NDZIMA YA CIGONDZO N.° 29
Seketela Jesu, a Murangeli wa hina
“Ndzi nyikilwe ntamu wontlhe le tilweni ni laha misaveni.” — MAT. 28:18.
LISIMU 13 Kristu hi yena Cikombiso ca hina
LEZVI HI TO GONDZA *
1. Hi kwihi a kurandza ka Jehovha nyamutlha?
NYAMUTLHA kurandza ka Nungungulu lezvaku a mahungu ya manene ya Mufumo ma chumayelwa misaveni yontlhe. (Mar. 13:10; 1 Tim. 2:3, 4) A ntiro lowu wa Jehovha niku wa lisima nguvhu laha ka kuza a hlawula a N’wana wakwe wo randzeka kasi a wu rangela. Hi nga tiyiseka lezvaku kota lezvi hi rangelwako hi murangeli wa munene Jesu, a ntiro wa kuchumayela wu ta chikela magumo hi kuya hi lezvi Jehovha a zvi lavisako zvona a kugumesa na ku nga se chikela. — Mat. 24:14.
2. Zvini hi to bhula hi zvona ka ndzima leyi?
2 Ka ndzima leyi, hi ta wona lezvi Jesu a tirisisako zvona a ‘nandza gakwe go tsumbeka ni go tlhariha’ kasi ku nyika zvakuga zva moya ni ku xaxameta valandzeli vakwe ka ntiro wa hombe nguvhu matin’wini, ku nga ntiro wa kuchumayela. (Mat. 24:45) Hi ta tlhela hi wona lezvi a mun’we ni mun’wani wa hina a nga mahako kasi ku seketela Jesu ni nandza go tsumbeka.
JESU WA RANGELA A NTIRO WA KUCHUMAYELA
3. I ntamu muni lowu Jesu a nyikilweko?
3 Jesu wa rangela a ntiro wa kuchumayela. Cini ci hi kholwisako lezvo? Cikhatanyana mahlweni ka ku a tlhela tilweni, Jesu i tlhanganile ni valandzeli vakwe vo tsumbeka citsungeni ca Galileya a va byela ku: “Ndzi nyikilwe ntamu wontlhe le tilweni ni laha misaveni.” Hi nga wona lezvi a nga wula hi kulandzela, i te: “Hikwalaho, fambani mu va maha vapizani a vanhu va matiko wontlhe.” (Mat. 28:18, 19) Hikwalaho, cikari ka zvilo zvin’wani lezvi Jesu a nyikilweko, i nyikilwe ni ntamu wa ku rangela a ntiro wa kuchumayela.
4. Hikuyini hi tiyisekako ku Jesu wa ha rangela a ntiro wa kuchumayela?
4 Jesu i wulile lezvaku a ntiro wa kuchumayela ni ku maha vapizani wu wa ta mahiwa ka “matiko wontlhe” niku i wa tava zvin’we ni valandzeli vakwe a “masiku wontlhe kala kugumeseni ka tiko”. (Mat. 28:20) A magezu lawa ma komba khwatsi lezvaku a ntiro wa kuchumayela wu wa ta simama wu rangelwa hi Jesu kala masikwini ya hina.
5. Hi vhunetelisa kuyini a kutatiseka ka ciphrofeto ci nga ka Lisimu 110:3?
5 Jesu i wa nga karateki hi ku alakanya lezvaku ku wa ta vhumaleka vatiri kugumeseni ka tiko. I wa zvi tiva lezvaku a magezu ya kuphrofeta ya mutsali wa tisimu ma wa ta tatiseka: “A vanhu va wena vata hi litsako, laha wena u hlomako a yimpi ya wena.” (Lis. 110:3) Loku u patseka ntirweni wa kuchumayela u vhunetela Jesu ni nandza go tsumbeka niku u vhunetela ku tatisa a ciphrofeto leci. A ntiro wa kuchumayela a wu nyimi kanilezvi ku na ni zvikarato.
6. Hi cihi a cin’we ca zvikarato leci a vachumayeli va Mufumo va kumanako naco nyamutlha?
6 A cin’we ca zvikarato leci a vachumayeli va Mufumo va kumanako naco kuvhukelwa. A vadhuki, ni varangeli va wukhongeli ni varangeli va politika va maha votala vava ni mawonela ya hava hi ntiro wa hina. Loku a maxaka ya hina, lava hi tivanako navo ni vatiri-kulori va kanganyiswa hi mawunwa lawo va nga hi kurumeta ku tsika ku tirela Jehovha ni ku nyima ku chumayela. Ka matiko yo kari, a valala va hina va vhukela vamakabye va hina, va va dzukisela kutani ku khoma va tlhela va va vhalela paxweni. A hi hlamali loku a vanhu va hi khomisa lezvo. Jesu i phrofetile ku: “Mu ta vengiwa hi matiko wontlhe hi kota ya vito ga mina.” (Mat. 24:9) A kuza hi vengisiwa lezvo cikombiso co tiya ca lezvaku ha tsakelwa hi Jehovha. (Mat. 5:11, 12) Sathani hi yena a kucetelako a kuvhukelwa loko. Kanilezvi a nga kumi nchumu ka Jesu! Hi ku vhuniwa hi Jesu, a mahungu ya manene ma chumayelwa vanhu ka matiko wontlhe. A hi woneni cikombiso co kari.
7. Cikombiso muni u ci wonako ca lezvaku Kuvhululelwa 14:6, 7 wa tatiseka?
7 A cin’wani cikarato hi kumanako naco loku hi chumayela hi ku a vanhu va wulawula a tirimi to tala to hambana. Ka kuvhululelwa loku a nyikileko mupostoli Johani, Jesu i phrofetile lezvaku masikwini ya hina a mahungu ya manene ma wa ta hlula a cikarato leco. (Lera Kuvhululelwa 14:6, 7.) Hi ndlela muni? Hi nyika a vanhu vo tala hi laha zvi kotekako hi kona a lungelo ga ku amukela a mahungu ya Mufumo. Inyamutlha, a vanhu misaveni yontlhe va nga lera mahungu ma seketelwako ka Bhibhiliya lomu ka saite ya hina ya jw.org hakuva ku na ni mahungu hi tirimi ta ku hundza 1000! A Hubye yi Fumako yi vhumelele lezvaku ku hundzuluselwa a bhuku Ti buze hi wutomi kala kupindzuka!, ku nga citiro-tshinya hi ci tirisako kasi ku maha vapizani, hi tirimi to hundza 700! Ku tlhela ku humesiwa a zvakuga zva moya hi ku tirisa tivhidhio kasi ku vhuna lava va kufa tindleve ni mabhuku hi ciBraile kasi ku vhuna lava va kufa matihlo. Ha wona a zviphrofeto zva Bhibhiliya na zvi tatiseka. A vanhu “va tirimi ti tsalangeneko ta matiko” va gondza a kuva ni ‘minomu yiswa leyi yi basileko’ ya lisine la Bhibhiliya. (Zak. 8:23; Zef. 3:9) Zvontlhe lezvo zvi rangelwa khwatsi hi Jesu Kristu.
8. Hi wahi a mabhindzu ya ntiro wa hina wa kuchumayela kala lezvi?
8 Inyamutlha, a vanhu va ku hundza 8 000 000 ka 240 wa matiko va ti tlhanganisa ni hlengeletano ya Jehovha niku lembe ni lembe ku bhabhatiswa vanhu vo tala nguvhu. Hambulezvo, a ca lisima nguvhu a ku hundza a ntsengo wa vanhu lavo matshamela ya moya, ku nga “munhu muswa”, lawa a vapizani lava va vaswa va ma hlakulelako. (Kol. 3:8-10) A votala va tsika a mahanyela yo biha, tihanyi, cihlawulela, ni ku ti khuza hi tiko gabye. A ciphrofeto ci nga ka Isaya 2:4 ca tatiseka; ‘a va ha gondzi kulwa’. Laha hi ti karatelako a ku ambala munhu muswa hi vhuna vanhu a ku nghena hlengeletanweni ya Nungungulu ni ku komba lezvaku hi landzela a murangeli wa hina Kristu Jesu. (Joh. 13:35; 1 Ped. 2:12) Lezvo a zvi maheki halahala. Jesu o hi nyika civhuno ci lavekako.
JESU A YIMISA NANDZA
9. Hi kuya hi Matewu 24:45-47 zvini Jesu a phrofetileko xungetano hi masiku yo gumesa?
9 Lera Matewu 24:45-47. Jesu i phrofetile lezvaku masikwini yo gumesa i wa ta yimisa “nandza go tsumbeka ni go tlhariha” kasi ku nyika zvakuga zva moya. Hikwalaho, hi wa ta rindzela lezvaku a nandza lego gi tira nguvhu masikwini ya hina. Hi zvalezvo futsi zvi mahekako. A murangeli wa hina i tirisa ntlawa wutsongwani wa vavanuna va totilweko kasi ku nyika vanhu va Nungungulu ni lava va tsakelako a zvakuga zva moya hi “cikhati ca kona”. A vavanuna lavo a va ti woni kota vafumeli va kukholwa ka van’wani. (2 Kor. 1:24) Wutshan’wini ga lezvo, va zvi tiva lezvaku Jesu Kristu hi yena “hosana ni murangeli” wa vanhu vakwe. — Isa. 55:4.
10. Ka mabhuku lawa ma kombisiwako laha ka mufota, hi gihi gi ku kucileko ku famba hi ndlela yi yako wutomi ga pindzukelwa?
10 Kusukela 1919, a nandza go tsumbeka gi humesa mabhuku yo hambanahambana kasi ku vhuna lava va ha sangulako ku tsakela lezvaku va ringa zvakuga zva moya zvo nona. Hi 1921, a nandza gi humesile a bhuku A Harpa de Deus kasi ku vhuna lava va nga tsakela lezvaku va gondza a tigondzo-tshinya ta Bhibhiliya. Hi kufamba ka cikhati, ku no humesiwa man’wani mabhuku. I bhuku muni gi ku vhunileko a ku tiva a Papayi wa hina wa le tilweni u tlhela u mu randza? Kuve “Seja Deus Verdadeiro”, A Verdade Que Conduz à Vida Eterna, Poderá Viver Para Sempre no Paraíso na Terra, Conhecimento Que Conduz à Vida Eterna, Zini Lezi A Biblia Gi Zi Gonzisako Hakunene?, Zini lezi a Biblia gi hi gonzisako? kutani kuve bhuku ga hina ga giswa Ti buze hi wutomi kala kupindzuka! A mabhuku wontlhe lawa ma humesilwe kasi ku tatisa a kungo go kongoma gi nga hi kona a cikhati leci a gin’we ni gin’wani gi nga humesiwa hi cona.
11. Hikuyini zvi nga zva lisima a ku hontlheni hi kuma zvakuga zva moya?
11 A hi lava va sangulako ku tsakela basi va lavako zvakuga zva moya zvi tiyileko. Hontlheni ha zvi lava. Mupostoli Pawule i tsalile lezvi: “A zvakuga zvi tiyileko zvi giwa hi vanhu va kulileko.” Pawule i engetele aku laha hi hanyako hi lezvi hi gondzako ka Bhibhiliya hi ta ‘zvi kota ku hambanisa a zvazvinene ni zvakubiha’. (Mah. 5:14) Zvikhatini lezvi zva zvikarato, laha contlhe cikhati a mahanyela ma bihileko nguvhu, zvi nga hi karatela nguvhu a ku namarela ka milayo ya Jehovha. Kanilezvi Jesu i maha zvontlhe zvi kotekako kasi hi ku ntamu wa ku maha lezvo hi ku veka phambeni ka hina a zvakuga zva moya zvi donisako ni mari. A cibuka ca zvakuga lezvo i Mhaka ya Nungungulu, a Bhibhiliya. A nandza go tsumbeka gi longisela gi tlhela gi humesa a zvakuga zva moya na gi wurangeli ga Jesu.
12. A ku fana na Jesu hi gi nyikisa kuyini wudzundzo a vito ga Nungungulu?
12 A ku fana na Jesu, hi nyika a vito ga Nungungulu a wudzundzo gi gi ringanako. (Joh. 17:6, 26) Hi cikombiso, hi 1931 hi ti chulile vito ga lomu ka Mitsalo ga ku Vakustumunyu va Jehovha hi ku maha lezvo hi komba lezvaku hi lava ku tiviwa hi vito ga Papayi wa hina wa le tilweni. (Isa. 43:10-12) Niku kusukela hi Outubro wa lembe lego, a vito ga Nungungulu ga kumeka laha ka kapa ya Murindzeli wun’we ni wun’wani. A kuhundza lezvo a Wuhundzuluseli ga misava yiswa ga Mitsalo yo Basa gi tlhelisela a vito ga Nungungulu wutshan’wini ga gona lomu ka Mhaka yakwe. Lezvo zvi hambana nguvhu ni wukhongeli ga mawunwa gi susako a vito ga Jehovha ka maBhibhiliya yo tala lawa gi hundzuluselako!
JESU A XAXAMETA VALANDZELI VAKWE
13. Cini ci ku kholwisako ku Jesu wa tirisa “nandza go tsumbeka ni go tlhariha” nyamutlha? (Joh. 6:68)
13 Hi ku tirisa “nandza go tsumbeka ni go tlhariha” Jesu i wumba hlengeletano yo hlamalisa laha misaveni kasi ku vhuvhumisa wukhozeli go basa. U ti zwisa kuyini hi hlengeletano leyi? Kuzvilava kasi ku hlamula u ehleketa hi magezu ya mupostoli Pedro a nga byela Jesu, aku: “Hi taya ka mani? Wena u na ni timhaka ta wutomi ga pindzukelwa.” (Joh. 6:68) Hi wa tava kwihi nyamutlha loku hi wa nga nghenangi hlengeletanweni ya Jehovha? Hi ku tirisa hlengeletano leyi, Jesu i maha zvontlhe zvi kotekako kasi hi gisiwa khwatsi hi tlhelo ga moya. Wa hi gondzisa kambe kasi hi wu maha khwatsi a ntiro wa hina wa kuchumayela. A cin’wani kambe, wa hi vhuna ku ambala “munhu muswa” kasi hi tsakisa Jehovha. — Efe. 4:24.
14. U vhunekisa kuyini hi kuva hlengeletanweni ya Jehovha ndzeni ka ntungu wa COVID-19?
14 Jesu i hi nyika wurangeli ga wutlhari zvikhatini zva zvikarato. A mabhindzu ya wurangeli lego ma wonekile khwatsi a cikhati leci a ntungu wa COVID-19 wu nga sangula. Laha a vanhu vo tala va nga kala va nga tivi ca ku maha, Jesu i mahile zvontlhe zvi nga koteka kasi hi kuma wurangeli go dlunyateka lezvaku hi simama hi vhikelekile. Hi kucilwe ku boha maskara loku hi suka laha kaya ni ku ti tsawukanisa ni van’wani. A madhota ma alakanyisilwe ku bhula ni vontlhe hi kukhandzakanya lomu bandla ni ku tiva zvilaveko zvabye zva nyama ni zva moya. (Isa. 32:1, 2) Hi kumile wurangeli go engeteleka hi tlhela hi tiyisiwa hi mibiko ya Hubye yi Fumako.
15. Wurangeli muni hi nyikilweko ndzeni ka ntungu xungetano hi ku maha mitlhangano ni ntiro wa kuchumayela niku mave wahi mabhindzu ya kona?
15 Ndzeni ka ntungu hi tlhelile hi kuma wurangeli go dlunyateka xungetano hi lezvi hi nga mahisako zvona mitlhangano ya bandla ni ntiro wa kuchumayela. Hi no tekela ku sangula ku maha mitlhangano ya bandla, mitlhangano ya cipandze ni migotsovanyano hi ku tirisa Internet. Hi tlhela hi sangula ku chumayela nguvhu hi telefone ni mapapilo. Jehovha i katekisile a kutikarata ka hina. A maravi yo tala ma bika ntsengo wo engeteleka wa vahuweleli. Hi lisine, a votala va kuma matshango yo tiyisa nguvhu ndzeni ka cikhati leci.— Wona a kwadru “ Jehovha wa katekisa a ntiro wa hina wa kuchumayela”.
16. Zvini hi tiyisekako ka zvona?
16 A vokari kuzvilava va ti zwisa ku khwatsi a hlengeletano yi nyika a zvileletelo zvo hundzeleta xungetano hi ntungu. Kanilezvi hi kuphindaphinda zvi wonekile lezvaku a zvileletelo lezvo zvi wa hi zva wutlhari. (Mat. 11:19) Niku a cikhati hi ehleketako hi ndlela ya lirandzo leyi Jesu a rangelako hi yona a vanhu vakwe hi tiyiseka lezvaku hambu loku mandziko wa siku ko humelela yini, Jehovha ni N’wana wakwe wo randzeka va tava na hina.— Lera Mahebheru 13:5, 6.
17. U ti zwisa kuyini hi ku tira na u rangelwa hi Jesu?
17 I thomo ga hombe a ku tira na hi rangelwa hi Jesu. Hi lumba a hlengeletano yi hlulako a mimbhingano yontlhe yi vangiwako hi midhawuko, matiko ni tirimi. Ha gisiwa khwatsi hi tlhelo ga moya hi tlhela hi longiselwa khwatsi kasi ku maha a ntiro wa kuchumayela. A mun’we ni mun’wani wa hina wa vhuniwa a ku ambala a munhu muswa hi tlhela hi gondza ku randza van’wani. Hi na ni zvigelo zvo tala zva ku tizwa matshandza hi ku rangelwa hi Jesu!
LISIMU 16 Dhumisani Jehovha hi kota ya N’wana wakwe
^ A timiliyoni ta vavanuna, vavasati ni vanana zvezvi ti chumayela a mahungu ya manene hi kuhiseka. Wenawu u cikari ka vanhu lavo ke? Loku zvi hi lezvo, u tira na u rangelwa hi hosi ya hina Jesu Kristu. Ka ndzima leyi hi ta wona cikombiso ci kombako ku Jesu wa rangela a ntiro wa kuchumayela nyamutlha. A ku ehleketa hi mahungu lawo, zvi ta hi vhuna a ku simama hi tirela Jehovha na hi rangelwa hi Kristu.
