NDZIMA YA CIGONDZO N.° 10
A ku randza Jehovha zvi ta ku kuca ku bhabhatiswa
“Cini ci ndzi vhalelako a ku bhabhatiswa?” — MITI. 8:36.
LISIMU 37 Ndzi ta tirela Jehovha hi mbilu yontlhe
LEZVI HI TO GONDZA *
1-2. Hi kuya hi lezvi zvi kombiwako ka Mitiro 8:27-31, 35-38, cini ci kucileko a muEtiyopia lezvaku a bhabhatiswa?
WA ZVI lava ku bhabhatiswa kota mupizani wa Kristu? A lirandzo ni kubonga zvi kuca vanhu vo tala lezvaku va bhabhatiswa. Wona a cikombiso ca muEtiyopia wo kari a nga tirela a hosi ya cisati ya tiko gakwe.
2 A muEtiyopia loye zvalezvi a nga gondza lomu ka Mitsalo lezvaku i fanele ku bhabhatiswa i no tekela ku zvi maha. (Lera Mitiro 8:27-31, 35-38.) Cini ci mu kucileko? Zvi te dlunya lezvaku i wa yi nyika lisima a Mhaka ya Nungungulu hakuva i wa famba hi kareta na a lera mavhesi yo kari ya bhuku ga Isaya. Niku a cikhati Filipu a nga bhula naye, a wanuna loye i kombisile kubonga ka hombe hi lezvi Jesu a nga mu mahela. Kanilezvi, i wa yela yini Jerusalema? Hiku i wa mu randza Jehovha. Hi zvi tivisa kuyini lezvo? I wa ha hi ku suka hi Jerusalema ka ku khozela Jehovha. A muEtiyopia loye kuzvilava i wa tsikile a wukhongeli gakwe ga mabeleko a ti patsa ntsena ni lava va ti nyikeleko ka Nungungulu wa lisine. A lirandzo hi Jehovha leli li nga mu maha a ya Jerusalema hi laleli li mu kucileko kuba zambo gin’wani ga lisima ga ku bhabhatiswa a tlhela a maha mupizani wa Kristu. — Mat. 28:19.
3. Cini ci nga vhalelako munhu a ku a bhabhatiswa? (Wona a kwadru “ Hi yihi misava yi fanako ni mbilu ya wena?”)
3 A lirandzo hi Jehovha li nga ku kuca ku bhabhatiswa. Kanilezvi, a lirandzo li nga tlhela li ku vhalela a ku maha lezvo. Hi ndlela muni? Wona a zvikombiso zvo kari. Kuzvilava wa ma randza nguvhu a maxaka ya wena ni vanghana va nga hiko maKristu niku u nga ha karateka u alakanya lezvaku loku u bhabhatiswa va ta ku venga. (Mat. 10:37) Kutani u randza zvilo zvo kari lezvi Nungungulu a zvi vengako, niku zvi nga ha ku karatela a ku tsika a zvilo lezvo. (Lis. 97:10) Kutani u kulile na u patseka ka tifesta leti ti yelanako ni wukhongeli ga mawunwa niku kuzvilava ku na ni zvilo zvokari zvi nga ku tsakisa ka tifesta leto. Hikwalaho, zvi nga ku karatela a ku tsika ku maha zvilo lezvi zvi kalako zvi nga mu tsakisi Jehovha. (1 Kor. 10:20, 21) Makunu ku sala a ciwutiso leci: “Cini kutani himani ndzi mu randzako nguvhu?”
HIMANI HI FANELEKO KU MU RANDZA NGUVHU?
4. Hi cihi a cigelo ca hombe ci faneleko ku maha munhu a bhabhatiswa?
4 Ku na ni zvilo zvo tala zva zvinene zvaku u zvi randza ni ku zvi nyika lisima. Hi cikombiso, hambu a cikhati leci u nga kala u nga se sangula a ku gondza ni Vakustumunyu va Jehovha, kuzvilava u wa gi nyika nguvhu lisima a Bhibhiliya. Niku kuzvilava u wa hi ni lirandzo hi Jesu. Niku lezvi u nga tivana ni Vakustumunyu va Jehovha kuzvilava wa zvi randza a ku tshama navo. Kanilezvi a ku randza zvilo lezvo zva zvi nene a zvi faneli kuva zvona zvi ku mahako u lava ku ti nyikela ka Jehovha u tlhela u bhabhatiswa. A cigelo ca hombe ci faneleko ku ku kuca ku bhabhatiswa lirandzo la wena hi Jehovha Nungungulu. Loku u randza Jehovha a ku hundza zvontlhe u nga ta tsika nchumu kutani munhu a ku vhalela a ku mu tirela. A lirandzo hi Jehovha li ta ku kuca a ku bhabhatiswa li tlhela li ku vhuna ku simama u tsumbekile andzhako ka loku u bhabhatisilwe.
5. Hi ta bhula hi yini ka ndzima leyi?
5 Jesu i wulile lezvaku hi fanele ku randza Jehovha hi mbilu ya hina yontlhe, ni muhefemulo wa hina wontlhe, ni kupima ka hina kontlhe, ni ntamu wa hina wontlhe. (Mar. 12:30) U nga gondzisa kuyini a ku mu randza nguvhu Jehovha ni ku mu komba a cichavo ca hombe? A ku ehleketa hi lezvi Jehovha a hi randzisako zvona zvi hi kuca ku hinawu hi mu randza. (1 Joh. 4:19) Hikwalaho, ka ndzima leyi hi ta bhula hi lezvi u faneleko ku maha kasi u mu randza nguvhu Jehovha u tlhela u bhabhatiswa?
6. Hi kuyelana na Va Le Roma 1:20, hi yihi a yin’we ya tindlela u nga gondzako ha yona xungetano hi Jehovha?
6 Gondza hi Jehovha ka zvivangwa. (Lera Va Le Roma 1:20; Kuv. 4:11) Ehleketa hi tisinya ni zvihari lezvi Jehovha a zvi vangileko ni lezvi zvi kombisako zvona lezvaku i na ni wutlhari. Gondza kutsongwani hi ndlela yo hlamalisa leyi a miri wa wena wu nga vangiswa zvona. (Lis. 139:14) Ehleketa kambe hi ntamu lowu Jehovha a wu chelileko laha ka gambo. Niku a gambo yin’we ya tinyeleti ta talela ga cima ti nga tilweni. * (Isa. 40:26) Loku u ehleketa hi lezvi Jehovha a zvi vangileko u taya u mu kombisa nguvhu cichavo. Hambulezvo, a ku tiva lezvaku Jehovha i na ni wutlhari ni ntamu zvova cipandze ntsena ca ciseketelo ca wuxaka ga wena naye. Kanilezvi kasi uva ni lirandzo lo tiya hi Jehovha u fanele ku tiva zvin’wani xungetano hi yena.
7. Zvini u faneleko ku tiyiseka ka zvona kasi u mu randza nguvhu Jehovha?
7 U fanele ku tiyiseka lezvaku Jehovha wa khatala hi wena. Zva ku karatela a ku kholwa lezvaku a Muvangi wa tilo ni misava wa zvi tiva lezvaku u kona niku wa khatala hi wena? Loku zvi hi lezvo, alakanya lezvaku Jehovha a nga “kule ka mun’we ni mun’wani wa hina.” (Miti. 17:26-28) Yena “wa kamba timbilu tontlhe” niku i ku tsumbisa zvo fana ni lezvi Dhavhidha a nga byela Solomoni aku: “Loku wena u mu hlota, u ta mu kuma.” (1 Kro. 28:9) Hi lisine, a cigelo ci ku mahako u gondza Bhibhiliya hi lezvi u ‘kokilweko hi Papayi’. (Joh. 6:44) A ku tiva zvontlhe lezvi Jehovha a ku mahelako zvi ta maha ku a lirandzo la wena hi yena li kula.
8. Hi zvi kombisa kuyini lezvaku hinawu ha mu randza Jehovha?
8 A yin’we ya tindlela ta ku komba lezvaku hinawu ha mu randza Jehovha ku bhula naye hi mukhongelo. A lirandzo la wena hi Jehovha li ta kula a cikhati leci u bhulako naye xungetano hi kukarateka ka wena niku mu bonga hi zvontlhe a ku mahelako. A wunghana ga wena na Jehovha gi ta tiya loku u wona lezvi a hlamulisako zvona a mikhongelo ya wena. (Lis. 116:1) U ta tiyiseka lezvaku wa ku zwisisa. Kanilezvi kasi u maha a munghana wa hombe wa Jehovha zvi lava ku u tiva lezvi a zvi randzako, lezvi a zvi vengako, ni ndlela leyi a mahako hi yona zvilo. Niku u fanele ku tiva lezvi a zvi lavako ka wena. I ndlela yin’we basi u nga tivako ha yona a zvilo lezvo, ku nga ku gondza a Mhaka yakwe, a Bhibhiliya.
A ku gondza Bhibhiliya hi yona ndlela ya yi nene ya ku tshama kusuhani na Jehovha ni ku tiva lezvi a zvi lavako ka hina (Wona ndzimana 9) *
9. U nga zvi kombisa kuyini lezvaku wa gi nyika lisima a Bhibhiliya?
9 Gondza a ku yi nyika lisima a Mhaka ya Nungungulu, a Bhibhiliya. A Bhibhiliya hi gona goce gi nga ni lisine xungetano hi Jehovha ni kungo gakwe hi wena. U nga komba lezvaku wa gi nyika lisima a Bhibhiliya hi ku gi lera siku ni siku, hi ku longiselela a cigondzo ca wena ca Bhibhiliya, ni ku tirisa lezvi u zvi gondzako. (Lis. 119:97, 99; Joh. 17:17) U nawo a longoloko wa ku lera a Bhibhiliya? Wa wu landzela hi ku lera a Bhibhiliya siku ni siku?
10. Cini ci mahako ku a Bhibhiliya giva go hlawuleka nguvhu?
10 A cin’we ca zvilo zvi mahako ku a Bhibhiliya giva go hlawuleka nguvhu hi ku gi na matimu ya Jesu ma hlawutelweko hi vanhu va nga zvi wona hi matihlo. Hi gona goce gi tlhamuselako lezvi Jesu a ku maheleko. A cikhati leci u to tiva lezvi Jesu a zvi wulileko ni ku zvi maha kuzvilava u ta kuceka ku maha wunghana naye.
11. Zvini zvi to ku vhuna a ku gondza ku randza Jehovha?
11 Gondza a ku randza Jesu niku a lirandzo la wena hi Jehovha li ta kula. Hikuyini? Hakuva Jesu i pimanyisile a matshamela ya Papayi wakwe hi kumbhelela. (Joh. 14:9) Hikwalaho loku u tiva zvotala xungetano hi Jesu, u ta mu tiva khwatsi Jehovha u tlhela u mu nyika lisima. Ehleketa hi kuzwela wusiwana loku Jesu a ku kombisileko hi lava va nga wonelwa hasi hi van’wani hi kota ya wusiwana, mababyi, ni ku vhumala ntamu. Ehleketa kambe hi wusungukati ga wutomi ga siku ni siku legi Jesu a ku nyikileko ni lezvi a wutomi ga wena gi chukwatisisako zvona loku u landzela a wusungukati lego. — Mat. 5:1-11; 7:24-27.
12. A cikhati leci u gondzako hi Jesu, zvini lezvi kuzvilava u to kuceka ku maha?
12 A lirandzo la wena hi Jesu li ta tiya a cikhati leci u ehleketako nguvhu xungetano hi muphahlo lowu a wu mahileko kasi a zviwonho zva hina zvi tsetselelwa. (Mat. 20:28) Loku u zwisisa lezvaku Jesu i zile afa hi kota ya wena, kuzvilava zvi ta ku kuca ku ti sola ka zviwonho zva wena u tlhela u lava ku Jehovha a ku tsetselela. (Miti. 3:19, 20; 1 Joh. 1:9) Laha u to mu randza nguvhu Jehovha na Jesu u ta tizwa kusuhani navo, niku u ta lava ku tshama ni vanhu lava vonawu va randzako Jehovha na Jesu.
13. Zvini lezvi Jehovha a to ku nyika?
13 Gondza a ku randza ngango wa Jehovha. Kuzvilava a maxaka ya wena ni vanghana va nga hiko maKristu va nga ta zvi zwisisa ku hikuyini u lavako ku ti nyikela ka Jehovha. Hambu ku tlhela va ku vhukela. Jehovha i ta ku vhuna hi ku ku nyika vamakabye va cinuna ni va cisati laha bandleni kota ngango wa wena. Loku u tshama kusuhani ni ngango lowo wa moya, va ta ku randza va tlhela va ku seketela. (Mar. 10:29, 30; Mah. 10:24, 25) Hi kufamba ka cikhati, kuzvilava a zviro zva ngango wa wena zvi ta ti patsa na wena mu tirela Jehovha ni ku hanya hi milayo yakwe. — 1 Ped. 2:12.
14. Hi kuya hi lezvi zvi wuliwako ka 1 Johani 5:3, zvini u zvi polileko xungetano hi milayo ya Jehovha?
14 Gondza a ku yi nyika lisima a milayo ya Jehovha u tlhela u hanya hi yona. Na u nga se mu tiva Jehovha, kuzvilava u wa ti vekele milayo ya wena ya mahanyela, kanilezvi zvezvi wa zvi wona lezvaku a milayo ya Jehovha hi yona ya yi nene nguvhu. (Lis. 1:1-3; lera 1 Johani 5:3.) Ehleketa hi wusungukati legi a Bhibhiliya gi nyikako a vanuna, ni vasati, ni vapswali ni vana. (Efe. 5:22–6:4) A ngango wa wena wa tsaka hi lezvi u tirisako a wusungukati lego? U munhu wa mahanyela ma nene hi lezvi u ingisako wusungukati ga Jehovha xungetano hi ku hlawula khwatsi a vanghana? U munhu wo tsaka? (Mav. 13:20; 1 Kor. 15:33) Kuzvilava a hlamulo wa zviwutiso lezvi i ina.
15. Zvini u nga mahako loku u lava ku tiva lezvi u nga ma tirisisako zvona a matshinya ya milayo ya Bhibhiliya?
15 Ka zvikhati zvo kari zvi nga ku karatela a ku tiva lezvi u nga ma tirisisako zvona a matshinya ya milayo ya Bhibhiliya lawa u gondzako. Hi cigelo leco Jehovha a tirisako a hlengeletano yakwe lezvaku yi humesa mabhuku ma tlhamuselako a Bhibhiliya ma tlhela ma ku vhuna a ku tiva zva zvi nene ni zvo biha. (Mah. 5:13, 14) Loku u lera u tlhela u gondza a mahungu lawo, u ta wona lezvi ma vhunisako zvona ni laha u nga ma tirisako kona wutomini ga wena. Niku lezvo, zvi nga tlhela zvi ku maha u navela kuva ciro ca hlengeletano ya Jehovha.
16. Jehovha i va xaxametisa kuyini a vanhu vakwe?
16 Gondza a ku randza ni ku seketela a hlengeletano ya Jehovha. Jehovha i xaxameta a vanhu vakwe lomu mabandleni; Jesu, a Nwana wakwe, hi yena a hloko ya mabandla wontlhe. (Efe. 1:22; 5:23) Jesu i yimisile a ntlawa wa vavanuna va totilweko kasi va rangela a ntiro lowu yena a lavako lezvaku wu mahiwa. Jesu i te a ntlawa lowo i “nandza go tsumbeka ni go tlhariha” niku a vavanuna lavo va wu nyika lisima a ntiro va nga nawo wa ku ku gisa ni ku ku vhikela hi tlhelo ga moya. (Mat. 24:45-47) A yin’we ya tindlela leti a nandza go tsumbeka gi ku khatalelako hi yona ku gi tiyiseka lezvaku ka yimisiwa a vavanuna va ringanelwako lezvaku vava madhota. (Isa. 32:1, 2; Mah. 13:17; 1 Ped. 5:2, 3) A madhota ma ti yimisele ku maha zvontlhe ma zvi kotako kasi ma ku chavelela ni ku ku vhuna a ku kulisa a wunghana ga wena na Jehovha. Kanilezvi a nchumu wa lisima nguvhu ma nga ku mahelako ku ku vhuna a ku gondzisa van’wani xungetano hi Jehovha. — Efe. 4:11-13.
17. Mayelano na Va Le Roma 10:10, 13, 14, hikuyini hi bhulako ni van’wani xungetano hi Jehovha?
17 Vhuna van’wani lezvaku va gondza ku randza Jehovha. Jesu i byelile a valandzeli vakwe lezvaku va gondzisa van’wani xungetano hi Jehovha. (Mat. 28:19, 20) Ha ingisa a cileletelo leco hakuva ha zvi tiva lezvaku hi fanele ku ci ingisa. Kanilezvi loku a lirandzo la wena hi Jehovha li kula, u ta tizwa hi ndlela yo fana ni leyi mupostoli Pedro na Johani va nga tizwa hi yona laha ka kuza va wula lezvi: “Hi nga ta tsika ku wulawula hi zvilo lezvi hi zvi wonileko ni ku zvizwa.” (Miti. 4:20) Zvilo zvitsongwani zvi tsakisako nguvhu a ku fana ni ku gondzisa munhu a ku a randza Jehovha. Hi nga alakanyela a litsako la hombe leli muvhangeli Filipu a vileko nalo a cikhati a nga vhuna a muEtiyopia lezvaku a gondza lisine la lomu ka Mitsalo a tlhela a bhabhatiswa! Loku u pimanyisa Filipu u tlhela u ingisa a cileletelo ca Jesu ca ku chumayela u komba lezvaku u lava kuva Kustumunyu wa Jehovha. (Lera Va Le Roma 10:10, 13, 14.) Kala laha, kuzvilava wa ti wutisa a ciwutiso co fana ni leci a muEtiyopia a nga wutisa caku: “Cini ci ndzi vhalelako a ku bhabhatiswa?” — Miti. 8:36.
18. Zvini hi to bhula hi zvona ka ndzima yi landzelako?
18 A zambo ga lisima nguvhu u to giba wutomini ga wena hi loku u maha a ciboho ca ku u bhabhatiswa. Kota gi nga zambo ga lisima, u fanele ku ehleketa khwatsi hi lezvi a ku bhabhatiswa zvi wulako zvona. Zvini u faneleko ku zvi tiva xungetano hi kubhabhatiswa? Zvini u faneleko ku maha na u nga se bhabhatiswa? Zvini u faneleko ku maha andzhako ka loku u bhabhatisilwe? A zviwutiso lezvi zvi ta hlamuliwa ka ndzima yi landzelako.
LISIMU 2 Hi wena wece u nga Jehovha
^ nzi. 5 A vokari va randzako Jehovha va kanakana lezvaku va longile a ku bhabhatiswa kota Vakustumunyu vakwe. Loku wenawu u ti zwisa lezvo, a ndzima leyi yi ta ku vhuna ku u ehleketa hi zvilo zvo kari u nga mahako kasi u ringanelwa hi kubhabhatiswa.
^ nzi. 6 Kasi ku kuma zvin’wani zvikombiso, wona a broxura A Vida — Teve um Criador? e A Origem da Vida — Cinco Perguntas Que Merecem Resposta.
^ nzi. 60 TLHAMUSELO WA MUFOTA: Makabye wa cisati a mu nyikako a ciphephana a nhanyana a nga laha kuxaviseni.
