1-2. a) Hi nga ti zwisa kuyini loku hi ehleketa hi wutomi ga Jesu ni lezvi a zvi mahileko a cikhati a nga hi laha misaveni? b) Zvini hi to bhula hi zvona ka ndzima leyi?

 LOKU hi felwa hi munhu hi mu randzako, hi mu xuva nguvhu! Kusanguleni, kuzvilava hi ngazwa kubayisa ka hombe loku hi ehleketa hi lezvi zvi mu humeleleko na a nga sefa, nguvhunguvhu loku a xanisekile nguvhu a cikhati a nga lava kufa. Hambulezvo, hi kufamba ka cikhati hi nga sangula ku kumanyana litsako loku hi alakanya zvokari a hi gondzisileko, a hi maheleko kutani ku wula kasi ku hi tiyisa kutani ku hi hlekisa.

² Hi kufanana, loku hi lera lezvi Jesu a nga xanisekisa zvona ni lezvi a nga dayisiwa zvona zva hi bayisa. Ndzeni ka nguva ya Cialakanyiso, hi ti nyika cikhati ca ku ehleketa hi lisima la hakhelo ya kutlhatlhisa. (1 Kor. 11:24, 25) Kanilezvi, hi kuma litsako la hombe loku hi ehleketa hi zvontlhe lezvi Jesu a zvi wulileko ni ku zvi maha a cikhati a nga hi laha misaveni. Zva hi tiyisa kambe loku hi ehleketa hi lezvi Jesu a mahako zvezvi ni lezvi a to hi mahela cikhatini ci tako. A ku ehleketa hi zvilo lezvo ni lirandzo lakwe hi hina zvi nga hi kuca ku hi kombisa kubonga, kota lezvi hi to zvi wona ka ndzima leyi.

3. Zvigelo muni hi nga nazvo zva ku kombisa kubonga hi hakhelo ya kutlhatlhisa?

³ Loku hi ehleketa hi wutomi ga Jesu ni kufa kakwe zvi hi kuca ku bonga. A cikhati leci Jesu a nga kari a tira laha misaveni, i gondzisile vanhu xungetano hi makatekwa lawa a Mufumo  wa Nungungulu wu to ma neha. Ha li randza nguvhu a lisine lelo la Mufumo a li gondzisileko. Ha yi bonga nguvhu a hakhelo ya kutlhatlhisa hakuva yi hi vhulela ndlela ya ku hiva ni wunghana ga hombe na Jehovha na Jesu. A cin’wani kambe, lava va kholwako ka Jesu va rindzela ku hanya kala kupindzuka ni ku wona maxaka yabye na ma vhuka. (Joh. 5:28, 29; Rom. 6:23) A ci kona hi nga maha kasi hi ringanelwa hi makatekwa lawo; ne a ci kona hi nga nyikako Jehovha na Jesu kasi ku va hakhela lezvi va hi maheleko. (Rom. 5:8, 20, 21) Kanilezvi, hi nga kombisa lezvi hi va bongisako zvona. Hi ndlela muni?

4. Mariya wa le Magdhala i kombisile kuyini kubonga hi lezvi Jesu a nga mu mahele? (Wona mufota.)

⁴ Wona cikombiso ca wasati wa muJudha wa ku hi Mariya wa le Magdhala. I wa xanisiwa nguvhu hi 7 wa madhimoni. I wa ti zwisa ku khwatsi a ku na wa ku a nga mu vhuna. Hikwalaho, alakanyela lezvi a nga bongisa a cikhati leci Jesu a nga hlongola a madhimoni lawo! A kubonga ku mu kucile ku ava mupizani wa Jesu a tlhela a tirisa cikhati cakwe, ni ntamu wakwe, ni titshomba takwe kasi ku mu seketela ntirweni wakwe. (Luka 8:1-3) Hambu lezvi Mariya a nga zvi bonga nguvhu lezvi Jesu a nga mu mahele, kuzvilava i wa nga zvi tivi lezvaku a cinyikiwo cakwe ca hombe ci wa hata. Jesu i no nyikela wutomini gakwe hi kota ya vanhu vontlhe, “kasi ni wihi loyi a kholwako kakwe” a kuma wutomi ga pindzukelwa. (Joh. 3:16) Hambulezvo, Mariya i no kombisa kubonga hi lezvi Jesu a nga mu mahele hi ku a tsumbeka kakwe. A cikhati leci Jesu a nga xaniseka laha mhandzeni ya hlomulo, Mariya i no nyima laha kusuhani, hakuva i wa khatala hi Jesu niku i wa lava ku chavelela lava va nga hi laho. (Joh. 19:25) Andzhako ka loku Jesu a file, Mariya ni vavasati van’wani va vambiri va nota ni mafura yo nuhela laha cilahleni va ta tota miri wa Jesu. (Mar. 16:1, 2) A kutsumbeka ka Mariya ku chachazelwe nguvhu. I vile ni thomo ga ku wona Jesu a tlhela a  bhula naye andzhako ka loku a vhuxilwe hi ka vafileko — a thomo ga ku a vapizani vo tala a va vangi nago. — Joh. 20:11-18.

5. Hi nga kombisa kuyini kubonga hi zvontlhe lezvi Jehovha na Jesu va hi maheleko?

⁵ Hinawu hi nga kombisa kubonga hi zvontlhe lezvi Jehovha na Jesu va hi maheleko hi ku tirisa a cikhati ca hina, ni ntamu wa hina ni titshomba ta hina kasi ku seketela a ntiro wa Mufumo. Hi cikombiso, hi nga ti nyiketela kasi ku vhunetela ka ku aka ni ku hlayisa a matshamu ya wukhozeli go basa.

6. Hikuyini hi nga wulako lezvaku a hakhelo ya kutlhatlhisa cinyikiwo ka mun’we ni mun’wani wa hina?

⁶ Loku hi ehleketa hi lezvi Jehovha na Jesu va hi randzisako zvona zvi hi kuca ku hinawu hi va randza. (1 Joh. 4:10, 19) Hi va randza nguvhu laha hi alakanyako lezvaku Jesu i fele a mun’we ni mun’wani wa hina. Mupostoli Pawule i wa zvi tiva lezvo niku i wulile lezvi a nga bongisa zvona a cikhati leci a nga tsalela va le Galatiya, aku: ‘A N’wana wa Nungungulu, . . . a ndzi randzile aza a ti nyikela hi kota ya mina.’ (Gal. 2:20) Hi ku tirisa a hakhelo ya kutlhatlhisa, Jehovha i ku kokile u tshinela kakwe kasi u tava munghana wakwe. (Joh. 6:44) A zvi ku tsakisi a ku tiva lezvaku Jehovha i wonile nchumu wa wunene ka wena a tlhela a hakhela ntsengo wa hombe nguvhu kasi zvi koteka ku uva munghana wakwe? A zvi engeteli a lirandzo la wena hi Jehovha na Jesu? Hi maha khwatsi hi ku ti wutisa ku: ‘Zvini lezvi a lirandzo lelo li ndzi kucako ku maha?’

7. Hi kuya hi mufota, hi nga kombisa kuyini ku ha mu randza Jehovha na Jesu? (2 Va Le Korinte 5:14, 15; 6:1, 2)

⁷ A lirandzo la hina hi Nungungulu na Kristu li hi kuca ku randza van’wani. (Lera 2 Va Le Korinte 5:14, 15; 6:1, 2.) A yin’we ya tindlela ta ku kombisa lirandzo la hina ku hi hiseka ntirweni wa kuchumayela. Hi chumayela vontlhe hi va kumako. A hi hlawuli munhu hi kuya hi  hlonge yakwe, mudhawuko wakwe kutani hi kota ya ku i ganyile niku i gondzile nguvhu, kutani hi ku cisiwana niku a nga gondzangi. Hi ndlela leyo, hi tira hi ku yelana ni kungo ga Jehovha ga ku “a vanhu va tixaka tontlhe va hanyiswa ni lezvaku vava ni wutivi go mbhelela ga lisine”. — 1 Tim. 2:4.

8. Hi nga kombisa kuyini ku ha va randza a vamakabye va hina?

⁸ Hi kombisa lirandzo la hina kambe hi Jehovha na Kristu hi ku randza vamakabye va hina. (1 Joh. 4:21) Hi khatala nguvhu hi lezvi va zvi lavako hi tlhela hi va vhuna a cikhati leci va kumanako ni zvikarato. Ha va chavelela loku va felwa hi munhu va mu randzako, hi va vhuxela loku va babya hi tlhela hi maha zvontlhe hi zvi kotako kasi ku va tiyisa loku va mbhelile ntamu. (2 Kor. 1:3-7; 1 Tes. 5:11, 14) Hi simama ku va khongelela, na hi alakanya ku “a mukhongelo wa munhu wo lulama wa vhuna nguvhu”. — Jak. 5:16.

9. Hi yihi yin’wani ndlela hi nga kombako hi yona lezvaku ha va randza vamakabye va hina?

⁹ Hi kombisa a lirandzo la hina kambe hi vamakabye hi ku kulula hi n’watseka kasi hiva ni kurula navo. Hi ti karatela ku pimanyisa a cikombiso ca Jehovha ca ku tsetselela. Lezvi Jehovha a nga ti yimisele ku a N’wana wakwe a fela zviwonho zva hina, xana hina a hi faneli ku ti yimisela ku tsetselela vamakabye va hina loku va hi wonhela ke? Hi wa nga ta tshuka hi lava ku fana ni nandza go biha gi kumbukiwako ka wun’we wa mifananiso ya Jesu. Hambu andzhako ka loku a hosi yakwe yi mu tsetselele a mangava yakwe ya hombe, a nandza lego gi no tsandzeka a ku tsetselele a nandza-kuloni gi nga mu dhevha zva zvi tsongwani. (Mat. 18:23-35) Loku ku hi lezvaku u kandzihelene citihwana ni wokari lomu bandleni, zvi nga koteka ku uba zambo go sangula kasi ku vhuxa kurula naye na ku nga se chikela a Cialakanyiso ke? (Mat. 5:23, 24) Loku u maha lezvo, u ta komba ku wa mu randza nguvhu Jehovha na Jesu.

10-11. A madhota ma nga kombisa kuyini lezvaku ma mu randza Jehovha na Jesu? (1 Pedro 5:1, 2)

¹⁰ A madhota ma nga kombisa kuyini ku ma mu randza Jehovha na Jesu? A ndlela ya lisima ku khatalela a zvilaveko zva tiyivhu ta Jesu. (Lera 1 Pedro 5:1, 2.) Jesu i mu dlunyatisele a mhaka leyo mupostoli Pedro. Andzhako ka loku Pedro a alile Jesu makhati manharu, i wa zvi xuva nguvhu a ku komba lezvaku wa mu randza Jesu. Andzhako ka loku Jesu a vhuxilwe hi ka vafileko, i no wutisa Pedro, aku: “Simoni n’wana Johani, wa ndzi randza ke?” Ha tiyiseka lezvaku Pedro i wa ta maha ni cihi kasi ku komba ku wa yi randza Hosi yakwe. Jesu i no byela Pedro, aku: “Risa a tiyivhana ta mina.” (Joh. 21:15-17) Kusukela laho, Pedro i no khatalela a tiyivhu ta Hosi yakwe hi lirandzo, a komba lezvaku i wa mu randza Jesu.

¹¹ Madhota, ndzeni ka nguva ya Cialakanyiso, mu nga kombisa kuyini lezvaku a magezu lawa Jesu a byelileko Pedro ya lisima ka n’wina ke? Mu nga komba lezvaku ma mu randza nguvhu Jehovha na Jesu hi ku maha tiendzo ta wurisi hi kukhandzakanya ni ku maha zvontlhe mu zvi kotako kasi ku vhuna lava va holileko lezvaku va tlhelela ka Jehovha. (Ezek. 34:11, 12) Mu nga kombisa ku khatala kambe hi zvigondzani zva Bhibhiliya ni lava va gondzako kuta Cialakanyisweni. Hi lava ku va zvizwa ku ha va amukela khwatsi hakuva hi tsumba lezvaku vonawu va tava vapizani va Jesu.

12. Hikuyini a ku ehleketa hi magezu lawa Jesu a nga wula ka wusiku go gumesa na a nga sefa zvi hi tiyisako hlanha? (Johani 16:32, 33)

¹² Ka wusiku go gumesa Jesu na a nga sefa, i byelile vapizani vakwe, aku: ‘Mu ta xaniseka tikweni,  kanilezvi tiyani hlanha! Mina ndzi hlulile tiko.’ (Lera Johani 16:32, 33.) Cini ci vhunileko Jesu a ku a tiya hlanha a cikhati leci a valala vakwe va nga mu vhukela ni ku simama a tsumbekile kala afa? I wa tsumba Jehovha. Lezvi a nga zvi tiva ku a valandzeli vakwe va wa ta kumana ni zviringo zvo fana, Jesu i no kombela Jehovha lezvaku a va hlayisa. (Joh. 17:11) Hikuyini lezvo zvi hi tiyisako hlanha? Hi ku Jehovha i na ni ntamu a ku hundza valala va hina. (1 Joh. 4:4) Jehovha i wona zvontlhe. Ha tiyiseka lezvaku loku hi tsumba Jehovha, hi nga hlula kuchava ka hina hi tlhela hi tiya hlanha.

13. Josefa wa le Arimateya i kombisile kuyini ku wa tiya hlanha?

¹³ Wona cikombiso ca Josefa wa le Arimateya. I wa kombisiwa nguvhu cichavo hi vaJudha. I wa hi ciro ca Tribhunali ya hombe ya vaJudha. Kanilezvi a cikhati leci Jesu a nga tira laha misaveni, Josefa a nga tshukangi a tiya hlanha. Johani i wulile lezvaku Josefa i wa hi “mupizani wa Jesu kufihlaleni hi kota ya ku chava vaJudha”. (Joh. 19:38) Hambu lezvi Josefa a nga ma tsakela a mahungu ya Mufumo, i wa ti fihla ku wa kholwa ka Jesu. A zvi kanakanisi lezvaku i wa chava ku luza a cikhundla co hlawuleka leci a nga hi naco lomu cipandzeni. Kanilezvi a Bhibhiliya gi wula lezvaku andzhako ka loku Jesu a file, hi kugumesa Josefa ‘i no tiya hlanha aya ka Pilatu a ya kombela cirumbi ca Jesu’. (Mar. 15:42, 43.) Josefa a nga ha zamangi kambe a ku fihla ku mupizani wa Jesu.

14. Zvini u faneleko ku maha loku u chava vanhu?

¹⁴ Wenawu wa tshuka u chava vanhu a ku fana na Josefa? Cikoleni kutani ntirweni, wa tshuka u chava ku ti tivekisa kota Kustumunyu wa Jehovha? Wa kanakana kuva muhuweleli kutani ku bhabhatisiwa hi kota ya ku chava lezvi a van’wani va to zvi pimisa hi wena? U nga tsiki lezvo zvi ku vhalela ku maha lezvi u zvi tivako ku zvinene. Khongela ka Jehovha hi mbilu yontlhe. Mu kombele ku a ku nyika kutiya-hlanha kasi u maha kurandza kakwe. Laha u wonako lezvi Jehovha a hlamulisako zvona mikhongelo ya wena, u tava ni ntamu u tlhela u tiya hlanha. — Isa. 41:10, 13.

15. Andzhako ka loku Jesu a wonekile ka vapizani vakwe, a litsako labye li va kucile ku maha yini? (Luka 24:52, 53)

¹⁵ A vapizani va Jesu va wa karatekile nguvhu a cikhati leci a ngafa. Hi nga ti alakanyela na u hi ka ciyimo cabye. Va wa nga felwangi ntsena hi munghana wabye va nga mu randza nguvhu, kanilezvi va wa tizwa na va mbhelelwe hi kutsumba kambe. (Luka 24:17-21) Hambulezvo,  a cikhati leci Jesu a nga woneka kabye, i ti nyikile cikhati ca ku va vhuna a ku zwisisa a ntiro wakwe kutatiseni ka zviphrofeto zva Bhibhiliya. I no tlhela a va nyika a ntiro wa lisima kasi va wu maha. (Luka 24:26, 27, 45-48) A cikhati leci Jesu a ngaya tilweni andzhako ka 40 wa masiku na a vhuxilwe, a kukarateka ka vapizani vakwe ku wa hundzulukile kuva litsako la hombe. A ku tiva lezvaku a Hosi yabye yi wa hanya ni ku yi wa longile ku va vhuna ku maha ntiro wabye wa wuswa, zvi va nyikile litsako. A litsako labye li va kucile a ku dhumisa Jehovha na va nga rereki. — Lera Luka 24:52, 53; Miti. 5:42.

16. Hi nga va pimanyisisa kuyini a vapizani va Jesu?

¹⁶ Hi nga va pimanyisisa kuyini a vapizani va Jesu? A hi kumi litsako la ku khozela Jehovha ndzeni ka nguva ya Cialakanyiso basi, kanilezvi hi nga li kuma ndzeni ka lembe gontlhe. Lezvo zvi lava ku hi rangisa a Mufumo wa Nungungulu wutomini ga hina. Hi cikombiso, a votala va cica matirela yabye kasi va kuma cikhati ca ku chumayela, kuva kona mitlhanganweni ni ku maha wukhozeli ga ngango hi kukhandzakanya. A vokari va boha ku ti tsona zvilo lezvi a van’wani va nge zva laveka wutomini kasi va tirisiwa nguvhu lomu bandleni kutani kasi va rura va ya lomu ku nga ni cilaveko ca hombe ca vahuweleli va Mufumo. Hambu lezvi zvi lavako ku timisela kasi hi simama ku tirela Jehovha, yena i tsumbisa ku hi katekisa loku hi rangisa a Mufumo wutomini ga hina.— Mav. 10:22; Mat. 6:32, 33.

17. Zvini u ti yimiseleko ku maha ka nguva leyi ya Cialakanyiso? (Wona mufota.)

¹⁷ Ha zvi donela mari a kuva kona Cialakanyisweni hi Wazibili wa dhiya 4 ka Abril. Hambulezvo, a hi faneli ku rindzela kala siku lego na hi nga se ehleketa hi wutomi ga Jesu ni kufa kakwe, ni lirandzo leli yena na Jehovha va hi kombisako. Londzowota ni wihi mole ndzeni ka nguva ya cialakanyiso kasi u maha lezvo. Hi cikombiso, ti nyike cikhati ca ku lera ni ku ehleketa hi zvimaho lezvi zvi xaxametilweko ka kwadru gi wulawulako hi vhiki go gumesa ga wutomi ga Jesu laha misaveni, gi nga ka Cibhukwana ca Mutlhangano ca Abril wa 2019, pajina 4. Laha u mahako lezvo, wona a zvipandze zva Bhibhiliya zvi engetelako a kubonga, ni lirandzo, ni kutiya-hlanha, ni litsako la wena. Hi kulandzela, wona tindlela to kongoma leti u nga kombisako hi tona a kubonga ka wena ka mbilu yontlhe. Tiyiseka lezvaku Jesu i ta zvi nyika lisima zvontlhe u zvi mahako kasi ku mu alakanya ndzeni ka nguva leyi ya Cialakanyiso. — Kuv. 2:19.