NDZIMA YA CIGONDZO N.° 19
LISIMU 22 A Mufumo wu yimisilwe makunu — A wute!
Zvini hi zvi tivako xungetano hi kulamula ka Jehovha loku ku tako?
“Jehovha . . . a nga lavi lezvaku ku lova ni mun’we.” — 2 PED. 3:9.
LEZVI HI TO GONDZA
A ndzima leyi yi ta hi tiyisekisa lezvaku a kulamula ka Jehovha loku ku tako ku tava ka nongameto ni ko lulama.
1. Hikuyini hi nga wulako lezvaku hi hanya zvikhatini zva ku tsakisa nguvhu?
HI HANYA zvikhatini zva kutsakisa nguvhu! Siku ni siku, a zviphrofeto zva Bhibhiliya zva tatiseka na hi zvi wona. Hi cikombiso, ha wona “hosi ya le n’walungu” ni “hosi ya le dzongeni” na ti lwisana hi ku lava ku fumela a misava yontlhe. (Dan. 11:40) Ha wona a mahungu ya manene ya Mufumo na ma chumayelwa hi ndlela ya ku cima ma wa nga se tshuka ma chumayelisiwa lezvo, niku a vanhu vo tala va amukela a mahungu lawo. (Isa. 60:22; Mat. 24:14) A cin’wani kambe, ha kuma zvakuga zva moya “hi cikhati ca kona”. — Mat. 24:45-47.
2. Zvini hi nga tiyisekako ka zvona, kanilezvi zvini hi faneleko ku zvi tiva?
2 Jehovha wa simama ku hi vhuna ku zwisisa khwatsi a zvilo zva lisima lezvi zvi to humelela zvezvanyana. (Mav. 4:18; Dan. 2:28) Hi nga tiyiseka lezvaku a cikhati leci a kuxaniseka ka hombe ku to sangula, hi ta ngha hi zvi tiva zvontlhe lezvi hi faneleko ku zvi tiva kasi hi timisela hi kutsumbeka hi tlhela hi simama hi bohene cikhatini leco co bindza. Hambulezvo, hi fanele ku zvi tiva lezvaku ku na zvilo zva ku a hi zvi tivi xungetano hi kulamula loku ku tako. Ka ndzima leyi, a kuranga hi ta bhula hi ku hikuyini hi chukwatisileko lezvi hi nga zvi wulile kale xungetano hi zvimaho lezvo. Hi ku landzela, hi ta vhuxeta a zvilo zvo kari hi zvi tivako xungetano hi kulamula loku ku tako ni ndlela leyi a Papayi wa hina wa le tilweni a to maha hi yona zvilo.
LEZVI HI KALAKO HI NGA ZVI TIVI
3. Zvini a kale hi nga wula xungetano hi cikhati leci Jehovha a to tsemarisa a thomo ga ku a vanhu va ti patsa na hina, niku hikuyini hi nga chikelela magumo lawo?
3 A kale, hi wa wula lezvaku neti a kuxaniseka ka hombe ku sangula, a nga kona zvi to koteka ku a sangula ku yima tlhelweni ga Jehovha, a pona Armagedhoni. Hi wa chikelele magumo lawo, hakuva hi wa zwisisa lezvaku a matimu xungetano hi Ndambi ma wa hi ciphrofeto. Hi cikombiso, hi wa alakanya lezvaku a ku khwatsi hi lezvi Jehovha a vhalileko a livati la taru a Ndambi na yi nga se sangula, kusanguleni ka kuxaniseka ka hombe i ta “vhala livati” tikweni ga Sathani, a vhalela lezvaku ku nga havi ni munhu wa ku ponisiwa. — Mat. 24:37-39.
4. Xana a matimu ya Ndambi hi ma wona kota ciphrofeto? Tlhamusela.
4 Xana hi fanele ku wona a matimu ya Ndambi kota ciphrofeto? Ahihi! Hikuyini? Hakuva a ku na Mutsalo wo kongoma wu seketelako lezvo. a Jesu i fananisile a ‘masiku ya Nowa’ ni cikhati ca kuva kona kakwe, kanilezvi a nga wulangi lezvaku zvontlhe zvi nga maheka masikwini ya Nowa, zvo kota a cikhati leci Jehovha a nga vhala a livati la taru, zvi wa tava ni kutatiseka ka hombe cikhatini ci tako. Kanilezvi, lezvo a zvi wuli lezvaku a hi faneli ku gondza nchumu ka matimu ya Nowa ni Ndambi.
5. a) Zvini lezvi Nowa a mahileko mahlweni ka Ndambi? (Mahebheru 11:7; 1 Pedro 3:20) b) Xungetano hi ntiro wa kuchumayela, a ciyimo ca hina nyamutlha ci fanisa kuyini ni ca masikwini ya Nowa?
5 A cikhati leci Nowa a ngazwa mahungu ya Jehovha ya citlharihiso, i no komba lezvaku i wa hi ni kukholwa hi ku aka taru. (Lera Mahebheru 11:7; 1 Pedro 3:20.) Hi ku fanana, a vanhu lava va zwako a mahungu ya manene xungetano hi Mufumo wa Nungungulu va fanele ku maha cokari. (Miti. 3:17-20) Pedro i wulile lezvaku Nowa i wa hi “muchumayeli wa kululama”. (2 Ped. 2:5) Hambulezvo, kota lezvi hi zvi wonileko ka ndzima yi nga hundza, a hi zvi tivi ku mahlweni ka Ndambi Nowa i mahile tsima ga ku chumayela a vanhu vontlhe va nga hanya laha misaveni. Nyamutlha hi kari hi chumayela misaveni yontlhe, niku hi zvi maha hi kuhiseka. Kanilezvi, hambu lezvi hi ti karatako hi laha zvi kotekako hi kona zvi nga ta koteka a ku chikelela a vanhu vontlhe va hanyako laha misaveni ni mahungu ya manene a kugumesa na ku nga se chikela. Hikuyini?
6-7. Hikuyini hi nga wulako lezvaku hi nga ta chumayela a vanhu vontlhe laha misaveni a magumo na ma nga se chikela? Tlhamusela.
6 Wona lezvi Jesu a zvi wulileko xungetano hi ntiro wa hina wa kuchumayela. Jesu i phrofetile lezvaku a mahungu ya manene ma wa ta chumayelwa “misaveni yontlhe kasi mava wukustumunyu ka matiko wontlhe”. (Mat. 24:14) A ciphrofeto leci ca tatiseka nguvhu nyamutlha a ku hundza kale. A mahungu ya Mufumo ma chumayelwa hi 1000 wa tirimi ni ku hundza, niku hi ku tirisa a saite ya jw.org, a mahungu ya Mufumo ma chikela ka vanhu vo tala nguvhu misaveni.
7 Hambulezvo, Jesu i tlhelile a byela vapizani vakwe lezvaku va wa nga ta “tlhanganisa a madhoropa wontlhe” kutani ku chumayela vanhu vontlhe na a nga se wuya. (Mat. 10:23; 25:31-33) A magezu ya Jesu ma ta tatiseka kambe masikwini ya hina. A vanhu vo tala nyamutlha va hanya ka matshamu lawa a ntiro wa hina wu nyenyiwako ni nkondzo. A cin’wani kambe, minuto ni minuto ku pswaliwa vanana vo tala nguvhu. Hi maha zvontlhe hi zvi kotako kasi ku chikelela vanhu va “wontlhe matiko ni tixaka ni tirimi” hi va byela a mahungu ya manene. (Kuv. 14:6) Kanilezvi a lisine ku a hi nga ta zvi kota ku chumayela a vanhu vontlhe laha misaveni a kugumesa na ku nga se chikela.
8. Zviwutiso muni zvi nga vhukako xungetano hi kulamula ka Jehovha loku ku tako? (Wona ni mifota.)
8 Hikwalaho, ku vhuka zviwutiso lezvi: Ahanti lava kuzvilava va to kala kuva ni thomo ga kuzwa a mahungu ya manene a kuxaniseka ka hombe na ku nga se sangula? Jehovha ni N’wana wakwe, loyi a mu yimisileko kasi ku lamula, va ta va lamulisa kuyini? (Joh. 5:19, 22, 27; Miti. 17:31) A mutsalo-tshinya wa ndzima leyi wu wula lezvaku Jehovha “a nga lavi lezvaku ku lova ni mun’we”. Wutshan’wini ga lezvo, i lava lezvaku “vontlhe va hundzuluka”. (2 Ped. 3:9; 1 Tim. 2:4) Lezvo zvi wula ku hi fanele ku vhumela lezvaku Jehovha a nga se hi byela lezvi a to maha kasi ku hlamula ciwutiso leci. Hi lisine, a nga kurumeteki ku hi byela zvontlhe lezvi a mahako ni lezvi a to maha.
Jehovha i ta va lamulisa kuyini lava va to ngha va nga vangi ni thomo ga kuzwa a mahungu ya manene na ku nga se sangula a kuxaniseka ka hombe? (Wona paragrafo 8) c
9. Zvini lezvi Jehovha a hi byelako lomu ka Mhaka yakwe?
9 Lomu ka Mhaka yakwe, Jehovha wa hi byela a zvilo zvo kari lezvi a to maha. Hi cikombiso, a Bhibhiliya gi hi byela lezvaku Jehovha i ta vhuxa ‘vangalulamangiko’ lava va kalako va nga vangi ni thomo ga kuzwa mahungu ya manene va cica mahanyela yabye. (Miti. 24:15; Luka 23:42, 43) Lezvo zvi vhuxa zvin’wani zviwutiso zva lisima.
10. Zviwutiso muni zvin’wani zvi vhukako?
10 Xana vontlhe lava va tofa ndzeni ka kuxaniseka ka hombe va ta loviselwa magumo na ku nga hi na kutsumba ka ku va vhuxiwa hi ka vafileko? A Mitsalo yi zvi veka laha kubaseni lezvaku a valala va hombe lava Jehovha ni mabutho Yakwe va to va lovisa yimpini ya Armagedhoni va nga ta vhuxiwa. (2 Tes. 1:6-10) Kanilezvi ahanti lava van’wani, hi cikombiso, lava va to dawa hi timhango ta ntumbuluko, timhango tin’wani laha tiyileko kutani lava va to dawa hi vanhu-kuloni? (Mutsh. 9:11; Zak. 14:13) Xana a vokari va tava cikari ka ‘vangalulamangiko’ lava va to vhuxiwa misaveni yiswa? A lisine ku a hi zvi tivi.
LEZVI HI ZVI TIVAKO
11. A vanhu va ta lamuliwa hi kuya hi yini yimpini ya Armagedhoni?
11 Hi tiva zvilo zvo tala xungetano hi lezvi zvi to maheka cikhatini ci tako. Hi cikombiso, ha zvi tiva lezvaku ndzeni ka Armagedhoni a vanhu va ta lamuliwa hi kuya hi lezvi va va khomisileko zvona vamakabye va Kristu. (Mat. 25:40) Lava va to lamuliwa kota tiyivhu hi lava va to ngha va seketele vatotilweko na Kristu. Ha zvi tiva kambe lezvaku a vamakabye vo kari va Kristu va ta ngha va ha hi kona laha misaveni andzhako ka kusangula ka kuxaniseka ka hombe, niku va nga ta tekiwa vaya tilweni kala cikhatanyana mahlweni ka kusangula ka Armagedhoni. Ndzeni ka cikhati leci a vamakabye vo kari va Kristu va to ngha va ha hi laha misaveni, zva koteka ku a vanhu va timbilu ti nene vava ni thomo ga ku va seketela va tlhela va seketela a ntiro lowu va wu mahako. (Mat. 25:31, 32; Kuv. 12:17) Hikuyini a timhaka leti ti nga ta lisima?
12-13. Zvini lezvi a vokari kuzvilava va to maha a cikhati leci va to wona a kulovisiwa ka “Bhabhuloni wa Hombe”? (Wona ni mifota.)
12 Hambu andzhako ka kusangula ka kuxaniseka ka hombe, zva koteka ku a vokari lava va to wona kulovisiwa ka “Bhabhuloni wa Hombe” va alakanya lezvaku hi malembe yo tala a Vakustumunyu va Jehovha va wa wulawula hi cimaho leco. Zva koteka ku a vokari lava va to wona a zvimaho lezvo va cica ke? — Kuv. 17:5; Ezek. 33:33.
13 Loku lezvo zvi humelela, zvi wa ta fana ni lezvi zvi humeleleko le Gibhite masikwini ya Mosi. Alakanya lezvaku a ‘vanhu va tin’wani tixaka’ va ti patsile ni vaIzrayeli a cikhati leci va nga huma hi Gibhite. A vokari kuzvilava va sangulile kuva ni kukholwa a cikhati va nga wona a kutatiseka ka zvitlharihiso zva Mosi xungetano hi 10 wa makhombo. (Ekso. 12:38) Loku ku maheka zvilo zvo fana ni lezvo andzhako ka kulovisiwa ka Bhabhuloni wa hombe, xana hi ta swireka loku a vanhu va ti patsa na hina na ku kiyela kutsongwani kasi a kugumesa ku chikela? Ne ni kutsongwani! Hi lava ku pimanyisa a matshamela ya Papayi wa hina wa le tilweni, a “Nungungulu wa wuxinji ni tipswalo, loyi a nonokako ku zangara, loyi a teleko hi wuxinji ni kutsumbeka”. b — Ekso. 34:6.
A vokari lava va to wona kulovisiwa ka “Bhabhuloni wa Hombe” va ta zvi alakanya lezvaku hi malembe yo tala a Vakustumunyu va Jehovha va wa wulawula hi cimaho leco (Wona maparagrafo 12-13) d
14-15. Xana lezvaku a munhu a hanya kala kupindzuka zviya hi cikhati leci a fako hi cona kutani lomu a tshamako kona? (Lisimu 33:4, 5)
14 Ka zvikhati zvin’wani ha tshuka hizwa wokari na aku: “Zvi wa tava zvinene nguvhu loku a maxaka ya mina ma wofa a kuxaniseka ka hombe na ku nga se sangula kasi mava ni kutsumba ka kuvhuxiwa hi ka vafileko.” Handle ko kanakana, ku na ni zvigelo zvo zwala zvi mahako ku a munhu a wula lezvo. Kanilezvi, lezvaku a munhu a hanya kala kupindzuka a zviyi hi cikhati leci a fako hi cona. Jehovha Mulamuli wo mbhelela. Contlhe cikhati i maha zviboho zva zvinene ni zvo lulama. (Lera Lisimu 33:4, 5.) Hi nga tiyiseka lezvaku “a mulamuli wa tiko” gontlhe i ta maha lezvi zvi nga zvinene. — Gen. 18:25.
15 Zva zwala kambe a ku chikelela magumo ya lezvaku a ku a munhu a hanya kala kupindzuka a zviyi hi lomu a tshamako kona. Zvi wa nga ta zwisiseka a ku Jehovha a lamula vanhu va talela ga cima kota “timbuti” hi kota ya lezvi va tshamako ka matiko lawa ma kalako ma nga se tshuka mava ni thomo ga ku kuzwa mahungu ya Mufumo. (Mat. 25:46) A Mulamuli wo lulama wa tiko gontlhe i khatala nguvhu hi vanhu lavo a ku hundza lezvi hina hi khatalisako zvona hi vona. A hi zvi tivi ku Jehovha i ta zvi mahisa kuyini zvilo kuxanisekeni ka hombe. Kuzvilava a vokari va vanhu lavo va tava ni thomo ga ku gondza xungetano hi Jehovha, va kholwa kakwe va tlhela va yima tlhelweni gakwe a cikhati leci a to ti basisa ka matiko. — Ezek. 38:16.
Andzhako ka kusangula ka kuxaniseka ka hombe, . . . zva koteka ku a vokari lava va to wona a zvimaho lezvo va cica ke?
16. Ka cigondzo ca hina ca Bhibhiliya, zvini hi zvi gondzileko xungetano hi Jehovha? (Wona ni mufota.)
16 Ka cigondzo ca hina ca Bhibhiliya, hi tivile lezvi Jehovha a gi nyikisako zvona lisima a wutomi ga vanhu. I nyikele wutomi ga N’wana wakwe kasi hontlheni hiva ni kutsumba ka ku hanya kala kupindzuka. (Joh. 3:16) Hontlheni hi li zwile a lirandzo la Jehovha. (Isa. 49:15) Jehovha wa tiva a mun’we ni mun’wani wa hina hi vito. Hi lisine, Jehovha wa hi tiva khwatsi laha ku loku hofa, a nga tlhela a hi vanga kambe, a mun’we ni mun’wani na a tshamisile zvalezvi a nga tshamisile zvona a tlhela a hi tlhelisela a maalakanyo wontlhe ma mahako ku hiva hina! (Mat. 10:29-31) Hikwalaho, hi na ni cigelo co zwala ca ku tsumba lezvaku a Papayi wa hina wa lirandzo wa le tilweni i ta lamula mun’we ni mun’wani wa hina hi ndlela yo mbhelela, ni yo ringanisela, ni ya wuxinji. — Jak. 2:13.
Hi nga tiyiseka lezvaku Jehovha i ta lamula mun’we ni mun’wani wa hina hi ndlela yo mbhelela, ni yo ringanisela, ni ya wuxinji (Woma paragrafo 16)
17. Zvini hi to bhula hi zvona ka ndzima yi landzelako?
17 A kuzwisisa loku ka kuswa ku maha ntiro wa hina wa kuchumayela wuva wa cihatla nguvhu ku hundza kale. Hikuyini hi wulako lezvo? Niku cini ci hi kucako ku simama hi chumayela mahungu ya manene na hi nga rereki? Hi ta bhula hi mihlamulo ya zviwutiso lezvi ka ndzima yi landzelako.
LISIMU 76 Xana zva ku tsakisa?
a Kasi ku wona mitlhamuselo ya ku hikuyini ku vileko ni kucica loku, wona a ndzima “U ranza ku maha lezo” ka Murindzeli wa 15 ka Março wa 2015, paj. 7-11.
b Andzhako ka kulovisiwa ka Bhabhuloni wa Hombe, a malandza wontlhe ya Jehovha ma ta ringiwa a cikhati leci ma to vhukelwa hi Goge wa Magoge. Ni wihi loyi a to yima ni vanhu va Nungungulu andzhako ka kulovisiwa ka Bhabhuloni wa Hombe, yenawu i ta ringiwa.
c TLHAMUSELO WA MIFOTA: A mifota leyi yi komba ku hikuyini a vokari va kalako va nga chikelelwi hi mahungu ya manene: 1) Wasati a tshamako lomu a wukhongeli ga tshinya ga lomu cipandzeni leco gi mahako ku a kuchumayela mahungu ya manene zviva ni mhango, 2) i sati ni nuna va hanyako lomu a mufumo wa politika wa tiko lego wu mahako ku a kuchumayela mahungu ya manene zviva ni mhango, ni 3) wanuna a tshamako kule nguvhu ka ku a zvi olovi ku chikela.
d TLHAMUSELO WA MIFOTA: A muswa wo kari a tsikileko lisine i alakanya lezvi a zvi gondzileko xungetano hi kulovisiwa ka “Bhabhuloni wa Hombe”. I boha ku wuya ka Jehovha gumesa a tlhela ka vapswali vakwe va Vakustumunyu. Loku a zvilo lezvo zvi humelela, zvi ta lava ku hi pimanyisa a wuxinji ni kuzwela wusiwana ka Papayi wa hina wa le tilweni hi tlhela hi tsaka hi lezvi a muwonhi loye a wuyileko.
