Zviwutiso zva vagondzi
A Vakustumunyu va Jehovha va nga lava wo chadha naye hi ku tirisa tisayite ta Internet ke?
Jehovha i lava ku lava va chadhako va kuma litsako, va randzana va tlhela va hanya hi kuzwanana kala rini na rini. (Mat. 19:4-6) Loku u lava wo chadha naye, u nga mu kumisa kuyini? Lezvi Jehovha a nga yena a nga hi vanga, wa zvi tiva lezvi zvi lavekako kasi zvi hi fambela khwatsi laha ko gangisana ni loku hi chadhile. Hikwalaho, loku u tirisa matshinya lawa a hi nyikileko, zvi ta ku fambela khwatsi. Zvezvi, wona matshinya yo kari.
A co sangula, zvi lava ku hi tiva a mhaka leyi xungetano hi hina venyi: ‘A mbilu yi khohlakele ku hundza zvilo zvontlhe.’ (Jer. 17:9) Loku a vanhu vambiri va lavako wo chadha naye va tivana va sangula ku gangisana, va nga hakisela kuswa hi lirandzo laha ka ku ne va nga zvi koti ni ku maha ciboho ca ci nene. (Mav. 28:26) Hi cigelo leco, loku va sangula ku tivana, a hi zvi nene a ku hakisela ku sangula ku gangisana, kutani ku tsumbisana ku chadha na va nga se tivana khwatsi.
Mavingu 22:3 i ngalo: ‘A munhu a tlharihileko wa wona mhango a fihlala; kanilezvi a zvipumbu zvi hundza hi laho zvi xaniseka.’ Makunu, hi yihi mhango ya ku lava wo chadha naye hi ku tirisa tisayite ta Internet? A ya hava hi ku a vokari va gondzile hi ndlela yo bayisa. Va tivene ni munhu hi Internet, va sangula ku gangisana, va guma va ya pola ku a munhu loye i wo va kalavela! Lomu ka Internet ku ni vanhu vo kanganyisa kambe va vhululileko tikonta ti nga hiko ta lisine kasi ku yiva mali ya lava vo khudzehela. Ka zvikhati zvin’wani, a vakanganyisi lavo va waku Vakustumunyu va Jehovha.
Wona mhango yin’wani yi nga kona. Lomu ka tisayite tin’wani, leci ci tlhanganisako vanhu va nge khwatsi va yelana tiprograma ta michini ta tisayite leto. Hambulezvo, a ku na leci ci kombako ku a mahela legi ga vhuna. Makunu, u wona ku zvi wa tava wutlhari futsi a ku tsumba tiprograma leto ta michini kasi ti hi mahela ciboho ka nchumu wa lisima nguvhu wo kota munhu wo chadha naye? A lisine hi ku a tiprograma ta michini a ku na ndlela ya ku ti tsumbeka a ku fana ni matshinya ya milayo ya Bhibhiliya. — Mav. 1:7; 3:5-7.
Ka Mavingu 14:15 hi kuma tshinya legi: ‘A cipumbu ci vhumelela timhaka tontlhe; kanilezvi loyi a tlharihileko wa cuwukisisa laha a fambako ha kona.’ Na u nga se maha ciboho ca ku chadha ni wokari, u fanele ku ranga hi ku mu tiva khwatsi. Kanilezvi, lezvo zvi nga karata hi ku mu kumana ka Internet. Hambu loku zvi koteka ku wona mahungu yo kari ya munhu loye lomu ka konta yakwe mu tlhela mu mbheta cikhati co leha na mu bhula, a ku u nga wula ku wa mu tiva khwatsi a munhu loye futsi?
A muyimbeleli wo kari wa tisimu i wulile lezvi: ‘A ndzi tshami ni vanhu vo hemba wunwa, hambu ni ku hlengela ni vaxengeteli.’ (Lis. 26:4) A kutala ka vanhu va zvi wona na zvi nga bihangi a ku hemba lomu ka tisayite tabye ta ku gangisana, na va fela ku woneka na va hi vanhu va va nene. Va nga fihla lezvi hakunene va nga zvona kutani ku nga kombekisi wumunhu gabye loku va hi lomu ka tisayite leto. Hambu lezvi ka ku a van’wani va nga wula ku Vakustumunyu va Jehovha, ti wutise ku: Hakunene maKristu ma bhabhatisilweko? Va buvhile hi tlhelo ga moya? Va na ni wunghana na Jehovha? Va na ni nduma yi nene laha bandleni? A vanhu lavo, zva koteka kambe a ku va nga hi cikombiso ci nene hambu kuva “vakubiha” futsi. (1 Kor. 15:33; 2 Tim. 2:20, 21) A ciwutiso cin’wani hi leci: Va tlhatlhekile ku chadha hi kuya hi matshinya ya milayo ya Bhibhiliya? Zvi lava ku u tiva mihlamulo ya zviwutiso lezvi. Kanilezvi, zva karata ku zvi tiva loku u nga vhuniwi hi vamakabye va mu tivako khwatsi a munhu loye. (Mav. 15:22) A lisine kambe hi ku a nandza ga Jehovha go tsumbeka gi wa nga ta tshuka gi alakanyela ku ti ‘boha kanga wun’we’ ni munhu a nga kholwiko. — 2 Kor. 6:14; 1 Kor. 7:39.
Kota lezvi hi wonileko ku a ku lava wo chadha naye lomu ka tisayite ta Internet zvi na ni mhango, hi tihi tindlela ta ti nene ta ku lava munhu wo chadha naye, loyi mu tova ni wukati ga gi nene? U nga mu kuma kwihi loyi kuzvilava a tova munhu wa mu nene kasi ku chadha naye? Loku zvi nga betelwi a ku tlhangana vanhu vo tala, a Vakustumunyu va Jehovha va nga tivana ni munhu nghohe ni nghohe lomu mitlhanganweni ya bandla, ya cipandze, lomu migotsovanyanweni, ni ka zvikhati zvin’wani hi tlhanganako.
Laha mu mbhetako cikhati na mu hi zvin’we, u taya u pola ku lezvi wena u zvi nyikako lisima ni mixuvo ya wena zva fana ni zva loyi u mu navelako ke
Loku zvi nga koteki a ku hi tlhangana nghohe ni nghohe hi kota ya zvilo zvo kota ntungu wa COVID-19, hi maha mitlhangano ya bandla hi ku tirisa michini, lomu hi nga tivanako ni Vakustumunyu van’wani va nga chadhangiko. Ka zvikhati lezvo, u nga wona lezvi va patsekisako zvona mitlhanganweni, u tlhela u vazwa loku va wulawula hi kukholwa kabye. (1 Tim. 6:11, 12) Mu nga tlhela mu bhula kambe ka tisala ta vanhu vatsongwani andzhako ka mitlhangano, loku a bandla ga n’wina gi maha mitlhangano hi programa yi vhumelako lezvo. A cikhati mu tlhangeneko kota malandza ya Jehovha, u nga wona lezvi loyi u mu navelao a va khomisako zvona van’wani, niku lezvo zvi nga ku vhuna ku tiva ku munhu wa matshamela muni. (1 Ped. 3:4) Laha hi kufamba ka cikhati u to ya u mu tiva khwatsi, u nga pola ku lezvi wena u zvi nyikako lisima ni mixuvo ya wena zva fana ni lezvi zva yena ke; u nga tlhela u zvi wona ku mu nga hanya khwatsi ke kota nuna ni sati.
Loku a munhu a lava wo chadha naye hi ku landza matshinya ya milayo ya Bhibhiliya, zvi tolovela ku guma va wona lisine la lezvi zvi wuliwako ka mavingu, zvaku: ‘Loyi a kumileko sati [kutani nuna] i kumile a kukateka; wa kuma thomo hi ka Jehovha.’ — Mav. 18:22.