi nga tekeli ku maha cokari kasi ku zvi tsuwula, zvi ta simama ku kula a ku fana ni byanyi go daya nguvhu zvi tlhela zvi hi vangela zvikarato. — Jak. 1:14, 15.

11. Hi yihi yin’we ya timhango yi nga wonekiko hi faneleko ku yi potsa, niku hikuyini?

¹¹ A yin’we ya timhango yi nga wonekiko hi faneleko ku yi potsa vanghana vo biha. Ehleketa hi ciyimo leci: U tira ni wokari a kalako a ga hi Kustumunyu wa Jehovha. Lezvi u lavako ku ava ni mawonela manene hi Vakustumunyu va Jehovha, u kombisa wunene u tlhela u mu vhuna. U nga tlhela u vhumela kuganyana cokari naye hi zvikhati zvo kari. Zvalezvo, u sangula kuga naye hi kukhandzakanya. Ka zvikhati zvo kari, a munhu loye i sangula ku bhula hi zvilo zvo kala kuhlazveka. Kusanguleni, u mahisa ku khwatsi a hi zva nchumu. Hi kufamba ka cikhati, a mabhulo lawo u ma tolovela nguvhu laha ka ku ma nga ha ku karati. Maku ka siku go kari, i ku ramba ku mu yanwa andzhako ka ku tira, u tlhela u vhumela. Hi kufamba ka cikhati, u sangula kuva ni maalakanyo yo fana ni lawa yakwe. Ka ciyimo leco, u wona ku zva ha ta teka cikhati muni kasi u sangula ku maha lezvi a munghana wa wena a mahako ke? Lisine ku hi kombisa wunene ni cichavo ka vanhu vontlhe, kanilezvi hi fanele ku alakanya lezvaku lava hi hlawulako ku hlakana navo, hi ta guma hi fana navo. (1 Kor. 15:33) Loku hi ti wonela, kota lezvi Jesu a hi kucileko, hi nga ta maha wunghana ni lava va kalako  va nga hanyi hi matshinya ya milayo ya Jehovha. (2 Kor. 6:15) Hi ta zvi wona a ku zvi na ni mhango, hi tlhela hi yi potsa.

12. Zvini lezvi a vapizani va Jesu va nga fanele ku maha laha va nga kari va rindzela kugumesa ka tiko?

¹² Jesu i wa lava ku a vapizani vakwe va tshama na va khomekile laha va rindzelako kugumesa ka tiko. I no va nyika ntiro kasi va wu maha. I va rumile ku chumayela mahungu ya manene lomu “Jerusalema, ni Judhiya gontlhe, ni Samariya, kala magemeta-musi ya misava.” (Miti. 1:6-8) Lowo wu wa hi ntiro wa hombe nguvhu! Va ci tirisile khwatsi a cikhati cabye hi ku maha zvontlhe va nga zvi kota kasi ku chumayela van’wani.

13. Hikuyini hi faneleko ku ci tirisa khwatsi a cikhati ca hina? (Va Le Kolosi 4:5)

¹³ Lera Va Le Kolosi 4:5. Kasi hi ti wonela, hi fanele ku ehleketa khwatsi hi lezvi hi ci tirisisako zvona a cikhati ca hina. Hontlheni hi nga humelelwa hi zvilo zvo kala hi nga zvi rindzelangi. (Mutsh. 9:11) Hi ngafa hi citshuketi.

14-15. Hi yihi ndlela ya ku ci tirisa khwatsi a cikhati ca hina? (Mahebheru 6:11, 12) (Wona ni mufota.)

¹⁴ Hi nga ci tirisa khwatsi a cikhati ca hina hi ku maha kurandza ka Jehovha ni ku tiyisa a wunghana ga hina naye. (Joh. 14:21) Hi fanele  ku ‘tiya hi ku nde, hi nga tsekatseki, hi tshama na hi khomekile ntirweni wa Hosi.’ (1 Kor. 15:58) Loku hi lava kufa, kutani loku a kugumesa ka tiko legi ku lava ku chikela, hi nga ta ti laya, hiku: ‘Mayiwako loku ndzi wa no maha zvotala ntirweni wa Jehovha!’ — Mat. 24:13; Rom. 14:8.

¹⁵ Nyamutlha, Jesu wa ha simama ku rangela vapizani vakwe laha va chumayelako Mufumo wa Nungungulu misaveni yontlhe. Jesu wa maha lezvi a nga tsumbisa. Hi ku tirisa hlengeletano ya Jehovha, wa hi gondzisa lezvi hi nga chumayelisako zvona niku wa hi nyika tiferamenta ti lavekako kasi ku hangalasa a mahungu ya manene. (Mat. 28:18-20) Hinawu hi nga maha cipandze ca hina hi ku ti tsitsirita ntirweni wa kuchumayela ni kugondzisa, hi tlhela hi simama ku ti wonela laha hi rindzelako Jehovha kasi a lovisa tiko legi. Loku hi tirisa wusungukati gi nga ka Mahebheru 6:11, 12, a kutsumba ka hina ku ta tiya ku ku nde “kala magumo.” — Lera.

16. Zvini hi ti yimiseleko ku maha?

¹⁶ Jehovha i yimisile siku ni cikhati leci a to lovisa hi cona a tiko legi ga Sathani. Loku a siku lego gi ta chikela, handle ko kanakana Jehovha i ta tatisa zviphrofeto zvontlhe lezvi a zvi tsalileko lomu ka Mhaka yakwe. Kanilezvi, lezvi ha ha rindzelako cikhati leco, hi nga tshuka hi zvi wonisa ku khwatsi co hlwela. Hambulezvo, a siku ga Jehovha gi tata futsi, gi ‘nga ta thindeka.’ (Hab. 2:3) Hikwalaho, a hi ti yimiseleni a ku ‘cuwuka ka Jehovha,’ hi komba lezvaku hi rindzela ‘Nungungulu wa kuhanyiswa ka hina.’ — Mika 7:7.