1. Hikuyini hi faneleko ku khozela Jehovha yece?

HI FANELE ku khozela Jehovha yece hakuva hi yena a nga hi vanga a tlhela a hi nyika wutomi. (Kuv. 4:11) Hambulezvo, zva hi karatela. Hambu loku hi randza Jehovha hi tlhela hi mu kombisa cichavo, a zvilo zvo kari zvi ngava zva lisima nguvhu wutomini ga hina laha ka kuza zvi hi tsandzekisa ku randza Jehovha ni ku khozela yena yece hi ndlela yi faneleko. Hi fanele ku zwisisa lezvi lezvo zvi nga mahekisako zvona. Hambulezvo, a ku sangula, a hi kambisiseni ku zvi wula yini a ku khozela Jehovha yece.

2. Hi kuya hi Eksodhusi 34:14, zvini hi to maha loku hi khozela Jehovha yece?

² Lomu ka Bhibhiliya, a kuva ni lirandzo la hombe hi Jehovha zvi yelana nguvhu ni ku khozela yena yece. Hi nga ta tsika munhu kutani nchumu ci vhaleta a wutshamu ga Jehovha lomu timbilwini ta hina. — Lera Eksodhusi 34:14.

3. Hikuyini hi nga ni zvigelo zva zvi nene zva ku randza Jehovha?

³ Hi na ni zvigelo zva zvi nene zvi hi mahako hi randza Jehovha. Lezvi hi zvi gondzako xungetano hi yena hi zvona zvi hi mahako hi khozela yena yece. Hi tiva matshamela yakwe yo hlamalisa. Ha zvi tiva lezvi a zvi randzako ni lezvi a zvi vengako hi tlhela hinawu hi zvi wonisa lezvo. Ha gi zwisisa hi tlhela hi gi seketela a kungo gakwe xungetano hi vanhu. Ha tizwa matshandza hi lezvi a hi nyikako thomo ga ku hiva vanghana vakwe. (Lis. 25:14) Zvontlhe lezvi hi zvi gondzako xungetano hi Muvangi wa hina zvi hi maha hi tshinela kakwe. — Jak. 4:8.

4. a) Zvini lezvi Sathani a zvi tirisako kasi ku hungula a lirandzo la hina hi Jehovha? b) Zvini hi to zvi kambisisa ka ndzima leyi?

⁴ Sathani hi yena a rangelako a tiko legi a tlhela a gi tirisa kasi gi maha a zvilo lezvi a vanhu va zvi lavako nguvhu wutomini gabye a tlhela a maha ku a kuxuva ka hina ka hava zvi karata ku ku ala. (Efe. 2:1-3; 1 Joh. 5:19) A kungo gakwe ku hi maha hi  randza nguvhu zvilo wutshan’wini ga ku randza Jehovha. Hi ta kambisisa a tindlela timbiri leti Sathani a ti tirisako kasi a humelela nguvhu. Yo sangula, i hi ringa lezvaku hi hlongolisela titshomba. Ya wumbiri, i zama ku hi maha hi hlawula zvihungato zva hava.

5. Hikuyini hi faneleko ku ti wonela kasi hi nga randzi mali?

⁵ Hontlheni hi lava zvakuga zvo enela kasi higa, ni tinguwo ta ti nene ta ku boha, ni wutshamu ga gi nene kasi hi tshama kona. Hambulezvo hi fanele ku ti wonela kasi hi nga randzi mali. A vanhu vo tala nyamutlha “va randza mali” ni zvilo lezvi zvi xaviwako hi yona. (2 Tim. 3:2) Jesu i wa zvi tiva lezvaku a vapizani vakwe va wa ta ringiwa lezvaku va randza mali. Hikwalaho ite: “I hava a zvi kotako ku tirela tihosi timbiri; hakuva i ta venga yin’we a randza leyi yin’wani, kutani ku namarela ka yin’we a kanyisa leyi yin’wani. A mu nge zvi koti ku tirela Nungungulu ni Titshomba.” (Mat. 6:24) A munhu loyi a khozelako Jehovha seno na a hlongolisela titshomba, hi ndlela yo kari, o zama ku tirela a tihosi timbiri. I wa nga ta ngha na a khozela Jehovha yece.

6. Hi gondza yini ka lezvi Jesu a nga byela bandla ga Lawodhikeya?

⁶ Kumbheleni ka zana ga malembe go sangula, a zviro zva bandla ga le dhoropeni ga Lawodhikeya zvi wa ti byela zviku: ‘Hi ganyile, hi na ni titshomba, a ha ha lavi nchumu.’ Kanilezvi ka Jehovha na Jesu va wa hi ‘vaxaniseki, ni vavhumali, ni zvisiwana, ni zvikhumu, ni zvimbyiri’. (Kuv. 3:14-17) Loku hi pola lezvaku a mixuvo ya ku lava ku ganya ya kula timbilwini ta hina, hi fanele ku tekela kucica maalakanyo ya hina. (1 Tim. 6:7, 8) Loku hi nga mahi lezvo, hi ta sangula a ku randza nguvhu zvilo a ku hundza Jehovha niku yena a nga ta amukela a wukhozeli ga hina. Jehovha i lava  lezvaku u mu randza “hi mbilu ya wena yontlhe”. (Mar. 12:30) Makunu, a mali yi ngava ya lisima nguvhu wutomini ga hina hi ndlela muni?

7-9. Zvini u zvi gondzako ka cikombiso ca dhota go kari ga ku hi David?

⁷ Wona a cikombiso ca David, a nga dhota gi tirako hi ku ti karata le Estados Unidos. David i wula lezvaku i wa tira nguvhu ntirweni wakwe wa ku ti hanyisa. A koponi leyi a nga tira ka yona yi no mu kulisa niku a vanhu vontlhe va lomu tikweni gakwe va wa mu tlhatlhela cihuko hi kota ya ntiro wakwe. David i wula lezvi: “Ka zvikhati zvin’wani ndzi wa alakanya lezvaku a ku kulisiwa loko ku wa komba lezvaku Jehovha wa ndzi katekisa.” Kanilezvi, futsi ma wa hi makatekwa ya Jehovha ke?

⁸ Hi kutsongwani-kutsongwani, David i no zvi pola lezvaku a ntiro wakwe wu wa wonha a wuxaka gakwe na Jehovha. I wula lezvi: “Loku ndzi hi mitlhanganweni ya bandla kutani ntirweni wa kuchumayela, ndzi wa ehleketa hi zvikarato zva le ntirweni. Ndzi wa hola mali yo tala kanilezvi ndzi no sangula kuva ni zvikarato laha ngangweni.”

⁹ David i no wona lezvaku i wa fanele ku cica lezvi a nga zvi rangisa wutomini gakwe. I wula lezvi: “Ndzi mahile ciboho co tiya kasi ndzi lulamisa a ciyimo ca mina.” I wa lava ku cica a matirela yakwe, hikwalaho i no bhulela a patrawu wakwe lezvi a nga lava ku maha. Give gihi wuyelo ga kona? David i no luza ntiro! Zvini a nga maha hi ku landzela? I amba lawa: “Ka siku gi nga landzela, ndzi no teka wuphayona ga ku vhunisa hi tihweti to tala.” Kasi va kuma ca ku ti hanyisa yena ni sati wakwe va no sangula ku tira ku basisa tiyindlu. Andzhako ka loku David a sangulile ku tira kota phayona ga cikhati contlhe, a sati wakwe yenawu i no teka wuphayona ga cikhati contlhe. A ngango  lowu wu hlawulile a ku maha a ntiro lowu a van’wani va wu chepetako, kanilezvi a ca lisima kabye a hi ntiro lowu va wu mahako. Hambu lezvi a mali leyi va yi kumako zvezvi yi kalako yi nga sizi nchumu loku yi fananisiwa ni leyi va nga yi hola kale, a hweti ni hweti va yi kuma ya ku ringana ku va eneta a zvilaveko zvabye. Va lava ku rangisa Jehovha wutomini gabye, niku va zvi wona hi mahlo yabye lezvaku Jehovha wa khatala hi lava va rangisako Mufumo. — Mat. 6:31-33.

10. Hi nga yi vhikelisa kuyini a mbilu ya hina?

¹⁰ Kani hi kuma mali ya yitsongwani kutani yo tala, hi fanele ku vhikela a mbilu ya hina. Hi ndlela muni? Hi ku nga randzi titshomba. Ni ku nga tsiki a ntiro wa ku ti hanyisa wuva wona wa lisima nguvhu wutomini ga hina a ku hundza ku tirela Jehovha. U nga zvi polisa kuyini lezvaku lezvo zva ku humelela? U nga ti maha zviwutiso zvo kota lezvi: ‘Ndza tala ku ehleketa hi ntiro wa mina wa ku ti hanyisa loku ndzi hi mitlhanganweni kutani ntirweni wa kuchumayela? Ndza tshamela ku karateka hi lezvaku ndzi ta yi kuma mali yo enela cikhatini ci tako? Mina ni sati wa mina kutani nuna wa mina ha tshamela ku holovisana hi mali ni titshomba? Ndzi wa ta ti yimisela ku maha a ntiro lowu a van’wani va wu chepetako loku ku hi lezvaku hi wona wu ndzi siyelako cikhati ca ku mu mahela zvo tala Jehovha?’ (1 Tim. 6:9-12) Laha hi kambisisako a zviwutiso lezvi, a hi alakanyeni lezvaku Jehovha wa hi randza. I tlhela a maha a citsumbiso leci ka lava va khozelako yena yece: “Ndzi nga ta tshuka ndzi ku tsika hambu ku ku fularela.” Hi kota ya lezvo, Pawule i tsalile magezu lawa: “A mahanyela ya n’wina ma ngavi ya ku randza mali.” — Mah. 13:5, 6.

11. A zvihungato zvi nga maha munhu ava ni matshamela muni?

¹¹ Jehovha i lava lezvaku hizwa a ku nandziha ka wutomi, niku a zvihungato zvi nga hi vhuna kuzwa a kunandziha loko. Kunene, a Mhaka ya Nungungulu yi wula lezvaku ‘ci hava cilo ca chukwana ka munhu a ku hundza lezvaku aga, anwa, ni kuva a muhefemulo wakwe wu tsakela ntiro wakwe’. (Mutsh. 2:24) Hambulezvo, a kutala ka zvihungato zva tiko legi zvi ngava ni wuyelo ga hava ka hina. Zvi nga maha ku a kutala ka vanhu va sangula ku vhumela a mahanyela ya tiko kutani ku randza zvilo lezvi a mhaka ya Nungungulu yi nge zvi bihile.

12. Hi kuya hi 1 Va Le Korinte 10:21, 22, hikuyini hi faneleko ku hlawula khwatsi zvihungato?

 ¹² Hi lava ku khozela Jehovha yece, hikwalaho a hi nge zvi koti kuga “mezeni ya Jehovha” ni “mezeni ya madhimoni”. (Lera 1 Va Le Korinte 10:21, 22.) A kuga zvakuga ni wokari, a kutala ka zvikhati zvi komba wunghana naye. Loku hi hlawula a zvihungato lezvi zvi vhuvhumisako tihanyi, wudhimoni, kutani kun’wani kuxuva ka nyama ni matshamela man’wani ya nyama, zvi fana ni kuga zvakuga ni valala va Nungungulu lezvi vona va zvi longiseleko. Kota wuyelo ga kona, zvi nga ta bayisa hina hoce kanilezvi zvi ta tlhela zvi wonha a wuxaka ga hina na Jehovha.

13-14. Mayelano na Jakobe 1:14, 15, hikuyini hi faneleko ku ti wonela ka zvihungato lezvi hi zvi hlawulako? Nyika cikombiso.

¹³ Wona a tindlela to kari to kongoma leti a zvihungato zvi fanako ni zvakuga. Loku hi kari higa zva koteka ku hlawula lezvi hi chelako lomu kanwini. Kanilezvi neti hi mita, a ha ha zvi koti ku hlawula lezvi a zvakuga lezvo zvi to maha lomu mirini wa hina. A zvakuga zva zvi nene zvi nga hi maha hiva ni lihanyo li nene; a zvakuga zva hava zvi nga hi tisela mababyi. Kuzvilava hi nga kala ku tekela ku zvi pola kanilezvi zvi woneka hi kufamba ka cikhati.

¹⁴ Hi ku fanana, a cikhati leci hi hlawulako a zvihungato hi nga hlawula lezvi hi zvi chelako ka maalakanyo ya hina. Kanilezvi andzhako ka lezvo, a zvihungato lezvo hi zvi hlawulako zvi nga khumba a ndlela leyi hi ehleketako hi yona ni lezvi hi ti zwisako zvona. A zvihungato zva zvi nene zvi nga hi vhuna; a zvihungato zva hava zvi hi wonha. (Lera Jakobe 1:14, 15.) Kuzvilava a wuyelo ga zvihungato zva hava a gi nge tekeli ku woneka, kanilezvi gi nga woneka hi kufamba ka cikhati. Hi cigelo leco, a Bhibhiliya ga hi tlharihisa giku: “Mu nga ti kanganyisi: Nungungulu a nga kalavelwi. Hakuva leci a munhu a ci byalako, i ta tshovela caleco; hakuva loyi a byalelako nyama, hi ka nyama i ta tshovela kubola.” (Gal. 6:7, 8) Zva lisima nguvhu a ku ala a zvihungato zvontlhe lezvi zvi vhuvhumisako a zvilo lezvi Jehovha a zvi vengako. — Lis. 97:10.

15. Cinyikiwo muni leci Jehovha a hi nyikileko lezvaku hi ti buza hi cona?

¹⁵ A kutala ka vanhu va Jehovha va randza a ku sixtira a JW Broadcasting^®, ku nga citichi ca hina ca televhizawu hi ku tirisa Internet. A makabye wo kari wa cisati wa ku Marilyn i wulile lezvi: “A JW Broadcasting ya ndzi vhuna a kuva munhu wo tsaka niku ndzi nga sixtira zvontlhe lezvi zvi nga lomo hakuva zvontlhe zvi nene ka mina. Loku ndzizwa ciwundza kutani ndzi mbhela ntamu, ndzi tiyisiwa hi tikanelo ta Wukhozeli ga ni mixo. Zvi ndzi maha ndzi tizwa kusuhani nguvhu na Jehovha ni hlengeletano yakwe. A JW Broadcasting yi cicile a wutomi ga mina hi kumbhelela.” Wenawu wa vhuneka hi cinyikiwo leci ca Jehovha? Ahandle ka milongoloko yiswa ya hweti ni hweti, lomu ka JW Broadcasting ku na ni tivhidhyu, mahungu ma gravharilweko kasi ku ingisela, ni tisimu ti tiyisako. A zvilo lezvo u nga zvi ingisela kutani ku zvi sixtira ni ka cihi cikhati.

16-17. Hikuyini hi faneleko ku ti pimela a cikhati leci hi to ci mbheta na hi ti hungata niku hi nga zvi mahisa kuyini?

¹⁶ A hi faneli ku ti wonela basi ka zvihungato lezvi hi zvi hlawulako, kanilezvi hi fanele ku ti wonela kambe ka cikhati leci hi ci mbhetako na hi ti hungata. Loku hi nga ti woneli hi nga mbheta cikhati co tala na hi ti hungata wutshan’wini ga ku tirela Jehovha. A vanhu vo tala zva va karatela a ku ti pimela cikhati leci va to ci mbheta na va ti hungata. A makabye wo kari wa 18 wa malembe wa ku hi Abigail i wula lezvi: “A ku sixtira zvi ndzi vhuna a ku  humula andzhako ka ku tira siku gontlhe. Kanilezvi loku ndzi nga ti woneli, ndzi nga mbheta a tihora to tala na ndzi sixtira.” A mun’wani wa jaha wa ku hi Samuel i wula lezvi: “Ka zvikhati zvin’wani ndzi sixtira a tivhidhyu to tala to koma lomu ka Internet. Ndzi sangula hi yin’we niku ndzi li cope na ndzi mbhetile tihora tinharu kutani mune.”

¹⁷ U nga ti pimelisa kuyini a cikhati leci u to ci mbheta na u ti hungata? A zambo go sangula ku tiva a cikhati leci zvezvi u ci mbhetako na u ti hungata. Zvi ngo yini a ku maha lezvi zvi landzelako hi cipimo ca vhiki? Tsala a tihora leti u ti mbhetako na u sixtira televhizawu, na u hi ka Internet, ni leti u ti mbhetako na u bela geme lomu ka fone kutani thablet ya wena. Loku u pola lezvaku wa mbheta cikhati co tala nguvhu na u ti hungata, zama ku maha a longoloko wa mitiro ya wena. Maha makungo ya ku ranga hi ku maha lezvi zvi nga zva lisima, hi kona u to siya a cikhati ca ku ti hungata. Hi ku landzela, kombela Jehovha lezvaku a ku vhuna kukhomelela ka longoloko wa wena. Hi ndlela leyo, u tava ni cikhati ni ntamu wa ku maha a cigondzo ca wena wutsumbu, wukhozeli ga ngango, kuya mitlhanganweni ni ku tirela Jehovha ntirweni wa kuchumayela ni ku gondzisa. Kuzvilava u nga ta ha tizwa nandzu hi cikhati leci u ci mbhetako na u ti hungata.

18-19. Hi nga zvi kombisa kuyini lezvaku hi khozela Jehovha yece?

¹⁸ Andzhako ka loku mupostoli Pedro a tsalile xungetano hi kugumesa ka tiko ga Sathani ni misava yiswa leyi yi tako, i tlhelile a tsala lezvi: “Varandzekako, kota lezvi mu rindzelako a zvilo lezvi, ti tsitsiriteni kasi a ta mu kuma na mu nga hi na noda, ne cisolo, kanilezvi na mu hi ni kurula.” (2 Ped. 3:14) Loku hi ingisa a wusungukati legi hi tlhela hi maha zvontlhe hi zvi kotako kasi hi simama hi basile hi tlhelo ga mahanyela ni ga moya, hi komba lezvaku hi khozela Jehovha yece.

¹⁹ Sathani ni tiko gakwe va ta simama ku hi ringa lezvaku hi cica lezvi hi zvi rangisako wutomini ga hina. (Luka 4:13) Hambulezvo, kani kova ni cihi cikarato hi kumanako naco, hi nga ta tsika munhu kutani nchumu wu vhaleta wutshamu ga Jehovha timbilwini ta hina. Hi fanele ku ti yimisela ku nyika Jehovha lezvi zvi ringanako yena basi — ku nga ku khozela yena yece!