NDZIMA YA CIGONDZO N.° 4
LISIMU 18 Ha bonga a hakhelo ya kutlhatlhisa
Zvini hi gondzako ka hakhelo ya kutlhatlhisa?
“A lirandzo la Nungungulu li kombisilwe ka hina hi ndlela leyi”. — 1 JOH. 4:9.
LEZVI HI TO GONDZA
Ka ndzima leyi hi ta wona lezvi a hakhelo ya kutlhatlhisa yi kombisako zvona a matshamela ya manene ya Jehovha Nungungulu na Jesu Kristu.
1. Hi vhunekisa kuyini hi kuya Cialakanyisweni ca kufa ka Jesu ci mahiwako lembe ni lembe?
HANDLE ko kanakana wa kholwa lezvaku a hakhelo ya kutlhatlhisa cinyikiwo ca lisima nguvhu! (2 Kor. 9:15) Hi kota ya lezvi Jesu a nga nyikela wutomi gakwe, ha zvi kota kuva ni wunghana go tiya na Jehovha Nungungulu. Hi nga tlhela hiva ni kutsumba ka wutomi ga pindzukelwa. Hi lisine, zva ringana a ku kombisa kubonga hi hakhelo ya kutlhatlhisa ni ku kombisa kubonga ka Jehovha, loyi a kucilweko hi lirandzo kasi ku hi nyika a hakhelo ya kutlhatlhisa! (Rom. 5:8) Kasi ku hi vhuna ku simama hi kombisa kubonga hi hakhelo ya kutlhatlhisa ni ku nga tshuki hi rivakelwa lezvi Jehovha na Jesu va hi maheleko, Jesu i yimisile a Cialakanyiso ca kufa kakwe, ci mahiwako lembe ni lembe. — Luka 22:19, 20.
2. Zvini hi to bhula hi zvona ka ndzima leyi?
2 A lembe legi, a Cialakanyiso ci ta mahiwa hi Mulongiso, wa dhiya 12 ka Abril wa 2025. Handle ko kanakana, hontlheni hi kari hi ti longisela kasi hiva kona. Ndzeni ka nguva ya Cialakanyiso, hi ta vhuneka nguvhu loku hi ti nyika cikhati ca ku ehleketa a hi lezvi Jehovha ni N’wana wakwe va hi mahelako. Ka ndzima leyi, hi ta bhula hi lezvi a hakhelo ya kutlhatlhisa yi hi gondzisako xungetano hi Jehovha ni N’wana wakwe. A ndzima yi landzelako yi ta hi vhuna ku zwisisa lezvi hi vhunekisako zvona hi hakhelo ya kutlhatlhisa ni lezvi hi nga kombisisako zvona a kubonga ka hina.
ZVINI LEZVI A HAKHELO YA KUTLHATLHISA YI HI GONDZISAKO HI JEHOVHA?
3. A kufa ka munhu mun’we, ku tlhatlhisa timiliyoni ta vanhu hi ndlela muni? (Wona ni mufota.)
3 A hakhelo ya kutlhatlhisa yi hi gondzisa xungetano hi kululama ka Jehovha. (Dhewu. 32:4) Hi ndlela muni? Hi nga ehleketa hi lezvi: Hi kota ya kungaingisi ka Adhamu, hi thapelwe hi ciwonho leci ci hi mahako hifa. (Rom. 5:12) Kasi ku hi tlhatlhisa ka ciwonho ni kufa, Jehovha i rumele Jesu kasi ku hi nyika a hakhelo ya kutlhatlhisa. Kanilezvi, a muphahlo wa munhu mun’we wo mbhelela wu nga tlhatlhisa timiliyoni ta vanhu hi ndlela muni? Mupostoli Pawule wa tlhamusela. I wula lezvi: “A ku khwatsi hi lezvi a kungaingisi ka munhu mun’we [Adhamu] ku nga maha votala vava vawonhi, hizvalezvo kambe, a kuingisa ka munhu mun’we [Jesu] ku ta maha votala va wuliwa vo lulama”. (Rom. 5:19; 1 Tim. 2:6) Hi magezu man’wani, hi zile hiva tikhumbi ta ciwonho ni kufa hi kota ya munhu mun’we wo mbhelela kanilezvi wo kala ku ingisa. Hikwalaho, zvi lavile ku a munhu mun’we wo mbhelela, kanilezvi wo ingisa, a hi tlhatlhisa.
Hi kota ya munhu mun’we, Adhamu, hi tikhumbi ta ciwonho ni kufa. Hi kota ya munhu mun’we, Jesu, hi nga tlhatlhisiwa ka ciwonho ni kufa (Wona paragrafo 3)
4. Hikuyini Jehovha a nga kala ku zama ndlela ya ku vhumelela ku a vana vo lulama va pswalo wa Adhamu va hanya kala kupindzuka?
4 A ku hakunene zvi wa lava ku Jesu afa kasi ku hi ponisa? Xana Jehovha na a nga zamangi ndlela ya ku vhumelela ku a vana vo lulama va pswalo wa Adhamu va hanya kala kupindzuka? Kota vanhu vo kala kumbhelela, kuzvilava hi nga alakanya ku leyo yi wa tava ndlela ya yinene ya ku lulamisa cikarato. Kanilezvi, lezvo zvi wa nga ta komba a kululama ko mbhelela ka Jehovha. Hi kota ya lezvi Jehovha a lulamileko, i wa nga ta tshuka a hlawula ku ti vhala matihlo ka kungaingisi ka Adhamu.
5. Hikuyini hi nga tiyisekako lezvaku contlhe cikhati Jehovha i ta maha lezvi zvi nga zvinene?
5 Kanilezvi, ahati loku Jehovha i wa no kala ku hi nyika a hakhelo ya kutlhatlhisa ke, a veka kululama kakwe hi tlhelo, a vhumelela ku a vana vo kala kumbhelela va Adhamu va hanya kala kupindzuka? Loku Jehovha i wa no maha lezvo, kuzvilava a vanhu na va lavile ku Jehovha a veka kululama kakwe hi tlhelo ni ka zviyimo zvin’wani. Hi cikombiso, a vanhu kuzvilava na va kanakanile lezvaku Jehovha i ta tatisa zvitsumbiso zvakwe zvontlhe. Kanilezvi a zvizi zvi lava ku hi karateka hi kota ya lezvo. Jehovha i mahile kululama, hambu lezvi zvi lavileko kutikarata ka hombe — i nyikela N’wana wakwe kota muphahlo — zvi hi tiyisekisa lezvaku contlhe cikhati i ta maha lezvi zvi nga zvinene.
6. Hi yihi a yin’we ya tindlela leti a hakhelo ya kutlhatlhisa yi kombako hi tona a lirandzo la Jehovha? (1 Johani 4:9, 10)
6 Hambu lezvi a hakhelo ya kutlhatlhisa yi hi vhunako a ku zwisisa lezvaku Jehovha i lulamile, yi tlhela yi hi vhuna a ku zwisisa a kueta ka lirandzo lakwe. (Joh. 3:16; Lera 1 Johani 4:9, 10.) A gondzo ya hakhelo ya kutlhatlhisa yi komba lezvaku Jehovha a nga lavi lezvaku hi kuma wutomi ga pindzukelwa basi, kanilezvi i lava ni lezvaku hi maha cipandze ca ngango wakwe. Ehleketa hi lezvi: A cikhati leci Adhamu a nga wonha, Jehovha i no mu hlongola cikari ka ngango wakwe wa vakhozeli. Kota wuyelo ga kona, hontlheni hi pswaliwa handle ka ngango wa Nungungulu. Kanilezvi, hi ku tirisa hakhelo ya kutlhatlhisa, Jehovha wa tsetselela zviwonho zva hina niku hi magumo i ta wuyisa vanhu vontlhe, lava va kombisako kukholwa ni ku ingisa, cikari ka ngango wakwe. Hambu zvezvi hi ngava ni wunghana go tiya na Jehovha a ku patsa ni vakhozeli-kuloni. Hi lisine, Jehovha wa hi randza nguvhu! — Rom. 5:10, 11.
7. A kuxaniseka ka Jesu ku hi vhunisa kuyini ku zwisisa lezvi Jehovha a hi randzisako zvona?
7 Hi nga zwisisa khwatsi lezvi Jehovha a hi randzisako zvona loku hi ehleketa hi lezvi zvi nga mu pandzisa zvona mbilu a ku wona N’wana wakwe na a xaniseka. Sathani i wula lezvaku a ku na nandza ga Nungungulu gi to simama kutsumbeka Kakwe loku gi kumana ni zvikarato. Kasi ku kaneta mawunwa lawo, Jehovha i no vhumelela lezvaku Jesu a ranga hi ku xaniseka na a nga se dawa. (Joba 2:1-5; 1 Ped. 2:21) Jehovha na a kari a cuwukisela, Jesu i no poyilelwa hi varangeli va wukhongeli lava va nga mu vhukela, a biwa hi masochwa a tlhela a belelwa laha mhandzeni ya hlomulo. Hi kugumesa, Jehovha i no wona N’wana wakwe na afa hi ndlela yo bayisa nguvhu. (Mat. 27:28-31, 39) Jehovha i wa hi ni ntamu wa ku na a nyimisile zvilo lezvo. Hi cikombiso, a cikhati leci a valala va ngaku: “Nungungulu i wa mu tlhatlhise loku a mu randza”, Jehovha na a mahile lezvo. (Mat. 27:42, 43) Hambulezvo, loku Nungungulu i wa no nyimisa ku lezvo zvi maheka, na ku nga vangi ni hakhelo ya kutlhatlhisa niku na hi tsikilwe na hi nga hi na kutsumba. Hikwalaho, Jehovha i vhumelele ku a N’wana wakwe a xaniseka kala afa.
8. Xana Jehovha i zwile kubayisa a cikhati leci a nga wona a N’wana wakwe na a xaniseka? Tlhamusela. (Wona ni mufota.)
8 A hi faneli ku alakanya lezvaku kota lezvi Jehovha a nga Nungungulu wa ntamu wontlhe a ngazwi kubayisa! Hina hi vangilwe hi mufananiso wakwe, hi vangilwe na hi hi ni kutizwa, hikwalaho zva zwala a ku wula lezvaku Jehovha wazwa kubayisa. A Bhibhiliya gi mu tlhamusela kota munhu a zwako “kubayisa” a tlhela azwa ‘kupandza ka mbilu’. (Lis. 78:40, 41) Hi nga ehleketa hi matimu ya Abrahama na Isaka. Kuzvilava wa alakanya lezvaku Jehovha i byelile Abrahama lezvaku a nyikela a n’wana wakwe wa mun’we kota muphahlo. (Gen. 22:9-12; Mah. 11:17-19) Hi nga alakanyela lezvi Abrahama a nga ti zwisa zvona a cikhati leci a nga longisela ku daya Isaka hi ku mu tlhava khati gin’we basi hi mukwana. A ha ha wuli hi lezvi Jehovha a nga bayisekisa zvona laha a nga wona N’wana wakwe na a xanisiwa kala afa hi vanhu va kubiha! — Wona vhidhio Pimanyisa kukholwa kabye — Abrahama, Cipandze 2 lomu ka jw.org.
Zvi mu bayisile nguvhu Jehovha a ku wona a N’wana wakwe na a xaniseka (Wona paragrafo 8)
9. Va Le Roma 8:32, 38, 39 i ku vhunisa kuyini a ku zwisisa a kueta ka lirandzo la Jehovha hi wena ni vakhozeli-kuloni?
9 A hakhelo ya kutlhatlhisa yi hi gondzisa lezvaku a ku na munhu mun’wani a hi randzako nguvhu a ku fana na Jehovha — hambu loku a maxaka ya hina kutani vanghana va hina vo hi randzisa kuyini. (Lera Va Le Roma 8:32, 38, 39.) A zvi kanakanisi lezvaku Jehovha wa hi randza a ku hundza lezvi hina venyi hi ti randzisako zvona. Wa zvi lava ku hanya kala kupindzuka? Jehovha i zvi lava nguvhu ku u hanya kala kupindzuka a ku hundza lezvi wena u zvi lavisako zvona. Wa zvi lava a ku tsetselelwa a zviwonho zva wena? Jehovha i zvi lava nguvhu a ku ku tsetselela a ku hundza lezvi wena u zvi lavisako zvona. Leci a ci lavako basi ku hi amukela a cinyikiwo cakwe co saseka hi ku kombisa kukholwa ni kuva vanhu vo ingisa. A hakhelo ya kutlhatlhisa cikombiso ca hombe nguvhu ca lirandzo la Nungungulu. Niku misaveni yiswa hi ta gondza zvilo zvo tala nguvhu xungetano hi lirandzo la Jehovha. — Mutsh. 3:11.
ZVINI LEZVI A HAKHELO YA KUTLHATLHISA YI HI GONDZISAKO HI JESU?
10. a) Zvini zvi karatileko nguvhu Jesu xungetano hi kufa kakwe? b) Jesu i basisile a vito ga Jehovha hi ndlela muni? (Wona ni kwadru “ A kutsumbeka ka Jesu ku basisile a vito ga Jehovha”.)
10 Jesu wa khatala nguvhu hi lezvi a vanhu va mu wonisako zvona a Papayi wakwe. (Joh. 14:31) I wa karateka nguvhu hi lezvi a vanhu va nga wa ta alakanyela zvahava hi Papayi wakwe hi kota ya lezvi a nga wa ta dayisiwa ku khwatsi cigevenga. Hi cigelo leco i no khongela, aku: “Papayi, loku zvi koteka, a kopo leyi yi wa suke ka mina.” (Mat. 26:39) Hi ku simama a tsumbekile ka Jehovha kala afa, Jesu i kombile lezvaku lezvi Sathani a nga zvi wula xungetano hi vito ga Jehovha mawunwa.
11. Jesu i kombisile a lirandzo lakwe la hombe hi vanhu hi ndlela muni? (Johani 13:1)
11 A hakhelo ya kutlhatlhisa yi hi gondzisa kambe lezvaku Jesu wa khatala nguvhu hi vanhu, nguvhunguvhu a vapizani vakwe. (Mav. 8:31; lera Johani 13:1.) Hi cikombiso, Jesu i wa zvi tiva lezvaku i wa ta kumana ni zvikarato zvo kari ntirweni wakwe wa laha misaveni, niku a cin’we ca zvikarato lezvo ku wa hi kufa ka bayisela ga cima. Hambulezvo, Jesu a nga mahangi a ntiro wakwe wa laha misaveni hi ku fela ku tatisa nayo basi. Wutshan’wini ga lezvo, Jesu i wa chumayela, ni ku gondzisa, a tlhela a vhuna van’wani hi mbilu yontlhe. Hambu ka siku legi a ngafa hi gona, Jesu i ti nyikile cikhati ca ku va hlambisa mikondzo a vapostoli vakwe a tlhela a va gondzisa, a va tiyisa ni ku va chavelela. (Joh. 13:12-15) A cikhati leci makunu a nga hi laha mhandzeni ya hlomulo, Jesu i no ti nyika cikhati ca ku mu nyika kutsumba a wanuna wo kari wa cigevenga ni ku maha malulamiselo ya lezvaku a mamani wakwe a sala a hlayisiwa. (Luka 23:42, 43; Joh. 19:26, 27) Hikwalaho, a lirandzo lo eta la Jesu a li kombisiwangi basi a cikhati leci a ngafa, kanilezvi li kombisilwe kambe ka zvontlhe lezvi a zvi mahileko wutomini gakwe gontlhe, a cikhati leci a nga hi laha misaveni.
12. Jesu i simama ku hi mahela zvilo zvo tala hi ndlela muni?
12 Hambu lezvi Jesu a ngafa “khati gin’we zvi enela”, wa ha simama ku hi mahela zvilo zvo tala. (Rom. 6:10) Zvini a hi mahelako? I simama ku tirisa cikhati cakwe ni ntamu laha a tirisako hakhelo ya kutlhatlhisa kasi ku vhuna hina. Wona lezvi a mahako zvezvi. I tira kota Hosi ya hina, Mupristi wa Hombe, ni hloko ya bandla. (1 Kor. 15:25; Efe. 5:23; Mah. 2:17) I nyikilwe ntiro wa ku hlengeleta vatotilweko ni lava va citshungu ca hombe, niku a ntiro lowo wu ta mbhela a kuxaniseka ka hombe na ku nga se gumesa. b (Mat. 25:32; Mar. 13:27) Jesu i tlhela a maha lezvaku a malandza yakwe yo tsumbeka maga khwatsi hi tlhelo ga moya masikwini lawa yo gumesa. (Mat. 24:45) Niku Mufun’weni wakwe wa 1000 wa malembe i ta simama ku hi tirela. Hakunene Jehovha i hi nyikile N’wana wakwe!
U NGA TSHUKI U NYIMA KU GONDZA
13. A ku ehleketa ku nga ku vhunisa kuyini a ku gondza hi lirandzo leli Nungungulu na Kristu va nga nalo hi hina?
13 U nga simama ku gondza xungetano hi lirandzo leli Jehovha Nungungulu na Jesu Kristu va nga nalo hi hina loku u simama ku ehleketa hi lona. Ka nguva ya Cialakanyiso ca lembe legi, kuzvilava u nga lera khwatsanyana a Ivhangeli yin’we kutani ku hundza. U nga zami ku lera zvilo zvo tala hi khati gin’we. Wutshan’wini ga lezvo, lera ha hombe u tlhela u wona zvigelo zvin’wani zvi hi mahako hi randza Jehovha na Jesu. A cin’wani kambe, bhulela van’wani lezvi u zvi gondzako.
14. Hi kuya hi Lisimu 119:97 ni tlhamuselo wa lahasi, a ku kambisisa zvi nga hi vhunisa kuyini ku gondza xungetano hi hakhelo ya kutlhatlhisa zvin’we ni timhaka tin’wani? (Wona ni mufota.)
14 Loku u hi lisineni hi malembe yo tala, kuzvilava wa ti wutisa ku zva koteka ku pola zvilo zva zviswa ka timhaka leti u ti tivako khwatsi, to kota kululama ka Nungungulu, lirandzo lakwe, ni hakhelo ya kutlhatlhisa? A mhaka ku lezvi hi nga gondzako xungetano hi timhaka leti a zvi na magumo. Hikwalaho, zvini u nga mahako? Londzowota khwatsi a mahungu ya talela ga cima ma nga lomu ka mabhuku ya hina. Loku u lera cipandze co kari lomu ka Bhibhiliya u nga ci zwisisi khwatsi, u nga hundzi, hlota a mhaka leyo. Laha a siku gi yako gi famba, ehleketa hi lezvi u zvi gondzileko ni lezvi lezvo zvi ku gondzisako hi Jehovha, ni N’wana wakwe ni lirandzo leli va nga nalo hi wena. — Lera Lisimu 119:97 ni tlhamuselo wa lahasi.
Hambu loku hi hi lisineni hi malembe yo tala, hi nga engetela a kubonga ka hina hi hakhelo ya kutlhatlhisa (Wona paragrafo 14)
15. Hikuyini hi faneleko ku simama ku hlota titshomba ta Bhibhiliya?
15 U nga mbheli ntamu loku u nga kumi zvilo zva zviswa kutani zvo tsakisa khati ni khati u tshamako u lera kutani ku kambisisa. Hi ndlela yo kari u fana ni munhu loyi a hlotako a ouro. A kutala ka zvikhati, lava va hlotako ouro va mbheta tihora to tala kutani masiku na va nga se kuma ne ndzhohwana yin’we basi ya ouro. Hambulezvo, va simama ku hlota hakuva a ndzhohwana ni ndzhohwana ya ouro va yi kumako ya lisima kabye. A ha ha wuli hi lisima la tshomba ni tshomba hi yi kumako lomu ka Bhibhiliya! (Lis. 119:127; Mav. 8:10) Hikwalaho, kombisa lihlazva-mbilu u tlhela u namarela ka programa ya wena ya ku lera Bhibhiliya. — Lis. 1:2.
16. Hi nga mu pimanyisisa kuyini Jehovha na Jesu?
16 Laha u gondzako zama ku wona lezvi u nga zvi tirisisako zvona lezvi u lerako. Hi cikombiso, pimanyisa a kululama ka Jehovha hi ku ngavi ni cihlawulela hi van’wani. Pimanyisa lezvi Jesu a mu randzisako zvona Papayi wakwe ni van’wani hi kutiyimisela ku xaniseka hi kota ya vito ga Jehovha ni ku vhuna maKristu-kuloni hambu loku a ciyimo ci bindza. Ahandle ka lezvo, pimanyisa Jesu hi kuchumayela van’wani kasi vonawu vava ni thomo ga ku kuma cinyikiwo ca lisima nguvhu ci tako hi ka Jehovha.
17. Zvini hi to bhula hi zvona ka ndzima yi landzelako?
17 Laha hi yako hi zwisisa ni ku bonga a hakhelo ya kutlhatlhisa, hi taya hi mu randza nguvhu Jehovha ni N’wana wakwe. Niku kota lezvi hi va randzako, vonawu va ta hi randza nguvhu. (Joh. 14:21; Jak. 4:8) Hikwalaho, ngha hi tirisa zvontlhe lezvi Jehovha a hi nyikako kasi hi simama ku gondza hi hakhelo ya kutlhatlhisa. Ka ndzima yi landzelako, hi ta wona tindlela to kari hi nga vhunekako hi tona hi hakhelo ya kutlhatlhisa ni lezvi hi nga kombisako zvona kubonga a lirandzo la Jehovha.
LISIMU 107 A hi pimanyiseni a lirandzo la Nungungulu
a TLHAMUSELO: A ku “ehleketa” zvi wula ku veka kupima ka timhaka to kari u tlhela u ti gondza zvi eta.
b A kuhlengeletiwa ka “zvilo zva le tilweni” loku Pawule a ku kumbukileko, kota lezvi zvi tsalilweko ka Va Le Efesusi 1:10, ku hambene ni kuhlengeletiwa ka “vahlawulilweko” loku Jesu a ku kumbukileko ka Matewu 24:31 na Marku 13:27. Pawule i wa wula a cikhati leci Jehovha a hlawulako a vana vakwe va moya hi ku va tota hi moya wakwe wo basa. Jesu i wa wula a cikhati leci a misalela ya vatotilweko yi to hlengeletiwa laha misaveni yi tekiwa yiya tilweni cikhatini ca kuxaniseka ka hombe.
