1-2. a) Zvini lezvi a tihosi ta misava ti to zvi huwelela lokuloku? b) Zviwutiso muni hi faneleko ku tiva a mihlamulo ya kona?

LOKULOKU a tihosi ta misava ti ta huwelela a magezu ma phrofetilweko yaku “ku rulile, a matiko ma etlele”! Hi nga alakanyela lezvi ti to ti zwisa zvona. Kuzvilava ti ta tizwa matshandza ti ku a tiko gi na ni kurula ka hombe ka ku a ku se tshuka kuva kona. A mifumo yi ta lava ku hi alakanya lezvaku ya zvi kota ku wonelela zvilo zvontlhe. Kanilezvi yi nga ta zvi kota a ku wonelela lezvi zvi to humelela hi ku landzela. Hikuyini? Hakuva hi kuya hi ciphrofeto ca Bhibhiliya, “a kuloviswa kabye ku ta va chikelela hi citshuketi . . . [niku] va nga ta pona”. — 1 Tes. 5:3.

² Ku na ni zviwutiso zva lisima hi faneleko ku tiva a mihlamulo ya kona: Zvini zvi to humelela “kuxanisekeni ka hombe”? Zvini lezvi Jehovha a rindzelako lezvaku hi zvi maha cikhatini leco? Niku hi nga ti longiselisa kuyini zvezvi kasi hi simama hi tsumbekile kuxanisekeni ka hombe? — Mat. 24:21.

3. Mayelano ni Kuvhululelwa 17:5, 15-18, Nungungulu i ta mu lovisisa kuyini “Bhabhuloni wa Hombe”?

³ Lera Kuvhululelwa 17:5, 15-18. A “Bhabhuloni wa Hombe” i ta lovisiwa a ku bhi! Kota lezvi zvi kumbukilweko ku sanguleni, a tihosi ta misava ti nga ta zvi kota a ku wonelela lezvi zvi to humelela ka cikhati leco. Hikuyini? Hakuva ‘Nungungulu i ta chela timbilwini tabye a maalakanyo yakwe’. Maalakanyo muni lawo? Ya ku lovisa a wukhongeli gontlhe ga mawunwa ni wuKristu ga mawunwa. * Nungungulu i ta chela maalakanyo yakwe timbilwini  ta “10 wa timhondzo” ta “civandza co pswhuka”. A 10 wa timhondzo ti yimela a mifumo ya politika leyi yi seketelako a “civandza” — ku nga ma Nações Unidas. (Kuv. 17:3, 11-13; 18:8) A cikhati leci a mifumo leyo ya ntamu yi to vhukela a wukhongeli ga mawunwa, ci tava cikombiso ca ku sangula ka kuxaniseka ka hombe. Ku tava khombo ga hombe gi to wela a vanhu vontlhe laha misaveni hi citshuketi.

4. Zvini lezvi kuzvilava a mifumo yi to wula ku hi zvona zvi yi mahako yi vhukela a wukhongeli ga mawunwa? b) Zvini lezvi kuzvilava va to maha lava va nga lumba a wukhongeli lego?

⁴ A hi zvi tivi ku zvini lezvi a mifumo yi to wula lezvaku hi zvona zvi yi mahako yi vhukela Bhabhuloni wa Hombe. Kuzvilava yi ta ku a wukhongeli hi gona gi mahako lezvaku ku nga hi na kurula ni ku a cikhati contlhe gi zama ku ti nghenisela ka lezvi zvi mahiwako hi mifumo. Kutani yi ta ku a tihlengeletano leto ta wukhongeli ti hlengeletele a titshomba to tala. (Kuv. 18:3, 7) Zvo khwatsi a kuvhukelwa loko ka wukhongeli ga mawunwa a ku wuli a kulovisiwa ka zviro zvontlhe zva gona. Kanilezvi a mifumo yi to fuvisa a tihlengeletano ta wukhongeli ga mawunwa. Kota lezvi a tihlengeletano leto ti to ngha ti lovisilwe, lava va nga lumba seyo va ta zvi tiva lezvaku a varangeli vabye va wukhongeli va zvi tsandzekile a ku tatisa lezvi va nga va tsumbisa. Hikwalaho kuzvilava va ta wula lezvaku va wa nga hi va wukhongeli lego.

5. Zvini lezvi Jehovha a zvi tsumbisileko xungetano hi kuxaniseka ka hombe niku hikuyini?

⁵ A Bhibhiliya a gi kombi lezvaku a kulovisiwa ka Bhabhuloni wa Hombe ku ta teka a cikhati co kota kwihi, kanilezvi ha zvi tiva lezvaku ku nga taza ku teka a cikhati co leha. (Kuv. 18:10, 21) Jehovha i tsumbisile lezvaku i ta ‘komisa a masiku’ ya kuxaniseka, hikwalaho a “vahlawulilweko” wakwe ni wukhongeli ga lisine gi ta pona. (Mar. 13:19, 20) Kanilezvi zvini lezvi Jehovha a lavako lezvaku hi zvi maha na ku nga se sangula a kuxaniseka ka hombe ni yimpi ya Armagedhoni?

6. Hikuyini zvi kalako zvi nga eneli a ku tsema wuxaka ni wukhongeli ga mawunwa?

⁶ Kota lezvi zvi tlhamuselweko ka ndzima ya cigondzo yi hundzileko, Jehovha i lava lezvaku  a vakhozeli vakwe va ti hambanisa ni Bhabhuloni wa Hombe. Hambulezvo, zvi lava ku va maha zvo hundza ku tsema wuxaka basi ni wukhongeli ga mawunwa. A vakhozeli va Jehovha va fanele ku ti yimisela ku seketela a wukhozeli ga lisine — ku nga wukhozeli go basa ga Jehovha. Wona a tindlela timbiri ta ku maha lezvo.

7. a) Hi nga simamisa kuyini ku khoma zvi tiya ka milayo ya Jehovha ya mahanyela? b) Hikuyini Mahebheru 10:24, 25 a hi byelako lezvaku hi fanele ku tlhangana ni vamakabye niku hikuyini lezvo zvi nga zva lisima zvezvi?

⁷ Yo sangula, hi fanele ku simama hi seketela a milayo ya Jehovha ya mahanyela. A hi faneli ku vhumela a mahanyela ni milayo ya tiko. Hi cikombiso, a hi vhumeli a mahanyela ya wubhayi ya tiko legi a ku patsa ni kutekana ka vanhu va zviro zva wubeleki zvo fana kutani lin’wani lixaka la wubhayi. (Mat. 19:4, 5; Rom. 1:26, 27) Ya wumbiri, hi fanele ku simama hi khozela zvin’we ni maKristu-kuloni. Hi fanele ku maha lezvo ni kwihi laha hi nga kona, kani hi lomu Salawini ya Mufumo kutani hi lomu ka tiyindlu ta vamakabye kutani hi lomu kufihlaleni. Hambu kuba ni cihi ci dhumako, hi ta simama hi tlhangana hi khozela zvin’we. Hi lisine, hi fanele ku tlhangana hi khozela, “nguvhunguvhu . . . lezvi [hi] wonako lezvaku a siku ga tshinela kusuhani”. — Lera Mahebheru 10:24, 25.

8. A mahungu lawa hi ma chumayelako kuzvilava ma ta cicisa kuyini cikhatini ci tako?

⁸ Cikhatini ca kuxaniseka ka hombe, a mahungu lawa hi ma chumayelako kuzvilava ma ta cica. Zvezvi hi chumayela a mahungu ya ma nene ya Mufumo hi tlhela hi zama a ku maha vapizani. Kanilezvi ka cikhati leco, kuzvilava hi ta huwelela a mahungu yo bayisa, lawa a Bhibhiliya gi ma fananisako ni maralala ya hombe. (Kuv. 16:21) Kuzvilava hi ta huwelela lezvaku lokuloku a tiko ga Sathani gi ta lovisiwa. Hi ta zvi tiva hi kufamba ka cikhati lezvi a mahungu ya hina ma to tshamisa zvona ni lezvi hi to ma huwelelisa zvona. Xana hi ta tirisa a tindlela to fana ni leti hi ti tirisako hi malembe yo tala kasi ku chumayela ni ku gondzisa? Kutani hi ta tirisa a tin’wani tindlela? Zvi lava ku hi rindzela kasi hi zvi wona. Kani hi yihi ndlela hi to yi tirisa, zvo khwatsi hi tava ni thomo ga ku huwelela hi ku tiya a mahungu ya Jehovha ya kulamula! — Ezek. 2:3-5.

9. A mahungu ya hina kuzvilava ma ta yi khumbisa kuyini mifumo, kanilezvi zvini hi faneleko ku tiyiseka ka zvona?

⁹ Zvo khwatsi a mahungu ya hina ma ta kwatisa mifumo yi zama ku hi miyeta lezvaku hi nga ha tshuki hi chumayela kambe. A ku fana ni lezvi nyamutlha hi tsumbako ku Jehovha i ta hi vhuna ntirweni wa hina wa kuchumayela, zvi ta lava kambe lezvaku hi mu tsumba ni ka cikhati ci tako. Hi nga tiyiseka lezvaku a Nungungulu wa hina i ta hi nyika ntamu wa ku hi maha a kurandza kakwe. — Mika 3:8.

10. Hi kuya hi lezvi zvi phrofetilweko ka Luka 21:25-28, a vanhu vo tala kuzvilava va ta ti zwisa kuyini cikhatini ca kuxaniseka ka hombe?

¹⁰ Lera Luka 21:25-28. Cikhatini ca kuxaniseka ka hombe, a vanhu va ta dzuka nguvhu a cikhati leci va to wona a zvilo zvontlhe lezvi va nga alakanya ku zvi ta tshama kala kupindzuka na zvi kari zvi lovisiwa. Va tava hlomulweni wa hombe, na va chava kambe lezvaku vonawu va ta lovisiwa cikhatini leco co tshisa nguvhu matin’wini ya vanhu. (Zef. 1:14, 15) Ka cikhati leco, kuzvilava a wutomi ga vanhu vontlhe a ku patsa ni ga vanhu va Jehovha gi ta bindza nguvhu. Kota lezvi hi to simama hi nga hi va tiko, kuzvilava hi ta xaniseka laha ka kuza hi vhumala ni lezvi zvi nga zvilaveko zva siku ni siku.

11. a) Hikuyini a mifumo yi to veka tihlo ka Vakustumunyu va Jehovha? b) Hikuyini hi nga faneliko ku chava a kuxaniseka ka hombe?

¹¹ A vanhu lava a wukhongeli gabye gi to ngha  gi lovisilwe, kuzvilava va ta kwata nguvhu hi lezvi a Vakustumunyu va Jehovha va to simama va khozela. Handle ko kanakana va ta byela van’wani lezvi va nga bayisekisa zvona, hambu hi ku zvi haxa lomu ka Internet. A mifumo ni hosi yabye, Sathani, va ta hi venga hi kota ya lezvi ku tova wukhongeli ga hina basi gi to ngha gi nga lovisiwangi. Va tava va tsandzekile ku tatisa a kungo gabye ga ku fuvisa a wukhongeli gontlhe laha misaveni. Hikwalaho va ta veka tihlo ka hina. Hi ndlela leyo, a matiko ma tava Goge wa Magoge. * Ma ta patsana ma vhukela a vanhu va Jehovha hi ntamu wabye wontlhe. (Ezek. 38:2, 14-16) Hi nga ha sangula ku karateka hi lezvi zvi to humelela cikhatini ca kuxaniseka ka hombe nguvhunguvhu lezvi hi kalako hi nga tivi mitlhamuselo yo tala ya lezvi zvi to humelela. Hambulezvo, ha zvi tiva lezvaku a hi faneli ku chava a kuxaniseka ka hombe. Jehovha i ta hi nyika a zvileletelo zvi to ponisa a wutomi ga hina. (Lis. 34:19) Hi ta zvi kota ku ‘ololoka hi tlakusa tihloko ta hina’ hakuva hi ta zvi tiva lezvaku ‘a kutlhatlhiswa ka hina ku tshinela.’ *

12. A “nandza go tsumbeka ni go tlhariha” gi hi longiselisa kuyini ka lezvi zvi tako?

¹² A “nandza go tsumbeka ni go tlhariha” gi kari gi hi longisela kasi hi simama hi tsumbeka cikhatini ca kuxaniseka ka hombe. (Mat. 24:45) Lezvo gi zvi maha hi tindlela to tala, kanilezvi a hi woneni a cikombiso cin’we. Gi tirisile a migotsovanyano hi vileko nayo hi cikhati ci nene kusukela hi 2016 kala 2018. Ka migotsovanyano leyo hi kucilwe ku tiyisa a matshamela lawa ma lavekako kota lezvi hi nga kusuhani ni siku ga Jehovha. A hi tlheleni hi kambisisa kutsongwani a matshamela lawo.

13. Hi nga ku tiyisisa kuyini a kutsumbeka ka hina niku hikuyini hi faneleko ku maha lezvo zvezvi?

¹³ Kutsumbeka: A hloko mhaka ya gotsovanyano wa 2016 yi waku: “Simama kutsumbeka ka Jehovha!” Ka gotsovanyano lowo hi gondzile lezvaku loku hi hi ni wunghana go tiya na Jehovha hi ta tsumbeka kakwe. Wu hi alakanyisile lezvaku hi tshinela ka Jehovha loku hi khongelela kakwe hi mbilu yontlhe ni loku hi gondza Mhaka yakwe. A ku maha lezvo zvi hi nyika ntamu wa ku hlula zvikarato hambu loku zvi hi zva hombe nguvhu. Laha a tiko ga Sathani gi yako gi gumesa, ha zvi tiva lezvaku hi ta kumana ni zvikarato lezvi zvi to ringa a kutsumbeka ka hina ka Nungungulu ni Mufumo wakwe. Kuzvilava a vanhu va ta simama va hi chepeta ni ku hi tseketsela. (2 Ped. 3:3, 4) A cin’we ca zvigelo zvi to maha ku lezvo zvi humelela hi lezvi hi kalako hi nga seketeli a tiko ga Sathani. Hi fanele a ku tiyisa a kutsumbeka ka hina zvezvi kasi hi zvi kota ku simama hi tsumbekile kuxanisekeni ka hombe.

14. a) Zvini zvi to cica cikhatini ca kuxaniseka ka hombe xungetano hi vamakabye lava va rangelako? b) Hikuyini zvi to lava ku hi kombisa kutsumbeka cikhatini leco?

¹⁴ Cikhatini ca kuxaniseka ka hombe ku tava ni kucica xungetano hi vamakabye lava va rangelako. Ka cikhati co kari ndzeni ka kuxaniseka ka hombe, a vatotilweko vontlhe lava va to ngha va ha hi laha misaveni, va ta tekiwa vaya tilweni kasi na vonawu va yalwa a yimpi ya Armagedhoni. (Mat. 24:31; Kuv. 2:26, 27) Lezvi zvi wulako lezvaku laha misaveni hi nga ta hava ni Hubye yi Fumako. Hambulezvo, a citshungu ca hombe ci ta simama ci xaxametilwe. A vamakabye va cinuna va ringanelwako,  va tiyivhu tin’wani, hi vona va to rangela. Zvi ta lava ku hi kombisa lezvaku ha tsumbeka ka Jehovha hi ku seketela a vamakabye lavo niku landzela a wusungukati legi va to nyikwa hi Jehovha. Kasi hi pona zvi ta lava ku hi ingisa!

15. Hi nga ku tiyisisa kuyini a kutimisela ka hina niku hikuyini zvi nga zva lisima a ku maha lezvo zvezvi?

¹⁵ Kutimisela: A hloko mhaka ya gotsovanyano wa 2017 yi waku: “U nga tsiki ku timisela!” A gotsovanyano lowo wu hi tiyisile kasi hi timisela loku hi kumana ni zvikarato. Hi gondzile lezvaku a hi timisele ntsena loku a zvilo zvi hi fambela khwatsi. Hi nga tiyisa a kutimisela ka hina hi ku tsumba Jehovha. (Rom. 12:12) A hi faneli ku rivala a citsumbiso ca Jesu caku: “Loyi a timiselako kala magumo hi yena a to ponisiwa.” (Mat. 24:13) A magezu lawa ma komba lezvaku hi fanele ku simama hi tsumbekile hambu loku hi kumana ni cihi cikarato. Niku loku hi timisela a zvikarato zvezvi, hi ta tiyisa a kukholwa ka hina na ku nga se sangula a kuxaniseka ka hombe.

16. Zvini zvi hi mahako hi tiya hlanha niku hi nga ku tiyisisa kuyini zvezvi?

¹⁶ Kutiya-hlanha: A hloko mhaka ya gotsovanyano wa 2018 yi waku: “Tiya hlanha!” A gotsovanyano lowo wu hi alakanyisile lezvaku a hi matshamela ya hina ya mabeleko ma kombako lezvaku hi vanhu va kutiya-hlanha. A ku fana ni kutimisela, a kutiya-hlanha ka lisine hi ku kuma hi ku tsumba Jehovha. Hi nga engetelisa kuyini lezvi hi mu tsumbisako zvona Jehovha? Hi ku gondza a Mhaka yakwe siku ni siku hi tlhela hi ehleketa hi lezvi Jehovha a nga va ponisisa zvona a vanhu vakwe cikhati ci hundzileko. (Lis. 68:20; 2 Ped. 2:9) A cikhati leci a mifumo yi to hi vhukela kuxanisekeni ka hombe, zvi ta lava ku hi tiya hlanha hi tlhela hi tsumba Jehovha zva ku cima a u se zvi wona. (Lis. 112:7, 8; Mah. 13:6) Loku hi tsumba Jehovha zvezvi, hi tava ni kutiya-hlanha loku ku to laveka cikhatini leci Goge a to hi vhukela. *

17. Hikuyini hi nga faneliko ku chava a yimpi ya Armagedhoni? (Wona a mufota wa kapa.)

¹⁷ Kota lezvi zvi kumbukilweko ka ndzima ya cigondzo yi hundzileko, a kutala ka hina hi hanya a wutomi ga hina gontlhe masikwini yo gumesa. Kanilezvi ha ha rindzela ku hanya hi  tlhela hi pona kuxanisekeni ka hombe. A yimpi ya Armagedhoni hi yona yi to lovisa a tiko gontlhe ga Sathani. Hambulezvo a hi faneli ku yi chava. Hikuyini? Hakuva a Armagedhoni yi tava yimpi ya Nungungulu; a hi hina hi tolwa. (Mav. 1:33; Ezek. 38:18-20; Zak. 14:3) A cikhati leci Jehovha a to nyika a cileletelo, Jesu Kristu i ta rangela a mabutho ya Nungungulu yimpini leyo. I tava zvin’we ni vatotilweko lava va to vhuxiwa hi ka vafileko ni tingilozi ta tsandza-vahlayi. Va ta patsana valwa na Sathani ni madhimoni yakwe ni mabutho yakwe ya laha misaveni. — Dhan. 12:1; Kuv. 6:2; 17:14

18. (a) Zvini lezvi Jehovha a hi tiyisekisako? b) Hikuyini Kuvhululelwa 7:9, 13-17 a ku vhunako kuva ni kutsumba xungetano hi cikhati ci tako?

¹⁸ Jehovha wa hi tiyisekisa lezvi: ‘A gi kona tlhari gi fulelweko ku vhukela wena gi ta nga humelela.’ (Isa. 54:17) “A citshungu ca hombe” ca vakhozeli vo tsumbeka va Jehovha ci ta ‘huma kuxanisekeni ka hombe’ ci hanya, ci simama ku tirela Jehovha. (Lera Kuvhululelwa 7:9, 13-17.) Hi ngazwa a kutsumba loku a Bhibhiliya gi hi nyikako xungetano hi cikhati ci tako! Ha zvi tiva lezvaku ‘Jehovha wa hlayisa lava vo tsumbeka’. (Lis. 31:23) Vontlhe lava va randzako Jehovha va tlhela va mu dhumisa va ta tsaka nguvhu hi ku mu wona na a basisa a vito gakwe go basa. — Ezek. 38:23.

19. Citsumbiso muni co tsakisa leci ci to tatiseka lokuloku?

¹⁹ Hi nga alakanyela lezvi kuzvilava Timote wa wumbiri 3:2-5 a to tshamisa zvona loku a tlhamusela a matshamela ya vanhu misaveni yiswa laha ku to ngha ku nga ha hi na kucetelo wa Sathani. (Wona a kwadru “ A matshamela ya vanhu va cikhatini ci tako.”) Makabye George Gangas, * loyi a tirileko kota ciro ca Hubye yi Fumako, i ma tlhamusele hi ndlela leyi: “A cikhati leci a vanhu vontlhe va to khozela Jehovha a misava yi tava wutshamu ga gi nene nguvhu ga ku hanya kona! Lokuloku u tava ni thomo ga ku hanya misaveni yiswa. Hi ta hanya a masiku ya ku fana ni lawa ya Jehovha. Hi ta hanya kala kupindzuka.” Hi nga wona a citsumbiso leco co tsakisa!