1-2. Zvini lezvi a ngilozi yi byelileko a vavasati laha cilahleni ca Jesu niku cileletelo muni leci Jesu a va nyikileko?

I MIXO ya 16 ka Nisani wa 33 Nguveni ya Hina. Andzhako ka masiku mambiri Hosi Jesu na a lahlilwe, a vavasati vo kari va ku randza Nungungulu va ya laha cilahleni cakwe na va karatekile nguvhu. A cikhati va chikelako, na va lava ku tota powa yo nuhela ni mafura yo nuhela a cirumbi ca Jesu, va hlamala nguvhu hi ku wona lezvaku a cilahla ci phanga! A ngilozi yo kari yi byela a vavasati lavo lezvaku Jesu i vhuxilwe hi ka vafileko yi tlhela yiku: “I ndleleni ya kuya Galileya. Mu ta ya mu wona seyo.” — Mat. 28:1-7; Luka 23:56; 24:10.

² Andzhako ka loku va sukile laha cilahleni, Jesu wutsumbu i no va tshinelela a va nyika a cileletelo leci: “Fambani mu ya byela a vamakabye va mina a timhaka leti kasi vaya Galileya. Va ta ya ndzi wona seyo.” (Mat. 28:10) Jesu i wa hi ni zvileletelo zva lisima kasi ku nyika a vapizani vakwe. Hikwalaho, a nchumu wo sangula a nga maha andzhako ka loku a vhuxilwe hi ka vafileko ku maha mutlhangano ni vapizani vakwe!

3-4. Hikuyini hi nga wulako lezvaku a cileletelo ci nga ka Matewu 28:19, 20 a ci nyikiwangi ntsena a vapostoli? (Wona mufota wa kapa.)

³ Lera Matewu 28:16-20. Ka mutlhangano lowu Jesu a wu mahileko ni vapizani vakwe, i wulawulile hi ntiro wa lisima lowu va nga wa ta wu maha ka cikhati leco — a ntiro walowu hi wu mahako ni nyamutlha. Jesu ite: “Fambani mu va maha vapizani a vanhu va matiko wontlhe, . . . mu va gondzisa a ku ingisa zvontlhe lezvi ndzi mu layileko.”

⁴ Jesu i lava lezvaku vontlhe a valandzeli vakwe va chumayela.  A cileletelo leci a nga nyikangi a vapostoli vakwe vo tsumbeka va 11 basi. Cini ci hi tiyisekisako lezvo? Xana vapostoli basi va nga hi kona a cikhati leci ku nga nyikiwa a cileletelo leci le citsungeni ca Galileya? Alakanya lezvaku a ngilozi yi byelile a vavasati yiku: “Mu ta ya mu wona [le Galileya].” Hikwalaho a vavasati lavo vonawu va wa fanele ku ngha va hi kona ka mutlhangano lowo. Kanilezvi a hi lezvo basi. Mupostoli Pawule i wulile lezvaku Jesu i “no woneka ka 500 wa vamakabye ni ku hundza hi khati gin’we”. (1 Kor. 15:6) Kwihi lezvo?

5. Zvini hi gondzako ka 1 Va Le Korinte 15:6?

⁵ Hi na ni zvigelo zva zvi nene zvi hi mahako hi ehleketa lezvaku ka Va Le Korinte vo sangula 15:6, Pawule i wa wula a mutlhangano wu mahilweko le Galileya lowu wu tlhamuselwako ka Matewu cipimo 28. Zvigelo muni? Co sangula, a kutala ka vapizani va Jesu va wa hi va le Galileya. Hikwalaho zvi wa olova a ku maha mutlhangano ni vanhu vo tala le citsungeni ca Galileya wutshan’wini ga ku wu mahela laha mutini wa munhu le Jerusalema. Ca wumbiri, Jesu i wa sina a tlhanganile ni vapostoli vakwe va 11 laha kaya ka munhu le Jerusalema andzhako ka loku a vhuxilwe hi ka vafileko. Loku ku wa hi ku Jesu i wa lava ku nyika a vapostoli vakwe basi a cileletelo ca ku chumayela ni ku maha vapizani na a va nyikile le Jerusalema wutshan’wini ga ku va ramba vona, ni vavasati ni van’wani vanhu lezvaku va ya tlhangana naye le Galileya. — Luka 24:33, 36.

6. Matewu 28:20 i zvi kombisa kuyini lezvaku a cileletelo ca ku maha vapizani ca tira ni nyamutlha niku a vanhu va ci ingisisa kuyini?

⁶ Ca wunharu, a cileletelo ca Jesu ca ku maha vapizani ci wa nga gumelwe ka maKristu ma nga hanya cikhatini leco. Hi zvi tivisa kuyini? Jesu i gumesile a zvileletelo zvakwe ka vapizani vakwe hi magezu lawa: “Ndzi na n’wina masiku wontlhe kala kugumeseni ka tiko.” (Mat. 28:20) Kota ku wula ka Jesu, nyamutlha ka ha mahiwa vapizani vo tala. Ehleketa hi lezvi: Lembe ni lembe ku bhabhatisiwa vanhu va kwalomu ka 300 000 kota Vakustumunyu va Jehovha va tlhela vava vapizani va Jesu Kristu!

7. Zvini hi to bhula hi zvona zvezvi niku hikuyini?

⁷ A kutala ka lava va gondzako Bhibhiliya va kula hi tlhelo ga moya va tlhela va bhabhatisiwa. Hambulezvo, a vokari lava hi gondzako navo a Bhibhiliya va chava a kuva vapizani va Jesu. Va tsaka hi cigondzo ca Bhibhiliya kanilezvi a va kuli kasi va ringanelwa hi ku bhabhatiswa. Loku u hi ni cigondzani ca Bhibhiliya, ha tiyiseka lezvaku wa zvi lava ku ci hanya hi lezvi ci zvi gondzako niku ci vhuna kuva mupizani wa Kristu. A ndzima leyi yi ta wulawula hi lezvi hi nga khumbisako zvona a timbilu ta zvigondzani zva hi hina ni lezvi hi nga zvi vhunisako zvona a ku kula hi tlhelo ga moya. Hikuyini hi faneleko ku bhula hi mhaka leyi? Hiku ka zvikhati zvin’wani zvi nga lava ku hi maha ciboho ca ku simama ku gondza naye Bhibhiliya kutani ku nyima ku gondza.

8. Hikuyini ka zvikhati zvin’wani zvi karatako a ku khumba timbilu ta zvigondzani?

⁸ Jehovha i lava lezvaku a vanhu va mu tirela hakuva va mu randza. Hikwalaho a kungo ga hina ku vhuna zvigondzani lezvaku zvi zwisisa ku Jehovha wa khatala nguvhu hi mun’we ni mun’wani niku wa va randza nguvhu. Hi lava ku va vhuna ku va wona Jehovha kota ‘papayi wa zvisiwana, tlhelo muyimeli wa tinoni’. (Lis. 68:5) Laha a zvigondzani zva wena zvi to zwisisa lezvi Nungungulu a zvi randzisako zvona, kuzvilava zvi ta khumba a timbilu tabye, a lirandzo labye hi Nungungulu li kula. A zvigondzani zvo kari zvi nga zvi karatela a ku wona Jehovha kota Papayi wa lirandzo hi kota ya lezvi a vapapayi vabye va nga kala ku va komba a lirandzo. (2 Tim. 3:1, 3) A cikhati leci u fambisako a cigondzo ca Bhibhiliya khanyisa a matshamela ya Jehovha yo hlamalisa. Vhuna a zvigondzani zva wena zva Bhibhiliya a ku zvi zwisisa lezvaku a Nungungulu wa  hina wa lirandzo i lava ku zvi kuma a wutomi ga pindzukelwa, niku i longile a ku zvi vhuna kasi zvi kuma a wutomi lego. Zvini zvin’wani hi nga mahako?

9-10. Mabhuku muni hi faneleko ku ma tirisa kasi ku fambisa zvigondzo zva Bhibhiliya, niku hikuyini?

⁹ Tirisa a bhuku “Zini lezi a Bibilia gi hi gonzisako” ni legi gaku ‘Tshamani liranzweni la Nungungulu’. A kungo ga mabhuku lawa ku hi vhuna a ku khumba a timbilu ta zvigondzani zva hina. Hi cikombiso, a cipimo 1 ca bhuku Hi gonzise ci hlamula a zviwutiso lezvi: Xana Nungungulu wa khatala hi hina, ni ku munhu wa xapi?, Nungungulu i ti zwisa kuyini loku a vanhu va xaniseka? niku zva koteka kuva munghana wa Jehovha ke? Ahati ke, a bhuku ‘Tshamani liranzweni la Nungungulu’. A bhuku legi gi vhuna a cigondzani a ku zwisisa lezvi a ku tirisa a matshinya ya milayo ya Bhibhiliya zvi nga chukwatisisako zvona a wutomi gakwe zvi tlhela zvi mu tshineta kusuhani na Jehovha. Hambu loku ku hi ku u sina u gondzile a mabhuku lawa ni zvin’wani zvigondzani zva Bhibhiliya, longisela khwatsi a cigondzo cin’we ni cin’wani u tlhela u ehleketa hi cilaveko ca cigondzani ni cigondzani.

 ¹⁰ Hambulezvo, a hi zvi veke laha kaku a cigondzani ca wena ci tsakisilwe hi mhaka yi nga ka bhuku gi kalako gi nga mahi cipandze ca lawa ma nga ka feramenta ya ku gondzisa hi yona. U ta maha yini? U nga mu kuca ku a gondza bhuku lego na a hi yece kasi u simama u fambisa cigondzo hi gin’we ga lawa ma kumbukilweko laha hehla.

11. Hi rini hi faneleko ku sangula hi tlhela hi gumesa a cigondzo hi mukhongelo, niku hi nga zvi mahisa kuyini?

¹¹ Sangula a cigondzo hi mukhongelo. Zvi nene a ku hi sangula hi tlhela hi gumesa a cigondzo hi mukhongelo, a kutala ka zvikhati andzhako ka mavhiki matsongwani na hi sangulile a ku gondza naye hi kukhandzakanya. Hi fanele ku vhuna a cigondzani a ku tiva lezvaku hi nga zvi kota a ku zwisisa a Mhaka ya Nungungulu ntsena hi ku vhuniwa hi moya wo basa wa Nungungulu. A vamakabye vo kari va tlhamusela ku hikuyini hi mahako mukhongelo loku hi lava ku gondza hi ku lera Jakobe 1:5 a nge: “Loku a hi kona cikari ka n’wina loyi a kalako a nga hi na wutlhari, i wa kombele ka Nungungulu.” Va gumesa va wutisa a cigondzani a ku hi nga mu kombelisa kuyini a wutlhari Nungungulu? Kuzvilava a cigondzani ci hlamula ku hi ku maha mukhongelo.

12. U nga li tirisisa kuyini a Lisimu 139:2-4 kasi ku vhuna a cigondzani lezvaku ci wulawula na Jehovha na ci tlhatlhekile?

¹² Gondzisa a cigondzani ca wena lezvi ci faneleko ku mahisa zvona mukhongelo. Tlhamusela a cigondzani ca wena lezvaku Jehovha wa zvi lava a kuzwa a mikhongelo yakwe yo huma mbilwini. U ci tlhamusela lezvaku ka mikhongelo leyi munhu a yi mahako yece, a nga byela Jehovha lezvi a ti zwisako zvona ni zvin’wani zvilo zvaku i wa nga ta lava ku byela munhu. Niku Jehovha i sina a ma tiva a maalakanyo ya hina. (Lera Lisimu 139:2-4.) Hi nga tlhela hi kuca a zvigondzani zva hina lezvaku zvi kombela Nungungulu kasi a zvi vhuna a ku cica maalakanyo ni mahanyela ya hava. Hi cikombiso, a hi nge a munhu wo kari a nga ni masiku yo leha na a gondza Bhibhiliya kuzvilava i randza mibuzo leyi a maKristu ma nga faneliko ku hlengela ka yona. Wa zvi tiva lezvaku zvi bihile, kanilezvi wa ha tsakisiwa hi zvokari ka mibuzo leyo. Mu kuce a ku byela Jehovha lezvi a ti zwisako zvona a tlhela a mu kombela lezvaku a mu vhuna ku randza basi lezvi Yena a zvi randzako. — Lis. 97:10.

13. a) Hikuyini hi faneleko ku ramba a zvigondzani zva hina lezvaku zvita mitlhanganweni na ha ha sangula ku gondza? b) Hi nga maha yini kasi a cigondzani ci tizwa na ci hi kaya lomu Salawu ya Mufumo?

¹³ Ramba a cigondzani ca wena ca Bhibhiliya lezvaku cita mitlhanganweni na ma ha sangula ku gondza. Lezvi a cigondzani ca wena ci zvi zwako ni ku zvi wona mitlhanganweni ya wuKristu zvi nga khumba a mbilu ya cona zvi tlhela zvi ci vhuna a ku kula hi tlhelo ga moya. Mu kombe a vhidhyu leyi yaku Zini zi mahiwako lomu ka Salawu ya Mufumo? niku hi ndlela ya lirandzo mu rambe lezvaku mu fambe zvin’we mitlhanganweni. Loku zvi koteka mu vhune hi mafambela. Zvi nene a ku famba ni vamakabye vo hambanahambana kasi uya fambisa navo a cigondzo. Lezvo zvi ta vhuna a cigondzani ca wena a ku tiva a vanhu vo tala lomu bandleni, niku loku ci ta mitlhanganweni ci ta tizwa ci hi kaya.

14. Cini ci to kuca a cigondzani a ku kula hi tlhelo ga moya?

¹⁴ A kungo ga hina ku vhuna a zvigondzani zva hina zva Bhibhiliya lezvaku zvi kula hi tlhelo ga moya. (Efe 4:13) Loku a wokari a vhumela ku hi gondza naye Bhibhiliya kuzvilava i vhumela hi ku lava ku tiva lezvi a cigondzo leco ci to mu vhunisa zvona. Kanilezvi a cikhati leci a lirandzo lakwe hi Jehovha li toya li kula, a nga ha sangula ku ehleketa hi lezvi yena a nga vhunisako zvona van’wani a ku patsa ni vamakabye laha bandleni. (Mat. 22:37-39) Hi cikhati ci nene, byela a cigondzani ca wena lezvaku ku na ni thomo ga ku seketela a zvilaveko zva ntiro wa Mufumo hi mali.

15. Hi nga ci vhunisa kuyini a cigondzani a ku maha lezvi zvi nga zvi nene loku ci kumana ni zvikarato?

 ¹⁵ Gondzisa cigondzani ca wena lezvi ci faneleko ku maha loku ci kumana ni zvikarato. Hi cikombiso, a hi nge a cigondzani ca wena, ci nga bhabhatisiwangiko, ci ku byelile lezvaku ci khunguvanyisilwe hi wokari laha bandleni. Wutshan’wini ga ku yimelela wokari, mu tlhamusele lezvi a Bhibhiliya gi wulako lezvaku i fanele ku maha. A nga tsetselela a makabye loye a tlhela a zvi rivala. Kutani ku loku a nga zvi koti lezvo, a nga tshinelela a makabye loye a bhula naye hi ndlela ya lirandzo na a hi ni kungo ga ku ‘kuma a makabye’. (Ringanisa na Matewu 18:15.) Vhuna a cigondzani ca wena a ku longisela lezvi ci to zvi wula. Ci kombe lezvi ci nga yi tirisisako zvona a JW Library^®, ni Bhuku go kambisisa hi gona ga Vakustumunyu va Jehovha ni jw.org^® kasi ku gondza a tindlela ti vhunako ta ku lulamisa a cikarato leci. Loku a gondza lezvi a nga lulamisisako zvona a zvikarato ni van’wani na a nga se bhabhatisiwa zvi ta mu olovela nguvhu a kuzwanana khwatsi ni van’wani laha bandleni andzhako ka loku a bhabhatisilwe.

16. Hikuyini zvi nga zvi nene a ku ramba a van’wani vahuweleli ka zvigondzani zva wena?

¹⁶ Ramba vamakabye va laha bandleni — ni muwoneleli va cipandze loku a vhuxela a bandla ga wena — lezvaku uya fambisa navo a cigondzo. Hikuyini? Kasi a ku engetela a zvigelo lezvi zvi sinako zvi wulilwe, a van’wani vahuweleli va nga zvi kota a ku vhuna a cigondzani ca wena hi tindlela leti wena u nga ti kotiko. A hi nge a cigondzani ca wena ci zamile ku tsika ku dzaha hi makhati yo hlaya ci tsandzeka. Ramba a makabye a zvi kotileko ku hluka a cikarato leco — kuzvilava andzhako ka ku a zamile hi makhati yo tala — lezvaku u famba naye ka cigondzani leco. A makabye loye i ta mu tlhamusela a wutlhari gi vhunako legi a cigondzani ci gi lavako. Loku u nga tizwi khwatsi a ku fambisa cigondzo na u hi ni makabye a buvhileko, byela makabye loye lezvaku a fambisa a cigondzo ka khati lego. Loku u ramba vamakabye lezvaku u famba navo ka zvigondzani zva wena, zvi ta vhuneka hi matimu ya vamakabye lavo. Alakanya lezvaku a kungo ga hina ku vhuna a zvigondzani a ku kula hi tlhelo ga moya.

17-18. Zvini u faneleko ku ehleketa hi zvona loku u lava ku maha ciboho ca ku nyima kutani ku simama ku gondza ni wokari?

¹⁷ Loku loyi u gondzako naye Bhibhiliya a nga cici zvokari wutomini gakwe, hi ndlela yo kari u nga ha ti wutisa ku, ‘ndzi fanele ku nyima ku gondza naye?’ Na u nga se maha ciboho, u fanele ku ehleketa hi matshamela ya munhu mun’we ni mun’wani. A van’wani vanhu va teka cikhati co leha kasi va kula hi tlhelo ga moya a ku hundza van’wani. Ti wutise lezvi: ‘A cigondzani ca mina ca kula hi kuya hi lezvi a ciyimo cakwe ci nga tshamisa zvona?’ ‘I sangulile “a ku ingisa” kutani ku tirisa lezvi a zvi gondzako?’ (Mat. 28:20) Zvi nga teka cikhati kasi a cigondzani ci kula kanilezvi ci fanele ku cica zvokari wutomini gakwe hi kutsongwani-kutsongwani.

¹⁸ Hambulezvo, zvi nga kuyini loku a wokari a  gondzako Bhibhiliya hi cikhati co nyawula a nga cici nchumu wu kombako lezvaku wa zvi nyika lisima lezvi a zvi gondzako kutani ku a cica zvitsongwani? Wona a ciyimo leci: A cigondzani ca wena ci mbhetile a ku gondza bhuku Hi gonzise, niku kuzvilava ci sangulile legi gaku ‘Tshamani liranzweni la Nungungulu’, kanilezvi a nga se tshuka a tsemakanya ka mutlhangano wa bandla— hambu hi ka Cialakanyiso! Niku a zvikhati zvo tala i ti lavela zvigelo kasi mu nga gondzi. Ka ciyimo leco, u wa ta maha khwatsi hi ku bhula naye. *

19. Zvini u nga wulako ka munhu loyi a kalako a nga ci nyiki lisima a cigondzo cakwe ca Bhibhiliya, niku zvini lezvi u faneleko ku ehleketa hi zvona?

¹⁹ U nga sangula bhulo hi ku mu wutisa ku, ‘cini u ci wonako na ci ku karatela nguvhu kasi uva Kustumunyu wa Jehovha?’ A cigondzani kuzvilava ci nga hlamula ku: ‘Ndza zvi randza a ku gondza Bhibhiliya kanilezvi ndzi nga ta tshuka ndzi maha Kustumunyu wa Jehovha!’ Loku a hi ni mawonela lawo, andzhako ka ku gondza hi cikhati co leha, xana ku na ni cigelo ca ku simama ku gondza naye ke? Kanilezvi, kuzvilava a cigondzani ca wena ci nga ku tlhatlhela hi khati go sangula lezvi zvi ci mahako ci nga kuli. Hi cikombiso, ci nga wula ku ci nga ta tshuka ci zvi kota ku chumayela hi muti ni muti. Loku u tiva lezvi a ti zwisako zvona, u nga zvi kota ku tiva lezvi u nga mu vhunisako zvona.

20. Mitiro 13:48, a hi vhunisa kuyini a ku tiva loyi hi faneleko ku simama hi gondza naye?

²⁰ A khombo ga kona hi ku a zvigondzani zvo kari zvi fana ni vaIzrayeli va masikwini ya Ezekiyeli. Xungetano hi vona, Jehovha i byelile Ezekiyeli aku: ‘A ka vona u fanana ni loyi a yimbelelako a lisimu la lirandzo hi gezu gi tsakisako, loyi a zvi tivako a kuba citende. Hakuva vazwa a timhaka ta wena, kanilezvi a va ti mahi.’ (Ezek. 33:32) Zvi nga hi karatela ku byela munhu lezvaku hi nga ta ha gondza naye. Hambulezvo, “a cikhati ci nga sala ci tsongwani”. (1 Kor. 7:29) Wutshan’wini ga ku mbheta cikhati na hi fambisa a zvigondzo zvi nga kombisiko ku kula, hi fanele ku ti karatela ku lava a vanhu va kombisako lezvaku va ‘longile ku amukela . . . wutomi ga pindzukelwa’. — Lera Mitiro 13:48.

21. Wuli yini a mutsalo wa hina wa lembe ga 2020 niku wu ta hi vhuna ku maha yini?

²¹ A mutsalo wa hina wa lembe ga 2020 wu ta hi vhuna a ku veka kupima ka lezvi hi nga chukwatisisako zvona a ntiro wa hina wa ku maha vapizani. Wu na ni magezu ya Jesu a ma wulileko ka mutlhangano wa lisima a wu maheleko citsungeni ca Galileya, yaku: “Fambani mu va maha vapizani . . . , mu va bhabhatisa.” — Mat. 28:19.