NDZIMA YA CIGONDZO N.° 23
LISIMU 28 Maha munghana wa Jehovha
Jehovha wa hi ramba lezvaku hiva vapfhumba tendeni gakwe
‘Ni wuakelo [tenda] ga mina gi tava cikari kabye; ndzi tava Nungungulu wabye’. — EZEK. 37:27.
LEZVI HI TO GONDZA
A ndzima leyi yi ta hi vhuna ku engetela ku bonga kovhinte ya Jehovha ya lezvaku hiva vapfhumba tendeni gakwe go fananisa ni ndlela leyi a hi khatalelako hi yona kota Muamukeli wa hina.
1-2. I thomo muni legi Jehovha a nyikako a vakhozeli vakwe vo tsumbeka?
LOKU va wo ku wutisa ku: “Jehovha cini ka wena?”, u wa ta hlamulisa kuyini? Kuzvilava u nga hlamula ku: “Jehovha i Papayi wa mina, Nungungulu wa mina niku Munghana wa mina.” Ku na ni zvin’wani zvotala u nga wulako xungetano hi Jehovha. Kanilezvi, a ku wa mu wona kambe kota loyi a ku amukeleko tendeni gakwe?
2 Hosi Dhavhidha i fananisile a wunghana legi Jehovha a nga nago ni vakhozeli Vakwe vo tsumbeka ni kuzwanana ku nga kona cikari ka n’winyi wa muti ni vapfhumba vakwe. I wutisile, aku: ‘Jehovha, himani a ta nga luvela tendeni ga wena? Himani a ta nga aka le citsungeni ca wena ci basileko ke?’ (Lis. 15:1) Ka magezu lawa ma pimiselweko, hi gondza lezvaku hi ngava vapfhumba va Jehovha, a vanghana vakwe. Hi nga wona a thomo lego ga hombe!
JEHOVHA I LAVA LEZVAKU HIVA VAPFHUMBA VAKWE
3. Himani a mupfhumba wo sangula wa Jehovha, niku Jehovha ni mupfhumba wakwe va wa ti zwisa kuyini hi mun’we ni mun’wani?
3 Na a nga se vanga nchumu, Jehovha i wa tshama yece. Kanilezvi ka cikhati co kari, i no amukela a N’wana wakwe wa matewula tendeni gakwe go fananisa. Jehovha i tsakile nguvhu hi lezvo. A Bhibhiliya gi wula lezvaku Jehovha i wa ‘tsaka’ hi N’wana wakwe. A mupfhumba wakwe wo sangula yenawu i wa ‘tsaka contlhe cikhati mahlweni’ ka Jehovha. — Mav. 8:30.
4. Hi ndzhako ka cikhati, hi vamani van’wani lava Jehovha a va rambileko lezvaku vava vapfhumba vakwe?
4 Hi kulandzela, Jehovha i no vanga zvin’wani zvivangwa zva moya, a zvi ramba ku zvonawu zviva vapfhumba vakwe. A tingilozi takwe ti vitaniwa ku i “vana va Nungungulu” niku ku wuliwa lezvaku ta tsaka hi kuva na Jehovha. (Joba 38:7; Dan. 7:10) Hi malembe yo tala, a vanghana va Jehovha ku wa hi lava a nga tshama navo le tilweni basi. Hi ndzhako ka cikhati, i no vanga vanhu vonawu vava vapfhumba vakwe. A vokari va vapfhumba lavo vo randzeka nguvhu ku wa hi Enoki, na Nowa, na Abrahama, na Joba. A vakhozeli lavo va lisine va wa wuliwa ku vanghana va Nungungulu, kutani ku va wa “famba zvin’we na Nungungulu”. — Gen. 5:24; 6:9; Joba 29:4; Isa. 41:8.
5. Zvini hi gondzako ka ciphrofeto ci kumekako ka Ezekieli 37:26, 27?
5 Hi kufamba ka malembe, Jehovha i simamile ku ramba vanghana vakwe lezvaku vava vapfhumba vakwe. (Lera Ezekieli 37:26, 27.) Hi cikombiso, ka ciphrofeto ca Ezekiyeli hi gondza lezvaku a Nungungulu wa lisine i lava lezvaku a vakhozeli vakwe vo tsumbeka vava ni wunghana ga hombe nguvhu naye. I tsumbisa ku ‘maha navo a civumelwano ca kurula’. A ciphrofeto leci ci wulawula hi cikhati leci lava va nga ni kutsumba ka kuya tilweni ni lava va nga ni kutsumba ka ku hanya laha misaveni va to tlhanganisiwa tendeni gakwe go fananisa kota “ntlhambi wun’we”. (Joh. 10:16) A cikhati leco hi caleci!
JEHOVHA WA HI KHATALELA NI KWIHI LAHA HI NGA KONA
6. Zvi mahisa kuyini ku a wokari ava mupfhumba tendeni ga Jehovha, niku a tenda ga Jehovha gi kumeka kwihi?
6 Zvikhatini zva kutsaliwa ka Bhibhiliya, a tenda ga munhu ku wa hi wutshamu ga ku a humula kona a tlhela vhikeleka ka zvilo zva ntumbuluko. A vapfhumba va wa hi ni zvigelo zva ku kholwa lezvaku va wa ta hlayiseka khwatsi loku va amukelwa ka tenda go kari. A cikhati leci hi nyikelako wutomi ga hina ka Jehovha, hi sangula kuva vapfhumba tendeni gakwe go fananisa. (Lis. 61:4) Hi na ni zvakuga zvo tala zva moya ni vanghana lava vonawu va nga vapfhumba va Jehovha. A tenda ga Jehovha go fananisa a gi ka wutshamu go kari go kongoma. Kuzvilava u tshukile uya ka tiko gin’wani u ya wona gotsovanyano wo hlawuleka niku u tivene ni van’wani va tsakako hi kuva tendeni ga Nungungulu. Lezvo zva maheka ka matshamu wontlhe lomu a vakhozeli vakwe vo ingisa va kumekako kona. — Kuv. 21:3.
7. Hikuyini hi nga wulako lezvaku a malandza ya Jehovha yo tsumbeka lawa ma fileko ma ha hi vapfhumba tendeni ga Jehovha? (Wona ni mufota.)
7 Ahanti ke a malandza ya Jehovha yo tsumbeka lawa ma fileko? Xana hi nga wula lezvaku ma ha hi vapfhumba tendeni ga Jehovha? Ina! Hikuyini hi wulako lezvo? Hi ku a vanhu lavo va hanya maalakanyweni ya Jehovha. Jesu i tlhamusele lezvi: “Xungetano hi kuvhuka ka vafileko, hambu Mosi i zvi kombisile ka matimu ma wulawulako hi khuhu ga mimizwa, laha a ngaku Jehovha ‘i Nungungulu wa Abrahama, ni Nungungulu wa Isaka, ni Nungungulu wa Jakobe’. A hi Nungungulu wa vafileko, kanilezvi wa vahanyako, hakuva ka yena vontlhe va hanya.” — Luka 20:37, 38.
Hambu malandza yo tsumbeka lawa ma fileko ma nga simama ku woniwa kota vapfhumba tendeni ga Nungungulu (Wona paragrafo 7)
LEZVI HI VHUNEKISAKO ZVONA NI WUTIHLAMULELI HI NGA NAGO
8. A vapfhumba va Jehovha va vhunekisa kuyini hi kuva tendeni gakwe?
8 A ku khwatsi hi lezvi a tenda ga lisine gi nga wutshamu ga ku a munhu a humula a tlhela a vhikeleka, a tenda ga Jehovha gi vhikela vapfhumba vakwe a ku va nga kumani ni timhango hi tlhelo ga moya gi tlhela gi va nyika kutsumba ka lisine ka cikhati ci tako. Loku hi tshama kusuhani na Jehovha, Sathani a nge hi vangeli a mhango ya pindzukelwa. (Lis. 31:23; 1 Joh. 3:8) Misaveni yiswa, Jehovha i ta simama ku vhikela a vanghana vakwe vo tsumbeka, na ku nga hi hi tlhelo ga moya basi, kanilezvi i ta tlhela a va vhikela lezvaku va ngafi. — Kuv. 21:4.
9. Zvini lezvi Jehovha a zvi rindzelako ka vapfhumba vakwe?
9 Kunene, i thomo ga hombe a kuva vapfhumba tendeni ga Jehovha — a kuva ni wunghana ga hombe naye gi to simama kala kupindzuka. Zvini hi faneleko ku maha loku hi lava ku simama hiva vapfhumba vakwe? Loku va ku ramba kaya ka wokari, u wa ta lava ku tiva lezvaku zvini lezvi a munhu loye a zvi rindzelako ka wena. Hi cikombiso, a nga ha rindzela ku u tlhatlha zvilato na u nga se nghena lomu ndlwini, niku u wa nga ta sola hi kota ya lezvo. Hi kufanana, hi lava ku tiva lezvi Jehovha a zvi rindzelako ka lava a lavako ku va simama kuva vapfhumba tendeni gakwe. A lirandzo la hina hi Jehovha li hi kuca ku maha zvontlhe zvi nga ntan’wini wa hina kasi ku “mu tsakisa ka zvontlhe”. (Kol. 1:10) Loku hi wona Jehovha kota Munghana wa hina, hi ta zvi tiva kambe lezvaku i Nungungulu ni Papayi wa hina, loyi a ringanelwako hi ku hi mu kombisa cichavo. (Lis. 25:14) Na hi ehleketa hi lezvo, contlhe cikhati hi fanele ku mu kombisa cichavo, hi nga tshuki hi rivala lezvaku hi yena mani. A cichavo leco ca hombe ci ta hi vhuna ku hi nga hanyi hi ndlela yi nga tsakisiko Jehovha. Handle ko kanakana, hi xuva ku “famba hi kutikoramisa zvin’we ni Nungungulu” wa hina. — Mika 6:8.
JEHOVHA A NGA VANGI NI CIHLAWULELA LE CIWULENI
10-11. Lezvi Jehovha a nga va khomisa zvona vaIzrayeli le ciwuleni zvi kombisile kuyini lezvaku i wa nga hi na cihlawulela?
10 Jehovha a nga na cihlawulela ka vapfhumba vakwe. (Rom. 2:11) Hi wona lezvo ka ndlela leyi a nga khoma vaIzrayeli hi yona le ciwuleni ca Sinayi.
11 Andzhako ka loku a tlhatlhisile vanhu vakwe wukhumbini le Gibhite, Jehovha i no yimisa vapristi kasi va tira tabhernakelini. A vaLevhi va wa yimisilwe kasi va maha mitiro yin’wani yi yelanako ni tenda go basa. Xana lava va nga tira lomu tabhernakelini kutani lava va nga tshama kusuhani nago, va wa khatalelwa nguvhu hi Jehovha a ku hundza lava van’wani? Ne ni kutsongwani! Jehovha a nga na cihlawulela.
12. Jehovha i kombisile kuyini lezvaku a nga na cihlawulela ka tiko ga Izrayeli? (Eksodusi 40:38) (Wona ni mufota.)
12 A vaIzrayeli vontlhe va wa hi ni thomo go fana ga ku vava vanghana va Jehovha, na ku nga khataliseki a zviavelo zvabye kutani ku va wa tshama kusuhani kutani kule ni tabhernakeli. Hi cikombiso, Jehovha i wa mahile lezvaku a tiko gontlhe gi zvi kota ku wona a cihlamaliso ca mhinga ya refu ni mhinga ya ndzilo ci nga hi laha hehla ka tabhernakeli. (Lera Eksodusi 40:38.) Loku a refu gi sangula ku suka giya ka wutshamu gin’wani, hambu lava va nga tshama kule nguvhu ni tabhernakeli va wa zvi wona, va tlhanganisela zvibya zvabye, va simulela matenda ya mingango yabye, va famba zvin’we ni vaIzrayeli-kuloni. (Mitse. 9:15-23) Vontlhe va wa kuzwa a kubiwa ka mimpundzu yimbiri ya prata yi nga biwa kasi ku byela vontlhe lezvaku va suka. (Mitse. 10:2) Zvi laha kubaseni lezvaku a ku tshama kusuhani ni tabhernakeli a hi zvona zvi nga hi cikombiso ca kuva ni wunghana ga hombe na Jehovha. Kanilezvi, a vaIzrayeli vontlhe va wa hi vapfhumba va Jehovha niku va wa fanele ku tiyiseka lezvaku i ta va rangela ni ku va vhikela. Ni nyamutlha, kani hi tshama kwihi, hi nga vhuneka hi lirandzo la Jehovha a tlhela a hi khatalela ni ku hi vhikela.
A lulamiselo ga Nungungulu ga tabhernakeli gi wa komba lezvaku a nga na cihlawulela (Wona paragrafo 12)
JEHOVHA A NGA NA CIHLAWULELA NI NYAMUTLHA
13. Hi yihi a yin’we ya tindlela leti Jehovha a kombisako hi tona lezvaku a nga na cihlawulela?
13 A vanhu vo kari va Nungungulu nyamutlha va tshama kusuhani ni tsindza ga misava yontlhe kutani hofisa ya ravi ya Vakustumunyu va Jehovha. A van’wani va tira ka matshamu lawo. Hi kota ya lezvo, a vanhu lavo va hlengela ka mitiro yo tala yi mahiwako ka matshamu lawo niku va na ni thomo ga ku tshama zvin’we ni lava va rangelako. A van’wani va tira kota vawoneleli va fambafambako kutani ku maha mitiro yin’wani yo hlawuleka ya cikhati contlhe. Loku zvezvi u hi mun’we wa lava van’wani vo tala va kalako va nga hi na thomo lego, tiyiseka lezvaku Jehovha wa va randza vontlhe a vapfhumba vakwe. Wa khatala hi mun’we ni mun’wani wabye. (1 Ped. 5:7) A vanhu vontlhe va Jehovha va nyikiwa zvakuga zva moya, ni wurangeli, ni kuvhikelwa.
14. Hi cihi cin’wani cikombiso ci kombako lezvaku Jehovha a nga na cihlawulela?
14 A cin’wani cikombiso ci kombako lezvaku Jehovha a nga na cihlawulela hi ku i maha ku a Bhibhiliya gi kumeka ka vanhu vontlhe misaveni yontlhe. Kusanguleni, a mitsalo yo basa yi wa tsalilwe hi tirimi leti ta tinharu: ciHebheru, ni ciAramaiko, ni ciGreki. Xana lava va lerako a Bhibhiliya hi tirimi leto va na ni wunghana ga hombe na Jehovha a ku hundza lava van’wani? Ahihi. — Mat. 11:25.
15. Cini ci kombako lezvaku Jehovha a nga na cihlawulela? (Wona ni mufota.)
15 Kasi Jehovha a hi amukela a zviyi hi ku hi gondzile nguvhu kutani hi wutlhari hi nga nago ga ku tiva tirimi. Wutshan’wini ga ku a wutlhari gakwe a nyika basi lava va gondzileko nguvhu, Jehovha i maha ku a vanhu vontlhe laha misaveni va gi kuma, kani va gondzile nguvhu kutani ahihi. A Mhaka yakwe yi pimiselweko, a Bhibhiliya, yi hundzuluselwa hi tirimi to tala nguvhu, hikwalaho a vanhu misaveni yontlhe va nga vhuneka hi lezvi a Bhibhiliya gi gondzisako va tlhela va tiva lezvi va nga mahisako zvona vanghana va Jehovha. — 2 Tim. 3:16, 17.
A kuva a Bhibhiliya gi kumeka hi tirimi to tala zvi kombisa kuyini lezvaku Nungungulu a nga na cihlawulela? (Wona paragrafo 15)
SIMAMA KU “AMUKELEKA” KA JEHOVHA
16. Hi kuya hi Mitiro 10:34, 35, himani loyi a simamako ku amukeleka ka Jehovha?
16 I thomo ga hombe a ku amukelwa hi Jehovha tendeni gakwe go fananisa. I hi amukela hi wunene ni lirandzo niku i amukela khwatsi vapfhumba a ku hundza ni wihi munhu. Ahandle ka lezvo, Jehovha a nga na cihlawulela, i amukela vanhu vontlhe na a nga cuwuki lomu va tshamako kona, ni mudhawuko wabye, ni lezvaku va gondzile nguvhu kutani a va gondzangi, ni hlonge yabye, ni lixaka labye, ni tanga yabye, kani vavanuna kutani vavasati. Hambulezvo, ntsena lava va ingisako a zvileletelo zvakwe hi vona va amukelekako kota vapfhumba vakwe. — Lera Mitiro 10:34, 35.
17. Hi ta ma kuma kwihi man’wani mahungu yo engeteleka xungetano hi kuva vapfhumba tendeni ga Jehovha?
17 Kota lezvi zvi tsalilweko ka Lisimu 15:1, Dhavhidha i mahile zviwutiso lezvi: ‘Jehovha, himani a ta nga luvela tendeni ga wena? Himani a ta nga aka le citsungeni ca wena ci basileko ke?’ A mutsali wa tisimu i tlhelile a pimiselwa ku tsala a hlamulo wa kona. A ndzima yi landzelako yi ta tlhamusela a zvilo zvokari zvo kongoma hi faneleko ku maha kasi hi simama hi amukeleka ka Jehovha.
LISIMU 32 Yima na Jehovha!
