1. A jaha go kari gi khumbisilwe kuyini hi kanelo yi vekilweko ka gotsovanyano hi 1935?

A JAHA go kari gi wa hi ni 18 wa malembe a cikhati gi nga bhabhatisiwa hi 1926. A vapswali vakwe va wa hi Zvigondzani zva Bhibhiliya, ku nga lezvi a Vakustumunyu va Jehovha va nga vitanisiwa zvona ka cikhati leco. Va wa hi ni majaha manharu ni vanhanyana vambiri niku va va gondzisile ku tirela Jehovha ni ku pimanyisa Jesu Kristu. A ku fana ni zvontlhe Zvigondzani zva Bhibhiliya, a jaha lego go tsumbeka gi waga pawa ni kunwa vhinyo lembe ni lembe Cilalelweni ca Hosi. Hambulezvo, a kutsumba kakwe ku cicile a cikhati a ngazwa a kanelo ya lisima nguvhu yi nga hi ni hloko mhaka yi nge: “Citshungu ca hombe.” A kanelo leyo yi vekilwe hi makabye J. F. Rutherford hi 1935 ka gotsovanyano wu mahilweko le Washington D.C., Estados Unidos. Zvini lezvi a Zvigondzani zva Bhibhiliya zvi nga gondza ka Gotsovanyano lowo?

2. Lisine muni lo tsakisa leli makabye Rutherford a li tlhamuseleko ka kanelo yakwe?

² Ka kanelo yakwe, makabye Rutherford i tlhamusele ku hi vamani va wumbako a “citshungu ca hombe”, leci ci kumbukiwako ka Kuvhululelwa 7:9. Kala ka cikhati leco, a Zvigondzani zva Bhibhiliya zvi wa alakanya lezvaku lava va wumbako a ntlawa lowo va wa taya tilweni, kanilezvi va wa nga ta fuma na Jesu kota tihosi hakuva va wa hi ni kukholwa kutsongwani. Makabye Rutherford i tirisile Mitsalo kasi ku tlhamusela lezvaku a citshungu ca hombe a ci hlawuliwangi ku ya hanya tilweni, kanilezvi ku wuliwa tiyivhu tin’wani ta Kristu ti to pona a “kuxaniseka ka hombe” ti hanya kala kupindzuka kwalaha misaveni. (Kuv. 7:14) Jesu i tsumbisile lezvi: “Ndzi na ni tiyivhu  tin’wani to kala ti nga hi ta ntlhambi lowu; tonawu ndzi fanele ku ti tisa laha, ti ta ingisa a gezu ga mina tiva ntlhambi wun’we wu nga ni murisi mun’we.” (Joh. 10:16) A “tiyivhu tin’wani” ku wuliwa a Vakustumunyu va Jehovha vo tsumbeka lava va rindzelako ku hanya kala kupindzuka paradhiseni laha misaveni. (Mat. 25:31-33, 46) Zvezvi a hi woneni lezvi a kuzwisisa loko ka kuswa ka lisine la Bhibhiliya ku cicisileko zvona a wutomi ga vanhu vo tala va Jehovha, a ku patsa ni jaha legiyani ga 18 wa malembe. * — Lis. 97:11; Mav. 4:18.

3-4. Andzhako ka gotsovanyano wa 1935, zvini lezvi a vamakabye vo tala va zvi zwisisileko xungetano hi kutsumba kabye niku hikuyini?

³ A cikhati co tsakisa ca gotsovanyano lowo ku vile laha a mukaneli a nga kombela vaingiseli, aku: “Vontlhe lava va nga ni kutsumba ka ku hanya kala kupindzuka laha misaveni va wa suke va yima.” A makabye wo kari a nga hi kona ka gotsovanyano lowo i wulile lezvaku i wonile vanhu vo hundza khihlanya ga lava va nga hi kona na va sukile va yima. Makabye Rutherford i no guma a wula lezvi: “Hi leci a citshungu ca hombe.” Andzhako ka lezvo, vontlhe lava va nga hi laho va no tsaka zva tanani mu ta wona. Lava va nga sukile va yima makunu va wa zvi zwisisile lezvaku va wa nga hlawuliwangi kuya hanya tilweni. Va no tiva lezvaku va wa nga totiwangi hi moya wo basa wa Nungungulu. Ka siku gi nga landzela ga gotsovanyano ku no bhabhatisiwa 840 wa Vakustumunyu vaswa niku a kutala kabye va wa hi va tiyivhu tin’wani.

⁴ Andzhako ka kanelo leyo, a jaha legiyani gi kumbukilweko kusanguleni ni vamakabye van’wani vo tala va no tekela ku nyima kuga pawa ni kunwa vhinyo Cilalelweni ca Hosi. A makabye wo kari wa ku ti koramisa i wulile lezvi a kutala kabye va nga ti zwisa zvona, i te: “Hi 1935 ku vile khati go gumesa ndzi ngaga pawa ni kunwa vhinyo Cialakanyisweni. Ndzi no pola lezvaku Jehovha a nga tirisangi moya wakwe wo basa kasi ku ndzi nyika kutsumba ka ku hanya tilweni, kanilezvi ndzi na ni kutsumba ka ku hanya laha misaveni ni ku hlengela ntirweni wa ku maha paradhise.” (Rom. 8:16, 17; 2 Kor. 1:21, 22) Kusukela kwalaho, a ntsengo wa lava va citshungu ca hombe wuya wu engetela niku va tira zvin’we ni vatotilweko va ha seleko laha misaveni, lava va gako pawa ni kunwa vhinyo Cilalelweni ca Hosi.

5. Jehovha i va wonisa kuyini lava va nyimileko kuga pawa ni kunwa vhinyo Cialakanyisweni?

⁵ Jehovha i va wonisa kuyini lava va nyimileko kuga pawa ni kunwa vhinyo Cialakanyisweni andzhako ka 1935? Ahati loku a Kustumunyu wo kari nyamutlha a kholwa lezvaku i fanele kuga pawa ni kunwa vhinya Cialakanyisweni kanilezvi hi ndzhako ka cikhati a zwisisa lezvaku a nga totiwangi? (1 Kor. 11:28) A vokari va waga pawa ni kunwa vhinyo hakuva va wa nga ku zwisisi khwatsi a kutsumba kabye. Kanilezvi loku va vhumela a cihoxo cabye, va nyima kuga pawa ni kunwa vhinyo Cialakanyisweni va tlhela va simama ku tirela Jehovha hi kutsumbeka, zvi laha kubaseni lezvaku i ta va hlaya zvin’we ni lava va tiyivhu tin’wani. Hambu lezvi va kalako va nga hagi pawa ni kunwa vhinyo, va ha simama kuva kona Cialakanyisweni hakuva va zvi bonga  nguvhu lezvi Jehovha na Jesu va va maheleko.

6. Zvini lezvi Jesu a rumileko tingilozi lezvaku ti maha?

⁶ Kota lezvi a kuxaniseka ka hombe ku nga laha kusuhani, zvi wa ta hi tiyisa a ku kambisisa lezvi Kuvhululelwa cipimo 7 a zvi wulako xungetano hi maKristu ma totilweko ni citshungu ca hombe ca tiyivhu tin’wani. Ka cipimo leci, Jesu i ruma tingilozi lezvaku ti khoma mune wa mimoya ya kulovisa. A ti faneli ku tsika a mimoya leyo yi chikela laha misaveni kala wontlhe maKristu ma totilweko ma vekelwa zvifungo, zvi wulako ku Jehovha i ta ngha a ma wonile lezvaku ma tsumbekile. (Kuv. 7:1-4) Kota nchachazelo wa kutsumbeka kabye, a maKristu ma totilweko ma tava tihosi ni vapristi na Jesu le tilweni. (Kuv. 20:6) Jehovha na Jesu ni tingilozi va ta tsaka nguvhu laha va to wona a 144 000 wa vatotilweko na va amukela a nchachazelo wabye wa le tilweni.

7. Hi kuya hi Kuvhululelwa 7:9, 10, hi vamani lava Johani a va wonileko lomu ka muwoniso niku zvini va mahako? (Wona mufota wa kapa.)

⁷ Andzhako ka ku wulawula hi lava va 144 000 va nga tihosi ni vapristi, Johani i wonile zvilo zvo tsakisa nguvhu, ku nga “citshungu ca hombe” ci ponileko Armagedhoni. A kuhambana ni ntlawa wo sangula, a ntlawa lowu wa wumbiri wa hombe nguvhu laha ka ku a ntsengo wa wona a wu tiveki. (Lera Kuvhululelwa 7:9, 10.) Va wa “bohile a tinguwo to basa ta kuleha”, zvi kombako lezvaku va wa “nga hi na noda” ya tiko ga Sathani niku va simamile va tsumbekile ka Nungungulu na Kristu. (Jak. 1:27) Va wa banguleka vaku va hanyisilwe hi kota ya lezvi Jehovha na Jesu, a Yivhana ya Nungungulu, va va maheleko. A cin’wani kambe, va wa khomile micindzu, zvi kombako ku va vhumela hi mbilu yontlhe lezvaku Jesu i Hosi yi yimisilweko hi Nungungulu. — Fananisa na Johani 12:12, 13.

8. Zvini Kuvhululelwa 7:11, 12 a hi byelako hi ngango wa Jehovha wa le tilweni?

⁸ Lera Kuvhululelwa 7: 11, 12. Va ti zwisile kuyini lava va nga hi le tilweni a cikhati va nga wona a citshungu leco? Johani i no wona vontlhe lava va nga hi le tilweni na va tsakile nguvhu va tlhela va dhumisa Nungungulu a cikhati va nga wona a citshungu ca hombe. A ngango wa Jehovha wa le tilweni wu ta tsaka nguvhu hi ku wona a kutatiseka ka muwoniso lowu a cikhati leci a citshungu ca hombe ci to huma hi kuxanisekeni ka hombe na ci hanya.

9. Hi kuya hi Kuvhululelwa 7:13-15, zvini lezvi lava va citshungu ca hombe va mahako zvezvi?

⁹ Lera Kuvhululelwa 7:13-15. Johani i wulile lezvaku lava va citshungu ca hombe “va hlazvile a tinguwo tabye ta kuleha, va ti basisa nkhateni wa Yivhana”. Lezvo zvi wula ku va na ni livhalo li basileko niku Jehovha wa tsaka hi vona. (Isa. 1:18) Vona maKristu ma ti nyikeleko ma bhabhatisiwa, ma kholwako ka muphahlo wa Jesu ma tlhela ma hi ni wunghana na Nungungulu. (Joh. 3:36; 1 Ped. 3:21) Hikwalaho, va ringanelwa hi ku yima mahlweni ka citshamu ca wuhosi ca Nungungulu “va mu tirela mumu ni wusiku” tempeleni yakwe ya moya ya laha misaveni. Zvezvi va hiseka ni ku maha ntiro wa hombe wa ku chumayela Mufumo ni ku maha vapizani hakuva va wona Mufumu wa Nungungulu na wu hi wa lisima nguvhu wutomini gabye. — Mat. 6:33; 24:14; 28:19, 20.

10. Zvini lezvi lava va citshungu ca hombe va tiyisekisiwako zvona niku citsumbiso muni va to ci wona na ci tatisekile?

¹⁰ Lava va citshungu ca hombe va to pona kuxanisekeni ka hombe va tiyisekisiwa lezvaku  Nungungulu i ta simama ku va khatalela hakuva “Loyi a tshamileko citshan’wini ca wuhosi i ta gwimba a tenda gakwe hehla kabye”. A citsumbiso leci lava va tiyivhu tin’wani va nga ci rindzela hi matihlo yo pswhuka ci ta ngha makunu ci tatisekile: “[Nungungulu] i ta kulula mihloti yontlhe matihlweni yabye, ku nga ta hava ni kufa, hambu ni hlomulo, kutani kurila, ni kubayisa.” — Kuv. 21:3, 4.

11-12. a) Hi kuya hi Kuvhululelwa 7:16, 17, makatekwa muni ma to kumiwa hi lava va tiyivhu tin’wani cikhatini ci tako? b) Zvini lezvi lava va tiyivhu tin’wani va nga mahako Cialakanyisweni niku hikuyini?

¹¹ Lera Kuvhululelwa 7:16, 17. Zvezvi a vanhu vo kari va Jehovha va xaniseka hi ndlala hakuva a va na mali yo xava zvakuga kutani hi kota ya zvikarato zvi vangiwako hi tiyimpi. A van’wani va vhalelwe mapaxweni hi kota ya kukholwa kabye. Hambulezvo, lava va citshungu ca hombe va tsaka nguvhu hakuva va zvi tiva lezvaku andzhako ka ku pona a kulovisiwa ka tiko legi go biha va tava ni zvakuga zvo tala va tlhela va gondzisiwa hi Jehovha. A cikhati leci a tiko ga Sathani gi to lovisiwa, lava va citshungu ca hombe va ta vhikelwa ka “kuhisa” ka zanga ya Jehovha loku a to ku neha hehla ka matiko. Andzhako ka kuxaniseka ka hombe, Jesu i ta rangela lava va ponileko laha misaveni lezvaku va kuma “mati ya wutomi” ga pindzukelwa. Hi nga zvi ehleketa: A citshungu ca hombe ci na ni kutsumba ko hlawuleka. Vontlhe vanhu lavo va tsandza-vahlayi cima va nga tafa! — Joh. 11:26.

¹² Lava va tiyivhu tin’wani va na ni kutsumba ko hlamalisa niku va mu bonga nguvhu Jehovha na Jesu hi kota ya lezvo! Vona a va hlawuliwangi kasi ku ya hanya le tilweni, hambulezvo Jehovha wa va randza a ku fana ni lezvi a va randzisako zvona a vatotilweko. Yontlhe a mitlawa leyi ya yimbiri yi nga dhumisa Nungungulu na Kristu. A yin’we ya tindlela ta ku maha lezvo kuva kona Cialakanyisweni.

13-14. Hikuyini a vanhu vontlhe va faneleko kuva kona Cialakanyisweni ca kufa ka Kristu?

¹³ Ka malembana lawa, ka lava va tako Cialakanyisweni, laha ka 1000 wa vona, hi to kuma mun’we basi a gako pawa ni kunwa vhinyo. Ka mabandla yo tala a ku na makabye a totilweko. A kutala ka vanhu va tako Cialakanyisweni va rindzela ku hanya laha misaveni. Maku hikuyini va taku Cialakanyisweni? A cigelo ci va mahako vata ca fana ni ca lava va yako muchadhweni wa munghana. A vanhu  lavo vaya muchadhweni kasi ku komba lezvaku va randza ni ku seketela lava va chadhako. Hi ku fanana, lava va tiyivhu tin’wani vata Cialakanyisweni hakuva va lava ku komba lezvaku va mu randza Kristu ni lava va totilweko niku va va seketela. A cin’wani kambe, lava va tiyivhu tin’wani vata Cialakanyisweni kasi ku kombisa kubonga hi muphahlo wa Jesu, ku nga wona wu mahako lezvaku zvi koteka ku va hanya kala kupindzuka laha misaveni.

¹⁴ A cigelo cin’wani ca lisima ci mahako ku lava va tiyivhu tin’wani vata Cialakanyisweni hi ku va ingisa a cileletelo ca Jesu. A cikhati leci Jesu a nga yimisa a Cilalelo leco co hlawuleka na a hi ni vapostoli vakwe vo tsumbeka, i va byelile lezvi: “Simamani ku maha lezvi kasi mu ndzi alakanya hi zvona.” (1 Kor. 11:23-26) Hikwalaho va simama kuva kona Cialakanyisweni zvin’we ni vatotilweko lava va nga laha misaveni. Hi lisine, lava va tiyivhu tin’wani va ramba vanhu vontlhe lezvaku vata Cialakanyisweni.

15. Hi nga mu dhumisisa kuyini Nungungulu na Kristu Cialakanyisweni?

¹⁵ Cialakanyisweni hi na ni thomo ga ku dhumisa Nungungulu na Kristu hi tisimu ni mikhongelo. A kanelo ya lembe legi yi na ni hloko ya mhaka yi nge: “Kombisa kubonga hi lezvi Nungungulu na Kristu va ku maheleko!” Yi ta engetela a ku mu bonga ka hina Jehovha na Kristu. A cikhati leci ku to fambisiwa a pawa ni vhinyo, hi ta alakanya lezvi a zvilo lezvo zvi yimelako zvona, ku nga nkhata wa Jesu ni miri wakwe. Hi ta tlhela hi ehleketa hi lirandzo leli Jehovha a hi kombisileko laha a nga nyikela N’wana wakwe a hi fela kasi hi kuma wutomi. (Mat. 20:28) Vontlhe lava va randzako Papayi wa hina wa le tilweni ni N’wana wakwe va ta zvi lava kuta Cialakanyisweni.

16. A vatotilweko ni lava va tiyivhu tin’wani va fana hi ndlela muni?

¹⁶ Hi ndlela yo kari, lava va totilweko ni lava va tiyivhu tin’wani va fana. Jehovha i randza mitlawa leyi ya yimbiri hi ndlela yo fana. Hi tiva lezvo hakuva i hakhele a ntsengo walowu wa wun’we kasi ku xava vatotilweko ni lava va tiyivhu tin’wani; vontlhe i va xavile hi wutomi ga N’wana wakwe wo randzeka. Leci ci hambanisako a mitlawa leyi ya yimbiri kutsumba ka yona basi. Vontlhe va fanele ku simama va tsumbekile ka Nungungulu na Kristu. (Lis. 31:23) Alakanya kambe lezvaku a moya wo basa wa Nungungulu wu nga tira hi ndlela yo fana ka hontlheni. Lezvo zvi wula lezvaku Jehovha i nyikela a moya wakwe ka munhu ni munhu hi kuya hi cilaveko cakwe, kani i totilwe kutani wa tiyivhu tin’wani.

17. Zvini lezvi a maKristu ma totilweko ma zvi rindzelako?

¹⁷ A maKristu ma totilweko a ma pswaliwi na  ma hi ni kutsumba ka kuya hanya tilweni. Nungungulu hi yena a ma nyikako a kutsumba loko. Ma ehleketa hi kutsumba kabye, ma khongela hi kona niku ma zvi dokolokela nguvhu a ku amukela a nchachazelo wabye wa le tilweni. Hambu ku a miri wabye wa moya wu ta tshamisa kuyini a va zvi tive. (Filp. 3:20, 21; 1 Joh. 3:2) Hambulezvo, va zvi lava nguvhu a ku tlhangana na Jehovha, na Jesu, ni tingilozi zvin’we ni vatotilweko lava van’wani. Va zvi lava nguvhu kambe a kuva zvin’we navo Mufun’weni wa le tilweni.

18. Zvini lezvi lava va tiyivhu tin’wani va zvi rindzelako?

¹⁸ Lava va tiyivhu tin’wani va rindzela ku hanya kala kupindzuka laha misaveni. Loku kuxuva loku a vanhu vontlhe va nga nako. (Mutsh. 3:11) Va gi dokolokela nguvhu a siku legi va to vhunetela a ku cica misava yontlhe yiva paradhise. Va gi rindzela hi mahlo yo pswhuka a siku legi va to aka tiyindlu tabye, va maha tijardhim va tlhela va wundla vana vabye na va hi ni wutomi go mbhelela. (Isa. 65:21-23) Va zvi rindzela nguvhu a ku fambafamba ka matshamu yo tala laha misaveni va wona zvitsunga, ni makhwati, ni mabimbi va gondza a zvilo zvontlhe lezvi Jehovha a zvi vangileko. A ca hombe ka zvontlhe, va tsaka nguvhu hi ku tiva lezvaku a wunghana gabye na Jehovha gi ta simama ku tiya.

19. I thomo muni legi a Cialakanyiso ci nyikako a mun’we ni mun’wani wa hina, niku a lembe legi ci ta mahiwa rini?

¹⁹ Jehovha i nyikile mun’we ni mun’wani wa malandza yakwe ma ti nyikeleko kakwe a ku tsumba ko hlamalisa. (Jer. 29:11) A Cialakanyiso ca kufa ka Kristu ci nyika a mun’we ni mun’wani wa hina a thomo ga hombe ga ku dhumisa Nungungulu na Kristu hi kota ya lezvi va hi maheleko kasi hi kuma wutomi ga pindzukelwa. Handle ko kanakana, a Cialakanyiso mutlhangano wa lisima nguvhu lowu a maKristu ma mahako lembe ni lembe. A lembe legi wu ta mahiwa hi Mulongiso, hi dhiya 27 ka Março wa 2021, a gambo na gi pelile. A lembe legi a vanhu vo tala va ta maha mutlhangano lowu wa lisima na ku nga hi na leci ci va vhalelako. A van’wani va ta maha hambu loku va vhukelwa. A vokari va ta maha mutlhangano lowu na va hi lomu mapaxweni. A cikhati leci Jehovha na Jesu ni tingilozi ni vontlhe vatotilweko lava va vhuxilweko va hi cuwukiselako na hi maha Cialakanyiso, ngha wontlhe mabandla ni mitlawa ni lava va nga voce vava ni Cialakanyiso co tsakisa!