1. Cini ci hi tiyisekisako lezvaku hi hanya “masikwini yo gumesa”?

U PSWALILWE andzhako ka 1914? Loku ku hi lezvo, a wutomi ga wena gontlhe u gi hanya “masikwini yo gumesa”. (2 Tim. 3:1) Hontlheni ha zvizwa a zvimaho lezvi Jesu a zvi phrofetileko xungetano hi cikhati leci hi hanyako ka cona. Lezvi zvi patsako a tiyimpi, tindlala, kutsekatseka ka misava, mitungu, kuengeteleka ka wubihi, ni ku xanisiwa ka vanhu va Jehovha. (Mat. 24:3, 7-9, 12; Luka 21:10-12) Hi tlhela hi wona a matshamela ya vanhu lawa ma phrofetilweko hi mupostoli Pawule. (Wona a kwadru “ A matshamela ya vanhu va nyamutlha.”) Kota vakhozeli va Jehovha, ha tiyiseka lezvaku hi hanya kugumeseni ka ‘masiku yo gumesa’.— Mika 4:1.

2. Zviwutiso muni hi faneleko ku tiva a mihlamulo ya zvona?

² Lezvi ku hundzako a cikhati co leha kusukela hi 1914, makunu hi hanya kugumeseni ka ‘masiku yo gumesa’. Kota lezvi a ku gumesa ku nga laha kusuhani nguvhu, hi fanele ku tiva a mihlamulo ya zviwutiso zvo kari zva lisima: Zvimaho muni zvi to humelela kugumeseni ka ‘masiku yo gumesa’? Niku zvini lezvi Jehovha a lavako lezvaku hi maha na ha ha rindzela ku a zvimaho lezvo zvi humelela?

3. Hi kuya hi ciphrofeto ci nga ka 1 Va Le Tesalonika 5:1-3, zvini zvi to huwelelwa hi tihosi ta misava?

³ Lera 1 Va Le Tesalonika 5:1-3. Pawule i kumbuka a “siku ga Jehovha”. Ka mutsalo lowu, a “siku ga Jehovha” ku wuliwa a cikhati leci ci to sangula hi vhukelwa ka “Bhabhuloni wa hombe”, ku nga mufumo wa misava yontlhe wa wukhongeli ga mawunwa, ci gumesa hi Armagedhoni. (Kuv. 16:14, 16; 17:5) Na ku kiyela ku  tsongwani kasi a “siku” lego gi chikela, a tihosi misava ti ta huwelela lezvaku “ku rulile, a matiko ma etlele”! Ka zvikhati zvin’wani, a tihosi ta misava ta tirisa a magezu ya ku fana ni lawa loku ti wulawula hi ku engetela a kuzwanana cikari ka matiko. * Hambulezvo, a kuhuwelelwa ka magezu yaku “ku rulile, a matiko ma etlele” loku a Bhibhiliya gi wulawulako hi kona ku tava ko hambana ni loko. Hikuyini? A cikhati leci lezvo zvi to humelela, a vanhu va ta alakanya lezvaku a tihosi ta misava ti zvi kotile ku maha a tiko giva ni kurula. Kanilezvi hi lisine, “a kuloviswa kabye ku ta va chikelela hi citshuketi” andzhako ka “kuxaniseka ka hombe”. — Mat. 24:21.

4. a) Zvini hi kalako hi nga zvi tivi xungetano hi kuhuwelelwa ka magezu ya ku “ku rulile, a matiko ma etlele”? b) Cini hi ci tivako xungetano hi kuhuwelelwa loko?

⁴ A hi zvi tivi ku cini ci to maha a tihosi ti huwelela lezvaku “ku rulile, a matiko ma etlele” kutani lezvaku ku ta mahisiwa kuyini. A hi zvi tivi kambe lezvaku a kuhuwelelwa loko ku tava ka khati gin’we basi kutani ka makhati yo tala. Kova ni cihi ci to humelela, leci hi ci tivako hi leci: A hi faneli ku jujiwa kupima hi alakanya lezvaku a tihosi ta misava makunu ti zvi kotile ku neha kurula misaveni yontlhe. Hakuva a kuhuwelelwa loko hi loku a Bhibhiliya gi wulako lezvaku ku tava kona. A kuhuwelelwa loko ku tava cikombiso ca lezvaku a “siku ga Jehovha” makunu gi chikele!

5. Zvini lezvi 1 Va Le Tesalonika 5:4-6 a hi byelako lezvaku hi maha kasi hi ti longisela a “siku ga Jehovha”?

⁵ Lera 1 Va Le Tesalonika 5:4-6. A citlharihiso ca Pawule ci hi byela lezvi hi faneleko ku maha kasi hi ti longisela a “siku ga Jehovha”. Ite: “Hi nga etleli a ku fana ni lezvi a van’wani va mahako.” Kanilezvi hi fanele ku ‘khindlimuka’ hi simama ku rindzela. Hi cikombiso, hi fanele ku ti wonela kasi hi simama hi nga ti ngheniseli ka timhaka ta politika ya tiko. Loku hi ti nghenisela ka timhaka ta politika, hi tava “va tiko”. (Joh. 15:19) Ha zvi tiva lezvaku a Mufumo wa Nungungulu hi wona woce wu to tisa a kurula misaveni yontlhe.

6. Zvini hi lavako ku vhuna vanhu lezvaku va maha niku hikuyini?

⁶ Wutshan’wini ga ku hina basi hi tshama na hi khindlimukile, hi lava ku vhuna van’wani lezvaku va gondza lezvi a Bhibhiliya gi zvi wulileko kale lezvaku zvi wa ta humelela laha misaveni. Hi fanele ku maha lezvo zvezvi hakuva neti a kuxaniseka ka hombe ku sangula, ku nga ta hava ni cikhati ca ku a vanhu va sangula ku hlota Jehovha. Lezvo hi zvona zvi mahako ku a ntiro wa hina wa kuchumayela wuva wa cihatla nguvhu! *

7. Zvini lezvi Jehovha a lavako lezvaku hi maha?

⁷ Ka cikhati leci ca ci tsongwani ci seleko mahlweni ka ku a “siku” lego gi sangula, Jehovha i lava lezvaku hi tshama na hi khomekile ntirweni wa kuchumayela. Hi fanele ku tiyiseka lezvaku ha ‘tshama na hi khomekile ntirweni wa  Hosi’ ke. (1 Kor. 15:58) Jesu i wulile na ka hi mahlweni lezvi hi nga wa ta maha. A cikhati leci a nga wulawula hi zvilo zvontlhe zva lisima lezvi zvi nga wa ta humelela masikwini yo gumesa, i tlhelile aku: “Ahandle ka lezvo, a mahungu ya ma nene ma fanele ku ranga ma chumayelwa ka matiko wontlhe.” (Mar. 13:4, 8, 10; Mat. 24:14) Hi nga ehleketa hi lezvi: A khati ni khati u yako ntirweni wa kuchumayela u vhunisa a kutatiseka ka ciphrofeto leco ca Bhibhiliya.

8. A ntiro wa kuchumayela wu simamisa kuyini ku andza?

⁸ Zvini hi nga wulako xungetano hi kuandza ka ntiro wa kuchumayela? Lembe ni lembe, a ntiro lowu wo simama ku andza. Hi cikombiso, hi nga alakanya hi kuengeteleka ka ntsengo wa vahuweleli va Mufumo misaveni yontlhe masikwini lawa yo gumesa. Hi 1914, a kova ni 5155 wa vahuweleli ka 43 wa matiko basi. Nyamutlha a vahuweleli va kwalomu ka 8 500 000 ka 240 wa matiko. Hambulezvo, a ntiro wa hina a wu se gumesa. Hi fanele ku simama ku huwelela a Mufumo wa Nungungulu kota wona woce wu to mbheta a zvikarato zva vanhu. — Lis. 145:11-13.

9. Hikuyini hi faneleko ku simama hi chumayela a mahungu ya Mufumo?

⁹ A ntiro wa hina wa kuchumayela a mahungu ya Mufumo wu ta gumesa loku Jehovha a wula ku wu mbhelile. Cikhati co kota kwihi ci seleko kasi a vanhu va gondza hi Jehovha Nungungulu na Jesu Kristu? (Joh. 17:3) A hi zvi tivi. Leci hi ci tivako hi lezvaku loku a kuxaniseka ka hombe ku nga se sangula, vontlhe lava va ‘longileko ku amukela lisine li yisako wutomini ga pindzukelwa’ va ta simama va vhumela a mahungu ya ma nene. (Miti. 13:48) Hi nga va vhunisa kuyini a vanhu lavo a cikhati na ca ha vhumela?

10. Zvini lezvi Jehovha a hi nyikako kasi zvi hi vhuna a ku gondzisa lisine?

¹⁰ Hi ku tirisa a hlengeletano yakwe Jehovha i hi nyika zvontlhe hi zvi lavako kasi hi gondzisa lisine. Hi cikombiso, vhiki ni vhiki ha kuma a gondzisilelo ka mutlhangano wa cikari ka vhiki. A mutlhangano lowo, wu hi vhuna a ku tiva lezvi hi nga wulako ka khati go sangula hi chumayelako munhu ni ka makhati ma landzelako. Niku wu tlhela wu hi gondzisa lezvi hi nga fambisisako zvona a zvigondzo zva Bhibhiliya. A hlengeletano ya Jehovha yi tlhele yi hi nyika a zvitiro zvi nga lomu ka Feramenta ya ku gondzisa hi yona. A zvitiro lezvo zvi hi vhuna a ku . . .

• sangula mabhulo,

• chumayela hi ndlela yi kokako kupima,

• kuca vanhu lezvaku va gondza zvotala,

• gondzisa lisine ka zvigondzani zva Bhibhiliya, ni ku

•   ramba lava va tsakelako lezvaku va nghena ka site ya hina va tlhela vata Salawini ya hina ya Mufumo.

Kanilezvi, a kuva ni feramenta leyo basi a zvi eneli. Hi fanele ku yi tirisa. * Hi cikombiso, loku ku hi lezvaku andzhako ka ku bhula ni munhu a kombisileko ku tsakela u mu siyele revhista kutani ciphephana, i ta sala a gondza kala siku legi u to mu tlhelela hi gona. Legi wutihlamuleli ga mun’we ni mun’wani wa hina a ku simama hi khomekile hweti ni hweti ntirweni wa kuchumayela a mahungu ya Mufumo.

11. Hikuyini ku mahilweko a Cigondzo ca Bhibhiliya ca lomu ka Internet?

¹¹ A cin’wani cikombiso ca lezvi Jehovha a vhunisako zvona vanhu lezvaku va gondza lisine, i Curso da Bíblia On-line (Cigondzo ca Bhibhiliya ca lomu ka Internet) yi nga ka jw.org^®. Ci mahelwe yini a cigondzo leco? Hweti ni hweti, a vanhu votala nguvhu misaveni yontlhe va hlota a cigondzo ca Bhibhiliya lomu ka Internet. A cigondzo ca Bhibhiliya leci ci nga ka site ya hina ca vhuna vanhu lavo lezvaku va sangula ku gondza a lisine la Mhaka ya Nungungulu. A cin’wani hi ku a vanhu vo kari lava u bhulako navo va nga tshuka va kanakana ku vhumela ku u gondza navo a Bhibhiliya. Loku zvi hi lezvo, va kombe a cipandze leci lomu ka site ya hina kutani ku va rumelela a link ya cigondzo leco. *

12. Zvini a munhu a nga gondzako ka Cigondzo ca Bhibhiliya ca lomu ka Internet?

¹² A Cigondzo ca Bhibhiliya ca lomu ka Internet ci tlhamusela a tihloko mhaka leti: “A Bhibhiliya ni mutumbuluxi wa gona.” “Vanhu lava ku wulawuliwako nguvhu hi vona lomu ka Bhibhiliya”, ni “Mahungu ma nyikako kutsumba ma nga lomu ka Bhibhiliya”. Ka tihloko mhaka leti, va gondza lezvi:

• A Bhibhiliya gi nga hi vhunisa kuyini?

• Himani Jehovha, na Jesu, ni ku ti tshamisile kuyini a tingilozi

• Hikuyini Nungungulu a vangileko vanhu

• Hikuyini ku nga ni kuxaniseka ni wubihi

A cigondzo leco ci komba lezvi Jehovha a to . . .

• ku fuvisisa zvona a kuxaniseka ni kufa,

• vhuxisa zvona a vafileko, ni lezvi a to

• vhaletisa zvona a mifumo ya vanhu hi Mufumo wakwe.

13. Xana a cigondzo ca lomu ka Internet ci vhaleta a malulamiselo ya cigondzo ca Bhibhiliya ke? Tlhamusela.

¹³ A cigondzo ca lomu ka Internet a ci vhaleti a malulamiselo ya cigondzo ca Bhibhiliya. Jesu i hi nyikile a thomo ga ku hi maha vapizani. Hi na ni kutsumba ka ku lava va tsakelako va ta gondza a zvigondzo lezvo zvi nga lomu ka Internet, va tsakela lezvi va zvi gondzako va tlhela va lava ku tiva zvin’wani. Loku zvi tshamisile lezvo, kuzvilava va ta vhumela a cigondzo ca Bhibhiliya. Loku a cigondzo cin’we ni cin’wani ci gumesa, a mugondzi i rambiwa lezvaku a kombela wokari lezvaku a gondza naye Bhibhiliya. Siku ni siku, a vanhu va kwalomo ka 230 misaveni yontlhe va tirisa a site ya hina kasi va kombela ku gondza Bhibhiliya! A kuva ni munhu wa ku gondza naye zva lisima.

14. Mayelano ni cileletelo ca Jesu ci tsalilweko ka Matewu 28:19, 20, zvini hi faneleko ku maha niku hikuyini?

¹⁴ Lera Matewu 28:19, 20. A cikhati leci hi fambisako a zvigondzo zva Bhibhiliya, hi fanele ku maha zvontlhe hi zvi kotako kasi hi “maha vapizani . . . [hi] va gondzisa a ku ingisa zvontlhe lezvi [Jesu a zvi] layileko”. Hi fanele ku vhuna vanhu lezvaku va zwisisa a ku hikuyini zvi nga zva lisima a ku va tirela Jehovha ni ku seketela a Mufumo wakwe. Lezvi zvi wulako lezvaku  hi fanele ku va kuca ku hanya hi lezvi va zvi gondzako, va nyikela wutomi gabye ka Jehovha va tlhela va bhabhatiswa. Ntsena loku va maha lezvo, hi kona va to pona ka siku ga Jehovha. — 1 Ped. 3:21.

15. Zvini zvi kalako zvi nga faneli ku hi mbhetela cikhati niku hikuyini?

¹⁵ Kota lezvi zvi wulilweko kusanguleni, a cikhati ci seleko kasi a tiko legi gi lovisiwa ci tsongwani nguvhu. Hi cigelo leco, a hi faneli ku mbheta cikhati hi ku gondza Bhibhiliya ni vanhu lava va kalako va nga hi na kungo ga kuva vapizani va Kristu. (1 Kor. 9:26) A ntiro wa hina wa cihatla! Ku na ni vanhu vo tala va ha faneleko kuzwa a mahungu ya Mufumo a cikhati na ca ha vhumela.

16. Hi kuya hi Kuvhululelwa 18:2, 4, 5, 8, zvini lezvi hontlheni hi faneleko ku maha? (Wona kambe a tlhamuselo wa lahasi.)

¹⁶ Lera Kuvhululelwa 18:2, 4, 5, 8. A mavhesi lawa ma komba cin’wani nchumu leci Jehovha a lavako lezvaku a malandza yakwe ma ci maha. A maKristu wontlhe ya lisine ma fanele ku ti hambanisa ni Bhabhuloni wa hombe. Kuzvilava a cigondzani co kari ca Bhibhiliya na ci nga se gondza a lisine ci wa lumba a wukhongeli ga mawunwa. Kuzvilava ci wa maha a mitiro yo kari ka wukhongeli lego. Kutani ku hlenga a mali ya ku seketela a wukhongeli lego. Na ci nga se vhumelelwa a kuva muhuweleli a nga bhabhatisiwangiko, a cigondzani ca Bhibhiliya ci fanele ku tsika zvontlhe zvi yelanako ni wukhongeli ga mawunwa. Ci fanele ku tsala papilo ga ku tivisa a chichi yakwe ya kale lezvaku a nga ha hi wa chichi leyo. Niku loku ku hi ku i wa lumba a hlengeletano yo kari yi yelanako ni wukhongeli ga mawunwa i fanele ku yi tivisa lezvaku i humele ka yona. *

17. Mitiro muni ya ku ti hanyisa leyi a muKristu a faneleko ku ti wonela ka yona niku hikuyini?

¹⁷ A muKristu wa lisine i fanele ku tiyiseka lezvaku ka ntiro wakwe wa ku ti hanyisa a ku na nchumu a mahako wu yelanako ni wukhongeli ga mawunwa. (2 Kor. 6:14-17) Hi cikombiso, i wa nga ta tshuka a vhumela ku tholiwa ku tira ka chichi yo kari. A cin’wani kambe, a muKristu loyi a tirako ka koponi yo kari i wa nga ta lava ku maha mitiro yo tala ka matshamu lawa ma vhuvhumisako a wukhongeli ga mawunwa. Loku ku hi lezvaku i ti mahela mitiro yakwe, handle ko kanakana i wa nga ta tshuka a lava kutani ku vhumela ntiro ka Bhabhuloni wa hombe. Hikuyini hi nga ni kutiyimisela loko ko tiya? Hakuva a hi lavi ku hlengela ka mitiro ni zviwonho zva tihlengeletano ta wukhongeli leti ti Nungungulu a wulako lezvaku a ti hlazvekangi. — Isa. 52:11. *

18. A makabye wo kari i khomisile kuyini zvi tiya ka matshinya ya milayo ya Bhibhiliya ntirweni wakwe wa ku ti hanyisa?

 ¹⁸ Ka malembe ma hundzileko, a dhota go kari ga muvatli gi no kombeliwa hi muwoneleli wa koponi yo kari lezvaku gi ya maha a citirwana ka chichi yi nga ka dhoropa legi a makabye loye a nga tshama ka gona. A muwoneleli loye wa koponi i wa zvi tiva lezvaku a makabye loye contlhe cikhati i wa wula ku i wa nga ta tshuka a maha ntiro wakwe lomu tichichini. Kanilezvi ka khati lego, a muwoneleli loye i wa nga mu kumi a mun’wani munhu wa ku mu thola kasi a maha ntiro lowo. Hambulezvo, a makabye loye i no khoma zvi tiya ka matshinya ya milayo ya Bhibhiliya a tlhela a ala ku maha a ntiro lowo. Ka vhiki gi nga landzela, ku no huma jornali na gi hi ni mufota wa mun’wani muvatli na a belela cihambano laha chichini. Loku a makabye wa hina i wa nga khomangi zvi tiya ka matshinya ya milayo ya Bhibhiliya, na ku hi mufota wakwe wu nga huma ka jornali lego. Hi nga alakanya hi lezvi zvi nga wa ta wonhisa zvona a wumunhu gakwe cikari ka maKristu-kuloni! Ni lezvi Jehovha a nga wa ta ngha a ti zwisile zvona.

19-20. a) Zvini hi zvi gondzileko? b) Zvini zvin’wani hi to zvi gondza?

¹⁹ Hi kuya hi ciphrofeto ca Bhibhiliya, a cimaho ca hombe ci to humelela lokuloku laha misaveni ku huwelelwa ka magezu ya ku “ku rulile, a matiko ma etlele”. Hi kota ya lezvi hi gondzisiwako hi Jehovha, ha zvi tiva lezvaku a tihosi ta misava ti nga ta tshuka ti zvi kota ku neha kurula ka lisine ni ka pindzukelwa. Zvini hi faneleko ku maha mahlweni ka a cimaho leco ci to landzelwa hi kulovisa ka citshuketi? Jehovha i lava lezvaku hi tshama na hi khomekile hi ku chumayela a mahungu ya Mufumo hi tlhela hi zama ku maha vapizani vo tala. Ka cikhati caleci ca cin’we, hi fanele ku ti hambanisa ni wukhongeli gontlhe ga mawunwa. Lezvo zvi patsa ku nga ha lumbi a wukhongeli ga mawunwa ni ku nga mahi ni wihi ntiro wu yelanako ni Bhabhuloni wa hombe.

²⁰ Ku na ni zvin’wani zvimaho zvi to humelela laha a ‘masiku yo gumesa’ ma gumesako. Ni zvin’wani kambe lezvi Jehovha a rindzelako lezvaku hi zvi maha. Zvini zvilo lezvo? Niku zvini hi nga mahako kasi hi ti longisela ka zvontlhe lezvi zvi to humelela lokuloku? Hi ta zvi tiva ka ndzima yi landzelako.