1. Zvini u nga zvi tiva a cikhati u nga sangula ku gondza a Bhibhiliya?

 WA HA zvi alakanya zvontlhe u nga gondza a cikhati u nga sangula ku gondza a Bhibhiliya? Zvi nga maha na u hlamalile hi ku tiva ku Nungungulu i na ni vito. Kuzvilava zvi ku tlhatlhile a ku tiva ku Nungungulu a nga hisi vanhu tilweni. Niku zvi ku tsakisile a ku tiva ku u nga zvi kota a ku tlhela u wona a varandzekako va wena va fileko, u tlhela u hanya navo kambe kwalaha misaveni ya paradhesi.

2. Ahandle ka lisine leli u nga gondza, kukula muni kun’wani ka moya u ku mahileko? (Va Le Efesusi 5:1, 2)

² Laha u nga ya u engetela ku gondza a Mhaka ya Nungungulu, a lirandzo la wena hi Jehovha li no engetela ku kula. A lirandzo lelo li ku kucile a ku hanya hi lezvi u nga kari u gondza. U no maha a zviboho zva zvinene zvi seketelwako ka matshinya ya milayo ya Bhibhiliya. U chukwatisile a matshamela ya wena ni mahanyela ya wena hi ku lava ku tsakisa Jehovha. A kufana ni lezvi a n’wanana a pimanyisako a vapswali vakwe va lirandzo, wenawu u no pimanyisa a Papayi wa wena wa le tilweni. — Lera Va Le Efesusi 5:1, 2.

3. Zviwutiso muni hi nga ti wutisako?

³ Hi nga ti wutisa lezvi: “Ndza mu randza nguvhu Jehovha zvezvi a ku hundza a cikhati leci ndzi nga maha muKristu? Kusukela loku ndzi bhabhatisilwe, ndza mu pimanyisa nguvhu Jehovha, nguvhunguvhu mhakeni ya ku randza a vamakabye va mina ke? Loku u pola ku “a lirandzo leli u nga hi nalo kusanguleni” li titimele, u nga mbheli ntamu. Ku na ni cikhati co kari lezvo zvi nga maheka ka maKristu yo sangula. Jesu a nga ma tsukulangi niku hinawu a nga ta tshuka a hi tsukula. (Kuvhululelwa 2:4, 7) Yena wa zvi tiva ku hi nga tlhela hi li kuma a lirandzo leli hi nga hi nalo a cikhati leci hi nga gondza lisine hi khati go sangula.

4. Hi ta wulawula hi yini ka ndzima leyi?

⁴ Ka ndzima leyi, hi ta wulawula hi lezvi hi nga mahako kasi hi  engetela lezvi hi mu randzisako zvona Jehovha ni van’wani. Andzhako ka lezvo, hi ta wona a makatekwa lawa hi to ma kuma loku hi mu randza nguvhu Jehovha ni vamakabye va hina.

5-6. a) Zvikarato muni lezvi Pawule a kumeneko nazvo na a tirela Jehovha? b) Cini ci vhunileko Pawule a ku simama a tirela Jehovha?

⁵ Mupostoli Pawule i wa tsaka hi ku tirela Jehovha, kanilezvi i wa kumana ni zvikarato zvo tala. Pawule i wa endza a mipfhuka ya hombe niku masikwini yakwe zvi wa nga olovi a ku endza. Ka tiendzo takwe, Pawule i wa tshuka ava ka “timhango micongweni” ni “timhangweni ta ku phangiwa”. Ku ni zvikhati lezvi kambe a valala vakwe va nga muba. (2 Kor. 11:23-27) Niku a hi contlhe cikhati leci a vamakabye va nga kombisa ku bonga hi lezvi Pawule a nga maha kasi ku va vhuna. — 2 Kor. 10:10; Filp. 4:15

⁶ Cini ci vhunileko Pawule a ku simama a tirela Jehovha? Pawule i gondzile zvotala hi matshamela ya Jehovha lomu ka Mitsalo ni ka wutomi ga yena wutsumbu. Pawule i no kholwa ku Jehovha Nungungulu wa mu randza. (Rom. 8:38, 39; Efe. 2:4, 5) Niku yenawu i no mu randza nguvhu Jehovha. Pawule i kombile ku wa mu randza Jehovha hi ku ‘tirela vobasa, ni ku simama ku va tirela’. — Mah. 6:10.

7. Hi yihi a yin’we ya tindlela hi nga yi tirisako kasi ku engetela lezvi hi mu randzisako zvona Jehovha?

⁷ Hi nga engetela a lirandzo la hina hi Nungungulu hi ku gondza a Mhaka yakwe hi kuhiseka. Laha u lerako Bhibhiliya, zama ku pola lezvi a cipandze cin’we ni cin’wani ci ku byelako xungetano hi Jehovha. Ti wutise lezvi: ‘A matimu lawa ma zvi kombisa kuyini ku Jehovha wa ndzi randza? Zvigelo muni lezvi a matimu lawa ma ndzi kombako zva ku minawu ndzi mu randza Jehovha?’

8. A mukhongelo wu hi vhunisa kuyini a ku engetela lezvi hi mu randzisako zvona Jehovha?

⁸ A yin’wani ndlela ya ku hi engetela a lirandzo la hina hi Jehovha ku mu vhululela a mbilu ya hina hi mukhongelo siku ni siku. (Lis. 25:4, 5) Karla, a makabye wo kari wa cisati wa le Azia, i wula lezvi: “Kusanguleni, ndzi wa randza Jehovha hi kota ya lezvi ndzi nga zvi gondzile xungetano hi yena. Kanilezvi, a cikhati ndzi nga wona ku wa hlamula a mikhongelo ya mina, ndzi no engetela ku mu randza. Lezvo zvi mahile ku ndzi zvi lava nguvhu a ku maha zvilo zvi mu tsakisako.” b

9. Timote i zvi kombisile kuyini ku i wa engetele lezvi a nga va randzisa zvona a vamakabye vakwe?

⁹ Andzhako ka malembe yo kari Pawule na a hundzulukile ava muKristu, i no tivana ni muswa wo kari wa ku hi Timote. Timote i wa randza Jehovha a tlhela a randza vanhu. Pawule i no byela va le Filipi, aku: “A ndzi na mun’wani a nga ni mbilu yo fana ni leyi [ya Timote], loyi a to mu khatalela hi mbilu yontlhe.” (Filp. 2:20) Hi magezu lawo, Pawule i wa nga wuli a wutlhari legi Timote a nga hi nago ga ku xaxameta zvilo ni ku veka khwatsi tikanelo, kanilezvi Pawule i wa hlamaliswa nguvhu hi ku wona lezvi Timote a nga va randzisa zvona vamakabye. A hi kanakani ku a mabandla lawa Timote a nga tira ka wona ma wa zvi rindzela hi mahlo yo pswhuka a ku endzelwa hi yena. — 1 Kor. 4:17.

10. Anna ni nuna wakwe va li kombisile kuyini a lirandzo leli va nga hi nalo hi vamakabye?

¹⁰ Hinawu hi zama ku lavetela tindlela ta ku vhuna a vamakabye va hina va maKristu. (Mah. 13:16) Wona a matimu ya Anna, a kumbukilweko ka ndzima yi hundzileko. Andzhako ka cingulo ca hombe, yena ni nuna wakwe  va no endzela a ngango wa Vakustumunyu va Jehovha va ya pola ku a cingulo ci papulile a yindlu yabye. Hi kota ya lezvo, a ngango lowo wu wa nga hi na tinguwo to basa. Anna i wula lezvi: “Hi no teka a tinguwo tabye hi ya hlazva hi gumesa hi ti tlhelisa na ti pasarilwe ti tlhela ti petseletelwa. Hi wa ti zwisa ku khwatsi lezvi hi nga maha a zvi tati kombe, kanilezvi zvi hi mahile hi chata wunghana legi gi nga ya gi kula kala nyamutlha.” A lirandzo la Anna ni nuna wakwe hi vamakabye li va kucile ku va va vhuna. — 1 Johani 3:17, 18.

11. a) A van’wani va tala ku ti zwisa kuyini loku hi va mahela zvilo zvi kombako ku ha va randza? b) Hi kuya hi Mavingu 19:17, Jehovha i ti zwisa kuyini loku hi va kombisa lirandzo van’wani?

¹¹ Loku hi kombisa a wunene ni lirandzo ka van’wani, va nga zvi wona ku hi zama ku pimanyisa Jehovha, niku va nga kuceka a ku bonga a wunene ga hina hi ndlela ya ku hi wa nga se tshuka hi yi alakanya. Karla, a kumbukilweko le hehla, wa va alakanya hi lirandzo lava va mu vhunileko. I wula lezvi: “A ndzo ku va bonga vontlhe vamakabye vo randzeka va cisati lava va ngata va ta ndzi teka ndzi ya ntirweni. Va wata va ta ndzi teka laha kaya, va ndzi ramba ku hi yaga zvokari, va gumesa va ndzi wuyisa laha kaya. Ndzi zvi pola zvezvi ku va wa ti karata nguvhu kasi ku maha lezvo. Niku va wa zvi maha hi kota ya lirandzo.” Kunene, a hi vontlhe va to hi bonga hi kota ya lezvi hi va mahelako. Karla i wula lezvi xungetano hi lava va mu vhunileko: “Ndzi zvi xuva nguvhu a ku va tlhelisela hi kota ya wunene gontlhe legi va ndzi maheleko, kanilezvi a ndzi ku tivi lomu va tshamako kona zvezvi. Hambulezvo, Jehovha wa ku tiva. Ndzi khongelela lezvaku yena va tlhelisela hi khati ga mina.” Karla i wula zvona. Jehovha wa zvi wona zvilo zvontlhe zva zvinene hi mahelako van’wani hambu loku zvi hi zvitsongwani. I zvi wona kota miphahlo ya lisima ni mangava lawa yena a to hakhela. — Lera Mavingu 19:17.

12. A vamakabye va cinuna va nga kombisisa kuyini a lirandzo labye hi bandla? (Wona ni mifota.)

 ¹² Loku u hi makabye wa cinuna, u nga li kombisisa kuyini a lirandzo ka vamakabye ni ku va vhuna? A makabye wo kari wa muswa wa ku hi Jordan i no wutisa a dhota go kari ku zvini zva ku a nga maha kasi a engetela ku vhuna bandla. A dhota lego gi no mu dzundza hi kota ya ku kula loku a nga sina a ku mahile gi gumesa gi mu nyika a wusungukati ga lezvi a nga engetelako. Hi cikombiso, i no mu nyika wusungukati Jordan ga ku a hatlisa ku chikela Salawini ya Mufumo a losa van’wani, a hlamula mitlhanganweni, a chumayela hi kukhandzakanya ni ntlawa wakwe wa simu ni ku ehleketa hi zvin’wani zva ku a nga maha kasi ku vhuna van’wani. A cikhati leci a nga tirisa a wusungukati lego, i no gondza a ndlela ya ku maha zvilo zvo kari a tlhela a gondza ku randza nguvhu vamakabye. Jordan i no tiva ku a hi ku khwatsi a makabye i sangula ku vhuna van’wani a cikhati a mahako a nandza go vhunetela, kanilezvi ka cikhati leci a mahako nandza o simama ku va vhuna. — 1 Tim. 3:8-10, 13.

13. A lirandzo li mu kucisile kuyini a makabye wa ku hi Christian a ku tlhela ava dhota?

¹³ Ahati loku u tshukile u tira kota nandza go vhunetela kutani dhota? Jehovha wa wu alakanya a ntiro lowu u wu mahileko cikhatini ci nga hundza ni lirandzo leli li ku kucileko ku wu maha. (1 Kor. 15:58) Wa ha li wona kambe a lirandzo leli u simamako ku li kombisa. A makabye wo kari wa ku hi Christian i khunguvanyekile a cikhati leci a nga tekelwa wudhota. Kanilezvi i wula lezvi: “Ndzi no boha ku maha zvontlhe zvi nga hi ntan’wini wa mina kasi ku tirela Jehovha hi lirandzo, kani ndzi na ni malungelo kutani a ndzi nawo.” Hi kufamba ka cikhati, i no yimisiwa kambe kota dhota. Christian i ti wulela lisine, aku: “Ndzi wa chava a ku tlhela ndziva dhota. Kanilezvi ndzi no boha ku loku Jehovha a lava lezvaku ndzi tlhela  ndziva dhota, ndzi ta maha a ntiro lowo hi lezvi ndzi mu randzako ni lezvi ndzi randzako a vamakabye va mina.”

14. Zvini u gondzileko ka lezvi zvi wulilweko hi makabye wa le Geórgia?

¹⁴ A malandza ya Jehovha ma randza kambe hambu ni vaakelani vabye. (Mat. 22:37-39) Hi cikombiso, Elena, a makabye wa le Geórgia, i wula lezvi: “Kusanguleni, leci ci nga ndzi kuca a ku chumayela ku wa hi lirandzo la mina hi Jehovha. Kanilezvi, a cikhati leci a lirandzo la mina hi Papayi wa mina wa le tilweni li nga ya li kula, a lirandzo la mina hi vanhu lonawu li no kula. Ndzi no zama ku alakanyela a zvikarato va kumanako nazvo ni timhaka leti ti nga wa ta khumba a timbilu tabye. Laha ndzi nga ya ndzi ti toloveta nguvhu ku maha lezvo, ndzi no ya ndzi zvi lava nguvhu ku va vhuna. — Rom. 10:13-15.

15-16. Kota lezvi zvi kombisiwako laha ka mifota, makatekwa muni hi ma kumako loku hi kombisa lirandzo ka van’wani?

¹⁵ A cikhati leci hi va kombisako a lirandzo a vamakabye va hina, a hi vona voce va vhunekako. Andzhako ka loku a ntungu wa COVID-19 wu sangulile, a makabye wo kari wa ku hi Paolo ni sati wakwe va vhunile a vamakabye vo tala va cisati va khosaheleko a ku tirisa a michini yabye kasi va zvi kota ku chumayela. A makabye mun’we loyi kusanguleni a nga alakanya ku zva karata ku tirisa michini, hi kugumesa i no zvi pasa. I no zvi kota ku tirisa muchini wakwe kasi ku ramba a maxaka yakwe Cialakanyisweni. A 60 wa wona ma no wona a Cialakanyiso hi ku tirisa a videoconferência! A makabye loyi wa  cisati ni maxaka yakwe va vhunekile hi kutikarata ka Paolo ni sati wakwe. Hi ndzhako ka cikhati, a makabye loye i tsalele Paolo, aku: “Hi bongile hi ku hi gondzisa hina zvikhosana. Ndzi nga ta tshuka ndzi rivala lezvi Jehovha a hi khatalelisako zvona ni lezvi u nga kululisa zvona u n’watseka kasi ku hi vhuna.”

¹⁶ A matshango yo kota legi ma mu gondzisile a zvilo zva lisima Paolo. I no alakanyiswa ku a ku kombisa lirandzo zva lisima nguvhu a ku hundza wutivi ni wutlhari ga mabeleko. I wula lezvi: “Ndzi wa hi muwoneleli wa cipandze. Nyamutlha, ndzi pola ku hambu lezvi ka ku zvi nga maha a vamakabye na va rivakelwe a tikanelo ta mina, ndza zvi tiva ku va ha simama ku alakanya a zvilo lezvi ndzi va maheleko.”

17. Hi vamani van’wani va to vhuneka loku hi kombisa lirandzo?

¹⁷ Loku hi kombisa a lirandzo ka van’wani, hinawu ha vhuneka hi tindlela to kala hi nga ti rindzelangi. Jonathan, loyi a tshamako Nova Zelândia wa tiyisa mhaka leyo. Ka gambo go kari ga Mulongiso, ku nga kari ku hisa, i no wona a makabye wo kari va cinuna wa phayona na a chumayela yece. Jonathan i no boha ku chumayela ni phayona lego ni gambo ka milongiso yi nga landzela. A nga tekelangi ku zvi pola ku yena n’winyi i wa ta vhunekisa kuyini hi ku kombisa a wunene lego. Jonathan i wula lezvi: “Ka cikhati leco, ndzi wa nga zvi randzi a ku chumayela. Kanilezvi, laha ndzi nga ya ndzi ingisela a phayona lego na gi gondzisa ndzi tlhela ndzi wona lezvi a ntiro wakwe wu nga pswalisa zvona mihandzu, ndzi no sangula ku zvi randza ku chumayela. A makabye loye i no maha munghana wa mina wa susa ndzi kandzihela niku i no ndzi vhuna ku ndzi zvi randza nguvhu ku chumayela ni ku engetela a wunghana ga mina na Jehovha.”

18. Jehovha i lava ku hi maha yini?

¹⁸ Jehovha i lava ku hontlheni hi engetela ku mu randza ni ku randza van’wani. Kota lezvi hi gondzileko, hi nga engetela ku randza Jehovha hi ku gondza a Mhaka yakwe, hi ehleketa hi yona hi tlhela hi bhula naye hi mukhongelo hi kukhandzakanya. Hi nga engetela ku randza vamakabye va hina, hi ku va vhuna lomu zvi lavekako. Laha a lirandzo la hina li yako li kula, hi ta tshinela nguvhu ka Jehovha ni ka vamakabye va hina. Hi ta ti buza hi wunghana lego kala kupindzuka!