1-2. Hi yihi ndlela ya yinene ya ku lera ni ku gondza Bhibhiliya? Nyika cikombiso.

 TI ALAKANYELE na u lava ku maha ciboho ca ku hi wihi muti u to xava. Cini u nga wa ta tsakela ku ci wona na u nga se maha ciboho leco? U wa ta wona mufota wa le phambeni ka yindlu basi? Handle ko kanakana u wa ta lava ku ya wona yindlu ya kona u tlhela u rendzelekela le handle ka yona, u nghena lomu ka tikwartu, u wona lezvi a yindlu yontlhe yi nga tshamisa zvona. U nga tlhela u lavetela wokari kasi a ku tlhamusela lezvi yi nga akiswa zvona. Handle ko kanakana, u wa ta lava ku yi tiva khwatsi a yindlu leyi u lavako ku xava.

² Hi nga maha zvo fana loku hi lera ni ku gondza Bhibhiliya. A mutsali wo kari i wulile lezvaku a Bhibhiliya gi fana ni “yindlu yo leha yi akilweko ka ciseketelo co tiya”. Makunu, hi nga zvi tivisa kuyini khwatsi lezvi zvi nga lomu ka Bhibhiliya? Loku u gi lera hi kuhatlisa basi, u to gondza ntsena a tigondzo to sangula — “a tigondzo to sangula ta timhaka ta Nungungulu”. (Mah. 5:12) Wutshan’wini ga lezvo, gondza Bhibhiliya u gi zwisisa hi kumbhelela. A yin’we ya tindlela ta tinene ta ku gondza Bhibhiliya ku zama ku wona lezvi a zvipandze zvo hambanahambana zvi zwananisako zvona. Zama ku zwisisa lezvi u zvi kholwako, niku hikuyini u kholwako ka zvona.

3. Zvini lezvi mupostoli Pawule a nga kuca maKristu-kuloni ku maha, niku hikuyini? (Va Le Efesusi 3:14-19)

³ Kasi hi yi zwisisa hi kumbhelela a Mhaka ya Nungungulu, ku ni zvilo zvo kari hi faneleko ko zvi gondza hi wukheta. Mupostoli Pawule i kucile a maKristu lezvaku ma gondza Mhaka ya Nungungulu hi wukheta kasi ma “zvi kota ku tiva a kuanama,  ni kuleha, ni kutlakuka, ni kueta” ka lisine. Hi kumaha loko va wa ta ‘zima mitsu, va tiya’ kukholweni kabye. (Lera Va Le Efesusi 3:14-19.) Hi fanele ku maha zvo fana. A hi woneni lezvi hi nga gondzisako zvona a Mhaka ya Nungungulu hi wukheta kasi hi kuma zvontlhe zvi patsekako ka mitlhamuselo ya gona.

4. Zvini hi nga mahako kasi hi tshinela ka Jehovha? Nyika cikombiso.

⁴ Kota maKristu a hi faneli ku tsakisiwa ntsena hi ku zwisisa a tigondzo to olova ta Bhibhiliya. Hi ku vhuniwa hi moya wo basa wa Nungungulu, hi xuva nguvhu a ku gondza “ni zvilo zvi etileko zva Nungungulu.” (1 Kor. 2:9, 10) Gondza na u hi ni kungo ga ku tshinela kusuhani na Jehovha. Hi cikombiso, u nga gondza hi ndlela leyi Jehovha a kombisileko hi yona a lirandzo lakwe ka malandza yakwe ya kale ni lezvi lezvo zvi kombisako zvona ku wenawu wa ku randza. U nga tlhela u gondza lezvi Jehovha a nga lava ku a vaIzrayeli va mu khozelisa zvona u tlhela u zvi fananisa ni lezvi a lavako ku hi mu khozelisa zvona zvezvi. Kutani kuzvilava u nga maha cigondzo co eta xungetano hi zviphrofeto lezvi Jesu a nga zvi tatisa a cikhati a nga hi laha misaveni.

5. Ku ni mhaka yo kari u tsakelako ku yi kambisisa ka cigondzo ca wena wutsumbu?

⁵ A zvigondzani zvo kari zva Bhibhiliya zvo hiseka zvi wutisilwe ku hi zvihi a zvilo zvo eta zvi nga tsakelako ku zvi kambisisa ka Mhaka ya Nungungulu. A mihlamulo yo kari yabye yi xaxametilwe ka kwadru “ Timhaka ta ku gondza hi tona ka cigondzo ca munhu wutsumbu.” U nga kuma litsako la hombe loku u gondza timhaka leto hi ku vhuniwa hi Biblioteca da Torre de Vigia kutani Bhuku go kambisisa hi gona ga Vakustumunyu va Jehovha. A ku maha cigondzo ca Bhibhiliya co eta zvi nga tiyisa kukholwa ka wena ni ku ku vhuna ku “kuma wutivi ga Nungungulu.” (Mav. 2:4, 5) Zvezvi a hi vekeni kupima ka lisine la Bhibhiliya lo eta hi nga li kambisisako.

6. a) Hi kwihi kuhambana ku nga kona cikari ka pulani ni kungo? b) Hikuyini hi nga wulako lezvaku a kungo ga Jehovha hi vanhu ni misava ga kala kupindzuka? (Va Le Efesusi 3:11)

⁶ Wona lezvi a Bhibhiliya gi wulako xungetano hi kungo ga Nungungulu. Ku na ni kuhambana ku nga kona cikari ka pulani ni kungo.  A pulani hi nga yi fananisa ni ruwa gi hi yisako ka wutshamu go kari hi gi lavako. Hambulezvo, a pulani ya tshuka yi nga pasi loku a ruwa lego gi vhalilwe hi cokari. A kungo hi nga gi fananisa ni wutshamu hi lavako ku chikela ka gona. Ha ku tiva khwatsi lomu hi lavako kuya kona, kanilezvi hi nga famba hi maruwa yo hambanahambana. Loku a ruwa go kari gi vhalilwe hi nga tirisa gin’wani. A ho ku mu bonga Jehovha hi lezvi a hi tivisako a kungo gakwe ga pindzukelwa hi kutsongwani-kutsogwani hi ku tirisa Bhibhiliya. (Wona a tlhamuselo wa Bhibhiliya ga cigondzo wa Va Le Efesusi 3:11.) Jehovha a nga hlawula ku tirisa tindlela to hambanahambana kasi a tatisa a kungo gakwe, niku contlhe cikhati wa humelela hakuva ‘i mahile zvilo zvontlhe lezvaku zviva ni ntiro wo kari.’ (Mav. 16:4) Niku a mabhindzu ya lezvi Jehovha a mahako ma ta simama kala kupindzuka. Hi gihi kungo ga Jehovha, niku hi kwihi kucica a nga ku maha kasi a gi tatisa?

7. Jehovha i yi cicisile kuyini a ndlela leyi a nga lava ku tatisa hi yona kungo gakwe, andzhako ka loku a vanhu vo sangula va wonhile? (Matewu 25:34)

⁷ Nungungulu i no byela a vanhu vo sangula a ku hi gihi a kungo a nga hi nago ka vona. Vona va wa fanele ku ‘pswala, va andza, va tata misava, va yi fumela . . . ni zvontlhe zvi hanyako’ laha misaveni. (Gen. 1:28) Laha Adhamu na Evha va nga hluwuka, va mahile lezvaku a ciwonho ci nghena ka vanhu, kanilezvi lezvo a zvi mu tsandzekisangi Jehovha a ku a tatisa kungo gakwe. I no cica ndlela leyi gi nga wa ta tatiseka hi yona. Zvalezvo, i no boha ku i ta yimisa Mufumo le tilweni lowu wu nga wa ta tatisa a kungo gakwe go sangula hi vanhu ni misava. (Lera Matewu 25:34.) Hi cikhati ci yimisilweko, Jehovha hi lirandzo i no rumela N’wana wakwe wa matewula kasi ata laha misaveni a ta gondzisa vanhu xungetano hi Mufumo ni ku nyikela wutomi gakwe kota hakhelo ya ku hi kutlhatlhisa ka ciwonho ni kufa. Hi kulandzela, Jehovha i no vhuxa Jesu hi ka vafileko a tlhela tilweni kasi a ya maha Hosi ya Mufumo wa Nungungulu. Kanilezvi ku ni zvotala hi nga zvi gondzako xungetano hi kungo ga Nungungulu.

8. a) Hi yihi mhaka-tshinya yi nga lomu ka Bhibhiliya? b) Kota zvi tlhamuselwako ka Va Le Efesusi 1:8-11, hi zvihi zvin’wani lezvi Jehovha a to zvi tatisa? (Wona mufota wa kapa)

⁸ A mhaka-tshinya ya Bhibhiliya hi leyi yaku a vito ga Jehovha gi ta basisiwa a cikhati a to tatisa kungo a nga nago hi misava hi ku tirisa Mufumo wu to rangelwa hi Kristu. A kungo ga Jehovha gi nge ciciwi. I tsumbisile lezvaku zvontlhe zvi ta maheka kota lezvi a tsumbisileko. (Isa. 46:10, 11; Mah. 6:17, 18) Ka cikhati leco, a misava yi ta hundzulwa yiva paradhise, laha a pswalo wo mbhelela wa Adhamu na Evha, wa vanhu vo tsumbeka wu to hanya ‘kala kupindzuka.’ (Lis. 22:26) Kanilezvi a hi lezvo basi. I ta tlhela a tlhanganisa a malandza yakwe wontlhe ya le tilweni ni ya laha misaveni. Hi ku landzela vontlhe va ta ingisa Jehovha kota Hosi yabye. (Lera Va Le Efesusi 1:8-11.) A yi ku hlamalisi a ndlela leyi Jehovha a to gi tatisa hi yona a kungo gakwe?

9. Zvilo muni zva ha tako hi nga zvi wonako hi ku lera Bhibhiliya?

⁹ Wona ciphrofeto leci Jehovha a ci mahileko sin’wini ga Edheni ci tsalilweko ka Genesisi 3:15. b Ci wa wulawula hi zvilo zvi nga wa ta tatisa a kungo gakwe. Hambulezvo, zvi wa ta maheka andzhako ka mazanazana ya malembe. A zvilo lezvo zvi wa patsa a pswalo wa Abrahama lowu wu nga wa ta maha ku ku  pswaliwa Kristu. (Gen. 22:15-18) Andzhako ka lezvo, hi 33 Nguveni ya Hina, Jesu i no lumiwa cirendze, kota lezvi zvi nga phrofetilwe. (Mitiro 3:13-15) A cimaho co gumesa ca ciphrofeto leci, ku nga kugandliwa ka hloko ya Sathani, ci ta maheka loku ku hundzile a 1000 wa malembe. (Kuv. 20:7-10) A Bhibhiliya gi tlhamusela zvo tala xungetano hi lezvi zvi to maheka a cikhati leci a livengo li nga cikari ka tiko ga Sathani ni hlengeletano ya Jehovha yi to chikela magumo.

10. a) Zvimaho muni zva cikhati ci tako zvi to maheka zvezvanyana? b) Hi nga ku longiselisa kuyini kupima ka hina ni mbilu ya hina? (Wona tlhamuselo wa lahasi)

¹⁰ Ehleketa hi zvimaho zvo hlamalisa lezvi a Bhibhiliya gi nga zvi phrofeta. Co sangula, a matiko ma ta huwelela ku “ku rulile, a matiko ma etlele!” (1 Tes. 5:2, 3) “Hi citshuketi” a kuxaniseka ka hombe ku ta sangula laha a matiko ma to vhukela wukhongeli ga mawunwa. (Kuv. 17:16) Andzhako ka lezvo ku ta woneka ciwoniso ca “N’wana wa munhu na ata hi marefu ya tilo hi ntamu ni kungangamela ka hombe.” (Mat. 24:30) Jesu i ta lamula vanhu, a hambanisa a tiyivhu ka timbuti. (Mat. 25:31-33, 46) Ka cikhati leco, Sathani i ta simama kulwa na Jehovha. Hi kukwata, i ta kucetela a patsano wa matiko, lowu a Bhibhiliya wu wu vitanako ku i Goge wa tiko ga Magoge, kasi wu vhukela a wukhozeli go basa ga Jehovha. Ka cikhati co kari, a misalela ya vatotilweko yi ta hlengeletiwa yiya tilweni kasi yi ya ti patsa na Kristu ni butho gakwe ga le tilweni kasi valwa a yimpi ya Armagedhoni. Lawo ma tava magumo ya kuxaniseka ka hombe. c (Mat. 24:31; Kuv. 16:14, 16) Hi kulandzela ku ta sangula a mufumo wa Kristu wa 1000 wa malembe. — Kuv. 20:6.

11. A kutsumba ka wutomi ga pindzukelwa ku wula yini ka wena? (Wona ni mufota.)

¹¹ Ehleketa hi lezvi zvi to maheka wutomini ga wena andzhako ko ngha na ku hundzile 1000 wa malembe. A Bhibhiliya gi wula lezvaku a muvangi wa hina ‘i vekile timbilwini [ta hina] a ku alakanya cikhati ci nga mbheliko.’ (Mutsh. 3:11) Ehleketa hi lezvi lezvo zvi gi khumbisako zvona a wunghana ga wena  na Jehovha. A Bhuku Achegue-se a Jeová, ka pajina 319, gi wula magezu lawa yo tsakisa: “Andzhako ko ngha na hi hanyile mazanazana, timiliyoni, hambu tibhiliyoni ta malembe, hi ta tiva zvo tala xungetano hi Jehovha a ku hundza lezvi hi zvi tivako zvezvi. Kanilezvi ka ha tava ni zvilo zvin’wani zvo hlamalisa kasi hi zvi gondza. . . . A wutomi ga pindzukelwa gi ta tsakisa nguvhu a ku hundza lezvi hi zvi alakanyelako — niku a co tsakisa nguvhu ka zvontlhe hi ku hi ta simama hi tshinela ka Jehovha.” Laha hi simamako ku gondza a Mhaka ya Nungungulu, hi zvihi zvin’wani hi faneleko ku zvi hlota?

12. Hi nga cuwuka le hehla matilweni hi ndlela muni? Nyika cikombiso.

¹² A Mhaka ya Nungungulu ya hi nyika masemanyana ya kuvakona ka Jehovha “le hehla.” (Isa. 33:5) A Bhibhiliya gi tlhamusela zvilo zvo hlamalisa xungetano hi Jehovha ni cipandze ca hlengeletano yakwe ya le tilweni. (Isa. 6:1-4; Dan. 7:9, 10; Kuv. 4:1-6) Hi cikombiso, hi gondza hi zvilo zvo hlamalisa lezvi Ezekiyeli a zvi wonileko laha ‘a matilo ma nga vhululeka, [a] wona a miwoniso ya Nungungulu.’— Ezek. 1:1.

13. Kota zvi tlhamuselwako ka Mahebheru 4:14-16, u ti zwisa kuyini xungetano hi lezvi Jesu a zvi mahako na a hi le tilweni?

¹³ Ehleketa kambe hi lezvi Jesu a hi mahelako na a hi le tilweni kota Hosi ya hina tlhelo Mupristi wa Hombe wo zwela wusiwana. Hi kota ya yena hi nga tshinela “citshan’wini ca wuhosi ca Nungungulu loyi a nyikako tipswalo” hi mukhongelo hi kombela wuxinji ni civhuno ‘cikhatini ci faneleko’. (Lera Mahebheru 4:14-16.) Hi nga tsiki siku gi hundza na hi nga ehleketangi hi lezvi Jehovha na Jesu va hi mahelako na va hi le tilweni. A lirandzo labye hi hina li fanele ku khumba mbilu ya hina li tlhela li hi maha hi hiseka ntirweni wa hina ni wukhozelini. — 2 Kor. 5:14, 15.

14. Hi wihi nchumu wa wunene hi nga mahako kasi hi komba lezvi hi mu bongisako zvona Jehovha na Jesu? (Wona ni mufota)

 ¹⁴ A yin’we ya tindlela ta tinene ta ku kombisa lezvi hi mu bongisako zvona Jehovha ni N’wana wakwe ku zama ku vhuna van’wani lezvaku vava Vakustumunyu va Jehovha tlhelo vapizani va Jesu. (Mat. 28:19, 20) Lezvi hi lezvi mupostoli Pawule a mahileko kasi a bonga Nungungulu na Kristu. I wa zvi tiva ku a kurandza ka Jehovha ku “a vanhu va tixaka tontlhe va ponisiwa, va li tiva khwatsi a lisine.” (1 Tim. 2:3, 4) I tirile yi nga chayi kuchumayeleni, a vhuna votala hi laha a nga zvi kota hi kona ‘kasi hi ku maha lezvo a fela ku hanyisa vokari.’ — 1 Kor. 9:22, 23.

15. Hi kuya hi Lisimu 1:2, zvini zvi to hi maha hi tsaka?

¹⁵ A muyimbeleli wa tisimu i wulile lezvaku a munhu wo tsaka ni wo humelela hi loyi a ‘tsakelako a nayo wa Jehovha’ a tlhela “a wu ehleketa mumu ni wusiku.” (Lis. 1:1-3.) Na a tlhamusela a mavhesi lawa, a muhundzuluseli wo kari wa Bhibhiliya i wulile lezvaku “a munhu i fanele ku randza a zvileletelo zva Nungungulu laha ka kuza a ti yimisela ku zvi lavetela, a zvi gondza, a tlhela a mbheta cikhati na a ehleketa hi zvona.” I tlhelile aku “loku a siku gi hundza a munhu na a nga lerangi Bhibhiliya, a siku lego gi luzile.” Leci ci nga ku vhunako a ku kuma litsako laha u gondzako Bhibhiliya ku chela kota hi timhaka to tsakisa ta gona ni ku wona lezvi ti yelanisako zvona. A zvo ku tsakisa a ku kambisisa zvontlhe zvi patsekako ka Mhaka ya Nungungulu.

16. Zvini hi to bhula hi zvona ka ndzima yi landzelako?

¹⁶ A lisine leli Nungungulu a hi gondzisako lomu ka Mhaka yakwe a li bindzi laha ka kuza zvi hi karatela ku li zwisisa. Ka ndzima yi landzelako, hi ta wona lisine lo eta leli Pawule a nga wulawula hi lona ka papilo gakwe ka maKristu ya vaHebheru, ku nga tempeli ya Jehovha ya hombe ya moya. Hi xuva lezvaku zvi ku tisela litsako la hombe a ku kambisisa a mhaka leyo!