Jesu i chumayele a mahungu ya kurula. Kanilezvi ka khati go kari i byelile a vapostoli vakwe, aku: “Mu nga alakanyi ku ndzi tele ku ta neha kurula misaveni; a ndzi telangi ku ta neha kurula, kanilezvi a cipadha. Hakuva ndzi tele ku ta hambanisa a mufana ni papayi wakwe, a nhanyana ni mamani wakwe, a katamwane ni n’wingi wakwe.” (Mat. 10:34, 35) Jesu i wa lava ku wula yini?

Jesu i wa nga lavi ku hambanisa a zviro zva ngango, kanilezvi i wa zvi tiva lezvaku lezvi a nga kari a gondzisa zvi wa ta vanga kuhambana ka mingango yo kari. Hikwalaho, lava va xuvako kuva vapizani va Kristu ni ku bhabhatiswa va fanele ku tiva lezvi zvi to va humelela hi kota ya ciboho cabye. Loku va vhukelwa hi nuna kutani sati a nga kholwiko kutani van’wani laha ngangweni, zvi nga tshuka zvi va karatela a ku va simama va tsumbeka ka tigondzo ta Kristu.

A Bhibhiliya gi kuca a maKristu a ku hanya “hi kurula ni vanhu vontlhe”. (Rom. 12:18) Kanilezvi a tigondzo ta Jesu ti nga ku khwatsi “cipadha” ka mingango yo kari. Lezvo zvi humelela loku a mun’we laha ngangweni a vhumela a tigondzo ta Jesu kanilezvi lava van’wani va ala hambu ku vhukela a tigondzo leto. Ka zviyimo lezvo, a maxaka, ku nga va laha ngangweni, va maha “valala” va loyi a gondzako a lisine. — Mat. 10:36.

A vapizani va Kristu lava va hanyako ka mingango yi hambanileko hi wukhongeli, ka zvikhati zvo kari zvi lava ku va hlawula ku va ta tsakisa Jehovha na Jesu kutani va ta tsakisa maxaka yabye. Hi cikombiso, a maxaka ma nga kholwiko ma nga va kurumeta a ku patseka ka feriyadho ya wukhongeli. Loku va ringiwa, himani va to hlawula ku mu tsakisa? Jesu i te: “Ni wihi a randzako nguvhu a papayi wakwe kutani mamani wakwe ku hundza mina a nga ndzi faneli.” (Mat. 10:37) Kunene, Jesu i wa nga wuli lezvaku kasi a munhu a ringanelwa hi kuva mupizani wakwe i fanele ku va randza kutsongwani a vapswali vakwe. Kanilezvi i wo va gondzisa a ku tiva lezvi zvi nga zva lisima nguvhu wutomini gabye. Loku a zviro zva ngango zvi nga kholwiko zvilwa ni mizamo ya hina ya ku khozela Jehovha a hi tsiki ku zvi randza kanilezvi ha zvi tiva lezvaku a ku randza Nungungulu hi zvona zvo ranga.

Handle ko kanakana, a ku vhukelwa hi va laha ngangweni wa wena zvi nga tshuka zvi bayisa nguvhu. Hambulezvo, a vapizani va Jesu a va rivali a magezu yakwe, yaku: “Ni loyi a nga rwaliko a mhandze yakwe ya hlomulo a ndzi landzela a nga ndzi faneli.” (Mat. 10:38) Hi magezu man’wani, a maKristu ma wona a kuvhukelwa hi va laha ngangweni kota cipandze ca tixanisa leti a vapizani va Kristu va ti yimiseleko ku ti timisela. Kanilezvi va tsumba kambe lezvaku a mahanyela yabye ya manene ma ta kuca a zviro zva ngango wabye zvi nga kholwiko lezvaku zvi ku retsevele, zvi gondza a mahungu ya Bhibhiliya. — 1 Ped. 3:1, 2.