NDZIMA YA CIGONDZO N.° 5
LISIMU 108 A lirandzo la Nungungulu a li mbheli
Lezvi hi vhunekisako zvona hi lirandzo la Jehovha
“Kristu Jesu i nota tikweni kasi ku ta hanyisa vawonhi.” — 1 TIM. 1:15.
LEZVI HI TO GONDZA
Ka ndzima leyi, hi ta wona lezvi hi vhunekisako zvona hi hakhelo ya kutlhatlhisa ni lezvi hi nga kombisako zvona ku bonga ka Jehovha.
1. Zvini hi nga mahako kasi ku tsakisa Jehovha?
HI NGA alakanyela a ciyimo leci: A munhu wo kari u mu randzako nguvhu u mu nyika cinyikiwo co saseka, co hlawuleka ni ca cinene nguvhu. U wa ta ti zwisa kuyini loku a munhu loye i wo teka cinyikiwo leco a ci veka lahasi ka mubhedhi, a nga ci tirisi? U wa ta karateka nguvhu! Kanilezvi u wa ta tsaka nguvhu loku a munhu loye i wo tirisa khwatsi a cinyikiwo leco a tlhela a kombisa kubonga. Hi gondza yini? Jehovha i hi nyikile N’wana wakwe kasi ku hi vhuna. Hi nga alakanyela lezvi Jehovha a tsakisako zvona a cikhati leci hi kombisako kubonga hi cinyikiwo leco ca lisima, ni lirandzo lakwe leli li mu kucileko ku hi nyika a hakhelo ya kutlhatlhisa! — Joh. 3:16; Rom. 5:7, 8.
2. Zvini hi to bhula hi zvona ka ndzima leyi?
2 Laha a malembe ma yako ma hundza, kuzvilava hi nga sangula ku luza kubonga ka hina hi hakhelo ya kutlhatlhisa. Lezvo zvi wa ta fana ni ku teka cinyikiwo ca Nungungulu hi veka lahasi ka mubhedhi, hi nga ci tirisi; hi tsakisiwa hi kuva naco basi, kanilezvi na hi nga ci woni. Kasi lezvo zvi nga humeleli, hi fanele ku tshama hi ku hlanganyetela kubonga ka hina hi lezvi Nungungulu na Kristu va hi mahelako. A ndzima leyi yi ta hi vhuna ku maha lezvo. Hi ta bhula hi lezvi hi nga vhunekisako zvona hi hakhelo ya kutlhatlhisa zvezvi ni cikhatini ci tako. Hi ta tlhela hi wona lezvi hi nga kombisisako zvona kubonga hi lirandzo la Jehovha, nguvhunguvhu ka nguva leyi ya Cialakanyiso.
LEZVI HI VHUNEKISAKO ZVONA ZVEZVI
3. Hi yihi a yin’we ya tindlela leti hi vhunekako hi tona hi hakhelo ya kutlhatlhisa zvezvi?
3 Zvezvi ha vhuneka hi hakhelo ya ku tlhatlhisa ya Kristu. Hi cikombiso, Jehovha wa tsetselela a zviwonho zva hina na a ti seketela ka hakhelo ya kutlhatlhisa. A nga kurumeteki ku hi tsetselela. Kanilezvi i maha lezvo hi kuzvirandza. A mutsali wa tisimu i kombisile kubonga ka Jehovha, aku: “Hakuva wena Jehovha u munene niku u longile ku tsetselela”. — Lis. 86:5; 103:3, 10-13.
4. Jehovha i nyikile vamani a hakhelo ya kutlhatlhisa? (Luka 5:32; 1 Timote 1:15)
4 A vokari va nga tizwa na va nga ringanelwi hi kutsetselelwa hi Jehovha. Hi lisine, hontlheni a hi ringanelwi. Mupostoli Pawule i wa zvi zwisisa lezvaku i wa nga ‘ringani ku vitaniwa ku mupostoli’. Niku i tlhelile aku: “Kanilezvi hi kota ya tipswalo ta Nungungulu, ndzi lezvi ndzi nga zvona.” (1 Kor. 15:9, 10) Loku hi ti sola a zviwonho wa hina, Jehovha wa hi tsetselela. Hikuyini? A hi lezvaku ho ringanelwa, kanilezvi hi ku wa hi randza. Loku u karateka hi maalakanyo ya kutizwa na u nga sizi nchumu alakanya lezvaku Jehovha i nyikele a hakhelo ya kutlhatlhisa ka vawonhi lava va ti solako na ku nga hi ka vanhu vo kala ku wonha. — Lera Luka 5:32; 1 Timote 1:15.
5. Xana i kona cikari ka hina a nga ni fanelo ya ku ti byela lezvaku wa ringanelwa hi ku kombisiwa wuxinji ga Jehovha? Tlhamusela.
5 I hava cikari ka hina a faneleko ku ti byela lezvaku wa ringanelwa hi ku kombisiwa a wuxinji ga Jehovha, hambu loku a hi ni malembe yo tala ntirweni wa Jehovha. Hi lisine, Jehovha wa alakanya zvilo zvontlhe lezvi hi mu maheleko. (Mah. 6:10) I hi nyikile a N’wana wakwe kota cinyikiwo ca mahala, na ku nga hi ku o hi hakhela hi ntiro lowu hi mu mahelako. Loku hi wo ti byela ku ha ringanelwa hi ku kombisiwa wuxinji, kutani ku hi na ni fanelo ya ku khomiwa hi ndlela yo hlawuleka, hi wa ta ngha hi komba lezvaku a kufa ka Jesu a ku sizi nchumu. — Ringanisa ni Va Le Galatiya 2:21.
6. Hikuyini Pawule a nga tira hi kutikarata ntirweni wa Jehovha?
6 Pawule i wa zvi tiva lezvaku i wa nga ringanelwi hi ku tsakelwa hi Jehovha. Makunu, hikuyini a nga tira hi kutikarata ntirweni wa Jehovha. I wa nga feli ku komba lezvaku wa ringanelwa, kanilezvi i wo komba lezvaku wa bonga a wunene ga Jehovha. (Efe. 3:7) A ku fana na Pawule, hi simama ku tira hi kutikarata, na ku nga hi ku fela ku kuma wuxinji ga Jehovha, kanilezvi kasi ku kombisa kubonga hi wuxinji gakwe.
7. Hi yini a ndlela yin’wani leyi hi vhunekako hi yona hi hakhelo ya kutlhatlhisa zvezvi? (Va Le Roma 5:1; Jakobe 2:23)
7 A ndlela yin’wani hi vhunekako hi yona hi hakhelo ya kutlhatlhisa zvezvi kuva ni wunghana go tiya na Jehovha. a Kota lezvi zvi kumbukilweko ka ndzima yi nga hundza, a cikhati leci hi nga pswaliwa hi wa nga hi na wunghana na Jehovha. Hi kota ya hakhelo ya kutlhatlhisa, hi nga ti buza hi “kurula na Nungungulu” hi tlhela hiva vanghana vakwe. — Lera Va Le Roma 5:1; Jakobe 2:23.
8. Hikuyini hi faneleko ku bonga Jehovha hi lungelo ga mukhongelo?
8 Ehleketa hi ndlela yin’we basi leyi hi vhunekako hi yona hi kuva vanghana va Jehovha, ku nga lungelo ga mukhongelo. Jehovha a ngazwi basi a mikhongelo leyi a vanhu vakwe va mahako loku va tlhangene zvin’we, kanilezvi wazwa ni mikhongelo leyi a mun’we ni mun’wani wa hina a mahako loku a hi yece. A mukhongelo a wu hi vhuni basi ku hiva ni kurula ka mbilu ni kurula ka maalakanyo. Kanilezvi, wu tlhela wu hi vhuna ku tiyisa a wunghana ga hina na Nungungulu. (Lis. 65:2; Jak. 4:8; 1 Joh. 5:14) A cikhati leci Jesu a nga hi laha misaveni i wa khongela hi kukhandzakanya hakuva i wa zvi tiva lezvaku Jehovha i wa muzwa ni lezvaku a mukhongelo wu wa ta simama ku tiyisa a wunghana gakwe ni Papayi wakwe. (Luka 5:16) A ho ku bonga hi kota ya lezvi a hakhelo ya kutlhatlhisa yi hi vhunako kuva ni wunghana na Jehovha zvi tlhela zvi koteka ku hi wulawula naye!
LEZVI HI TO VHUNEKISA ZVONA CIKHATINI CI TAKO
9. A hakhelo ya kutlhatlhisa yi ta va vhunisa kuyini vakhozeli vo tsumbeka va Jehovha cikhatini ci tako?
9 A vakhozeli vo tsumbeka va Jehovha va ta vhunekisa kuyini hi hakhelo ya kutlhatlhisa cikhatini ci tako? Va ta kuma wutomi ga pindzukelwa. A vanhu vo tala va alakanya lezvaku lezvo a zvi koteki hakuva ku hundza malembe yo tala a vanhu na va kari vafa. Kanilezvi a kungo go sangula ga Jehovha ku wa hi ku a vanhu va hanya kala kupindzuka. Loku Adhamu i wa nga wonhangi, ne mun’we wa hina i wa nga ta alakanya lezvaku a ku hanya kala kupindzuka a zvi koteki. Hambu lezvi zvezvi zvi nga hi karatelako a ku alakanyela ku hanya kala kupindzuka, hi nga kholwa lezvaku lezvo zvi ta koteka hakuva ha zvi tiva lezvaku Jehovha i hakhele a ntsengo wa hombe nguvhu, ku nga wutomi ga N’wana wakwe, kasi ku maha ku lezvo zvi koteka. — Rom. 8:32.
10. Zvini lezvi a vatotilweko ni lava va tiyivhu tin’wani va zvi rindzelako?
10 Hambu lezvi a wutomi ga pindzukelwa hi to gi kuma cikhatini ci tako, Jehovha i lava lezvaku hi ehleketa hi gona zvezvi. A vatotilweko va rindzela ku kuma a wutomi go tsakisa le tilweni laha va to fumela misava zvin’we na Kristu. (Kuv. 20:6) Lava va tiyivhu tin’wani va rindzela ku hanya paradhesini laha misaveni na va nga hazwi kubayisa, kuxaniseka ni ku karateka. (Kuv. 21:3, 4) Xana u mun’we wa lava va tiyivhu tin’wani va rindzelako ku hanya kala kupindzuka laha misaveni? U nga alakanyi lezvaku a ku hanya laha misaveni zvi nga ta tsakisa a ku fana ni ku hanya le tilweni! Jehovha i mahile vanhu kasi va hanya laha misaveni, hikwalaho a ku hanya kala kupindzuka laha misaveni zvi ta hi tsakisa nguvhu.
11-12. Makatekwa muni ya le Paradhiseni lawa hi nga ehleketako hi wona zvezvi? (Wona ni mifota.)
11 Hi nga alakanyela hi lezvi a wutomi gi to tshamisa zvona Paradhiseni laha misaveni. Hi nga ta karateka hi mababyi kutani kufa. (Isa. 25:8; 33:24) Jehovha i ta hi nyika zvontlhe zvilo zva zvinene hi zvi lavako. Zvini u tsakelako ku gondza hi zvona Paradhesini? Ku gondza hi zvihari, ku chaya kutani ku dhezenyera? A zvi kanakanisi lezvaku Paradhiseni ku ta laveka vadhezenyari, vaaki ni varimi. Niku ku ta tlhela ku laveka vanhu va ku byala ni ku longisela zvakuga, ku maha tiferamenta ni ku khatalela a jardhim. (Isa. 35:1; 65:21) A cikhati leci hi to hanya kala kupindzuka, hi tava ni cikhati co enela kasi ku maha zvilo lezvo zvontlhe ni zvin’wani zvotala.
12 Hi nga alakanyela a litsako hi tova nayo a cikhati leci hi to amukela lava va to vhuxiwa hi ka vafileko! (Miti. 24:15) Hi nga alakanyela kambe lezvi hi to tsakisa zvona hi ku gondza zvotala xungetano hi Jehovha laha hi to hlola khwatsi a zvivangwa zvakwe zvo tala. (Lis. 104:24; Isa. 11:9) A ca hombe ka zvontlhe, hi nga alakanyela lezvi zvi to tsakisisa zvona a ku khozela Jehovha na hi nga ha tizwi nandzu hi kota ya ciwonho! A ku u wa ta cicisa a makatekwa lawa ya cikhatini ci tako hi “ku ti buza hi litsako la cikhatanyana la ciwonho”? (Mah. 11:25) Ne ni kutsongwani! A makatekwa lawo ma hundza ni kwihi kutikarata hi nga ku mahako. Alakanya lezvi, a Paradhise ga laha misaveni a hi nchumu hi to wu rindzela kala kupindzuka. Gi tava kona futsi. Ne cin’we ca zvilo lezvi zvi nga wa ta koteka loku Jehovha i wa nga hi randzangi nguvhu laha ka kuza a hi nyika a N’wana wakwe kota cinyikiwo!
Makatekwa muni u ma rindzelako hi mahlo yo pswhuka Paradhiseni? (Wona maparagrafo 11-12)
KOMBISA KUBONGA HI LIRANDZO LA JEHOVHA
13. Hi nga kombisa kuyini ku bonga hi lirandzo la Jehovha? (2 Va Le Korinte 6:1)
13 Hi nga kombisa kuyini ku ha mu bonga Jehovha hi kota ya lezvi a hi nyikileko hakhelo ya kutlhatlhisa? Hi ku rangisa a ntiro wakwe wutomini ga hina. (Mat. 6:33) Phela Jesu i fele vanhu vontlhe “kasi lava va hanyako va nga ha ti hanyeli, kanilezvi va hanyela loyi a nga va fela a tlhela a vhuxiwa”. (2 Kor. 5:15) Kunene a hi lavi ku amukela a tipswalo ta Nungungulu mahala. — Lera 2 Va Le Korinte 6:1.
14. Hi nga kombisa kuyini ku ha kholwa a wurangeli ga Jehovha?
14 A ndlela yin’wani ya ku kombisa kubonga hi lirandzo la Jehovha ku tsumba a wurangeli gakwe ni ku gi landzela. Hi ndlela muni? Loku zvi lava ku hi maha zviboho, zvo kota ku hi ta gondza kala kwihi kutani i ntiro muni hi to wu vhumela, hi fanele ku kambisisa lezvi Jehovha a lavako ku hi maha. (1 Kor. 10:31; 2 Kor. 5:7) Loku hi kombisa kukholwa laha hi mahako zviboho ku ta humelela zvilo zvo tsakisa nguvhu — a kukholwa ka hina ni wunghana ga hina na Jehovha zvi ta tiya nguvhu. A kutsumba ka hina ka ku hanya kala kupindzuka konawu ku ta tiya. — Rom. 5:3-5; Jak. 2:21, 22.
15. Hi nga kombisa kuyini kubonga ka nguva leyi ya Cialakanyiso?
15 Ka ha hi ni ndlela yin’wani leyi hi nga kombisako hi yona kubonga a lirandzo la Jehovha. Ku nga ku tirisa a nguva leyi ya Cialakanyiso kasi ku komba Jehovha lezvi hi mu bongisako zvona hi kota ya hakhelo ya kutlhatlhisa. Ahandle ka ku hina hi maha makungo basi ya ku hiva kona Cialakanyisweni, hi nga ramba van’wani kasi vonawu vava kona. (1 Tim. 2:4) Tlhamusela lava u va rambako lezvi zvi to mahiwa Cialakanyisweni. Zvi nga vhuna nguvhu a ku va komba vhidhio Hikuyini Jesu a fileko ni leyi ya ku Alakanya kufa ka Jesu lomu ka jw.org. A madhota ma nga ramba lava va holileko hi tlhelo ga moya. Hi nga alakanyela a litsako li tova kona le tilweni ni laha misaveni loku a tiyivhu to kari ta Jehovha ti lahlekileko ti kuceka ku wuya ntlhambini! (Luka 15:4-7) Cialakanyisweni hi nga losaneni hi cihina basi, kanilezvi hi fanele ku losa nguvhunguvhu lava va gondzako kuta ni lava ku hundzako cikhati co leha na va ngati mitlhanganweni. Hi lava ku va tizwa na va hi kaya! — Rom. 12:13.
16. Hikuyini hi faneleko ku hlota tindlela ta ku maha zvotala kuchumayeleni hi nguva ya Cialakanyiso?
16 U nga maha zvo engeteleka ntirweni wa Jehovha ka nguva leyi ya Cialakanyiso? A ku maha lezvo i ndlela ya yinene ya ku kombisa kubonga hi zvontlhe lezvi Nungungulu na Kristu va hi mahelako. Laha hi yako hi mu tirela nguvhu Jehovha, hi taya hi wona lezvi a hi vhunisako zvona, niku kota wuyelo ga kona, hi ta mu tsumba nguvhu. (1 Kor. 3:9) A cin’wani kambe, landzela programa ya kulera ka Bhibhiliya ku yelanako ni Cialakanyiso yi kumekako ka cibhukwana Hlola Mitsalo siku ni siku kutani ka kwadru gi nga ka cibhukwana ca mitlhangano. Loku u zvi lava u nga hlawula zvipandze lezvo zva Bhibhiliya kasi u maha hi zvona cigondzo ca wena wutsumbu.
17. Zvini zvi tsakisako Jehovha? (Wona ni kwadru “ Lezvi hi nga kombisako zvona kubonga hi lirandzo la Jehovha”.)
17 Kuzvilava a zviyimo zva wena a zvi ku vhumeleli a ku tirisa mawonela wontlhe ma kumbukilweko ka ndzima leyi. Hambulezvo, alakanya lezvaku Jehovha a nga fananisi lezvi u zvi mahako ni lezvi a van’wani va mahako, kanilezvi i cuwuka lezvi zvi nga lomu mbilwini ya wena. Yena wa tsaka nguvhu laha a wonako lezvi u bongisako zvona a cinyikiwo cakwe ca lisima, a hakhelo ya kutlhatlhisa. — 1 Sam. 16:7; Mar. 12:41-44.
18. Hikuyini hi bongako Jehovha Nungungulu na Jesu Kristu?
18 A hakhelo ya kutlhatlhisa hi yona basi yi mahako ku hi tsetselelwa zviwonho zva hina, hiva ni wunghana na Jehovha, hi tlhela hiva ni kutsumba ka ku kuma wutomi ga pindzukelwa. Ngha contlhe cikhati hi kombisa kubonga hi lirandzo la Jehovha, leli li mu kucileko ku a hi nyika makatekwa lawa. (1 Joh. 4:19) Hi nga tlhela hi kombisa kubonga kambe hi Jesu, loyi a hi randzileko laha ka kuza a nyikela wutomi gakwe kasi ku vhuna hina! — Joh. 15:13.
LISIMU 154 A lirandzo a li fuvi
a Jehovha i tsetselele vakhozeli vakwe va hanyileko mahlweni ka Kristu, Jesu na a nga se nyikela hakhelo ya kutlhatlhisa. Jehovha i mahile lezvo hakuva i wa tiyiseka lezvaku a N’wana wakwe i ta tsumbeka kala afa. Hikwalaho, ka Nungungulu a hakhelo ya kutlhatlhisa yi wa ku khwatsi yi sina yi nyikelwe. — Rom. 3:25.
