1. Hikuyini hi nga vhunekako hi ku kambisisa a Lisimu 15:1-5?

 KA NDZIMA yi nga hundza, hi gondzile lezvaku a malandza ya Jehovha ma ti nyikeleko kakwe ma ngava vapfhumba tendeni gakwe go fananisa hi ku ti karatela kuva ni wunghana ga hombe naye. Kanilezvi, zvini hi nga mahako kasi hi ringanelwa hi wunghana lego? A Lisimu 15 li wulawula hi mhaka leyi. (Lera Lisimu 15:1-5.) A lisimu leli li na ni zvigondzo zva lisima zvi nga hi vhunako a ku hiva kusuhani nguvhu na Nungungulu.

2. Zvini kuzvilava zvi kucileko Dhavhidha lezvaku a kumbuka a tenda ga Jehovha?

² A Lisimu 15 li sangula hi zviwutiso lezvi: ‘Jehovha, himani a ta nga luvela tendeni ga wena? Himani a ta nga aka le citsungeni ca wena ci basileko ke?’ (Lis. 15:1) A cikhati leci Dhavhidha, a muyimbeleli wa Tisimu, a nga kumbuka a ‘tenda’ ga Jehovha kuzvilava i wa ehleketa hi tabhernakeli, legi ka cikhati leco gi nga hi le Gibheyoni. Dhavhidha i tlhelile a kumbuka ‘citsunga co basa’ ca Nungungulu, kuzvilava na a wula Ziyoni le Jerusalema. A Ziyoni ku wa tsawukene nguvhu ni Dzonga wa Gibheyoni hi tikilometro to tala niku Dhavhidha i no zima tenda seyo kasi ku vekiwa kona arke ga civhumelwano kala ka cikhati leci ku nga akiwa a tempeli leyi gi nga wa ta tshama kona hi cikhati co leha. — 2 Sam. 6:17.

3. Hikuyini hi faneleko ku chela kota hi Lisimu 15? (Wona ni mufota.)

³ A kutala ka vaIzrayeli va wa nga vhumelelwi a ku tira lomu tabhernakelini niku vatsongwani va nga vhumelelwa a ku nghena lomu a arke ga civhumelwano gi nga tshama kona. Kanilezvi wontlhe a malandza ya Jehovha yo tsumbeka zvi wa koteka ku mava vapfhumba tendeni gakwe go fananisa hi kuva  vanghana vakwe va tlhela va simama ni wunghana lego. Hi zvalezvo hontlheni hi zvi xuvako. A Lisimu 15, li kumbuka matshamela yo kari hi faneleko kuva nawo hi tlhela hi ma kombisa kasi hi simama kuva vanghana va Jehovha.

FAMBA HI NONGAMETO U TLHELA U MAHA ZVAZVINENE

4. Hi zvi tivisa kuyini lezvaku a kubhabhatiswa a hi zvona zvoce Jehovha a zvi lavako ka hina? (Isaya 48:1)

⁴ Ka Lisimu 15:2, a munghana wa Jehovha i tlhamuselwa kota loyi “a fambako hi nongameto, a mahako kululama”. A magezu a “fambako” ni a “mahako” ma komba zvilo zvi tshamelako ku mahiwa. Kanilezvi, xana hakunene zva koteka a ku hi ‘famba hi nongameto’? Ina. Kota lezvi ka ku a kuna munhu wo mbhelela, Jehovha i ta hi wona na hi ‘famba hi nongameto’ loku hi maha zvontlhe hi zvi kotako kasi hi mu ingisa. A cikhati leci hi ti nyikelako ka Jehovha hi tlhela hi bhabhatisiwa, ho sangula ku famba na Nungungulu. Wona lezvaku zvikhatini zva kutsaliwa ka Bhibhiliya, a kuva a munhu a lumba tiko ga Izrayeli basi zvi wa nga wuli ku mupfhumba wa Jehovha. A vokari va wa dhumisa Nungungulu kanilezvi ‘na ku nga hi hi lisine ni kululama’. (Lera Isaya 48:1.) A vaIzrayeli va timbilu ti nene va wa fanele ku gondza xungetano hi zvileletelo zva Jehovha va tlhela va zvi landzela. Hi kufanana, kasi hi amukeleka ka Nungungulu nyamutlha, ku laveka zva ku hundza ku bhabhatisiwa ni ku ti patsa ni bandla ga wuKristu. Hi fanele ku simama hi ‘maha kululama’. Hi nga zvi mahisa kuyini lezvo?

5. A ku ingisa Jehovha ka zvontlhe zvi patsa yini?

⁵ Kuwoneni ka Jehovha, a ku ‘famba hi nongameto’ ni ku ‘maha kululama’ zvi wula zvo hundza a kuya mitlhanganweni Salawini ya Mufumo hi kukhandzakanya. (1 Sam. 15:22) Hi fanele ku kulula hi n’watseka kasi hi ingisa Nungungulu ka zvontlhe hi zvi mahako  wutomini ga hina hambu loku hi hi hoce. (Mav. 3:6; Mutsh. 12:13, 14) Zva lisima a ku hi ti karatela a ku ingisa Jehovha hambu ka zvilo zvi wonekisako ku khwatsi zvitsongwani. Loku hi maha lezvo hi komba lezvaku hakunene ha mu randza Jehovha, lezvi zvi mahako ku yenawu a hi randza nguvhu. — Joh. 14:23; 1 Joh. 5:3.

6. Hi kuya hi Mahebheru 6:10-12, zvini zvi nga zva lisima nguvhu a ku hundza a zvilo zva zvinene lezvi hi mahileko cikhatini ci nga hundza?

⁶ Jehovha wa zvi nyika nguvhu lisima lezvi hi mu maheleko cikhatini ci nga hundza. Hambulezvo, a kuva hi mahile zvilo zva zvinene cikhatini ci nga hundza a hi zvona basi zvi wulako lezvaku hi ta simama hiva vapfhumba tendeni ga Jehovha. Hi wona lezvo ka Mahebheru 6:10-12. (Lera.) Jehovha a nga rivali a zvilo zva zvinene lezvi hi zvi mahileko cikhatini ci nga hundza. Kanilezvi i lava ku hi simama ku mu khozela hi muhefemulo wontlhe “kala magumo”. Jehovha i ta hi chachazela hi wunghana ga kala kupindzuka “loku hi nga rereki”. — Gal. 6:9.

WULAWULA LISINE MBILWINI YA WENA

7. A ku wulawula lisine mbilwini ya hina zvi patsa yini?

⁷ Loku a munhu a lava ku amukelwa tendeni ga Jehovha i fanele ku ‘wulawula lisine mbilwini yakwe’. (Lis. 15:2) Lezvo zvi wula zvo hundza ku hi nga hembi. Jehovha i lava lezvaku hi tsumbeka ka zvontlhe hi wulako ni ka zvontlhe hi mahako. (Mah. 13:18) Lezvo zva lisima, hakuva ‘a wakubiha manyala ka Jehovha, kanilezvi i xaka ga valulamileko’. — Mav. 3:32.

8. Mahanyela muni hi faneleko ku ma potsa?

⁸ Lava va “wulawulako lisine mbilwini” yabye a va lavi ku ingisa Nungungulu loku va hi ni van’wani basi kuveni va tshova milayo ya Nungungulu loku va hi voce. (Isa. 29:13) Va venga a kukhohlisa. A munhu wa ku khohlisa a nga ha sangula ku kanakanela wutlhari ga zvileletelo zvo kari zva Nungungulu. (Jak. 1:5-8) A munhu loye a nga tshuka a nga ingisi a zvileletelo zva Nungungulu ka zvilo lezvi a zvi wonako na zvi nga hi zva lisima nguvhu. Andzhako ka lezvo, loku a nga woni a mawuyawuya ya kungaingisi kakwe, a nga sangula  ku engetela ku tshova milayo ya Nungungulu, a wukhozeli gakwe giva go kanganyisa. (Mutsh. 8:11) Hambulezvo, hina hi lava ku tsumbeka zvilweni zvontlhe.

9. Zvini hi gondzako ka lezvi zvi nga maheka ka khati go sangula legi Jesu a nga kumana na Nataneli? (Wona ni mufota.)

⁹ Hi nga gondza a lisima la kuva vanhu va timbilu ti tsumbekileko ka lezvi zvi nga maheka ka khati go sangula laha Jesu a nga kumana na Nataneli. A cikhati leci Filipu a nga neha munghana wakwe, Nataneli, kasi a ta tivana na Jesu ku humelele zvilo zvo hlamalisa. Hambu lezvi Jesu a nga kala a nga se tshuka a mu wona Nataneli, Jesu i te: “Hi nga wonani a muIzrayeli wa lisine a nga hiko na kukanganyisa!” (Joh. 1:47) Lisine ku Jesu i wa wona a vapizani lava van’wani na va hi vanhu vo tsumbeka, kanilezvi Jesu i wonile a kutsumbeka ka hombe ka Nataneli. Nataneli yenawu i wa nga mbhelelangi a ku fana na hina. Kanilezvi i wa nga hi na kukanganyisa; i wa tsumbeka zvilweni zvontlhe. Jesu i no hlamalisiwa nguvhu hi lezvo a tlhela a mu dzundza hi zvona. Gi wa tava wudzundzo ga hombe loku Jesu i wo wula zvo fana hi hina!

10. Hikuyini hi faneleko ku ma tirisa khwatsi a magezu ya hina? (Jakobe 1:26)

¹⁰ A kutala ka zvilo hi faneleko ku maha, zvi xaxametilweko ka Lisimu 15, zvi yelana ni lezvi hi va khomisako zvona van’wani. A Lisimu 15:3 li wula lezvaku loyi a nga mupfhumba tendeni ga Jehovha ‘a nga lumbeti hi lirimi lakwe, a nga mahi kubiha ka xaka gakwe, ne hambu ku wulawula ndzhukano ka muakelani wakwe’. Loku hi tirisa magezu ya hina hi ndlela ya hava hi nga va vangela zvikarato zva hombe van’wani zvi tlhela zvi hi maha hi nga ringanelwi hi kuva vapfhumba tendeni ga Jehovha. — Lera Jakobe 1:26.

11. Zvi wula yini a ku lumbeta, niku zvini zvi nga mahiwako hi valumbeti va nga ti soliko?

¹¹ A mutsali wa Tisimu i wulawula hi kukongoma hi kulumbeta. Zvi wula yini lezvo? A kutala ka zvikhati zvi wula ku wulawula mawunwa yo biha ma nga wonhako vito ga  van’wani. A valumbeti va nga ti soliko va fanele ku susiwa bandleni ga wuKristu. — Jer. 17:10.

12-13. Hi ka zviyimo muni hi nga vako ni nandzu wa ku wulawula kubiha hi van’wani na hi nga zvi poli? (Wona ni mufota.)

¹² A Lisimu 15:3 li tlhela li hi alakanyisa lezvaku a vapfhumba va Jehovha a va mahi zvakubiha ka vaakelani vabye ne hambu ku wulawula kubiha hi vanghana vabye. Zvi patsa yini lezvo?

¹³ Hi nga wulawula kubiha hi van’wani na hi nga zvi poli hi ku hangalasa mahungu ya hava hi vona. Hi cikombiso: 1) a makabye wo kari wa cisati i nyimile a ntiro wa cikhati contlhe, 2) a vamakabye vo kari va sati ni nuna a va ha tiri Bheteli kutani 3) a makabye wo kari a nga ha hi dhota kutani nandza go vhunetela. Xana zvi wa tava zvinene a ku lavetela a zvigelo zva kucica loko hi gumesa hi bhulela van’wani? Ku ngava ni zvigelo zvo tala zvi mahileko lezvaku kuva ni kucica loko zva ku ne a hi zvi tivi. A hundza lezvo, lava va nga vapfhumba tendeni ga Jehovha a va ‘mahi kubiha ka xaka gabye, ne hambu ku wulawula ndzhukano ka muakelani wabye’.

DZUNDZA LAVA VA CHAVAKO JEHOVHA

14. Tlhamusela lezvi a vapfhumba va Jehovha va mu vengisako zvona a “wakubiha”.

¹⁴ A Lisimu 15:4 li wula lezvaku a vanghana va Jehovha va ‘cuwuka a wakubiha hi mahlo ya kusola’. A hi faneli ku boha lezvaku a wokari i bihile kutani ahihi hi kuya hi mawonela ya hina kutani lezvi hi zvi randzako. Hikuyini? Hakuva kota vanhu vo kala kumbhelela, hi nga tshuka hi randza munhu loyi hi alakanyako ku zva olova a ku tshama naye kanilezvi hi zonda van’wani hi kota ya lezvi va hi swirako. Hikwalaho, hi fanele ku venga ntsena lava Jehovha a va wonako na va bihile. (1 Kor. 5:11) A vanhu lavo va patsa lava va mahako zvilo zva kubiha va nga ti soli, ni lava va nga kombisiko cichavo hi kukholwa ka hina kutani lava va zamako ku daya wunghana ga hina na Jehovha. — Mav. 13:20.

15. Hi yihi a yin’we ya tindlela ta ku dzundza ‘lava va chavako Jehovha’?

¹⁵ Hi kulandzela, a Lisimu 15:4 li hi byela lezvaku hi ‘dzundza lava va chavako Jehovha’. Hikwalaho, hi hlota tindlela ta ku kombisa wunene ni cichavo ka vanghana va Jehovha. (Rom. 12:10) Hi ndlela muni? A yin’we ya tindlela yi seketelwa ka Lisimu 15:4, li wulako ku a mupfhumba tendeni ga Jehovha a nga ‘hundzuli cifungo cakwe, hambu loku a lahlekelwa yena wutsumbu’. A kungatatisi citsumbiso ca hina, handle ko kanakana zvi nga va zwisa kubayisa van’wani. (Mat. 5:37) Hi cikombiso, Jehovha i rindzela lezvaku a vapfhumba vakwe va simama ku hanya hi ku yelana ni cifungo cabye ca muchadho. Wa tsaka kambe loku a vapswali va ti karatela a ku tatisa a zvitsumbiso zvabye lezvi va zvi mahako ka vana vabye. A ku randza Nungungulu zvin’we ni muakelani zvi ta hi kuca a ku hi simama hi tatisa a zvitsumbiso zva hina.

16. Hi yihi yin’wani ndlela ya ku dzundza vanghana va Jehovha?

¹⁶ A ndlela yin’wani ya ku dzundza vanghana va Jehovha ku va amukela mitini ya hina ni ku va kombisa wuhana. (Rom. 12:13) Wutshan’wini ga ku hi tlhangana ni vamakabye mitlhanganweni ni ntirweni wa ku chumayela basi, a ku tshama zvin’we ni vamakabye zvi hi vhuna ku hiva ni wunghana ga hombe navo zvi tlhela zvi tiyisa wunghana ga hina na Jehovha. Ahandle ka lezvo, loku hi amukela van’wani mitini ya hina, hi pimanyisa Jehovha.

SIMAMA KU NGA RANDZI MALI

17. Hikuyini ku kumbukiwako mali ka Lisimu 15?

¹⁷ Hi lera lezvaku a vapfhumba va Jehovha  a va ‘pembisi mali yabye kasi ku bhindzula, ne hambu ku rengelelwa kasi ku kumisa nandzu munhu a nga hiko na nandzu’. (Lis. 15:5) Hikuyini ku kumbukiwako mali ka lisimu leli lo koma? Hi ku loku hi nga hi na mawonela ya manene hi mali zvi nga va zwisa kubayisa van’wani zvi tlhela zvi wonha a wunghana ga hina na Nungungulu. (1 Tim. 6:10) Zvikhatini zva kutsaliwa ka Bhibhiliya, a vokari va wa xolola a vamakabye vabye va zvisiwana hi ku va londza majuro loku va va pemba mali. A cin’wani kambe, a valamuli vo kari va wa vhumela ku xavelelwa, va nga mu nyiki nandzu loyi a nga ni nandzu. A zvilo lezvo Jehovha wa zvi nyenya nguvhu. — Ezek. 22:12.

18. Zviwutiso muni zvi nga hi vhunako ku hlola mawonela ya hina hi mali? (Mahebheru 13:5)

¹⁸ Zva lisima a ku hi hlola lezvi hi yi wonisako zvona mali. Ti wutise lezvi: ‘Ndza tshamela a ku ehleketa hi mali ni lezvi yi nga xavako? Loku ndzi pemba mali, ndza hlwela ku tlhelisa na ndzi alakanya lezvaku loyi a nga ndzi pemba a nga yi lavi ke? A kuva ni mali zvi ndzi maha ndzi tizwa ndzi hi wa lisima kanilezvi zvi ndzi karatela ku hana? Ndza lamula a vamakabye va mina ndzi ku va randza titshomba ntsena hi kota ya lezvi va nga ni mali? Ndzi maha wunghana ni lava vo ganya kanilezvi ndzi nga khatali hi zvisiwana?’ Hi nyikilwe thomo ga hombe ga ku hiva vapfhumba va Jehovha. Hi nga vhikela a thomo lego hi ku hi simama hi nga randzi mali wutomini ga hina. Loku hi maha lezvo, Jehovha a nga ta tshuka a hi tsika! — Lera Mahebheru 13:5.

JEHOVHA WA VA RANDZA VANGHANA VAKWE

19. Hi cihi a cigelo-tshinya ci mahako Jehovha a hi nyika zvileletelo?

¹⁹ A Lisimu 15 li gumesa hi citsumbiso leci: ‘Loyi a mahako lezvo cima a nga ta tsekatsekiswa.’ (Lis. 15:5) Laha, a mutsali wa tisimu i tlhamusela a cigelo-tshinya ci mahako Nungungulu a hi nyika zvileletelo. Jehovha i lava ku hi tsaka. Hikwalaho, i hi nyika wurangeli gi hi mahako hi kuma makatekwa yakwe ni kuvhikelwa. — Isa. 48:17.

20. Zvini lezvi a vapfhumba va Jehovha va zvi rindzelako?

²⁰ A vapfhumba va Jehovha va rindzela wumandziko ga ginene nguvhu. A vatotilweko vo tsumbeka va ta nyikiwa “wutshamu go tala” legi Jesu a va longiseleleko gona le tilweni. (Joh. 14:2) Lava va nga ni kutsumba ka ku hanya laha misaveni va zvi rindzela hi mahlo yo pswhuka lezvi Kuvhululelwa 21:3 a zvi tsumbisako. Handle ko kanakana, hontlheni hi tizwa na hi nyikiwa wudzundzo hi lezvi Jehovha a hi rambako ku hiva vanghana vakwe, kasi hiva vapfhumba tendeni gakwe kala kupindzuka!