Hi nga tsetselelwa zviwonho zva hina ntsena hi kota ya muphahlo wa hakhelo ya kutlhatlhisa lowu Jesu a hakhelileko hi nkhata wakwe. (Efe. 1:7) Hambulezvo, a Bhibhiliya gi wula lezvi: “Hi kota ya kutimisela kakwe, Nungungulu i tsetselele zviwonho zvi mahilweko kale”, ku nga mahlweni ka ku Jesu a nyikela a hakhelo ya kutlhatlhisa. (Rom. 3:25) Jehovha i wa ta zvi mahisa kuyini lezvo na a nga tshovi a milayo yakwe yo lulama?

Hi kuya hi mawonela ya Jehovha, a hakhelo ya kutlhatlhisa yi wa ku khwatsi yi sina yi hakhelwe zvalezvi a nga boha ku humesa a “pswalo” lowu wu nga wa ta ponisa a vanhu va kholwako. (Gen. 3:15; 22:18) Nungungulu i wa zvi tiva lezvaku hi cikhati leci a ci yimisileko, a N’wana wakwe loyi a pswalilweko yece i wa ta humesa a hakhelo ya kutlhatlhisa hi ku zvi randza. (Gal. 4:4; Mah. 10:7-10) A cikhati leci Jesu a nga hi laha misaveni kota muyimeli wa Nungungulu, i wa hi ni ntamu wa ku tsetselela zviwonho hambu lezvi a nga kala a nga se nyikela a hakhelo ya kutlhatlhisa. Jesu i wa tsetselela a zviwonho zva vanhu va nga hi ni kukholwa hakuva i wa zvi tiva lezvaku a muphahlo lowu a nga wa ta wu nyikela wu wa ta fenengeta a zviwonho zvabye. — Mat. 9:2-6.