A vokari va lerako a matimu lawa hi cipswhati, va ti maha a ciwutiso leco. Kanilezvi a mavhesi lawa ma wulawula hi vavanuna vambiri vo hambana va nga hi ni vito lego gaku Mefibhoxete, niku hi nga gondza cokari hi ku hlolisisa lezvi zvi nga humelela.

Sawule, a hosi ya Izrayeli, i wa hi ni 7 wa vana va vafana ni vambiri va vanhanyana. A matewula yakwe ku wa hi Jonatani. Sawule no gumesa ava ni n’wana waku hi Mefibhoxete, a nga pswaliwa hi sati wakwe wa mutsongwani wa ku hi Rizpa. Kasi lezvo, Jonatani yenawu i wa hi ni n’wana waku hi Mefibhoxete. Hikwalaho, hosi Sawule i wa hi ni n’wana waku hi Mefibhoxete ni zukulu waku hi Mefibhoxete.

Ka khati go kari, Hosi Sawule i no vhukela a vaGibheyoni, a zama ku dayela vontlhe. Zvi wonekisa ku khwatsi a votala va delwe futsi. Lezvo hakunene zvi wa bihile. Hikuyini? Hi ku masikwini ya Joxuwa, a madhota ya vaIzrayeli ma wa mahile civhumelwano ni vaGibheyoni caku va ta hanya navo hi kurula. — Jox. 9:3-27.

A civhumelwano leco ci wa ha tira hambu masikwini ya Hosi Sawule. Hambulezvo, a hosi yi no tshova civhumelwano leco, yi zama ku hihirita a vaGibheyoni. Lezvo zvi mahile ku ‘Sawule ni yindlu yakwe’ vava ni ‘nandzu wa nkhata’. (2 Sam. 21:1) Hi kugumesa, Dhavhidha i no sangula ku fuma. A vaGibheyoni lava va nga ha hanya va no ya mu bikela a cihoxo leco ca hombe. Dhavhidha i no va wutisa ku a nga wu hlazvisa kuyini a nandzu lowo wa hombe wu vangilweko hi Sawule kasi Jehovha a katekisa a tiko. Wutshan’wini ga ku kombela mali, a vaGibheyoni va no kombela ku va va nyika 7 wa vana va wanuna ‘loyi a bohileko cikungo ca ku va lovisa’ kasi va va daya. (Mitse. 35:30, 31) Dhavhidha i no vhumela cikombelo cabye. — 2 Sam. 21:2-6.

Ka cikhati leco, Sawule na Jonatani va wa file yimpini, kanilezvi a n’wana wa Jonatani, Mefibhoxete, i wa ha hanya. I wa limele hi kota ya mhango yi mu humeleleko na a ha hi n’wanana, hikwalaho a nga patsekangi ka tsima ga kokwani wakwe ga ku lava ku hihirita vaGibheyoni. Dhavhidha i wa mahile civhumelwano na Jonatani, leci ci nga wa ta vhuna vana vakwe, a ku patsa na Mefibhoxete. (1 Sam. 18:1; 20:42) A matimu ma wula lezvi: ‘A hosi [Dhavhidha] yi no ponisa Mefibhoxete n’wana Jonatani wa Sawule, hi kota ya cifungo cakwe ka Jehovha’. — 2 Sam. 21:7.

Hambulezvo, Dhavhidha i no vhumela a cikombelo ca vaGibheyoni. I no nyikela a vana vambiri va Sawule, a mun’we wabye a nga vitaniwa ku hi Mefibhoxete, ni ntlhanu wa vazukulu va Sawule. (2 Sam. 21:8, 9) Lezvi Dhavhidha a nga maha zvi mahile ku a tiko gi nga havi ni nandzu wa nkhata.

Hi nga gondza zvokari ka matimu lawa. A nayo wa Nungungulu wu wa dlunyatekile. Wu waku: ‘A vanana va nga ta dawa hi kota ya vapswali.’ (Deut. 24:16) Jehovha na a nga vhumelangi ku a vana lavo va vambiri va Sawule ni vazukulu vakwe va ntlhanu va dawa loku va wa nga hi na nandzu. A nayo lowo wu wa tlhela wuku: A ‘munhu ni munhu i ta dawa hi kota ya nandzu wakwe yena n’winyi.’ Zvi wonekisa ku khwatsi a vana lavo va 7 va Sawule va patsekile hi ndlela yo kari ka tsima lego ga ku lava ku hihirita vaGibheyoni. Hikwalaho, va wo tshovela mihandzu ya kuwonha kabye.

A matimu lawa ma komba lezvaku a munhu a nga na cigelo ca ku ti yimelela ka zvilo zvo biha a zvi mahileko, aku mina ndzi wo maha lezvi ndzi nga rumiwa. A vingu go kari gi wula lezvi: “Alakanya a ndlela ya milenge ya wena, a tindlela ta wena tontlhe a ti tiyiswe.” — Mav. 4:24-27; Efe. 5:15.