A VAIZRAYELI va wa zvi randza nguvhu a ku yimbelela. Lomu ka Bhibhiliya ku na ni makhati yo tala ku kumbukiwako vanhu na va chaya ni ku yimbelela tisimu. Hi lisine, a cipandze ca hombe ca Bhibhiliya ci wumbiwa hi tisimu. Hi cikombiso, a mabhuku ya Tisimu, ni Cizimba ca Solomoni, ni Mikosi ma tsalilwe kasi ma yimbelelwa. A bhuku go kari gi wulawulako hi wutomi zvikhatini zva kutsaliwa ka Bhibhiliya gi wula lezvaku “a Bhibhiliya gi komba kubaseni lezvaku a vaIzrayeli va wa yimbelela ka zviyimo zvo hambanahambana”.

Ku yimbelela ka wutomi ga siku ni siku. A vaIzrayeli va wa chaya ni ku yimbelela tisimu kasi va kombisa lezvi va nga ti zwisa zvona. (Isa. 30:29) A vavasati va waba mitandanda na va yimbelela tisimu ta kutsaka va tlhela va kina a cikhati leci ku nga yimisiwa tihosi, ni lomu ka mibuzo, ni loku va hlulile yimpini. (Vala. 11:34; 1 Sam. 18:6, 7; 1 Tih. 1:39, 40) A vaIzrayeli kambe va wa yimbelela tisimu ta cirilo. (2 Kro. 35:25) A McClintock and Strong’s Cyclopedia gi wula lezvi: “A vaHebheru va wa hi vanhu va ku zvi randza nguvhu a ku yimbelela.”

Ku yimbelela laha ndlwini ya wuhosi. A tihosi ta ka Izrayeli ti wa tsaka nguvhu hi ku ingisela tisimu. Hosi Sawule i vitanile Dhavhidha laha ndlwini yakwe ya wuhosi kasi a ta tira kota muchayi. (1 Sam. 16:18, 23) Hi ndzhako ka cikhati, laha Dhavhidha a ngava hosi i no tsamba zvichaya-chaya, ni ku tsala tisimu to nandziha a tlhela a xaxameta vanhu kasi va yimbelela lomu tempeleni ya Jehovha. (2 Kro. 7:6; Amo. 6:5) Hosi Solomoni i wa hi ni vayimbeleli va cinuna ni va cisati laha ndlwini yakwe ya wuhosi. — Mutsh. 2:8.

Ku yimbelela wukhozelini. A ca lisima nguvhu, a vaIzrayeli va wa yimbelela kasi ku khozela Jehovha. Hi lisine, ku wa hi ni 4000 wa vavanuna va nga chaya ni ku yimbelela lomu tempeleni Jerusalema. (1 Kro. 23:5) Va waba tingomana, ni zvichaya-chaya zva tingoti, ni zvitende, ni mimpundzu. (2 Kro. 5:12) Kanilezvi a hi vayimbeleli lavo basi va ku zvi tiva khwatsi va nga khozela Jehovha hi tisimu. A kutala ka vaIzrayeli zvo khwatsi va wa yimbelela Tisimu ta ku kandziha a cikhati leci va ngaya Jerusalema ka mibuzo ya lembe ni lembe. (Lis. 120-134) Hi kuya hi mabhuku ya ciJudha, a vaIzrayeli va wa yimbelela Tisimu ta Haleli a cikhatini ca Phasika.

A ku yimbelela zva ha hi zva lisima ka vanhu va Nungungulu. (Jak. 5:13) Hi yimbelela kota cipandze ca wukhozeli ga hina. (Efe. 5:19) A ku yimbelela ku hi maha hi bohana ni maKristu-kuloni. (Kol. 3:16) A cin’wani kambe, ka hi tiyisa a cikhati leci hi kumanako ni tixanisa. (Miti. 16:25) A ku yimbelela i ndlela ya yinene ya ku komba kukholwa ka hina ka Jehovha ni lirandzo la hina hi yena.