Hikuyini a vanhu vo kari va wulako lezvaku a magezu ma nga ka Lisimu 12:7 ma wula ‘timhaka ta Jehovha’ (vhesi 6) kuveni a Wuhundzuluseli ga Misava Yiswa gi wula ‘zvisiwana’ (vhesi 5)?

A mongo wu komba ku a vhesi legi gi wulawula hi vanhu.

Ka Lisimu 12:1-4, hi lera lezvaku ‘a va kholekileko a va ha hi kona cikari ka vanana va vanhu’. Makunu wona a Lisimu 12:5-7, ma nga mavhesi lawa ma patsekako ka ciwutiso leci.

A vhesi 5 gi komba lezvi Nungungulu a to mahela ‘zvisiwana’, gi: I ta zvi ponisa.

A vhesi 6 gi engeta giku: ‘A timhaka ta Jehovha timhaka ti basileko, ti khwatsi i silivha yi hlutilweko’. Lezvi zvi komba lezvi a maKristu ya lisine ma ti zwisako zvona hi Mhaka ya Nungungulu. — Lis. 18:30; 119:140.

Makunu wona vhesi gi landzelako, Lisimu 12:7: ‘Jehovha, u ta va hlayisa; u ta va londzowota ka leci cizukulwana kala kupindzuka.’ A “va” loyi ku wuliwa vamani?

Hi kota ya lezvi a vhesi 7 gi landzelako a vhesi 6 gi wulawulako hi ‘timhaka ta Jehovha’, a vokari va alakanya ku a “va” i wula timhaka ta Nungungulu. Niku ha zvi tiva lezvaku Nungungulu i hlayisile Bhibhiliya hambu lezvi a valala va zamileko hi tindlela to tala a ku gi betela ni ku gi fuvisa. — Isa. 40:8; 1 Ped. 1:25.

Hambulezvo, lezvi zvi wuliwako ka vhesi 5 zvonawu lisine. Jehovha wa vhuna niku i ta simama ku vhuna ni ku ponisa ‘zvisiwana’ ni ‘vavhumali’. — Joba 36:15; Lis. 6:4; 31:1, 2; 54:7; 145:20.

Makunu, a “va” ka vhesi 7 ku wuliwa vamani?

A mongo wa Lisimu leli wu komba lezvaku a “va” ku wuliwa vanhu.

A Lisimu 12:1 li wulawula hi ciyimo leci a “va kholekileko” va kumekako ka cona hi kota ya vakubiha. Andzhako ka lezvo, hi kuma lezvaku Jehovha i ta maha cokari xungetano hi lava va wulawulako tirimi timbiri. A Lisimu leli li hi tiyisekisa lezvaku Nungungulu i ta maha cokari kasi ku vhikela vanhu vakwe hakuva a timhaka takwe ti basile.

Hikwalaho a vhesi 7 gi wula lezvaku i ta “va” hlayisa ni ku va londzowota, ku nga zvisiwana lezvi zvi xanisiwako hi vakubiha.

A “va” wa vhesi legi wa kumeka ka tikopiya to tsumbeka ta Mitsalo ya ciHebheru. A Septuaginta ga ciGreki gi phinda kumbiri a gezu “hina” ka vhesi 7, lezvi zvi kombako ku ku wuliwa a vatsumbekileko lava va xanisiwako ni ku vhumala. Hi kugumesa, a vhesi 7 gi komba ku a mun’we ni mun’wani wa lava va tsumbekileko va ta ‘londzowotiwa’ kutani ku vhikelwa ka ‘cizukulwana leci’ ka vanhu lava va mahako zvakubiha. (Lis. 12:7, 8) Ka wuhundzuluseli ga Mitsalo ya ciHebheru hi ciAramaiko, a cipandze co sangula ca vhesi legi conawu ci tirisa a “va” niku ci wula lezvi: “Wena HOSI, u ta vhikela a valulamileko, u ta va hlayisa ka cizukulwana leci co biha kala kupindzuka.” Lezvo zvi engetela a ku tiyisa lezvaku a Lisimu 12:7 a li wuli timhaka ta Nungungulu.

Hi cigelo leco, a vhesi legi gi nyika kutsumba ka lava “va kholekileko” ka lezvaku Nungungulu i ta maha cokari.