1. Zvini lezvi Jehovha a phrofetileko ku zvi wa ta humelela masikwini ya hina?

JEHOVHA i phrofetile lezvi xungetano hi masiku lawa hi hanyako ka wona: A ‘khume ga vavanuna va tirimi ti tsalangeneko ta matiko, va ta khomelela ka nguwo ya muJudha, vaku: Hi ta famba na n’wina, hakuva hi zwile lezvaku Nungungulu i na n’wina.’ (Zak. 8:23) A ‘muJudha’ i yimela lava Nungungulu a va totileko hi moya wa ku basa. Va vitaniwa kambe lezvaku i “Izrayeli wa Nungungulu.” (Gal. 6:16) A “khume ga vavanuna” va yimela lava va nga ni kutsumba ka ku hanya laha misaveni kala kupindzuka. Va zvi tiva lezvaku Jehovha i hlawulile a ntlawa wa vatotilweko niku va zvi wona zvi hi wudzundzo a ku mu khozela zvin’we navo.

2. A “khume ga vavanuna” va “famba” ni vatotilweko hi ndlela muni?

² Hambu lezvi zvi nga kotekiko a ku tiva a vito ga mu totiwa mun’we ni mun’wani a nga kona laha misaveni nyamutlha, * lava va nga ni kutsumba ka ku hanya laha misaveni va nga “famba” zvin’we navo. Hi ndlela muni? A Bhibhiliya gi wula lezvi: A “khume ga vavanuna” va ta ‘khomelela ka nguwo ya muJudha, vaku: Hi ta famba na n’wina, hakuva hi zwile lezvaku Nungungulu i na n’wina.’ A vhesi legi ga Bhibhiliya gi kumbuka muJudha mun’we. Kanilezvi a gezu ‘n’wina’ ni legi gaku ‘na n’wina’ ma wula vanhu vo tala. Lezvo zvi wula lezvaku a muJudha loyi a hi mun’we kanilezvi i yimela ntlawa wontlhe wa vatotilweko. Lava va kalako va nga totiwangi va tirela Jehovha zvin’we ni vatotilweko. Hambulezvo,  a va va woni kota varangeli vabye, hakuva va zvi tiva lezvaku a Murangeli wabye hi Jesu. — Mat. 23:10.

3. Zviwutiso muni zvi to hlamuliwa ka ndzima leyi?

³ Kota lezvi ka ha hiko ni maKristu ma totilweko cikari ka vanhu va Nungungulu nyamutlha, a vokari va nga ha ti wutisa lezvi: 1) A vatotilweko va fanele ku ti wonisa kuyini? 2) Hi fanele ku va khomisa kuyini lava va gako pawa ni kunwa vhinyo Cialakanyisweni? 3) Hi fanele ku karateka loku a ntsengo wa lava va gako pawa ni kunwa vhinyo Cialakanyisweni wu engeteleka? A ndzima leyi yi ta hlamula a zviwutiso lezvi.

4. Citlharihiso muni ci nga ka 1 Va Le Korinte 11:27-29, leci a vatotilweko va faneleko ku ehleketa nguvhu hi cona, niku hikuyini?

⁴ A vatotilweko va fanele ku ehleketa khwatsi hi citlharihiso ci nga ka 1 Va Le Korinte 11:27-29. (Lera.) A munhu a totilweko a ngaga pawa ni kunwa vhinyo Cialakanyisweni “na zvi nga mu ringani” hi ndlela muni? A nga maha lezvo loku aga pawa ni kunwa a vhinyo kanilezvi na a nga hanyi hi milayo yo tlakuka ya Jehovha. (Mah. 6:4-6; 10:26-29) A vatotilweko va zvi tiva lezvaku va fanele ku simama va tsumbekile loku va lava ku kuma “nchachazelo wa  kuvitaniwa tilweni hi Nungungulu ha Kristu Jesu.” — Filp. 3:13-16.

5. A maKristu ma totilweko ma fanele ku ti wonisa kuyini?

⁵ A moya wo basa wa Jehovha wu vhuna a malandza yakwe lezvaku ma ti koramisa, ma nga ti kulisi. (Efe. 4:1-3; Kol. 3:10, 12) Hikwalaho, a vatotilweko a va ti woni na va hi va chukwana a ku hundza van’wani. Va zvi tiva lezvaku a hi ku khwatsi Jehovha o va nyika a moya wo basa wa ku hundza lowu a nyikako lawa man’wani malandza yakwe. A va alakanyi lezvaku va li zwisisa khwatsi a lisine la Bhibhiliya a ku hundza van’wani. Niku va wa nga ta tshuka va byela munhu mun’wani lezvaku yenawu i totilwe niku i fanele kusangula kuga pawa ni kunwa vhinyo Cialakanyisweni. Wutshan’wini ga lezvo, hi kutikoramisa va zvi tiva lezvaku hi Jehovha basi a rambako vanhu lezvaku vaya tilweni.

6. Hi kuya hi 1 Va Le Korinte 4:7, 8, a maKristu ma totilweko ma fanele ku ti khomisa kuyini?

⁶ Hambu lezvi a vatotilweko va zvi wonako na zvi hi wudzundzo a ku rambiwa a ku ya tilweni, a va lavi ku a van’wani va va khoma hi ndlela yo hlawuleka. (Filp. 2:2, 3) Va zvi tiva kambe lezvaku a cikhati leci Jehovha a nga va tota, a nga tsikangi munhu wo kari a zvi tiva. Hikwalaho a munhu a totilweko a nga hlamali loku a vokari va nga kholwi lezvaku i totilwe. Wa zvi tiva lezvaku a Bhibhiliya gi hi byela ku a hi faneli ku hatlisela ku kholwa loku a wokari a wula lezvaku i nyikilwe ntiro wo hlawuleka hi Nungungulu. (Kuv. 2:2) A munhu a totilweko a nga lavi ku koka a kupima ka van’wani, hikwalaho a nga byeli vontlhe lava a kumanako navo hi khati go sangula lezvaku i totilwe. Niku a nga ti bhumi hi zvona. — Lera 1 Va Le Korinte 4:7, 8.

7. Zvilo muni lezvi a vatotilweko va kalako va nga mahi, niku hikuyini?

⁷ A maKristu ma totilweko a ma alakanyi lezvaku ma fanele ku tshama basi ni maKristu-kulobye ma totilweko, a ku khwatsi hi loku va lumba ntlawa wo hlawuleka. A ma laveteli a van’wani vatotilweko kasi ma bhula hi kutotiwa kabye kutani ku ma tlhangana hi ci wona kasi ma gondza Bhibhiliya. (Gal. 1:15-17) Loku ma wo maha lezvo, a bandla gi wa nga tava ni wumun’we. Ma wa to vhukela a moya wo basa, lowu wu vhunako a malandza ya Nungungulu lezvaku mava ni kurula ni wumun’we. — Rom. 16:17, 18.

8. Hikuyini hi lavako ku ti wonela ka ndlela leyi hi khomako hi yona lava va gako pawa ni kunwa vhinyo Cialakanyisweni? (Wona ni tlhamuselo wa lahasi.)

⁸ Hi fanele ku va khomisa kuyini a vamakabye va totilweko? Zvi wa nga tava zvinene a ku komba munhu a cichavo co hundzeleta — hambu  loku a hi makabye wa Kristu a totilweko. (Mat. 23:8-12) Loku a Bhibhiliya gi wulawula hi madhota gi hi kuca lezvaku hi ‘pimanyisa a kukholwa kabye’, kanilezvi a gi hi byeli lezvaku hi nga maha munhu ava murangeli wa hina. (Mah. 13:7) Lisine lezvaku a Bhibhiliya gi li a vokari va “fanele ku dzundziwa nguvhu”. Hambulezvo, hi kota ya lezvi va “rangelako khwatsi” ni lezvi va “ti tsitsiritako kuwulawuleni ni kugondziseni” na ku nga hi lezvaku va no totiwa. (1 Tim. 5:17) Loku hi dzundza a vatotilweko niku va komba cichavo hi ndlela yo hundzeleta, zvi nga va maha va dhana. * A co biha nguvhu hi ku lezvo zvi nga va maha vava ni matshandza. (Rom. 12:3) Hi wa nga ta lava ku maha nchumu lowu kuzvilava wu nga mahako a muKristu a totilweko a maha ciwonho leco ca hombe! — Luka 17:2.

9. Hi nga zvi kombisa kuyini lezvaku ha ma komba cichavo a maKristu ma totilweko?

⁹ Hi nga zvi kombisa kuyini lezvaku ha va komba cichavo lava va totilweko hi Jehovha? Hi wa nga ta va wutisela ku va totisilwe kuyini. Leyi i mhaka ya munhu wutsumbu, hi kalako hi nga hi na fanelo ya ku yi tiva. (1 Tes. 4:11; 2 Tes. 3:11) Niku a hi faneli ku chikelela a magumo ya lezvaku a vanuna vabye kutani vasati vabye, ni vapswali vabye kutani zvin’wani zviro zva ngango wabye, vonawu va totilwe. A kutsumba ka ku ya hanya tilweni a hi tshomba a nyikwako hi maxaka yakwe. Yi nyikiwa hi Nungungulu. (1 Tes. 2:12) Hi fanele ku ti wonela kambe kasi hi nga mahi a zviwutiso zvi nga wa ta khunguvanyisa van’wani. Hi cikombiso, hi wa nga ta wutisa a sati wa a totilweko lezvaku i ti zwisa kuyini hi ku hanya kala kupindzuka laha misaveni na a nga hi na nuna wakwe. Hi nga tiyiseka lezvaku misaveni yiswa Jehovha i ta ‘xurisa zvontlhe lezvi zvi hanyako’. — Lis. 145:16.

10. Hi ti vhikelisa kuyini loku hi ti wonela ku “hlamala vanhu”?

¹⁰ Loku hi khoma a vatotilweko hi ndlela yi kombako lezvaku a hi va lisima a ku hundza van’wani, hi tlhela hi ti vhikela hina wutsumbu. Hikuyini? A Bhibhiliya gi hi byela lezvaku a vatotilweko vo kari kuzvilava va nga ta simama va tsumbekile. (Mat. 25:10-12; 2 Ped. 2:20, 21) Kanilezvi loku hi ti wonela ku “hlamala vanhu” hi nga tava valandzeli vabye, hambu loku ku hi lava va totilweko kutani lava va tiviwako nguvhu hambu ku hi lava va tireleko Jehovha hi malembe yo tala. (Jud. 16, tlhamuselo wa lahasi.) Loku va nga ha tsumbeki kutani va tsika bandla, hi nga ta luza a kukholwa ka hina kutani ku nyima ku tirela Jehovha.

11. Zvini zvi humelelako hi ntsengo wa lava va gako pawa ni kunwa vhinyo Cialakanyisweni?

¹¹ Hi malembe yo tala, a ntsengo wa lava va gako pawa ni kunwa vhinyo Cialakanyisweni wu wa hunguleka. Kanilezvi ka malembana lawa, a ntsengo lowo wu kula lembe ni lembe. Xana lezvo zvi fanele ku hi karata? Ahihi. A hi wone ku hikuyini hi nga faneliko ku karateka.

12. Hikuyini hi nga faneliko ku karateka xungetano hi ntsengo wa lava va gako pawa ni kunwa vhinyo Cialakanyisweni?

¹² “Jehovha wa va tiva lava va nga vakwe.” (2 Tim. 2:19) A kuhambana ni vamakabye lava va hlayako a ntsengo wa lava va gako pawa ni kunwa vhinyo Cialakanyisweni, Jehovha wa mu tiva loyi a totilweko hi lisine. Hikwalaho a ntsengo lowu wu patsa ni lava va alakanyako lezvaku va totilwe kuveni ahihi. Hi cikombiso, a vokari lava va ngaga pawa ni kunwa vhinyo va gumesile va nyima. A van’wani kuzvilava va na ni mababyi ya hloko lawa ma va mahako va alakanya lezvaku va ta ya fuma na Kristu  le tilweni. Hi lisine, a hi zvi tivi khwatsi lezvaku vatotilweko vangani va ha seleko laha misaveni.

13. A Bhibhiliya ga wula lezvaku vatotilweko vangani va to ngha va ha hi kona laha misaveni a cikhati leci ku to sangula a kuxaniseka ka hombe?

¹³ Ku tava ni vatotilweko ka matlhelo yo tala ya misava a cikhati leci Jesu a tota a ta va teka vaya tilweni. (Mat. 24:31) A Bhibhiliya gi wula lezvaku masikwini yo gumesa, ku tava ni ntsengo wutsongwani wa vatotilweko va to ngha va sele laha misaveni. (Kuv. 12:17) Kanilezvi a gi wuli lezvaku vatotilweko vangani va to ngha va ha hi kona laha misaveni a cikhati leci ku to sangula a kuxaniseka ka hombe.

14. Kota lezvi zvi kombisiwako ka Va Le Roma 9:11, 16, hi gondza yini xungetano hi kuhlawulwa ka vatotilweko?

¹⁴ Jehovha hi yena a mahako ciboho caku hi rini a to hlawula a vatotilweko. (Rom. 8:28-30) Jehovha i sangulile ku hlawula a vatotilweko andzhako ka loku Jesu a vhuxilwe hi ka vafileko. Niku zvi wonekisa ku khwatsi ka zana ga malembe go sangula, a maKristu vontlhe ya lisine ma wa totilwe. Ka malembe ma nga landzela, a kutala ka lava va nga ti wula ku maKristu, va wa nga landzeli Kristu hi lisine. Hambulezvo, ndzeni ka malembe lawo, Jehovha i totile vokari lava va nga hi maKristu ya lisine. A maKristu lawo ma wa fana ni trigo leyi Jesu a ngaku yi wa ta kula cikari ka nyasavari. (Mat. 13:24-30) Masikwini lawa yo gumesa, Jehovha i simama a hlawula vanhu va to maha cipandze ca lava va 144 000. * Hikwalaho, loku Nungungulu a boha ku hlawula a vokari laha kusuhani nguvhu ni magumo ya tiko legi, a hi faneli ku kanakanela a wutlhari gakwe. (Lera Va Le Roma 9:11,  16.) * Hi fanele ku ti wonela kasi hi nga maha zvo fana ni lezvi zvi nga mahiwa hi vatiri lava Jesu a nga va tlhamusela ka wun’we wa mifananiso yakwe. A vatiri lavo va solile a ndlela leyi a hosi yabye yi nga va khoma ha yona lava va nga sangula ku tira hi hora yo gumesa. — Mat. 20:8-15.

15. Xana hi vontlhe a vatotilweko va mahako cipandze ca “nandza go tsumbeka ni go tlhariha”, legi gi kumbukiwako ka Matewu 24:45-47? Tlhamusela.

¹⁵ A hi vontlhe lava va nga ni kutsumba ka kuya hanya tilweni va mahako cipandze ca “nandza go tsumbeka ni go tlhariha”. (Lera Matewu 24:45-47.) A ku fana ni zana ga malembe go sangula, Jehovha na Jesu nyamutlha va tirisa a vamakabye vatsongwani kasi va gisa kutani ku gondzisa a votala. Ka zana ga malembe go sangula, maKristu matsongwani basi ma totilweko ma tirisilweko hi Jehovha kasi ma tsala a Mitsalo ya ciGreki ya wuKristu. Ni nyamutlha konawu, maKristu matsongwani basi ma totilweko ma nga ni wutihlamuleli ga ku nyika “zvakuga hi cikhati ca kona” ka vanhu va Nungungulu.

16. Zvini u zvi gondzileko ka ndzima leyi?

¹⁶ Hi gondza yini ka ndzima leyi? Jehovha i mahile a ciboho caku nyika a malandza yakwe lawa yo tala a wutomi ga pindzukelwa laha misaveni ni wutomi ga le tilweni ka lava va ntlawa wutsongwani wu to fuma na Jesu. Jehovha wa chachazela a malandza yakwe wontlhe — a ‘muJudha’ ni “khume ga vavanuna”. Niku i lava lezvaku va ingisa a milayo yaleyi ya yin’we va tlhela va simama va tsumbekile. Vontlhe va fanele ku ti koramisa, va tirela Jehovha zvin’we va tlhela va hi ni wumun’we. Niku vontlhe va fanele ku ti karata kasi va hlayisa kurula lomu bandleni. Kota lezvi a ku gumesa ku nga laha kusuhani, ngha hontlheni hi simama ku tirela Jehovha ni ku landzela Kristu kota “ntlhambi wun’we”. — Joh. 10:16.