Zva tshuka zvi ku karatela ku alakanya lezvi wa ha mbhetako ku gondza? Lezvo hontlheni zva tshuka zvi hi humelela. Zvini zvi nga ku vhunako? Ku vhuxeta timhaka-tshinya.

A cikhati leci u gondzako, tana u nyima u tsala a timhaka leti ti nga ta lisima nguvhu. Wona lezvi mupostoli Pawule a vhunisileko zvona lava va nga lera a papilo gakwe lezvaku va maha lezvo a cikhati leci a nga tsala, aku: “A tshinya ga timhaka leti . . . hi legi”. (Mah. 8:1) Hi magezu lawa, i wo va vhuna ku zwisisa lezvi a nga zvi wula ni lezvi a magezu yakwe wontlhe ma nga yelanisa zvona.

U nga siya cikhati, kuzvilava ku ngava 10 wa timinuto magumo ka cigondzo ca wena, kasi u ehleketa hi timhaka-tshinya ta lezvi gondzileko. Loku u nga ha zvi alakanyi, tlhela u lera a zvihlokwana zva mhaka kutani tifraze-tshinya — a kutala ka zvikhati ku nga tifraze to sangula ta paragrafo — kasi zvi ku vhuna ku alakanya lezvi u gondzileko. Loku u gondzile zvilo zva zviswa, zama ku zvi tlhamusela hi magezu ya wena. Laha u vhuxetako a timhaka-tshinya zvi nga ta vhuna a maalakanyo ya wena basi kanilezvi zvi ta tlhela zvi ku vhuna ku u zvi wona khwatsi lezvi a mahungu lawo ma yelanisako zvona ni wutomi ga wena.