1-2. Zvini zvi tolovelako ku maheka loku a vanhu va bhabhatiswa, niku hi ta bhula hi yini?

 U TSHUKILE u wona ntlawa wa lava va yako kubhabhatisweni? U zwile kutiyiseka kabye a cikhati leci va nga hlamula zviwutiso zvimbiri na va nga se bhabhatiswa. U wonile maxaka ni vanghana vabye na va kulungela hi litsako. A cikhati leci va nga ku khaga hi lomu matini, u zwile mandla na ma biwa u tlhela u wona litsako lomu ka tingohe tabye. Hi ciringaniso, vhiki ni vhiki ku na ni makume ya mazana ya vanhu va bako a zambo lego, va ti nyikelako va bhabhatiswa kota vaKustumunyu va Jehovha Nungungulu.

² Ahati wena ke? Loku u hi ni mixuvo ya kubhabhatiswa, u munhu wa lisima nguvhu tikweni legi go biha hakuva u ‘hlota Nungungulu’. (Lis. 14:1, 2) A ndzima leyi yi mahelwe wena, kani u muswa kutani u khosahele. Kanilezvi hina lava hi sinako hi bhabhatisilwe, zvi lava ku hi tiyisa a kutiyimisela ka hina ka ku tirela Jehovha kala kupindzuka. Hikwalaho a hi wulawuleni hi zvigelo zvinharu zvi hi mahako hi lava kutirela Jehovha.

3. Hikuyini a malandza ya Jehovha ma randzako lisine ni kululama? (Lisimu 119:128, 163)

³ Jehovha i leletele vanhu vakwe lezvaku va ‘randza a lisine’. (Zak. 8:19) Jesu i kucile valandzeli vakwe lezvaku va hlota kululama. (Mat. 5:6) Lezvo zvi wula ku hi fanele kuva ni kuxuva ka hombe ka ku maha lezvi zvi lulamileko, zva zvinene ni zvi basileko mahlweni ka Nungungulu. Wa li randza lisine ni kululama? Ina, wa zvi randza. Wa ma venga mawun’wa ni zvilo zvontlhe zva hava ni zva kubiha. (Lera Lisimu 119:128, 163.) Loyi a hembako i pimanyisa Sathani, a hosi ya tiko legi. (Joh. 8:44; 12:31) A gin’we ga makungu ya Sathani ku chakisa vito  go basa ga Jehovha Nungungulu. Sathani i kari a hangalasa mawunwa xungetano hi Nungungulu wa hina kusukela loku Adhamu na Evha va hluwukele Nungungulu le Edheni. I zama ku maha vanhu va alakanya lezvaku Nungungulu i na ni makangwa niku i Hosi yo kala kululama leyi yi va tsonako zva zvinene a vanhu. (Gen. 3:1, 4, 5) A mawunwa ya Sathani xungetano hi Jehovha ma ha simama ku chakisa maalakanyo ni timbilu ta vanhu. Loku a vanhu va hlawula ku nga ‘randzi lisine’, Sathani a nga va kucetela ku maha zvontlhe zvilo zvo kala kululama ni kuva ni mahanyela yo biha. — Rom. 1:25-31.

4. Jehovha i zvi kombisa kuyini lezvaku i “Nungungulu wa lisine”? (Wona ni mufota.)

⁴ Jehovha i “Nungungulu wa lisine” niku i gondzisa lisine ka lava va mu randzako. (Lis. 31:5) Hi ku maha loko, wa va tlakusa — a va tlhatlhisa ka mawunwa ya Sathani. Jehovha wa gondzisa malandza yakwe kambe kasi ma tsumbeka ni kululama. Lezvo zvi maha ku mava ni wudzundzo ma tlhela mava ni kurula ka mbilu. (Mav. 13:5, 6) Xana Nungunhulu i ku mahele lezvo a cikhati u nga gondza a Bhibhiliya? U gondzile ku a tindlela ta Jehovha hi tona ta tinene ka vanhu vontlhe ni ka wena wutsumbu. (Lis. 77:13) Hikwalaho, u lava ku hlawula ku maha lezvi Nungungulu a nge hi zvona zvo lulama. (Mat. 6:33) U lava ku yimela lisine, ni ku komba lezvaku lezvi Sathani a nga wula xungetano hi Nungungulu wa hina mawunwa. Makunu u nga zvi mahisa kuyini?

5. U nga seketelisa kuyini lisine ni kululama?

⁵ U nga hanya hi ndlela yi kombako lezvaku wa ala mawunwa ya Satani niku u seketela lisine. U nga komba ku u lava ku Jehovha ava Hosi ya wena niku u lava ku maha lezvi Jehovha a nge zvinene. U nga zvi mahisa kuyini? U nga maha lezvo hi ku tshinela ka Jehovha hi mukhongelo, u tsumbisa ku mu tirela kala kupindzuka u gumesa u bhabhatiswa. A ku randza lisine ni kululama hi zvona zvi to ku kuca ku bhabhatiswa.

6. Zvigelo muni lezvi Lisimu 45:4 aku nyikako zva ku randza Jesu Kristu?

⁶ Hikuyini u randzako Jesu Kristu? Wona zvigelo zvo zwala zvi kumekako ka Lisimu 45:4. (Lera.) Jesu wa randza lisine, ni kutikoramisa ni kululama. Loku ku hi ku wa li randza lisine ni kululama, zvi laha kubaseni ku wa mu randza Jesu kambe. Ehleketa hi lezvi Jesu a nga tiyisa zvona a yimela lisine ni kululama. (Joh. 18:37) Hambulezvo, Jesu i  zvi kombisile kuyini ku i wa randza kutikoramisa?

7. A kutikoramisa ka Jesu ku ku kuca ku maha yini?

⁷ Jesu i vhuvhumisile kutikoramisa hi cikombiso cakwe. Hi cikombiso, i wa nga tshuki a ti nyika wudzundzo, kanilezvi i wa nyika a wudzundzu gontlhe a papayi wakwe. (Mar. 10:17, 18; Joh. 5:19) U ti zwisa kuyini hi ku wona a kutikoramisa loko? Handle ko kanakana zva ku kuca ku randza N’wana wa Nungungulu ni ku mu landzela. Hikuyini Jesu a ti koramisako? Hi ku wa randza ni ku pimanyisa a Papayi wakwe, loyi a ti koramisako. (Lis. 18:35; Mah. 1:3) Xana lezvo a zvi ku tshineti ka Jesu, loyi a pimanyisako hi ku mbhelela a matshamela ya Jehovha?

8. Hikuyini hi mu randzako Jesu kota Hosi ya hina?

⁸ Ha mu randza Jesu kota Hosi ya hina hakuva Mufumeli wa munene. Jehovha wutsumbo i gondzisile N’wana wakwe a tlhela a mu yimisa kota Hosi. (Isa. 50:4, 5) Ehleketa kambe hi lirandzo leli Jesu a li kombisileko hi ku ti nyikela. (Joh. 13:1) Kota Hosi ya wena, zva ringana ku u mu randza. I wulile lezvaku lava hakunene va mu randzako, i va vitana ku vanghana vakwe ni lezvaku wa va randza hi kota ya lezvi va ingisako zvileletelo zvakwe. (Joh. 14:15; 15:14, 15) Hi ngazwa a thomo lego ga kuva munghana wa N’wana wa Jehovha!

9. A kubhabhatiswa ka maKristu ka fana ni loku ka Kristu hi ndlela muni?

⁹ A cin’we ca zvileletelo zva Jesu ku a valandzeli vakwe va fanele ku bhabhatiswa. (Mat. 28:19, 20) I hi vekele cikombiso. A kubhabhatiswa kakwe ku hambene ni loku ka valandzeli vakwe hi tindlela to kari. (Wona kwadru “ Hi kwihi kuhambana ka kubhabhatiswa ka Jesu ni ka vapizani vakwe?”) Kanilezvi ka fana hi tindlela tin’wani. A cikhati leci Jesu a nga bhabhatiswa, i ti nyikele kasi ku maha a kurandza ka Papayi wakwe. (Mah. 10:7) Hi kufanana, laha a valandzeli va Jesu va bhabhatiswako, va komba kubaseni lezvaku va nyikele wutomi gabye ka Jehovha Nungungulu. Andzhako ka kubhabhatiswa, a nchumu wa lisima ka vona ku maha kurandza ka Nungungulu na ku nga hi kurandza ka vona venyi.

10. Hikuyini a ku randza Jesu zvi ku kucako ku u bhabhatiswa?

¹⁰ Handle ko kanakana wa kholwa lezvaku Jesu i N’wana wa Nungungulu a belekilweko yece niku i Hosi leyi Nungungulu a yi yimisileko kasi ku hi fumela. Wa zvi tiva ku Jesu wa ti koramisa niku i pimanyisa hi kumbhelela a Papayi wakwe. U gondzile lezvaku i gisile lava va nga hi ni ndlala, a chavelela lava va nga mbhelile ntamu a tlhela a hanyisa lava va nga babya. (Mat. 14:14-21) Wa wona lezvi a rangelisako zvona a bandla gakwe nyamutlha. (Mat. 23:10) Niku wa zvi tiva ku cikhatini ci tako i ta maha zvilo zvo hlamalisa nguvhu kota Hosi ya Mufumo wa Nungungulu. U nga zvi kombisa kuyini ku wa mu randza? Hi ku landzela cikombiso cakwe. (Joh. 14:21) A cin’we ca zvilo u nga mahako kasi ku landzela cikombiso cakwe ku nyikela wutomi ga wena ka Jehovha ni kubhabhatiswa.

11. Hi cihi a cigelo ca lisima nguvhu ci hi mahako hi bhabhatiswa, niku hikuyini?

¹¹ Hi cihi a cigelo ca lisima nguvhu ci hi mahako hi bhabhatiswa? Jesu i kombile a cileletelo ca hombe ca Nungungulu hi ku wula lezvi: “Randza Jehovha Nungungulu wa wena hi mbilu ya wena yontlhe ni muhefemulo wa wena wontlhe ni kupima ka wena kontlhe ni ntamu wa wena wontlhe.” (Mar. 12:30) A ku lezvo zva tlhamusela lezvi u mu randzisako zvona Nungungulu ke?

12. Hikuyini hi mu randzako Jehovha? (Wona ni mufota.)

¹² Ku na ni zvigelo zvo tala zvi hi mahako hi randza Jehovha. Hi cikombiso, wa zvi zwisisa ku hi yena ‘cibuka ca wutomi’ ni lezvaku hi yena Munyiki wa “zvinyikiwo zvontlhe zvo saseka ni zvinyikiwo zvontlhe zvo mbhelela”. (Lis. 36:9; Jak. 1:17) Zvontlhe zvilo lezvi hi ti buzako hi zvona zvita hi ka Nungungulu wa hina wo hana ni wa lirandzo.

13. Hikuyini a hakhelo ya kutlhatlhisa ku nga cinyikiwo co saseka ka zvontlhe?

¹³ A cinyikiwo co saseka ka zvontlhe leci Jehovha a hi nyikileko i hakhelo ya kutlhatlhisa. Hikuyini hi nga wulako lezvo? Ehleketa hi kubohana loku ku nga kona cikari ka Jehovha ni N’wana wakwe, Jesu. Jesu i wulile lezvi: “Papayi wa ndzi randza” niku minawu “ndza mu randza Papayi”. (Joh. 10:17; 14:31) A ku bohana kabye ku yile ku kula nguvhu laha va nga tshama zvin’we hi tibhiliyoni ta malembe. (Mav. 8:22, 23, 30) Hi nga ehleketa lezvi Nungungulu zvi mu bayisisileko zvona a ku vhumela ku a N’wana wakwe a xaniseka a tlhela afa. Jehovha wa va randza vanhu — a ku patsa na wena — laha ka kuza a ti yimisela ku nyikela a N’wana wakwe wo randzeka kota muphahlo kasi wena ni van’wani mu hanya kala kupindzuka. (Joh. 3:16; Gal. 2:20) Leco hi cona cigelo ca hombe ci hi mahako hi randza Nungungulu.

14. Hi yihi a mixuvo ya yinene ka yontlhe wutomini leyi u nga ti vekelako?

¹⁴ Laha u ngaya u gondza zvotala hi Jehovha, a lirandzo la wena hi yena li no kula. A zvi kanakanisi lezvaku u lava kuva munghana wakwe zvezvi ni kala kupindzuka. U nga zvi kota. Hi wunene i ku kuca ku u tsakisa a mbilu yakwe. (Mav. 23:15, 16) U nga maha lezvo hi mitiro, na ku nga hi magezu ntsena. Lezvi u hanyisako zvona zvi ta komba ku hakunene wa mu randza Jehovha ke. (1 Joh. 5:3) Leyo hi yona mixuvo ya yinene ka yontlhe wutomini leyi u nga ti vekelako.

15. U nga kombisisa kuyini lezvaku wa mu randza Jehovha?

¹⁵ U nga kombisisa kuyini lezvaku wa mu randza Jehovha? Co sangula, maha mukhongelo wo hlawuleka, u ti nyikela ka Nungungulu mun’we wa lisine. (Lis. 40:8) Hi ku landzela, kombisa ka vontlhe lezvaku u ti nyikele ka Jehovha hi ku bhabhatiswa. Kota lezvi hi zvi wonileko kusanguleni ka ndzima, a siku ga kubhabhatiswa i siku go tsakisa nguvhu ni ga lisima ka wontlhe wutomini ga wena. U sangula wutomi giswa, u nga ha ti hanyeli, kanilezvi u hanyela Jehovha. (Rom. 14:8; 1 Ped. 4:1, 2) Zvi nga tshuka zvi wonekisa ku khwatsi i zambo go karata ku giba, niku zva karata futsi. Kanilezvi gi vhulula a mole wa ku kuma wutomi go tsakisa nguvhu. Hi ndlela muni?

16. Hi kuya hi Lisimu 41:12, Jehovha i ta va chachazelisa kuyini lava va nyikelako wutomi gabye kasi ku mu tirela?

¹⁶ Jehovha munhu wo hana ku hundza vontlhe. Kani cini u mu nyikako, contlhe cikhati i ta ku nyika zvo hundza lezvo. (Mar. 10:29, 30) Hambu ka tiko legi go biha, i ta ku nyika wutomi go tsakisa gi teleko hi makatekwa. Lawo masemanyana ntsena. A wutomi legi u gi sangulako a cikhati leci u bhabhatiswako a gi na magumo. U nga simama ku tirela a papayi wa wena wo randzeka kala kupindzuka. A lirandzo la wena hi Papayi wa wena li ta simama ku kula, niku u ta hanya kala kupindzuka, a ku fana naye. — Lera Lisimu 41:12.

17. Cini u nga nyikako Jehovha ca ku a nga naco?

¹⁷ A cikhati leci u ti nyikelako u tlhela u bhabhatiswa, wo kuma lungelo ga ku mu nyika nchumu wo hlawuleka nguvhu a Papayi wa wena. I ku nyikile a zvilo zvontlhe zva zvinene,  zvo kota zvikhati zva ku tsakisa lezvi u ti buzako hi zvona. Kota ndlela ya ku mu bonga, u nga nyika a N’winyi wa matilo ni misava a nchumu lowu a kalako a nga hi nawo — ku nga kutiyimisela ka wena ka ku mu tirela hi ku tsumbeka. (Joba 1:8; 41:11; Mav. 27:11) Leyi hi yona ndlela ya ku gi tirisa khwatsi a wutomi ga wena! Handle ko kanakana, a lirandzo la wena hi Jehovha hi cona cigelo ca hombe ci ku mahako u bhabhatiswa.

18. Zviwutiso muni u nga ti mahako?

¹⁸ U ci hlamulisa kuyini a ciwutiso leci caku: U longile ku bhabhatiswa? A hlamulo wu tiviwa hi wena. Kanilezvi, zvi nga vhuna loku u ti wutisa ku: ‘Ndza ha rindzela yini?’ (Miti. 8:36) Ehleketa hi zvigelo zvinharu lezvi hi bhulileko hi zvona. Co sangula, u randza lisine ni kululama. Ti wutise lezvi: ‘A ku ndza zvi lava a ku wona a siku legi a vanhu vontlhe va to wulawula lisine ni ku maha zvazvinene?’ Ca wumbiri, u randza Jesu Kristu. Ti wutise lezvi: ‘Ndza zvi lava ku fumelwa hi N’wana wa Nungungulu ni ku landzela cikombiso cakwe ke?’ Ca wunharu — ci nga ca hombe ka zvontlhe — u randza Jehovha. Ti wutise lezvi: ‘Ndza zvi lava ku tsakisa a mbilu ya Jehovha hi ku mu tirela kota Nungungulu wa mina ke?’ Loku ku hi ku u hlamulile ku ina ka zviwutiso lezvi, hikuyini u kalako u nga bhabhatiswi? Wa ha rindzela yini? — Miti. 16:33.

19. Hikuyini u nga faneliko ku kanana ku bhabhatiswa? Tlhamusela. (Johani 4:34)

¹⁹ Loku u kanakana ku bhabhatiswa, ehleketa hi mufananiso lowu Jesu a wu tirisileko. (Lera Johani 4:34.) Wona lezvaku Jesu i fananisile a ku maha kurandza ka papayi wakwe ni zvakuga. Hikuyini? Hakuva a zvakuga zvinene ka hina. Jesu i wa zvi tiva ku zvontlhe lezvi Jehovha a kombelako ku hi maha zvinene ka hina. Jehovha a nga lavi lezvaku hi maha ni wihi nchumu wu nga wa ta hi zwisa kubayisa. A ku Jehovha wa zvi lava ku u bhabhatiswa? Ina, wa zvi lava! (Miti. 2:38) Hikwalaho, u nga tiyiseka lezvaku a ku ingisa a cileletelo ca ku bhabhatiswa zvi ta vhuna wena. Loku ku hi ku u wa nga ta kanakana kuga zvakuga zvo nandziha, hikuyini u kanakanako ku bhabhatiswa?

20. Zvini hi to bhula hi zvona ka ndzima yi landzelako?

²⁰ Wa ha rindzela yini? A vokari va nga hlamula ciwutiso leci vaku: “Zvezvi a ndzi se longa.” Kunene, a ciboho ca ku ti nyikela ka Jehovha u tlhela u bhabhatiswa, ciboho ca lisima ka zvontlhe u nga mahako. Hikwalaho, u fanele ku ehleketa khwatsi hi cona, niku zvi lava cikhati niku ti karata kasi u ringanelwa. Kanilezvi, loku u hi ni kuxuva ka kuba a zambo legi, zvini u nga mahako kasi u ti longisela? Hi ta bhula hi hlamulo wa ciwutiso leci ka ndzima yi landzelako.