1. Hikuyini Jesu a nga kombela Jehovha lezvaku a vhikela vapizani vakwe?

KA WUSIKU go gumesa ga Jesu laha misaveni, i wa kari alakanyela a zvikarato lezvi a vapizani vakwe va nga wa ta sala va kumana nazvo. Makunu lezvi a nga va randza, i no kombela a Papayi wakwe ‘lezvaku a va vhikela hi kota ya loyi wa kubiha.’ (Joh. 17:14, 15) Jesu i wa zvi tiva lezvaku loku a taya tilweni, Sathani i wa ta simama kulwa ku ku phum ni vontlhe lava va lavako ku tirela Jehovha. Hi kota ya lezvo, zva dlunyateka ku a vanhu va Jehovha va lava ku vhikelwa.

2. Zvini hi nga mahako kasi Jehovha a hlamula mikhongelo ya hina?

² Jehovha i hlamulile a mukhongelo wa Jesu hakuva wa mu randza a N’wana wakwe. Loku hi maha zvontlhe hi zvi kotako kasi ku tsakisa Jehovha, i ta hi randzawu a tlhela a hi vhikela loku hi mu kombela ku a hi vhikela. Jehovha kota Papayi a randzako va ngango wakwe, i ta simama ku hlayisa vana vakwe hi lirandzo. Phela loku a nga mahi lezvo, a vito gakwe gi ta chaka.

3. Hikuyini inyamutlha zvi lavekako ku Jehovha a hi vhikela?

³ Zvezvi, hi kona zvi lavekako nguvhu a ku Jehovha a hi vhikela a ku hundza kale. Phela Sathani i papaxilwe le tilweni ata laha misaveni “na a zangarile” a pswhuka ni matihlo. (Kuv. 12:12) I zile a wonha ni kupima ka valala va hina laha ka kuza va alakanya lezvaku a cikhati va hi vhukelako, vo “tirela Nungungulu.” (Joh. 16:2) A van’wani va nga kholwiko ka Nungungulu, va hi xanisa hi lezvi hi kalako hi nga pimanyisi a mahanyela ya vanhu va tiko legi. Kani cini ci mahako ku a vanhu va hi xanisa, a hi faneli ku chava. Hikuyini? Hakuva a Mhaka ya Nungungulu yi wula lezvi: “A Hosi yi tsumbekile, yi ta mu tiyisa ni ku mu vhikela ka loyi wa kubiha.” (2 Tes. 3:3) Makunu, Jehovha i hi vhikelisa kuyini? A hi woneni tindlela timbiri.

4. Hi kuya hi Va Le Efesusi 6:13-17, zvini lezvi Jehovha a hi nyikileko kasi ku hi vhikela?

⁴ Jehovha i hi nyikile matlhari ya moya ma nga hi vhikelako yimpini leyi hi lwako na Sathani. (Lera Va Le Efesusi 6:13-17.) A matlhari lawo ya moya ma tiyile niku a ma tshuki ma tsandzeka ku hi vhikela. Kanilezvi kasi ma hi vhikela, zvi lava ku hi boha wontlhe — ina, hi boha hi nga tlhatlhi ne gin’we. Makunu, a tlhari gin’we ni gin’wani gi yimela yini? A hi zvi woneni.

5. Cini a libhandi la lisine, niku hikuyini hi faneleko ku boha?

⁵ Libhandi la lisine: Li yimela lisine li nga lomu ka Mhaka ya Nungungulu, a Bhibhiliya. Hikuyini hi faneleko ku boha a libhandi leli? Hi ku Sathani i “papayi wa mawunwa.” (Joh. 8:44) Ku hundza malembe yo tala nguvhu na a hemba niku i zvi kotile ku ‘kanganyisa tiko gontlhe’! (Kuv. 12:9) Kanilezvi, a lisine li nga lomu ka Bhibhiliya la hi vhikela kasi hi nga pengisiwi. Hi bohisa kuyini a libhandi leli lo fananisa? Hi maha lezvo hi ku gondza lisine hi Jehovha, hi ku mu khozela “hi moya ni lisine,” ni ku tsumbeka ka zvilo zvontlhe wutomini ga hina. — Joh. 4:24; Efe. 4:25; Mah. 13:18.

6. Cini a cikatawu ca simbi ca kululama, niku hikuyini hi faneleko ku boha?

⁶ Cikatawu ca simbi ca kululama: Ci yimela a milayo ya Jehovha yo lulama. Hikuyini hi faneleko ku boha a cikatawu ca simbi ca kululama? A cikatawu ca simbi ca musochwa, ci vhikela a mbilu yakwe kasi yi nga tlhaviwi. A cikatawu ca simbi ca kululama, conawu ci vhikela a mbilu ya hina yo fananisa kasi hi nga cici wumunhu ga hina hi landzela mahanyela ya tiko legi. (Mav. 4:23) Jehovha i rindzela lezvaku hi mu randza hi tlhela hi mu tirela hi mbilu ya hina yontlhe. (Mat. 22:36, 37) Makunu, Sathani i zama ku a mbilu ya hina yi avanyeka, hi ku hi kucetela ku hi randza zvilo zva tiko legi, lezvi Jehovha a zvi nyenyako. (Jak. 4:4; 1 Joh. 2:15, 16) Loku a zvi tsandzeka ku hi kucetela, o hi dzukisela kasi hi maha lezvi Jehovha a kalako a nga zvi lavi.

7. Hi bohisa kuyini a cikatawu ca simbi ca kululama?

⁷ Hi boha a cikatawu ca simbi ca kululama hi ku hanya hi milayo ya Jehovha yo lulama wutomini ga hina. (Lis. 97:10) A van’wani va nga alakanya lezvaku a milayo ya Jehovha yo va vhalela ku maha lezvi va zvi lavako. Kanilezvi, loku hi wo tsika ku hanya hi milayo leyo wutomini ga hina, hi wa to fana ni musochwa a tlhatlhako cikatawu cakwe ca simbi na valwa yimpi hi ku ti byela lezvaku ca bindza. A wu zvi woni ku loku a musochwa i wo maha lezvo zvi wa tava wupumbu! Ka lava va randzako Jehovha, a milayo yakwe “a yi karati”; yo va vhikela. — 1 Joh. 5:3.

8. Hi yihi ndlela ya ku boha zvilato?

⁸ Pawule i tlhela a hi kuca ku boha zvilato zva mahungu ya ma nene ya kurula. Hi magezu man’wani, hi fanele ku tshama hi longile ku chumayela mahungu ya ma nene ya Mufumo. Loku hi bhulela van’wani a mahungu ya Bhibhiliya, a kukholwa ka hina ko tiya. A zvo ku tiyisa ku wona lezvaku ka zviyimo zvontlhe a vanhu va Jehovha misaveni yontlhe va tshama hi ku hlota tindlela ta ku chumayela — ku ngava loku va hi ntirweni, cikoleni, lomu mamerkadho, hi muti ni muti; loku va hi lomu ko xava zvilo, loku va vhuxela maxaka, loku va kotlana ni munhu va mu tivako, ni loku zvi boha ku va tshama laha kaya hi zvigelo zvo kari. Loku ho tshuka hi chava hi tsika ku chumayela, hi wa ta fana ni musochwa a tlhatlhako zvilato zvakwe na valwa yimpi; zvi wa ta olova ku a tlhaviwa; niku ka ciyimo leco, zvi wa ta mu karatela kulwa, ni ku ti vhikela, ni ku ingisa zvileletelo zva komandante wakwe.

9. Hikuyini hi faneleko ku khoma a citlhangu ca hombe ca kukholwa?

 ⁹ Citlhangu ca hombe ca kukholwa: Ci yimela kukholwa loku hi nga nako hi Jehovha. A hi kanakani lezvaku Jehovha i ta maha zvontlhe lezvi a nga tsumbisa. A kukholwa loko ku ta hi vhuna ku ‘tima a mipaxa yontlhe yi vhurako ya loyi wa kubiha.’ Hikuyini hi faneleko ku khoma a citlhangu leco ca hombe? Hi ku ci hi vhikela ku hi nga pengisiwi hi lezvi zvi gondzisiwako hi lava va vhukelako lisine kutani hi nga mbheli ntamu loku hi poyilelwa. Loku hi nga hi na kukholwa, hi nga ta zvi kota ku yima hi tiya loku a van’wani va hi kucetela ku nga ingisi milayo ya Jehovha. Khati ni khati hi tiyako le ntirweni kutani cikoleni hi ala ku maha lezvi Jehovha a zvi nyenyako, a kukholwa ka hina ko hi vhikela. (1 Ped. 3:15) Khati ni khati hi nga vhumeliko a ntiro wo holela timali, lowu wu nga wa ta hi colopetela ku khozela Jehovha, a kukholwa ka hina ko hi vhikela. (Mah. 13:5, 6) Khati ni khati hi simamako ku tirela Jehovha hambu loku hi xanisiwa, a kukholwa ka hina ko hi vhikela. — 1 Tes. 2:2.

10. Cini a cihuko ca simbi ca kuhanyiswa, niku hikuyini hi faneleko ku boha?

¹⁰ Cihuko ca simbi ca kuhanyiswa: Kutsumba loku Jehovha a hi nyikako — a ku tsumba lezvaku  Jehovha i ta va chachazela vontlhe lava va mahako kurandza kakwe, niku hambu loku hifa, i ta hi vhuxa. (1 Tes. 5:8; 1 Tim. 4:10; Tit. 1:1, 2) A ku fana ni lezvi a cihuko ca musochwa ci vhikelako a hloko yakwe, a cihuko ca simbi ca kuhanyiswa, ci vhikela kupima ka hina. Hi ndlela muni? A kutsumba loku hi nga nako, ku hi vhuna ku veka kupima ka lezvi Jehovha a hi tsumbisako, ku tlhela ku hi vhuna ku hi nga reriwi hi zvikarato. Hi bohisa kuyini a cihuko leco ca simbi? Hi maha lezvo hi ku zwananisa kupima ka hina ni mawonela ya Nungungulu. Hi cikombiso, a hi tsumbi titshomba, hakuva ha zvi tiva ku a ti tsumbeki. Kanilezvi, hi tsumba Nungungulu. — Lis. 26:2; 104:34; 1 Tim. 6:17.

11. Cini a cipadha ca moya, niku ci hi vhunisa kuyini?

¹¹ Cipadha ca moya: I Mhaka ya Nungungulu, a Bhibhiliya. A cipadha leco ci na ni ntamu wa ku tsema maalakanyo wontlhe ya hava, ni ku tlhatlhisa vanhu lezvaku va nga kholwi tigondzo ta mawunwa, ni lezvaku va nga landzeli mahanyela yo biha. (2 Kor. 10:4, 5; 2 Tim. 3:16, 17; Mah. 4:12) Hi gondza ku ci tirisa khwatsi a cipadha leco ka cigondzo ca hina wutsumbu ni ka lezvi hi gondzisiwako hi hlengeletano ya Nungungulu. (2 Tim. 2:15) A handle ka matlhari ya moya, Jehovha i hi vhikela hi ndlela yin’wani ya ntamu nguvhu. I zvi mahisa kuyini?

12. Cini cin’wani ci lavekako kasi hi hlula, hikuyini?

¹² A musochwa wa wutlhari wa zvi tiva khwatsi ku a nge zvi koti ku ma hlula yece a masochwa yo tala ya ntamu. Zvi lava ku a vhuniwa hi masochwa-kuloni. Na hinawu, Sathani ni lava va mu landzelako a hi nge zvi koti a ku va hlula hoce. Zvi lava ku hi vhuniwa hi vamakabye va hina. Jehovha i hi nyikile “vamakabye” misaveni yontlhe lava va nga tlhelweni ga hina kasi ku hi vhuna. — 1 Ped. 2:17.

13. Hi kuya hi Mahebheru 10:24, 25, hi vhunekisa kuyini hi mitlhangano ya bandla?

¹³ A yin’we ya tindlela ta ku hi vhuniwa hi vamakabye kuya mitlhanganweni. (Lera Mahebheru 10:24, 25.) Loku hi mbhela ntamu— kota lezvi hontlheni zvi tshukako zvi hi humelela — a kuya mitlhanganweni zvi nga hi vhuna nguvhu. A cikhati leci a vamakabye va hlamulako na zvi huma mbilwini zva hi tiyisa. A tikanelo ti seketelwako ka Bhibhiliya ni mikombiso leyi va mahako, zvi hi nyika ntamu wa ku simama hi tirela Jehovha. A mabhulo yo aka lawa hi nga nawo a mitlhangano na yi nga se sangula ni loku yi mbhelile, ma hi tiyisa. (1 Tes. 5:14) Ahandle ka lezvo, a mitlhangano ya hina yi hi vhululela ndlela ya ku kuma litsako la ku vhuna van’wani. (Miti. 20:35; Rom. 1:11, 12) A mitlhangano ya hina yi hi vhuna hi tindlela tin’wani kambe. A yin’we ya kona, ku gondza ku yi tirisa khwatsi a Feramenta ya hina ya ku gondzisa hi yona. Hikwalaho, longisela khwatsi a mitlhangano. Loku yi kari yi famba, ingisela khwatsi. Loku yi mbhelile, tirisa lezvi u nga gondza. Loku u maha lezvo, u tava “musochwa wa mu nene wa Kristu Jesu.” — 2 Tim. 2:3.

14. Civhuno muni cin’wani hi nga naco?

¹⁴ Ku na ni tingilozi ta talela ga cima ti hi vhunako kambe. Hi nga alakanya lezvi a ngilozi yin’we basi yi zvi kotileko ku maha! (Isa. 37:36) Makunu, ahati a tingilozi ta talela ga cima ke, zvini ti nga wa ta zvi kota ku maha? A ku na munhu hambu dhimoni gi nga ni ntamu wa ku hlula tingilozi ta Jehovha. Jehovha i na ni ntamu wa hombe nguvhu. Hikwalaho, loku a makabye mun’we basi a hi na Jehovha, a nga hlula valala va hina, hambu va no talisa kuyini. (Vala. 6:16) Lelo lisine lo tiya! Loku u  tshuka u chava lezvi zvi wuliwako kutani ku mahiwa hi mutiri-kuloni, cigondzani-kuloni, kutani xaka, alakanya a mhaka leyo. U nga rivali lezvaku a wulwi wece a yimpi leyi. Jehovha i ta ku vhuna, hakuva u maha lezvi a zvi lavako.

15. Hi kuya hi Isaya 54:15, 17, hikuyini Sathani ni lava va mu seketelako va zvi tsandzekako ku nyimisa ntiro wa kuchumayela wa vanhu va Nungungulu?

¹⁵ Ku na ni zvigelo zvo tala zvi mahako ku a vanhu va tiko legi gi fumelwako hi Sathani va hi zonda: A hi ti ngheniseli ka politika, a hilwi tiyimpi kambe. Hi vhuna vanhu a ku tiva vito ga Nungungulu, hi chumayela lezvaku a Mufumo wakwe hi wona woce wu to tisa kurula, hi seketela milayo yakwe yo lulama hi tlhela hi hanya hi yona. Hi vhuna vanhu a ku tiva lezvaku loyi a fumako tiko legi i bihile zva cima niku i hemba zva ku lomu kaya ku hava. (Joh. 8:44) Hi tlhela hi chumayela lezvaku zvezvinyana a tiko ga Sathani gi ta lovisiwa. Hambulezvo, Sathani ni lava va mu seketelako va nga ta tshuka va zvi kota ku hi tsikisa ku chumayela. Kanilezvi, hi ta simama ku dhumisa Jehovha, na hi tirisa ni cihi ci kotekako. Hambu lezvi Sathani a nga ni ntamu, a nga se zvi kota ne a nga ta tshuka a zvi kota ku vhalela vanhu laha misaveni lezvaku va tiva mahungu ya Mufumo. Sathani i zvi tsandzeka hakuva hi vhikelwa hi Jehovha. — Lera Isaya 54:15, 17.

16. Jehovha i ta va vhikelisa kuyini a vanhu vakwe kuxanisekeni ka hombe?

¹⁶ Makunu, zvini hi zvi rindzelako? Kuxanisekeni ka hombe, Jehovha i ta hi vhikela hi tindlela timbiri to hlamalisa. Yo sangula, Jehovha i ta vhikela malandza yakwe yo tsumbeka a cikhati leci a to maha ku a tihosi ta misava ti lovisa Bhabhuloni wa Hombe, a wukhongeli gontlhe ga mawunwa. (Kuv. 17:16-18; 18:2, 4) I ta guma a hi vhikela a cikhati leci a to lovisa a zvipandze lezvi zvi to sala zva tiko ga Sathani hi Armagedhoni. — Kuv. 7:9, 10; 16:14, 16.

17. Hi vhunekisa kuyini loku hi tiyisa wunghana ga hina na Jehovha?

¹⁷ Loku a wunghana ga hina na Jehovha gi tshama gi tiyile, a ku na nchumu wo biha a to hi mahela Sathani, lowu wu to hi lovisa. Hi lisine, hi yena a to lova kala kupindzuka. (Rom. 16:20) Hikwalaho, boha matlhari wontlhe ya moya — u nga tshuki u tlhatlha ne gin’we! U nga zami kulwa wece na Sathani ni tiko gakwe. Vhuna vamakabye u tlhela u ingisa milayo ya Jehovha. Loku u maha lezvo, u nga chavi nchumu; Jehovha, a Papayi wa wena wa le tilweni, loyi a ku randzako, i ta ku tiyisa a tlhela a ku vhikela. — Isa. 41:10.