1. Kutizwa muni loku a malandza yo tsumbeka ya Jehovha ma lwisanako nako?

 A ZVO ku tiyisa a ku tiva lezvaku Jehovha wa tsakela vanhu vakwe kota ntlawa! A Bhibhiliya gi wula lezvi: ‘Jehovha wa xalala hi vanhu vakwe’. (Lis. 149:4) Hambulezvo, ka zvikhati zvin’wani a vokari va mbhela ntamu laha ka ku va ti wutisa ku: ‘A ku Jehovha wa xalala hi mina?’ A kutala ka malandza yo tsumbeka ya Jehovha ma kumbukiwako lomu ka Bhibhiliya ma vile ni zvikhati ma nga kanakana ku Jehovha wa ma tsakela. — 1 Sam. 1:6-10; Joba 29:2, 4; Lis. 51:11.

2. Hi vamani va tsakelwako hi Jehovha?

² A Bhibhiliya gi zvi veka kubaseni lezvaku a vanhu vo kala kumbhelela va nga tsakelwa hi Jehovha. Zvi kotekisa kuyini? Hi ku kombisa kukholwa ka Jesu Kristu ni ku bhabhatiswa. (Joh. 3:16) Hi ndlela leyo, hi komba van’wani lezvaku hi ti solile ka zviwonho zva hina niku hi tsumbisile Nungungulu lezvaku hi ta maha kurandza kakwe. (Miti. 2:38; 3:19) Jehovha wa tsaka loku hiba mazambo lawo kasi hi wumba wunghana naye. Laha hi simamako ku maha zvontlhe hi zvi kotako kasi hi hanya hi kuyelana ni cifungo ca hina ca kutinyikela, Jehovha wa hi tsakela a tlhela a hi wona kota vanghana vakwe. — Lis. 25:14.

3. Zviwutiso muni hi to bhula hi zvona?

³ Hambulezvo, hikuyini a vokari ka zvikhati zvin’wani va ti zwisako ku khwatsi Jehovha a nga va tsakeli? Jehovha i zvi kombisa kuyini lezvaku wa hi tsakela? Niku a muKristu a nga tiyisekisa kuyini lezvaku Nungungulu wa mu tsakela?

HIKUYINI A VOKARI VA TI ZWISAKO KU KHWATSI JEHOVHA A NGA VA TSAKELI?

4-5. Hambu loku hi tizwa na hi nga vhuni nchumu, zvini hi nga tiyisekako?

⁴ A kutala ka hina, kusukela wun’wananeni ga hina hilwa ni maalakanyo ya ku a hi vhuni nchumu. (Lis. 88:15) A makabye wo  kari wa ku hi Adrián i wulile lezvi: “Contlhe cikhati ndzi tizwa na ndzi nga vhuni nchumu. A cin’we ca zvilo ndzi ci alakanyako ndzi nga maha na ndza ha hi mufana ku khongelela ku a ngango wa hina wuva paradhesini, hambu lezvi ndzi nga tiyiseka ku a ndzi ringanelwi hi kuva seyo.” Tony, a kuleleko ka ngango wu nga hiko maKristu, i wula lezvi: “A vapswali va mina a va tshukangi va ndzi byela ku va ndzi randza kutani ku va tizwa matshandza hi mina. Zvi wa ku khwatsi a ci kona ndzi mahako ci va tsakisako.”

⁵ Loku ka zvikhati zvin’wani hi tizwa na hi nga vhuni nchumu, hi fanele ku alakanya lezvaku Jehovha i hi kokile hi tshinela kakwe. (Joh. 6:44) I wona zvazvinene ka hina zvaku kuzvilava hina wutsumbu a hi zvi woni niku wa tiva a timbilu ta hina. (1 Sam. 16:7; 2 Kro. 6:30) Hikwalaho, hi nga mu tsumba loku a wula lezvaku hi va lisima. — 1 Joh. 3:19, 20.

6. Mupostoli Pawule i wa ti zwisa kuyini hi zviwonho lezvi a nga zvi mahile kale?

⁶ Na hi nga se gondza lisine, a vokari cikari ka hina va mahile zvilo lezvi kuzvilava va ha ti zwako nandzu hi zvona. (1 Ped. 4:3) Hambu a maKristu yo tsumbeka malwa ni kutizwa na ma nga vhuni nchumu. Xana a mbilu ya wena ya ku kona? Loku ku hi lezvo, u nga chavelelwa hi ku tiva lezvaku a malandza yo tsumbeka ya Jehovha ya cikhatini ci nga hundza wonawu ma lwile ni kutizwa loko. Hi cikombiso, mupostoli Pawule i wa tizwa na a nga vhuni nchumu loku a ehleketa hi zvihoxo zvakwe. (Rom. 7:24) Pawule i wa ti solile ka zviwonho zvakwe a tlhela a bhabhatiswa. Hambulezvo, i ti wulile ku hi yena wa “mutsongwani ka vapostoli” niku i wa hi “muwonhi wa hombe ku hundza vontlhe”. — 1 Kor. 15:9; 1 Tim. 1:15.

7. Zvini hi faneleko ku zvi alakanya xungetano hi zviwonho lezvi hi zvi mahileko kale?

⁷ A Papayi wa hina wa le tilweni i tsumbisa ku hi tsetselela loku hi ti sola. (Lis. 86:5) Hikwalaho, loku hi ti sola hi mbilu yontlhe hi kota ya zviwonho lezvi hi zvi mahileko, hi nga tsumba lezvi Jehovha a zvi wulako zva ku i ta hi tsetselela. — Kol. 2:13.

8-9. Hi nga ma hlulisa kuyini a maalakanyo ya ku a hi nge tshuki hi maha zvo ringana ku tsakisa Jehovha?

⁸ Hontlheni hi lava ku tirela Jehovha hi mbilu yontlhe hi laha zvi kotekako hi kona. Hambulezvo, a vokari va ti zwisa ku khwatsi a va nge tshuki va maha zvo ringana ku hi tsakelwa hi Jehovha. A makabye wo kari wa ku hi Amanda i wulile lezvi: “Ndzi wa alakanya ku a ku mahela Jehovha zvontlhe zvi nga ntan’wini wa mina zvi wula ku contlhe cikhati ndzi fanele ku maha zvo engeteleka. Ndzi wa rindzela ku maha zvo hundza lezvi ndzi nga zvi kota ku maha. Makunu, loku ndzi nga zvi koti ku maha lezvo ndzi wa alakanya ku Jehovha i swirekile hi mina a ku khwatsi hi lezvi mina n’winyi ndzi nga swirekile.”

⁹ Hi nga ma hlulisa kuyini a maalakanyo ya ku a hi nge tshuki hi maha zvo ringana ku tsakisa Jehovha? Alakanya ku Jehovha a hi munhu wo nonoha kutani wo kala ku olova. A nga tshuki a rindzela ku hi maha zvo hundza lezvi hi zvi kotako. Wa zvi nyika nguvhu lisima zvontlhe lezvi hi mu mahelako loku hi maha zvontlhe zvi nga ntan’wini wa hina. A cin’wani kambe, ehleketa hi zvikombiso zva lomu ka Bhibhiliya zva lava va tireleko Jehovha hi muhefemulo wontlhe. Ehleketa hi Pawule. I tirile nguvhu hi kuhiseka hi malembe yo tala, a endza tikilometro to tala a tlhela a yimisa mabandla yo tala. Hambulezvo, a cikhati leci a ciyimo cakwe ci nga kala ci nga mu vhumeleli ku maha zvotala ntirweni wa kuchumayela, a ku Nungungulu i tsikile ku mu tsakela? Ne ni kutsongwani. Pawule i no simama ku maha lezvi a nga zvi kota niku Jehovha i mu katekisile. (Miti. 28:30, 31) Hi kufanana, lezvi hi mahelako Jehovha zvi nga tshuka zvi cica. Kanilezvi, a ca lisima ka Jehovha ku  hikuyini hi mahako lezvo. A hi woneni tindlela to kari leti Jehovha a kombako hi tona lezvaku wa hi tsakela.

JEHOVHA I ZVI KOMBISA KUYINI LEZVAKU WA HI TSAKELA?

10. Hi mu “zwisa” kuyini Jehovha na a hi byela lezvaku wa hi tsakela? (Johani 16:27)

¹⁰ I tirisa Bhibhiliya. Jehovha wa zvi randza a ku komba lava a va tsakelako lezvaku wa va randza. A Mitsalo yi wulawula hi makhati mambiri lawa Jehovha a nga byela Jesu lezvaku i N’wana wo randzeka, a xalalako hi yena. (Mat. 3:17; 17:5) Xana u wa ta tsakela kuzwa Jehovha na a ku tiyisekisa lezvaku wa ku tsakela? Jehovha a nga wulawuli na hina hi le tilweni, kanilezvi i wulawula na hina hi ku tirisa Mhaka yakwe. Hi “ngazwa” a gezu ga Jehovha na gi hi byela lezvaku wa hi tsakela a cikhati leci hi lerako a magezu ya Jesu lomu ka tiIvhangeli. (Lera Johani 16:27.) Jesu i pimanyisile matshamela ya Papayi wakwe hi kumbhelela. Hikwalaho, a cikhati leci hi gondzako ku Jesu i kombisile lezvaku wa tsakela a valandzeli vakwe vo kala kumbhelela kanilezvi vo tsumbeka, hi nga alakanyela Jehovha na a hi byela a magezu lawo. — Joh. 15:9, 15.

11. Hikuyini a kuxaniseka ku kalako ku nga wuli lezvaku Jehovha a nga ha hi tsakeli? (Jakobe 1:12)

¹¹ I hi nyika lezvi hi zvi lavako. Jehovha i zvi lava nguvhu a ku hi vhuna. I khatalela a zvilaveko zva hina zva nyama. Ka zvikhati zvo kari, Jehovha a nga vhumelela ku hi xaniseka a ku khwatsi hi lezvi a mahileko ka Joba, a wanuna wo lulama. (Joba 1:8-11) A kuxaniseka a ku wuli ku Nungungulu a nga ha hi tsakeli. Wutshan’wini ga lezvo, ku hi nyika lungelo ga ku komba a lirandzo la hina la hombe hi Nungungulu ni lezvi hi mu tsumbisako zvona. (Lera Jakobe 1:12.) Laha a hi vhunako ku timisela hi ta zvizwa lezvaku wa hi khatalela hi lirandzo ni ku hi seketela.

12. Zvini hi gondzako ka tshango ga Dmitrii?

¹² Wona cikombiso ca makabye wo kari wa ku hi Dmitrii wa le Azia. I luzile a ntiro wakwe a tlhela a mbheta tihweti to tala na a nga se kuma wun’wani. Hikwalaho, i no maha ciboho ca ku engetela a ntiro wakwe wo chumayela, lezvi zvi nga komba lezvaku wa mu tsumba Jehovha. Ku no hundza tihweti to tala na a nga se kuma ntiro. Hi ndzhako ka cikhati, i no babya nguvhu laha ka kuza a tsandzeka ni ku suka. I no sangula ku kanakanela a lisima lakwe kota nuna tlhelo papayi, a tlhela a ti wutisa ku xana Jehovha wa ha mu tsakela ke. Ka gambo go kari a nhanyana  wakwe i no gandla phepha gi nga hi ni magezu ma kumekako ka Isaya 30:15, ma nge: ‘A ntamu wa n’wina mu ta wu kuma kuruleni ni kutsumbeni’. I no famba nago laha mubhedhini wa papayi wakwe, a ya mu byela ku: “Papayi, a cikhati leci u zwako kubayisa, alakanya a mutsalo lowu.” Dmitrii i no pola ku hi ku vhuniwa hi Jehovha, a ngango wakwe wu wa ha hi ni zvakuga, tinguwo ni ka ku tshama kona. I wula lezvi: “Lezvi ndzi nga fanele ku maha ku wa hi ku simama ndzi rula ndzi tlhela ndzi simama ku tsumba Nungungulu wa mina.” Loku u kumana ni cikarato co fana ni leci, tsumba lezvaku Jehovha i ta ku khatalela niku i ta ku vhuna ku timisela.

13. Hi vamani lava Jehovha a nga va tirisako kasi ku komba lezvaku wa hi tsakela, niku i zvi mahisa kuyini?

¹³ I tirisa vamakabye. Jehovha i tirisa a vamakabye va hina kasi ku hi komba lezvaku wa hi tsakela. Hi cikombiso, a nga kuca van’wani lezvaku va hi byela magezu yo tiyisa hi cikhati ci nene. A makabye wo kari wa le Azia zvi mu humelele lezvo a cikhati leci a nga karatekile nguvhu. I wa luzile a ntiro wakwe niku i wa babya nguvhu. Andzhako ka lezvo, a nuna wakwe i no maha a ciwonho ca hombe, a nyimisiwa kuva dhota. I wula lezvi: “Ndzi wa nga zvi zwisisi ku hikuyini lezvo zvi nga humelela. Ndzi wa alakanya ku kuzvilava ndzi wa mahile nchumu wo kari wo biha niku Jehovha i wa nga ha ndzi tsakeli.” A makabye wa hina i no khongotela Jehovha lezvaku a mu tiyisekisa ku wa mu tsakela. Jehovha i zvi mahisile kuyini? I wula lezvi: “A madhota ya laha bandleni ma no bhula na mina ma ndzi tiyisekisa lezvaku Jehovha wa ndzi randza.” Andzhako ka lezvo i no tlhela a kombela Jehovha lezvaku a mu vhuna. I wula lezvi: “Ka siku galego, ndzi no kuma papilo gi ngata hi ka ntlawa wa vamakabye va lomu bandleni. Laha ndzi nga kari ndzi lera a magezu yabye ya ku chavelela, ndzi no zvi wona lezvaku Jehovha  i wa ndzi zwile.” Kunene, a kutala ka zvikhati Jehovha i kombisa lezvaku wa hi tsakela hi magezu ya manene ya van’wani. — Lis. 10:17.

14. Hi yihi yin’wani ndlela leyi Jehovha a kombisako hi yona lezvaku wa hi tsakela?

¹⁴ Jehovha wa kombisa kambe lezvaku wa hi tsakela hi ku tirisa vamakabye kasi va hi nyika wusungukati loku zvi laveka. Hi cikombiso, ka zana ga malembe go sangula, Jehovha i tirisile mupostoli Pawule lezvaku a tsalela a makholwa-kulobye a 14 wa mapapilo. A mapapilo lawo ma wa patsa a wusungukati ga ntamu kanilezvi ga lirandzo. Hikuyini Jehovha a pimiseleko Pawule lezvaku a tsala a wusungukati lego ga lirandzo? Jehovha i Papayi wa munene niku i laya a vana vakwe ‘lava a va randzako’. (Mav. 3:11, 12) Hikwalaho, loku hi nyikiwa a wusungukati gi seketelwako ka Bhibhiliya, hi fanele ku zvi wona kota cikombiso ca ku Jehovha wa hi tsakela na ku nga hi ku o kala a nga hi tsakeli. (Mah. 12:6) Zvini zvin’wani zvi kombako ku Jehovha wa hi tsakela?

ZVIKOMBISO ZVIN’WANI ZVI KOMBAKO KU JEHOVHA WA HI TSAKELA

15. Hi vamani lava Jehovha a va nyikako a moya wakwe wo basa, niku hikuyini lezvo zvi hi nyikako a kutsumba?

¹⁵ Jehovha i va nyika a moya wakwe wo basa lava a va tsakelako. (Mat. 12:18) Hi nga ti wutisa lezvi: ‘Ndza zvi kota ku kombisa a matshamela yo kari ya mihandzu ya moya wutomini ga mina?’ Zvezvi u na ni lihlazva-mbilu nguvhu hi van’wani a ku hundza a cikhati leci u nga kala u nga se mu tiva Jehovha? Hi lisine, laha u yako u kombisa nguvhu a matshamela ya mihandzu ya moya wa Nungungulu, u ta zvi wona khwatsi lezvaku Jehovha wa ku tsakela! — Wona kwadru “ A mihandzu ya moya . . .”

16. Hi vamani lava Jehovha a va tirisako kasi ku chumayela a mahungu ya manene, niku lezvo zvi ku maha u ti zwisa kuyini? (1 Va Le Tesalonika 2:4)

¹⁶ Jehovha wa va nyika mahungu ya manene lava a va tsakelako. (Lera 1 Va Le Tesalonika 2:4.) Wona lezvi a makabye wo kari wa ku hi Jocelyn a vhunekisileko zvona hi ku bhulela van’wani a mahungu ya manene. Ka siku go kari, Jocelyn i no vhuka na a karatekile. I wula lezvi: “Ndzi no ti zwisa ku khwatsi a ndzi na ca ku nyika van’wani. Kanilezvi ndzi wa hi phayona niku gi wa hi siku ga ku ndziya kuchumayeleni. Ndzi no maha mukhongelo ndzi gumesa ndzi suka ndzi famba.” Ka mixo yaleyo Jocelyn i no tivana na Mary, a wasati wa munene, a nga vhumela ku gondza a Bhibhiliya. Andzhako ka tihweti to kari Mary i no mu byela lezvaku a cikhati leci a nga gongondza a livati i wo khongela ka Nungungulu a kombela lezvaku a mu vhuna. Zvini  lezvi Jocelyn a zvi gondzileko ka tshango legi? I wula lezvi: “Ndzi ti zwisile ku khwatsi hi loku Jehovha a ndzi byela ku ‘ndza tsaka hi wena.’” Kunene, a hi vontlhe va to ma amukela khwatsi a mahungu lawa hi chumayelako. Kanilezvi hi nga tiyiseka lezvaku Jehovha wa tsaka a cikhati leci hi zamako ku maha zvontlhe hi zvi kotako kasi ku bhulela van’wani a mahungu ya manene.

17. Zvini u gondzileko ka magezu ya Vicky xungetano hi hakhelo ya kutlhatlhisa? (Lisimu 5:12)

¹⁷ Jehovha i tirisa a lisima la hakhelo ya kutlhatlhisa ka lava a va tsakelako. (1 Tim. 2:5, 6) Kanilezvi ahati loku a mbilu ya hina yi simama yi nga kholwi lezvaku Jehovha wa hi tsakela, hambu loku hi kholwa ka hakhelo ya kutlhatlhisa ni loku hi bhabhatisilwe? Alakanya lezvaku a hi contlhe cikhati hi faneleko ku tsumba lezvi hi ti zwisako zvona, kanilezvi hi fanele ku tsumba Jehovha. Jehovha i wona lava va kholwako ka hakhelo ya kutlhatlhisa kota vo lulama niku i tsumbisa ku va katekisa. (Lera Lisimu 5:12; Rom. 3:26) A ku ehleketa hi hakhelo ya kutlhatlhisa zvi vhunile Vicky. Ka siku go kari, andzhako ka ku ehleketa zvi eta hi hakhelo ya kutlhatlhisa, i no pola lezvi: “Ku hundza cikhati co tala Jehovha na a kombisa lihlazva-mbilu hi mina. . . . Hambulezvo, hi lisine, ndzi wo mu byela ku: ‘A lirandzo la wena a hi la hombe a kuza li ndzi chikelela. A muphahlo wa n’wana wa wena a wu eneli kasi ku vhinya a zviwonho zva mina.’” Hi ku ehleketa hi hakhelo ya kutlhatlhisa, i no sangula ku zvi wona ku Jehovha wa mu randza. Hinawu hi ta tizwa na hi randziwa hi Jehovha hi tlhela hi zvi wona lezvaku wa hi tsakela loku hi ehleketa hi hakhelo ya kutlhatlhisa.

18. Zvini hi nga tiyisekako ka zvona laha hi simamako ku randza a Papayi wa hina wa le tilweni?

¹⁸ Hambu lezvi hi nga ti karatelako ku tirisa mawonela lawa hi ma gondzileko ka ndzima leyi, ka zvikhati zvin’wani kuzvilava hi nga mbhela ntamu hi tlhela hi ti wutisa ku xana Jehovha wa ha hi tsakela ke. Loku lezvo zvi ku humelela, alakanya lezvaku Jehovha i tsakela “lava va simamako ku mu randza”. (Jak. 1:12) Hikwalaho, simama ku tshinela ka Jehovha u tlhela u ti karatela ku wona a tindlela leti a kombisako hi tona lezvaku wa ku tsakela. Contlhe cikhati u nga rivali lezvaku Jehovha a nga “kule ka mun’we ni mun’wani wa hina”. — Miti. 17:27.