1. Hi gi wonisa kuyini a thomo ga ku khongela ka Jehovha?

 HI NA ni thomo ga hombe ga ku tshinela ka Mumahi wa tilo ni misava hi mukhongelo. Hi nga ehleketa hi lezvi: Hi nga chulula a timbilu ta hina ka Jehovha ni ka cihi cikhati ni hi lihi lirimi hi li lavako na zvi nga lavangi ku hi sangula hi ku mu tivisa. Hi nga khongela kakwe na hi hi mubhedhini wa cipitali kutani lomu paxweni na hi tsumba lezvaku i ta hi ingisela. Ha ci bonga nguvhu a cinyikiwo leci.

2. Hosi Dhavhidha i kombisile kuyini ku i wa gi nyika lisima a thomo ga mukhongelo?

² Hosi Dhavhidha i wa gi nyika lisima a thomo ga ku khongela. I yimbelele ka Jehovha, aku: “A mukombelo [wa mina] a wute mahlweni ka wena khwatsi libani.” (Lis. 141:1, 2) Masikwini ya Dhavhidha, a libani li nga tirisiwa ka wukhozeli go basa hi vapristi li wa longiselwa khwatsi. (Ekso. 30:34, 35) A kuva Dhavhidha a kumbukile libani zvi komba ku i wa lava ku ehleketa khwatsi hi lezvi a nga wa ta byela a Papayi wakwe wa le tilweni. Hi zvalezvo hinawu hi zvi xuvako nguvhu. Hi lava ku a mikhongelo ya hina yi tsakisa Jehovha.

3. Zvini hi faneleko ku maha a cikhati hi tshinelako ka Jehovha hi mukhongelo niku hikuyini?

³ A cikhati leci hi khongelako ka Jehovha hi fanele ku kombisa cichavo ca hombe. Ehleketa hi miwoniso yo hlamalisa leyi yi wonilweko hi Isaya, Ezekiyeli, Dhaniyeli na Johani. A miwoniso leyo yi hambene kanilezvi ku ni cokari ci fanako laha ka yona. Yontlhe yi tlhamusela Jehovha kota Hosi ya Hombe. Isaya i wonile ‘Jehovha na tshamile citshan’wini ca hombe  ca wuhosi ci tlakukileko’. (Isa. 6:1-3) Ezekiyeli i wonile Jehovha na a tshamile ka kareta yakwe ya le tilweni na a randzelwe hi ‘kuvangamela . . . ko fanana ni ka wura ga nyazimu’. (Ezek. 1:26-28) Dhaniyeli i wonile “a Wakale ka Masiku” na a bohile tinguwo to basa, na ku huma malangavi ya ndzilo hi citshan’wini cakwe ca wuhosi. (Dan. 7:9, 10) Johani i wonile Jehovha na a tshamile citshan’wini ca wuhosi na a randzelwe hi nchumu wo khwatsi i wura ga nyazimu go saseka ga esmeraldha. (Kuv. 4:2-4) Laha hi ehleketako hi kungangamela ka hombe ka Jehovha, hi alakanya a thomo ga hombe hi nga nago ga ku tshinela kakwe hi mukhongelo ni lisima la ku maha lezvo hi cichavo ca hombe. Kanilezvi hi nga khongelisa kuyini?

4. Zvini hi gondzako ka magezu yo sangula ya mukhongelo wa cikombiso ma kumekako ka Matewu 6:9, 10?

⁴ Lera Matewu 6:9, 10. Ka Kanelo yakwe ya le Citsungeni, Jesu i gondzisile a vapizani vakwe lezvi va nga khongelisako zvona hi ndlela yi tsakisako Nungungulu. Andzhako ka ku wula ku, “khongelisani lezvi”, a kusangula i no wula a zvilo zva lisima zvi yelanako ni kungo ga Jehovha hi kukongoma: ku nga kubasisiwa ka vito gakwe, kuta ka Mufumo lowu wu to lovisa vontlhe lava va vhukelako Nungungulu ni zvilo zva zvinene lezvi a to mahela misava ni vanhu cikhatini ci tako. Hi ku patsa a zvilo lezvo ka mikhongelo ya hina hi komba lezvaku a kungo ga Nungungulu ga lisima ka hina.

5. Zvi nene a ku khongela xungetano hi zvilo zva hina wutsumbu?

⁵ Ka cipandze ci landzelako ca mukhongelo, Jesu i kombile ku zvi nene a ku khongela xungetano hi zvilo zva hina wutsumbu. Hi nga kombela Jehovha lezvaku a hi nyika zvakuga zvi ringanako a siku, a hi tsetselela minandzu ya hina, a hi vhikela ka zviringo a tlhela a hi tlhatlhisa ka loyi wa kubiha. (Mat. 6:11-13) Loku hi kombela a zvilo lezvi ka Jehovha, hi komba lezvaku hi lava ku a hi vhuna niku hi lava ku mu tsakisa.

6. A zvilo lezvi hi faneleko ku zvi khongelela zvi gumelwa basi ka lezvi zvi kumbukiwako ka mukhongelo wa cikombiso? Tlhamusela.

⁶ Jesu i wa nga lavi ku a valandzeli vakwe va kopiyara a magezu ya mukhongelo wa  cikombiso zvalezvi ma nga tshamisa zvona. Ka mikhongelo yin’wani leyi Jesu a nga maha i kumbukile a zvilo zvo hambana ku nga lezvi zvi nga mu karata ka cikhati leco. (Mat. 26:39, 42; Joh. 17:1-26) Hi kufanana, hinawu hi nga khongela xungetano hi ni wihi nchumu wu hi karatako. A cikhati hi lavako ku maha ciboho, hi nga khongela kasi hi kuma wutlhari ni kupimisisa. (Lis. 119:33, 34) Loku hi lava ku maha ciavelo co karata, hi nga khongela hi kombela ku vhuniwa ku zwisisa lezvi hi nga ci mahisako zvona. (Mav. 2:6) A vapswali va nga khongelela a vana vabye, a vana va khongelela a vapswali vabye niku hontlheni hi nga khongelela a zvigondzani zva hina zva Bhibhiliya ni lava hi va chumayelako niku hi fanele ku maha zvezvo futsi. Hambulezvo, a mikhongelo ya hina a yi faneli ku nyima laha ka ku kombela basi.

7. Hikuyini hi faneleko ku dhumisa Jehovha ka mikhongelo ya hina?

⁷ Hi fanele ku alakanya ku dhumisa Jehovha ka mikhongelo ya hina. A ku na munhu a ringanelwako hi kudhumiswa a ku hundza Nungungulu wa hina. Jehovha ‘mu nene, wa tsetselela’. Jehovha kambe wa ‘hawukela, i na ni tipswalo; wa timisela, i tele hi wuxinji ni kutsumbeka’. (Lis. 86:5, 15) Hi na ni cigelo co zwala ca ku dhumisa Jehovha hi kota ya matshamela yakwe ya manene ni zvilo lezvi a zvi mahako.

8. Zvilo muni hi nga mu bongako hi zvona Jehovha? (Lisimu 104:12-15, 24)

⁸ A cin’wani kambe hi nga mahako ka mikhongelo ya hina ku bonga Jehovha hi zvilo zva zvinene lezvi a hi nyikako. Hi cikombiso, hi nga mu bonga hi mivala yo saseka ya zvitsangi, zvakuga zvo tala lezvi hi ti buzako hi zvona ni litsako leli hi li kumako hi kuva ni vanghana vo randzeka. A Papayi wa hina wa lirandzo i hi nyika zvontlhe lezvi ni zvin’wani zvo tala na a mahela ku hi tsaka basi. (Lera Lisimu 104:12-15, 24.) A ca lisima ka zvontlhe, hi bonga Jehovha hi kota ya zvakuga zvo tala zva moya lezvi a hi nyikako ni kutsumba ko tsakisa loku hi nga nako xungetano hi wumandziko.

9. Cini ci nga hi vhunako a ku alakanya ku bonga Jehovha? (1 Va Le Tesalonika 5:17, 18)

⁹ Zvi nga olova a ku rivakelwa ku bonga Jehovha  hi zvilo zvontlhe lezvi a hi mahelako. Cini ci nga hi vhunako a ku alakanya? U nga maha a lista ya zvilo zvo kongoma lezvi u kombeleko Jehovha u tlhela uta na u yi hlola kasi ku wona lezvi a hlamulisileko zvona. Hi ku landzela maha mukhongelo u mu bonga hi kota ya lezvi a ku vhunileko. (Lera 1 Va Le Tesalonika 5:17, 18.) Ehleketa hi lezvi: Ha tsaka hi tlhela hi tizwa na hi randziwa loku a van’wani va hi bonga. Hi kufanana, a cikhati leci hi alakanyako a ku bonga Jehovha hi mihlamulo ya mikhongelo ya hina, zvi maha a mbilu yakwe yi tsaka. (Kol. 3:15) Hambulezvo, hi cihi cin’wani cigelo ca lisima ca ku bonga a Nungungulu wa hina?

10. Hi kuya hi 1 Pedro 2:21, hikuyini hi nga ni cigelo ca ku bonga Jehovha hi lezvi a nga rumela Jesu laha misaveni?

¹⁰ Lera 1 Pedro 2:21. Hi fanele ku bonga Jehovha hi lezvi a rumeleko a N’wana wakwe wo randzeka kasi ku ta hi gondzisa. Hi gondza zvotala xungetano hi Jehovha ni lezvi hi nga mu tsakisisako zvona hi ku gondza xungetano hi wutomi ga Jesu. Loku hi kombisa kukholwa ka muphahlo wa Kristu, hi ngava ni wunghana ga hombe na Jehovha Nungungulu hi tlhela hi ti buza hi kurula zvin’we Naye.— Rom. 5:1.

11. Hikuyini hi khongelako hi ku tirisa a vito ga Jesu?

¹¹ Ha bonga Jehovha hi lezvi hi nga khongelako kakwe hi ku tirisa a N’wana wakwe. Jehovha i tirisa Jesu kasi ku hi nyika lezvi hi mu kombelako. Jehovha wa ingisela ni ku hlamula a mikhongelo leyi yi mahiwako hi vito ga Jesu. Jesu i tlhamusele lezvi: “Ni cihi mu to ci kombela hi vito ga mina, ndzi ta ci maha, kasi Papayi a fela ku dhumiswa hi laha ka N’wana.” — Joh. 14:13, 14.

12. Hi cihi cin’wani cigelo ca ku bonga Jehovha hi kota ya N’wana wakwe?

¹² Jehovha i tsetselela a zviwonho zva hina hi ku tirisa a hakhelo ya kutlhatlhisa ya muphahlo wa Jesu. A Mitsalo yi tlhamusela Jesu kota “mupristi wa hombe, a tshamileko reveni ga cinene ga citshamu ca wuhosi ca Loyi a Tlakukileko ku Hundza Vontlhe le tilweni”. (Mah. 8:1) Jesu “muvhuni [wa hina] loyi a nga zvin’we na Papayi”. (1 Joh. 2:1) A ho ku mu bonga nguvhu Jehovha hi lezvi a hi nyikileko a Mupristi wa Hombe wo zwela wusiwana, loyi a zwisisako a gome ga hina a tlhela a “hi khongelela”! (Rom. 8:34; Mah. 4:15) Hi vanhu vo kala kumbhelela, hikwalaho hi wa nga ta zvi kota ku tshinela ka Jehovha loku hi wa nga hi na muphahlo wa Jesu. A zvi kanakanisi lezvaku wa vhumela ku a hi nge zvi koti ku tlhamusela lezvi hi mu bongisako zvona Jehovha hi kota ya cinyikiwo ca lisima leci a hi nyikileko, ku nga N’wana wakwe wo randzeka!

13. Ka wusiku ga mahlweni ka ku afa, Jesu i kombisile kuyini ku wa va randza vapizani vakwe?

¹³ Ka wusiku ga mahlweni ka ku afa, Jesu i khongelele vapizani vakwe a kombela a Papayi wakwe lezvaku a “va hlayisa hi kota ya loyi wa kubiha”. (Joh. 17:15) Lezvo zvi wa komba ku Jesu wa va randza a vapizani vakwe. Hambu lezvi a nga zvi tiva ku ndzeni ka cikhati citsongwani i wata xanisiwa nguvhu, i simamile a karatekela vapostoli vakwe.

14. Hi nga kombisa kuyini lezvaku ha va randza vamakabye va hina?

¹⁴ Hi ku pimanyisa Jesu, a hi veki kupima ka zvilaveko zva hina wutsumbu basi. Wutshan’wini ga lezvo, contlhe cikhati hi khongelela vamakabye va hina. A cikhati hi mahako lezvo, ho ingisa a nayo wa Jesu wa ku  randzanani hi tlhela hi komba Jehovha lezvi hi va randzisako zvona a vamakabye va hina. (Joh. 13:34) A ku khongelela a vamakabye va hina a hi ku xakela cikhati. A Mhaka ya Nungungulu yi hi byela lezvi: “A mukhongelo wa munhu wo lulama wa vhuna nguvhu.” — Jak. 5:16.

15. Hikuyini zvi lavako ku hi khongelela a vamakabye va hina?

¹⁵ Zvi lava ku hi khongelela a vamakabye va hina hi ku va kumana ni zvikarato zvo tala. Hi nga kombela Jehovha lezvaku a va vhuna ku timisela mababyi, timhango ta ntumbuluko, tiyimpi, kuxanisiwa ni zvin’wani zvikarato. Hi nga tlhela hi khongelela a vamakabye va hina lava va ti nyikelako hi kuzvirandza kasi ku vhunetela lava va nga zvikaratweni. Kuzvilava wa tiva vokari va kumanako ni zvikarato lezvo. Hikuyini u nga va khongeleliko hi mavito ka mikhongelo ya wena? Hi kombisa lirandzo la lisine la wumakabye hi ku kombela Jehovha lezvaku a va vhuna ku timisela.

16. Hikuyini hi faneleko ku khongelela lava va rangelako?

¹⁶ Lava va rangelako lomu bandleni va yi bonga nguvhu a mikhongelo ya van’wani niku va vhuneka hi yona. Mupostoli Pawule yenawu i wa zvi lava nguvhu a ku khongelelwa hi van’wani. I tsalile lezvi: “Minawu ndzi khongeleleni lezvaku ndzi nyikiwa magezu yo wula a cikhati leci ndzi to vhulula nomu ndzi kanela hi cihundla co basa ca mahungu ya ma nene hi kutiya”. (Efe. 6:19) Nyamutlha konawu, hi na ni vamakabye vo tala vo ti tsitsirita lava va rangelako cikari ka hina. Hi komba ku ha va randza hi ku kombela Jehovha lezvaku a katekisa a ntiro wabye.

17-18. Hi ka zviyimo muni hi nga kombeliwako ku maha mukhongelo, niku zvini hi nga faneliko ku zvi rivala?

¹⁷ Ka zvikhati zvin’wani ha tshuka hi kombeliwa ku maha mukhongelo mahlweni ka van’wani. Hi cikombiso, a makabye wo kari a fambisako a cigondzo ca Bhibhiliya a nga kombela a makabye loyi va fambisako zvin’we kasi a maha mukhongelo. Kuzvilava a makabye loye a kombeliwako a nga ci tivi khwatsi a cigondzani leco, hikwalaho a nga hlawula ku maha mukhongelo wo gumesa. Hi ndlela leyo, zvi ta mu olovela ku zwananisa mukhongelo wakwe ni zvilaveko zva cigondzani leco.

¹⁸ A makabye wo kari a nga kombeliwa ku  maha mukhongelo ka mutlhangano wa ntiro wa kuchumayela kutani ka mutlhangano wa bandla. A vamakabye lavo va nga ni thomo lego a va faneli ku rivakelwa a kungo ga mutlhangano. A mukhongelo a wu faneli ku tirisiwa kasi ku nyika wusungukati a bandla kutani ku maha zvitiviso. Ka mitlhangano yo tala ya bandla, kova ni 5 minuto basi kasi ku yimbelela ni ku maha mukhongelo, hikwalaho a makabye loyi a mahako mukhongelo a nga faneli “ku wulawula nguvhu”, nguvhunguvhu kusanguleni ka mutlhangano. — Mat. 6:7.

19. Cini ci to hi vhuna ku hi ti longisela a siku ga kulamula ka Jehovha?

¹⁹ Zvi lava ku a mukhongelo wuva wa lisima nguvhu wutomini ga hina laha a siku ga kulamula ka Jehovha gi yako gi tshinela. Xungetano hi mhaka leyo, Jesu i te: “Tshamani na mu khindlimukile, mu khongela contlhe cikhati kasi mu pona ka zvontlhe lezvi zvi to maheka”. (Luka 21:36) Kunene, a ku khongela contlhe cikhati zvi ta hi vhuna ku tshama na hi khindlimukile hi tlhelo ga moya kasi a siku ga Nungungulu gi nga hi kumi na hi nga longangi.

20. A mikhongelo ya hina yi nga fanisa kuyini ni masema yo nuhela ya libani?

²⁰ Zvini hi bhulileko hi zvona? Hi gi nyika nguvhu lisima a thomo legi hi nga nago ga mukhongelo. A kungo-tshinya ga mikhongelo ya hina gi fanele kuva ka zvilo zvi yelanako hi kukongoma ni kungo ga Jehovha. Hi kombisa ku bonga kambe hi N’wana wa Nungungulu ni Mufumo wakwe hi tlhela hi khongelela vamakabye va hina. Niku hi nga khongelela a zvilaveko zva hina zva nyama ni zva moya. A cikhati hi ehleketako khwatsi hi lezvi hi lavako ku wula ka mikhongelo ya hina, hi komba lezvaku ha gi nyika lisima a thomo lego go hlawuleka. A magezu ya hina ma ta fana ni masema yo nuhela ya libani ka Jehovha — ‘ma mu tsakisako’. — Mav. 15:8.