1-2. Makatekwa muni a munhu a ma kumako andzhako ka loku a bhabhatisilwe?

 A ZVO ku tsakisa a kubhabhatisiwa uva ciro ca ngango wa Jehovha. Lava makunu va bhabhatisilweko, va vhumelelana ni magezu ya Dhavhidha, a mutsali wa tisimu, loyi a ngaku: “I katekile a munhu loye wena [Jehovha] u mu hlawulako, loye u mu tshinetako ka wena”. — Lis. 65:4.

² Jehovha a nga vhumeleli ni wihi munhu a mu kumako lezvaku ava ciro ca ngango wakwe. Kota hi zvi wonileko ka ndzima yi hundzileko, i hlawula ku tshinela kusuhani ka lava va kombako lezvaku va lava kuva vanghana vakwe. (Jak. 4:8) Loku u ti nyikela ka Jehovha u tlhela u bhabhatisiwa, u tshinela ka Jehovha hi ndlela yo hlawuleka. U nga tiyiseka lezvaku andzhako ka loku u bhabhatisilwe, i ta ku ‘chululela a makatekwa yo tlhela u vhumala ni wutshamu go chela kona’. — Mala. 3:10; Jer. 17:7, 8.

3. Wutihlamuleli muni ga hombe legi a maKristu ma ti nyikeleko ma tlhela ma bhabhatisiwa ma nga nago? (Mutshawuteli 5:4, 5)

³ Hi lisine, a kubhabhatisiwa masangulo ntsena. Andzhako ka loku u bile a zambo legi, u ta lava ku maha zvontlhe u zvi kotako kasi u hanya hi kuyelana ni cifungo ca wena ca kutinyikela, hambu loku a kukholwa ka wena ku ringiwa. (Lera Mutshawuteli 5:4, 5.) Kota mupizani wa Jesu, u ta landzela cikombiso cakwe ni zvileletelo zvakwe hi laha zvi kotekako hi kona. (Mat. 28:19, 20; 1 Ped. 2:21) A ndzima leyi yi ta ku vhuna ku maha lezvo.

 ‘SIMAMA KU LANDZELA’ JESU HAMBU LOKU U KUMANA NI ZVIKARATO NI ZVIRINGO

4. A vapizani va Jesu va wa ta rwala a ‘mhandze ya hlomulo’ hi ndlela muni? (Luka 9:23)

⁴ U nga alakanyi lezvaku andzhako ka ku bhabhatisiwa u nga ta kumana ni zviringo. Jesu i zvi vekile kubaseni lezvaku a vapizani vakwe va wa ta rwala a ‘mhandze ya hlomulo’. Hi lisine, va wa ta maha lezvo “siku ni siku”. (Lera Luka 9:23.) A ku Jesu i wa wula lezvaku a vapizani vakwe va wa ta tshamela ku xaniseka? Ne ni kutsongwani. Kanilezvi i wo khanyisa ntsena lezvaku hambu lezvi va to kuma makatekwa, va wa ta tlhela va kumana ni zvikarato. A zvokari zva zvikarato lezvo zvi wa ta bayisa nguvhu. — 2 Tim. 3:12.

5. Makatekwa muni Jesu a tsumbisileko lava va ti karatako?

⁵ Kuzvilava u sina u vhukelwa hi maxaka ya wena kutani u tsikile titshomba to kari kasi u rangisa a zvilaveko zva Mufumo. (Mat. 6:33) Loku zvi hi lezvo, tiyiseka lezvaku Jehovha wa zvi wona zvontlhe lezvi u mahako hi kota ya yena. (Mah. 6:10) Kuzvilava makunu u wonile a kutatiseka ka magezu lawa ya Jesu, yaku: ‘A ku na munhu a siyileko muti, kutani vamakabye, kutani mamani, kutani papayi, kutani vana, kutani mipetso hi kota ya mina ni mahungu ya manene a to kala ku amukela zvilo lezvo hi ka 100 ni ku hundza ka cikhati leci — a mimiti, ni vamakabye, ni vamamani, ni vana, ni mipetso, na a kumana ni tixanisa — ni wutomi ga pindzukelwa cikhatini ci tako.’ (Mar. 10:29, 30) Handle ko kanakana, a makatekwa lawa u ma kumako ma hundza ni kwihi kutikarata loku u ku mahako. — Lis. 37:4.

6. Hikuyini u faneleko ku simama kulwa ni “kunavela ka nyama” andzhako ka kubhabhatisiwa?

⁶ Andzhako ka kubhabhatisiwa, zvi ta lava ku ulwa ni “kunavela ka nyama” kambe. (1 Joh. 2:16) A cigelo hi ku wa ha ta simama kuva munhu wo kala kumbhelela. Ka zvikhati zvo kari, u nga ti zwisa ku khwatsi hi lezvi mupostoli Pawule a nga ti zwisa zvona. I tsalile lezvi: “Kunene ndza tsakela a nayo wa Nungungulu hi munhu loyi ndzi nga yena mbilwini, kanilezvi ndzi wona a nayo wun’wani zvirweni zva mina lowu wu lwako ni nayo wa kupima ka mina, wu ndzi kokela wukhumbini ga nayo wa kuwonha lowu wu nga zvirweni zva mina.” (Rom. 7:22, 23) U nga ha mbhetiwa ntamu hi kota ya kungambheleli ka wena. Hambulezvo, a ku ehleketa hi citsumbiso leci u ci mahileko ka Jehovha a cikhati leci u nga ti nyikela kakwe, zvi ta tiyisa a kutiyimisela ka wena ka kulwa ni zviringo. A lisine ku a cikhati leci u kumanako ni zviringo, a cifungo ca wena ca kutinyikela ci ta olovisa a wutomi ga wena. Hi ndlela muni?

7. A ku ti nyikela ka Jehovha zvi ta ku vhunisa kuyini a ku simama u tsumbekile kakwe?

⁷ A cikhati leci u ti nyikelako ka Jehovha, wo ti tsika. Lezvo zvi wula ku ala lezvi u zvi xuvako ni lezvi u zvi navelako, zva ku zvi wa nga tsakisa Jehovha. (Mat. 16:24) Hikwalaho, loku u kumana ni ciringo, a zvizi zvi lava ku u bongola hloko hi ku lava ku tiva ku zvini u to maha. Hakuva u sina u mahile ciboho ca lezvi u to maha, ku nga ku simama u tsumbekile ka Jehovha. U ta simama u namarela ka ciboho ca wena ca ku lava ku tsakisa Jehovha. Hi ndlela yo kari u ta fana na Joba. Hambu lezvi a nga kumana ni zvikarato zva hombe nguvhu, i wulile a kutiyimisela kakwe, aku: ‘Ndzi ta ti wula loyi a nga hiko na nandzu’. — Joba 27:5.

8. A ku ehleketa hi mukhongelo u wu mahileko a cikhati leci u nga ti nyikela zvi nga ku vhunisa kuyini ku ala zviringo?

⁸ A ku ehleketa hi mukhongelo u wu mahileko a cikhati leci u nga ti nyikela ka Jehovha, zvi ta ku vhuna ku ala ni cihi ciringo. Hi cikombiso, xana u wa ta sangula ku kombisa ku  khwatsi wafa hi sati kutani nuna wa vambe? Ne ni kutsongwani? U sina u tsumbisile Jehovha lezvaku u nga ta tshuka u maha lezvo. Loku u nga tsiki a kutizwa ka hava ku zima mitsu, zvi nga ta ku karatela a ku ku hlongola. U ta “potsoloka” a ‘tisoko ta vakubiha’. — Mav. 4:14, 15.

9. A ku ehleketa hi mukhongelo u wu mahileko a cikhati u nga ti nyikela zvi ta ku vhunisa kuyini a ku rangisa a mitiro ya moya?

⁹ Ahati loku u wo nyikiwa ntiro wu to ku maha u lovha mitlhanganweni ya wuKristu? Wa zvi tiva lezvi u faneleko ku maha. Na u nga se nyikiwa a ntiro, u sina u mahile ciboho ca ku u nga ta vhumela a ntiro wu to ku vhalela a kuya mitlhanganweni. Hikwalaho, u nga alakanyi ku loku u maha ciboho ca hava u nga ta ma kuma a mawuyawuya ya kona. A ku alakanya a kutiyimisela ka Jesu ka ku lava ku tsakisa a Papayi wakwe, zvi ta ku vhuna ku tekela ku ala hi ku tiya ni wihi nchumu lowu u tivako ku wu wa nga ta tsakisa a Nungungulu loyi u ti nyikeleko kakwe. — Mat. 4:10; Joh. 8:29.

10. Jehovha i ta ku vhunisa kuyini ku ‘simama ku landzela’ Jesu andzhako ka ku bhabhatisiwa?

¹⁰ A mhaka ku a zvikarato ni zviringo zvi ku nyika lungelo ga ku kombisa lezvaku u ti yimisele a ku ‘simama ku landzela’ Jesu. Laha u mahako lezvo, u nga tiyiseka lezvaku Jehovha i ta ku vhuna. A Bhibhiliya gi wula lezvi: “Nungungulu i tsumbekile, a nga ta mu tsika mu ringiwa a ku hundza a ntamu wa n’wina; kanilezvi loku mu welwa hi ndzhingo, i ta mu vhululela ndlela ya kupona, kasi mu zvi kota ku wu timisela.” — 1 Kor. 10:13.

ZVINI U NGA MAHAKO KASI U SIMAMA KU LANDZELA JESU?

11. Hi yihi a ndlela ya yinene ya ku landzela Jesu? (Wona ni mufota.)

¹¹ Jesu i wa tirela Jehovha hi mbilu yontlhe, niku i wa tshama na a hi kusuhani na Jehovha  hi mukhongelo. (Luka 6:12) Hi lisine, a yin’we ya tindlela leti u nga simamako ku landzela Jesu hi tona andzhako ka loku u bhabhatisilwe ku simama ku maha zvilo lezvi zvi to ku tshineta kusuhani na Jehovha. A Bhibhiliya gi wula lezvi: “Kani hi buvhile kala kwihi, a hi simameni ku fambisa zvalezvo”. (Filp. 3:16) Hi zvikhati zvo tala, u tazwa matshango ya vamakabye lava va zvi kotileko ku engetela ntiro wabye lowu va mahelako Jehovha. Kuzvilava va gondzile Cikola ca Vavhangeli va Mufumo kutani ku rura vaya lomu ku nga ni cilaveko ca hombe ca vahuweleli. Loku u ti vekela mixuvo yo khwatsi hi leyo, maha zvontlhe u zvi kotako kasi u yi tatisa. A vanhu va Jehovha va zvi lava nguvhu a ku engetela a wutireli gabye. (Miti. 16:9) Kanilezvi, ahati loku ku hi ku zvezvi a ciyimo ca wena a ci ku vhumeleli a ku maha lezvo? U nga ti woneli hasi ku hundza lava va zvi kotako. Leci ci nga ca lisima ku simama ku timisela. (Mat. 10:22) U nga kanyisi a lisima la ku tirela Jehovha hi kuya hi ntamu ni ciyimo ca wena. Leyo i ndlela ya yinene u nga simamako ku landzela Jesu hi yona andzhako ka ku bhabhatisiwa. — Lis. 26:1.

12-13. Zvini u nga mahako loku a kuhiseka ka wena ku hunguleka? (1 Va Le Korinte 9:16, 17) (Wona ni kwadru “ Simama ku tsutsuma.”)

¹² Zvini u nga mahako loku ka zvikhati zvin’wani u ti zwisa ku khwatsi a mikhongelo ya wena a ya ha humi mbilwini kutani ku a ntiro wa wena wa kuchumayela a wa ha ku tsakisi khwatsi a ku fana ni kale? Ahati loku a kulera ka wena ka Bhibhiliya ku nga ha ku tsakisi a ku fana ni kale? Loku u ti zwisa lezvo andzhako ka loku u bhabhatisilwe, u nga chikeleli magumo ya ku a wa ha hi na moya wa Jehovha. U munhu wo kala kumbhelela niku a kutizwa ka wena ku nga cicacica. Loku a kuhiseka ka wena ku sangula ku hunguleka, ehleketa hi cikombiso ca mupostoli Pawule. Hambu lezvi a nga  zama ku pimanyisa Jesu, i wa zvi tiva lezvaku ka zvikhati zvin’wani i wa ta tshuka a nga hi na kuxuva ka hombe a ku khwatsi hi zvin’wani zvikhati. (Lera 1 Va Le Korinte 9:16, 17.) I te: “Hambu loku ndzi nga chumayeli hi kuzvirandza, a ntiro wona ndzi sina ndzi nyikilwe.” Hi magezu man’wani, Pawule i wa ti yimisile ku simama a chumayela na ku nga khataliseki ku i ti zwisa kuyini ka cikhati leco.

¹³ Hi kufanana, u nga tsiki a ku tizwa ka wena ko kala kumbhelela ku ku mahela zviboho. Alakanya lezvaku u nga zvi kota ku maha zvazvinene na ku nga khataliseki lezvi u ti zwisako zvona. Loku u simama ku maha zvazvinene, hi kufamba ka cikhati a kutizwa ka wena ku nga cica. Hi lisine, a ku simama ni longoloko wunene wa moya zvi ta ku vhuna ku simama u landzela Jesu andzhako ka ku bhabhatisiwa. A kutimisela ka wena ku ta tlhela ku kuca vamakabye. — 1 Tes. 5:11.

‘TSHAMA HI KU TI HLOLA’

14. Zvini u faneleko ku tshama hi ku zvi hlola niku hikuyini? (2 Va Le Korinte 13:5)

¹⁴ A cin’wani ci nga ku vhunako andzhako ka kubhabhatisiwa ku ti hlola hi ku khandzakanya. (Lera 2 Va Le Korinte 13:5.) Zvi nene a kuta na u hlola a wutomi ga wena ni lezvi u zvi randzako ku maha kasi u wona lezvaku wa khongela siku ni siku, wa lera ni ku gondza Bhibhiliya, waya mitlhanganweni ni ntirweni wa kuchumayela ke. Zama ku hlota tindlela ta ku maha ku a zvilo lezvo zvi mahako a cipandze ca wukhozeli ga wena zvi tsakisa nguvhu. Hi cikombiso, u nga ti maha zviwutiso zvo kota lezvi: ‘Ndzi nga zvi kota a ku tlhamusela a tigondzo-tshinya ta Bhibhiliya? Zvi kona ndzi nga mahako kasi a ntiro wa mina wa kuchumayela wu tsakisa? Ndza khongelela zvilo zvo kari zvo kongoma, niku ndza komba ku ndzi tsumba Jehovha hi kumbhelela? Ndzaya mitlhanganweni hi kukhandzakanya? Ndza chukwatisa lezvi ndzi vekisako zvona kupima mitlhanganweni ndzi tlhela ndzi hlamula?’

15-16. Zvini u nga gondza ka tshango ga Robert xungetano hi ku ala zviringo?

¹⁵ Zvi nene kambe a ku hlola gome ga wena. A makabye wo kari wa ku hi Robert i hlawutele zvilo zvo kari a zvi hanyileko zvi tlhamuselako a mhaka leyi. I wula lezvi: “A cikhati leci ndzi nga hi kwalomu ka 20 wa malembe, ndzi wa hi ni ntiro wo kari. Ka siku go kari, andzhako ka loku hi chayisile, a mutiri-kuloni wa cisati i no ndzi ramba ku hiya kaya kakwe. I wulile lezvaku hi wa ta tshama hocana hi ‘ti buza’. Kusanguleni ndzi no ti lavela zvigelwana zva ku ala, kanilezvi hi ku gumesa ndzi no ala futsi ndzi tlhela ndzi mu tlhamusela ku hikuyini.”  Robert i no ala a ciringo leco, niku lezvo zva dzundzeka. Hambulezvo, hi ndzhako ka cikhati i no ehleketa hi ciyimo leco a wona lezvaku kuzvilava na a mahile zvo hundza lezvo. I ti wulela lisine aku: “A ndzi alangi a cirambo leco hi kutiya a ku khwatsi hi lezvi Josefa a nga tekela ku ala a sati wa Potifare. (Gen. 39:7-9) Hi lisine, ndzi hlamalile hi lezvi zvi nga ndzi karatelisa zvona a ku ala. A ciyimo leco ci ndzi vhunile a ku wona lezvaku ndzi wa fanele a ku tiyisa a wunghana ga mina na Jehovha.”

¹⁶ A ku fana na Robert, wenawu u nga vhuneka hi ku ti hlola. Hambu loku u zvi kotile ku ala ciringo, ti wutise lezvi: ‘Ndzi tekile cikhati co kota kwihi na ndzi nga se ala?’ Loku u wona cokari u nga chukwatisako, u nga tizwi nandzu. Tsaka hi lezvi u tivako a gome lego. Khongela hi mhaka leyo u tlhela uba mazambo ya ku tiyisa a kutiyimisela ka wena ka kuhanya hi milayo yo tlakuka ya Jehovha. — Lis. 139:23, 24.

17. Lezvi zvi humeleleko Robert zvi wa gi khumbisa kuyini a vito ga Jehovha?

¹⁷ Ku na ni zvin’wani hi nga gondzako ka tshango ga Robert. I simama a wula lezvi: “Andzhako ka loku ndzi alile a cirambo cakwe, a wasati loye i wulile lezvi: ‘U hlulile ciringo’. Ndzi no mu wutisa ku u lava ku wula yini. A tlhamusela lezvaku a munghana wakwe, loyi a kale a nga hi Kustumunyu wa Jehovha, i wa mu byelile lezvaku vontlhe a vaswa va nga Vakustumunyu va Jehovha va hanya wutomi gimbiri niku va maha zvobiha cihundleni loku va kuma mole. Hikwalaho, i no byela munghana wakwe ku i wa ta wona ku lezvo lisine ke hi laha ka mina. Ndzi no tsaka nguvhu hi ku tiva lezvaku ndzi wa dzundzile a vito ga Jehovha.”

18. Zvini u ti yimiseleko ku maha andzhako ka ku bhabhatisiwa? (Wona ni kwadru “ Tindzima timbiri ti to ku tsakisa.”)

¹⁸ Loku u nyikela a wutomi ga wena ka Jehovha u tlhela u bhabhatisiwa, u komba lezvaku u lava ku basisa a vito gakwe hambu loku ku humelela yini. Niku tiyiseka lezvaku Jehovha wa zvi wona a zvikarato lezvi u kumanako nazvo ni zviringo lezvi u zvi alako. I ta katekisa a kutikarata ka wena ka ku lava ku simama u tsumbekile. Tsumba lezvaku hi ku tirisa a moya wakwe wo basa, i ta ku nyika ntamu wu lavekako kasi u zvi kota a ku maha lezvo. (Luka 11:11-13) Hi ku vhuniwa hi Jehovha, u ta zvi kota a ku simama u landzela Jesu andzhako ka loku u bhabhatisilwe.