A vokari lava va nga hi va lixaka la Levhi, na va nga tiri kota vapristi, va wa nyikiwa yin’wani mitiro, yo kota ku tira kota varindzeli. Va wa rangelwa hi hosana ya varindzeli va tempeli. Filu, a mutsali wa matimu wa muJudha, i tlhamusele lezvi zvi nga mahiwa hi varindzeli lavo. I te: “A [vaLevhi] vo kari va wa yimisiwa lomu tinyangweni tontlhe va tira kota vagadhi. A van’wani va wa vekiwa [lomu tempeleni] mahlweni ka wutshamu go basa kasi ku nga ngheni munhu a nga kala a nga hi na fanelo ya ku nghena, hambu loku a no phazama. A van’wani va wa tshama hi ku fambafamba lomu tempeleni kasi va yi wonelela. Va wa cicana; ku wa hi ni lava va nga tira ni wusiku ni lava va ni mumu.”

A varindzeli lavo va wa rumiwa hi Tribhunali ya Hombe. A ntlawa lowu wa vaJudha hi wona basi wu nga vhumelelwa hi mufumo wa Roma lezvaku wu khoma a zvipadha.

Joachim Jeremias, a tlhari ya ku tlhamusela Bhibhiliya, i wulile lezvaku “a cikhati leci a varindzeli va nga khoma Jesu i va wutisile lezvaku hikuyini va nga kala ku mu khoma a cikhati leci a nga gondzisa lomu tempeleni. (Mat. 26:55) Jesu na a nga va wutisangi a ciwutiso leco loku ku wa hi lezvaku va wa nga hi varindzeli va tempeli”. A tlhari leyi yi kholwa lezvaku lava va nga rumiwa a kuya khoma Jesu hi khati go sangula vonawu va wa hi varindzeli va tempeli. (Joh. 7:32, 45, 46) Hi ndzhako ka cikhati, a Tribhunali ya Hombe yi rumile a varindzeli ni hosana yabye lezvaku va ya khoma a vapizani va Jesu va wuya navo. Niku zvi wonekisa ku khwatsi hi vona a varindzeli va tempeli va nga kokovisela Pawule va huma naye lomu tempeleni. — Miti. 4:1-3; 5:17-27; 21:27-30.