1-2. Zvini lezvi a munhu a faneleko ku maha na a nga se bhabhatisiwa?

 NDZENI ka ntlhanu wa malembe ma hundzileko, a vanhu va ku hundza miliyoni va bhabhatisilwe kota Vakustumunyu va Jehovha. A ku fana na mupizani Timote, wa zana ga malembe go sangula, a kutala kabye va gondzisilwe lisine “kusukela wun’wananeni”. (2 Tim. 3:14, 15) A van’wani va gondzile xungetano hi Jehovha na va hi va hombe, a vokari makunu na va khosahele. A wasati wo kari a nga gondza Bhibhiliya ni Vakustumunyu va Jehovha i bhabhatisilwe na a hi ni 97 wa malembe!

² Loku u hi cigondzani ca Bhibhiliya kutani loku u wundliwa hi vapswali va nga Vakustumunyu va Jehovha, wa ehleketa hi ku bhabhatisiwa? Lezvo zva dzundzeka nguvhu! Hambulezvo, na u nga se bhabhatisiwa, u fanele ku ti nyikela ka Jehovha. A ndzima leyi yi ta tlhamusela lezvi a kutinyikela zvi wulako zvona. Yi ta tlhela yi ku vhuna a ku wona a ku hikuyini u nga faneliko ku kanakana kuba zambo legi u tlhela u bhabhatisiwa loku makunu u longile.

ZVI WULA YINI A KU TI NYIKELA?

3. Nyika zvikombiso zva lomu ka Bhibhiliya zva vanhu va nga ti nyikele ka Jehovha.

³ Lomu ka Bhibhiliya, a kutinyikela zvi wula a ku hambanisiwa kasi ku maha ntiro wo basa. A vaIzrayeli va wa hi tiko gi nga ti nyikele ka Jehovha. Kanilezvi a vaIzrayeli vo kari va wa ti nyikele ka Jehovha hi ndlela yo hlawuleka. Hi cikombiso, Aroni i wa boha a cikombiso co “basa” ca kutinyikela — ku nga hi cixapana ca ouro ci nga hi laha phambeni ka cihuko cakwe. A cixapana  leco ca ouro ci wa komba lezvaku i wa hlawulilwe kasi a maha ntiro wo hlawuleka — kota Mupristi wa Hombe wa Izrayeli. (Levi 8:9) A vaNazira vonawu va wa ti nyikele ka Jehovha hi ndlela yo hlawuleka. A gezu “muNazira”, gi tako hi ka gezu ga ciHebheru gi nge nazír, gi wula munhu “a hambanisilweko” kutani “a nyikelweko”. A vaNazira va wa fanele ku hanya hi zvileletelo lezvi va nga nyikiwa hi Nayo wa Mosi. — Mitse. 6:2-8.

4. a) Lava va ti nyikeleko ka Jehovha va hambanisilwe kasi va maha ntiro wo basa hi ndlela muni? b) Zvi wula yini a ku ti ‘tsika’? (Wona ni mufota.)

⁴ A cikhati leci u ti nyikelako ka Jehovha, wo hlawula kuva mupizani wa Jesu Kristu ni ku rangisa a ku maha kurandza ka Nungungulu wutomini ga wena. A kutinyikela ka muKristu ku patsa yini? Jesu i te: “Loku munhu a lava ku ndzi landzela i wa ti tsike”. (Mat. 16:24) A fraze ya ciGreki yi hundzuluselweko ku “i wa ti tsike” yi nga ha wula kambe a ku “i fanele ku ti ala”. Kota nandza ga Jehovha gi ti nyikeleko, zvi ta lava ku u ala ni cihi ci lwako ni kurandza kakwe. (2 Kor. 5:14, 15) Lezvo zvi patsa ku ala “mitiro ya nyama”, yo kota wubhayi. (Gal. 5:19-21; 1 Kor. 6:18) Xana a ku ingisa a milayo leyo zvi ta ku karatisela kuhanya? Ahihi, loku ku hi lezvaku wa mu randza Jehovha ni ku wa tiyiseka lezvaku a milayo yakwe yi nene. (Lis. 119:97; Isa. 48:17, 18) A makabye wo kari wa ku hi Nicholas i zvi wulisile lezvi: “A milayo ya Jehovha u nga yi wona kota libhiyo la paxo li ku vhalelako ku maha lezvi u zvi lavako kutani ku yi wona kota libhiyo la lomu ku tshamako tinghala li ku vhikelako ku u nga bayisiwi.”

5. a) U ti nyikelisa kuyini ka Jehovha? b) Hi kwihi a kuhambana ka kutinyikela ni kubhabhatisiwa? (Wona ni mufota.)

⁵ U ti nyikelisa kuyini ka Jehovha? U maha mukhongelo, u mu tsumbisa lezvaku u ta khozela yena basi niku u ta rangisa kurandza kakwe wutomini ga wena. Hi lisine, u tsumbisa  Jehovha lezvaku u ta simama ku mu randza “hi mbilu ya wena yontlhe ni muhefemulo wa wena wontlhe ni kupima ka wena kontlhe ni ntamu wa wena wontlhe”. (Mar. 12:30) A kutinyikela zvi mahiwa cihundleni, zva wena na Jehovha basi. Kasike, a kubhabhatisiwa zvi mahiwa laha ka ku tala vanhu; zvi komba van’wani lezvaku u ti nyikele ka Jehovha. A kutinyikela cifungo co basa, niku Jehovha i rindzela lezvaku u ci tatisa a ku khwatsi hi lezvi wenawu u xuvako lezvo. — Mutsh. 5:4, 5.

HIKUYINI U FANELEKO KU TI NYIKELA KA JEHOVHA?

6. Cini ci kucako munhu lezvaku a ti nyikela ka Jehovha?

⁶ A cigelo ca hombe ci ku mahako u ti nyikela ka Jehovha hi ku wa mu randza. A lirandzo la wena a li seketelwi ka lezvi u ti zwisako zvona basi. Kanilezvi li seketelwa ka ‘wutlhari ga lisine’ ni ka “kuzwisisa ku tako hi ka Nungungulu”. A zvilo lezvi u zvi gondzileko hi Jehovha zvi mahile ku a lirandzo la wena hi yena li kula. (Kol. 1:9) A ku gondza mitsalo zvi ku tiyisekisile 1) lezvaku Jehovha munhu wa lisine, 2) lezvaku a Bhibhiliya i Mhaka yakwe yi pimiselweko, ni 3) lezvaku i tirisa a hlengeletano yakwe kasi ku maha kurandza kakwe.

7. Zvini u faneleko ku maha na u nga se ti nyikela ka Nungungulu?

⁷ Lava va ti nyikelako ka Jehovha va fanele ku tiva a tigondzo-tshinya ta lomu ka Mhaka ya Nungungulu va tlhela va hanya hi ku yelana ni milayo yakwe. Va maha zvontlhe va zvi kotako kasi ku byela van’wani lezvi va zvi kholwako. (Mat. 28:19, 20) A lirandzo labye hi Jehovha la kula, niku a kuxuva kabye ka hombe ku khozela yena yece. Hi zvalezvi wenawu u ti zwisako zvona? A kuva ni lirandzo lelo zvi ta  ku vhuna ku u nga woni a kutinyikela ni kubhabhatisiwa kota zvilo u faneleko ku zvi maha kasi u tsakisa a mugondzisi wa wena wa Bhibhiliya kutani vapswali va wena, hambu hi ku fela ku fana ni van’wani.

8. A kubonga ku ku vhunisa kuyini a ku maha ciboho ca ku ti nyikela ka Jehovha? (Lisimu 116:12-14)

⁸ A ciboho ca ku ti nyikela ka Jehovha ci zwisiseka khwatsi a cikhati leci u ehleketako hi zvontlhe lezvi a ku mahelako. (Lera Lisimu 116:12-14.) A Bhibhiliya gi wula ku Jehovha Munyiki wa “zvinyikiwo zvontlhe zvo saseka ni zvinyikiwo zvontlhe zvo mbhelela”. (Jak. 1:17) A cinyikiwo ca hombe nguvhu ka zvontlhe, muphahlo wa N’wana wakwe, Jesu. Hi nga ehleketa hi lezvi: A hakhelo ya kutlhatlhisa yi ku vhulele ndlela ya ku uva ni wuxaka ga hombe na Jehovha. Niku yi ku nyika thomo ga ku hanya kala kupindzuka. (1 Joh. 4:9, 10, 19) A ku ti nyikela ka Jehovha i ndlela ya yinene ya ku kombisa a kubonga ka wena hi lirandzo lelo la hombe, a ku patsa ni makatekwa wontlhe lawa Jehovha a ku nyikako. (Deut. 16:17; 2 Kor. 5:15) A kubonga loko ku khanyisiwa ka cigondzo 46, mhaka ya wu 4, ka bhuku Ti buze hi wutomi kala kupindzuka!, (hi ciPutukezi) laha ku patsekako a vhidhio ya 3 minuto, yi nge: Ofereça as Suas Dádivas a Deus.

U LONGILE A KU TI NYIKELA NI KU BHABHATISIWA?

9. Hikuyini a munhu a nga faneliko ku tizwa na a kurumeteka ku ti nyikela ka Jehovha?

⁹ Kuzvilava u nga tshuka u ti wonisa ku khwatsi a wu longangi ku ti nyikela ni ku bhabhatisiwa. Kuzvilava zva ha lava ku u cica zvokari wutomi ga wena kasi gi zwanana ni milayo ya Jehovha, kutani wa ha lava cikhati co engeteleka kasi u tiyisa kukholwa ka wena. (Kol. 2:6, 7) A hi zvontlhe zvigondzani zva Bhibhiliya zvi kulako kufana niku a hi vaswa vontlhe va longileko ku ti nyikela ni ku bhabhatisiwa ka tanga yaleyi ya yin’we. Zama ku hlola a kukula ka wena hi tlhelo ga moya hi kuya hi lezvi u zvi kotako ku maha na u nga ti fananisi ni van’wani. — Gal. 6:4, 5.

10. Zvini u nga mahako loku u pola lezvaku a wu se longa ku ti nyikela ka Jehovha ni ku bhabhatisiwa? (Wona ni kwadru “ Lava va wundliwako lisineni”.)

¹⁰ Hambu loku u pola lezvaku a wu se longa kasi ku ti nyikela ka Jehovha, simama ku ti vekela mixuvo leyo. Kombela Jehovha lezvaku a katekisa kontlhe kutikarata ka wena ka ku cica zvontlhe zvi lavekako. (Filp. 2:13; 3:16) Tiyiseka lezvaku Jehovha i ta yizwa a mikhongelo ya wena a tlhela a yi hlamula. — 1 Joh. 5:14.

HIKUYINI A VAN’WANI VA KANAKANAKO?

11. Jehovha i hi vhunisa kuyini kasi hi simama hi tsumbekile kakwe?

¹¹ A vokari lava va longileko ku ti nyikela ni ku bhabhatisiwa va ha kanakana. Kuzvilava va ti wutisa ku: ‘Zvini zvi to humelela loku ndzi tshuka ndzi maha ciwonho ca hombe ndzi susiwa bandleni?’ Loku ku hi ku hi lezvo zvi ku chavisako, tiyiseka lezvaku Jehovha i ta ku nyika zvontlhe zvi lavekako ‘kasi u famba hi ndlela yi fanelako Jehovha, lezvaku u mu tsakisa ka zvontlhe’. (Kol. 1:10) I ta tlhela a ku nyika ntamu wa ku maha lezvi zvi nga zvinene. I sina a kombile lezvaku a nga zvi kota ku maha lezvo hi ndlela leyi a va khomako hi yona a vamakabye van’wani vo tala. (1 Kor. 10:13) Leco hi cona a cin’we ca zvigelo zvi mahako ku kuva vatsongwani basi va susiwako bandleni ga wuKristu. Jehovha wa vhuna a vanhu vakwe kasi va simama va tsumbekile.

12. Zvini zvi nga hi vhunako ku hi nga mahi ciwonho ca hombe?

¹² A vanhu vontlhe vo kala kumbhelela va ringiwa ku maha zvakubiha. (Jak. 1:14) Hambulezvo, u fanele ku hlawula lezvi u to maha loku  u ringiwa. A mhaka ku wena hi wena u nga ni wutihlamuleli ga ku hlawula lezvi u to hanyisa zvona. Hambu lezvi a vanhu vo kari va nga wulako ku lezvo a hi lisine, u nga gondza ku wonelela lezvi u ringiwako ku maha. Hikwalaho, hambu loku u ringiwa ku maha zvokari u nga hlawula ku u nga mahi zvakubiha. Kasi u zvi kota ku maha lezvo, khongela ka Jehovha siku ni siku. Ti mahele longoloko wa wunene wa cigondzo ca wena wutsumbu ca Mhaka ya Nungungulu. Uya mitlhanganweni ya wuKristu u tlhela u bhulela van’wani lezvi u zvi kholwako. A ku maha lezvo hi kukhandzakanya, zvi ta ku nyika ntamu wa ku simama u tsumbekile ka Jehovha. Niku u nga tshuki u rivala lezvaku Jehovha i ta ku vhuna ku maha lezvo. — Gal. 5:16.

13. Cikombiso muni ca cinene leci Josefa a hi vekeleko?

¹³ Zvi ta ku olovela a ku hanya hi kuyelana ni kutinyikela ka wena, loku u ranga u boha ku zvini u to maha loku u ringiwa. A Bhibhiliya ga hi byela a vanhu vo tala va mahileko lezvo, hambu lezvi vonawu va nga hi vanhu vo kala ku mbhelela. Hi cikombiso, a sati wa Potifare i zamile ku kalavela Josefa hi makhati yo tala. Kanilezvi i wa sina a zvi tiva lezvi a nga fanele ku maha. A Bhibhiliya gi hi byela lezvaku Josefa ‘i no ala’ a tlhela aku: ‘Ndzi ta mahisa kuyini loku kubiha, ndzi wonha ka Nungungulu ke?’ (Gen. 39:8-10) Zvi laha kubaseni lezvaku hambu mahlweni ka ku a sati wa Potifare a mu ringa, Josefa i wa zvi tiva lezvi a nga fanele ku maha. Lezvo zvi mahile ku zvi mu olovela a ku maha zvazvinene a cikhati leci a nga ringiwa.

14. Hi nga gondzisa kuyini a ku ala zviringo?

¹⁴ U nga mu pimanyisisa kuyini Josefa u simama u tsumbekile ka Nungungulu a cikhati leci u ringiwako? U nga boha zvezvi a ku zvini u to maha loku u ringiwa. Gondza ku tekela ku ala a zvilo lezvi Jehovha a zvi vengako u tlhela u potsa ku ehleketa hi zvona. (Lis. 97:10; 119:165) Loku u maha lezvo, u nga ta wonha loku u ringiwa. U ta nghana u zvi tiva lezvi u to maha a cikhati leci u to ringiwa.

15. A munhu a nga kombisa kuyini lezvaku i ‘hlota Jehovha hi mbilu yontlhe’? (Mahebheru 11:6)

¹⁵ Kuzvilava wa zvi tiva lezvaku u li kumile lisine ni lezvaku wa zvi lava a ku tirela Jehovha hi mbilu yontlhe, kanilezvi ku na ni nchumu wo kari wu ku kanakanisako a ku ti nyikela ni ku bhabhatisiwa. U nga maha zvo fana ni lezvi Hosi Dhavhidha a mahileko. U nga kombela ka Jehovha, uku: ‘Nungungulu, ndzi hlole, u tiva mbilu ya mina; ndzi ringe, u tiva a maalakanyo  ya mina. U cuwuka loku ndzi kari ndzi famba hi ndlela ya kubiha, u ndzi rangela ndleleni ya pindzukelwa.’ (Lis. 139:23, 24) Jehovha wa katekisa lava “va mu hlotako hi mbilu yontlhe”. A kutikarata loku u ku mahako kasi ku tatisa mixuvo ya ku ti nyikela ni ku bhabhatisiwa ku komba Jehovha lezvaku wa mu hlota hi mbilu yontlhe. — Lera Mahebheru 11:6.

SIMAMA KU TSHINELA KA JEHOVHA

16-17. Lava va wundliwako lisineni va nga kokisiwa kuyini hi Jehovha? (Johani 6:44)

¹⁶ Jesu i wulile lezvaku a vapizani vakwe va kokiwa hi Jehovha. (Lera Johani 6:44.) Hi nga ehleketa hi ku eta ka magezu lawo ni lezvi ma tirisako zvona ka wena. Jehovha i wona nchumu wokari wa wunene ka munhu mun’we ni mun’wani loyi a mu kokelako kakwe. I wona munhu loye kota munhu a lumbako “tiko gakwe wutsumbu” kutani tshomba yakwe. (Deut. 7:6) Hi zvalezvo wenawu Jehovha a ku wonisako zvona.

¹⁷ Hambulezvo, kuzvilava u muswa a wundliwako lisineni. Niku zvi nga maha na u alakanya ku u tirela Jehovha hi kota ya lezvi a vapswali va wena va mu tirelako na ku nga hi lezvi Yena a ku kokileko. Kanilezvi, a Bhibhiliya gi wula lezvi: “Tshinelani ka Nungungulu, yenawu i ta tshinela ka n’wina.” (Jak. 4:8; 1 Kro. 28:9) Loku u sangula hi wena u tshinela ka Jehovha, yenawu i ta tshinela ka wena. Jehovha a nga ku woni ntsena kota ciro ca ntlawa. Kanilezvi i koka a munhu mun’we ni mun’wani, a ku patsa ni lava va wundliwako lisineni. A cikhati leci a munhu a sangulako hi yena a tshinela ka Jehovha, Jehovha yenawu wa maha cokari kota lezvi hi zvi wonileko ka Jakobe 4:8. — Fananisa ni 2 Va Le Tesalonika 2:13.

18. Zvini hi to bhula hi zvona ka ndzima yi landzelako? (Lisimu 40:8)

¹⁸ A cikhati leci u ti nyikelako ka Jehovha u tlhela u bhabhatisiwa, u pimanyisa Jesu. I ti nyikele hi kuzvirandza ka Papayi wakwe kasi ku maha ni cihi leci a nga wa ta mu kombela ku maha. (Lera Lisimu 40:8; Mah. 10:7) Ka ndzima yi landzelako, hi ta bhula hi lezvi zvi to ku vhuna a ku simama u tirela Jehovha hi ku tsumbeka andzhako ka loku u bhabhatisilwe.